Arquivos da etiqueta: agacal

Curso de comercialización de mazá ecolóxica na Estrada

A Consellería do Medio Rural, a través da Agacal, en colaboración co Craega, organiza un novo curso de produción ecolóxica. Desta volta a formación está dedicada á comercialización de mazá ecolóxica, que terá lugar o 28 de setembro no Museo do Moble da Estrada (MOME) da Estrada (Pontevedra)

Coma no resto dos cursos, a xornada estenderase todo o día: pola mañá, a partir das 9:00 horas, trataranse temas como a situación do mercado da mazá ecolóxica, o novo regulamento e a comunicación ambiental de produtos ecolóxicos; a sesión matutina finalizará cun coloquio para todos os asistentes.  Pola tarde, a partir das 16:00 horas, levarase a cabo unha visita práctica.

As solicitudes poden enviarse a clientes@sinerxia.es.

A Aula Cemit de Chantada acollerá un curso sobre comercialización da castaña eco

A Consellería do Medio Rural, a través da Agacal, en colaboración co Craega, organiza un novo curso de produción ecolóxica. Nesta ocasión a formación estará dedicada á “comercialización da castaña ecolóxica”, e desenvolverase o 6 de setembro na Aula Cemit de Chantada (Lugo). 

Como os outros dous cursos previstos (viticultura ecolóxica e pataca ecolóxica), a xornada comezará a partir das 9:00 horas; tras a presentación do curso, terá lugar unha charla sobre a situación do mercado da castaña ecolóxica, o novo regulamento e a comunicación ambiental de produtos ecolóxicos; a sesión matutina rematará cun coloquio para todos os asistentes.  Pola tarde, a partir das 16:00 horas, levarase a cabo unha visita práctica na empresa Miguel Areán e Hijos, situada no Polígono Industrial de Chantada. 

As solicitudes poden enviarse a clientes@sinerxia.es

A revista do verán chega cargada de cor, espazos únicos e boas novas

 

Chega o número 57 da nosa revista, que podedes visualizar xa en formato dixital. A edición de verán inclúe, coma cada ano, un especial no que debullamos as cifras que se recollen na Memoria anual referente aos datos de 2020, que reflicten un aumento no número de hectáreas, no número de operadores e, o máis salientable, na facturación. A presentación tivo lugar no pazo de Quián (Sergude, Boqueixón) e agora podedes vela en vídeo a través da nosa canle de Youtube ou dende a revista tan só con activar o voso código QR.

Para a nosa sección de entrevistas, desta volta paramos no pazo de Sabadelle (Chantada), que rexenta Xosé Figueiroa, un espazo moi especial e cheo de historia no que se poden saborear alimentos ecolóxicos  e de km 0, ademais de coñecer de preto un emblemático recuncho da nosa cultura.

Neste número incluímos dúas reportaxes. Na primeira coñecemos o nacemento das  Galletas Mariñeiras, o selo de identidade da empresa chantadina Daveiga. Na segunda dámoslles voz aos creadores dos únicos xeados ecolóxicos galegos, The Bio Factory, que se asentan na Coruña.

Volve Rocío Garrido, responsable do blog  La Cocina de mi Abuelo, á nosa sección de cociña eco, desta vez cun menú fresco, sinxelo e cheo de cor.

Na nosa axenda recompilamos as diferentes feiras programadas para os vindeiros meses e lembramos algunhas das noticias vinculadas ao noso labor dos últimos meses, como a nova campaña “Máis preto, máis eco”, en apoio ao pequeno comercio, ou o convenio que acabamos de asinar coa Universidade de Santiago de Compostela (USC) co fin de seguir apoiando o sector.

A revista ao completo en formato dixital, aquí.

O CFEA Sergude organiza unha sesión demostrativa para a produción forraxeira ecolóxica

CFEA de Sergude, da Axencia Galega da Calidade Alimentaria (Agacal), organiza mañá, venres 9, unha xornada demostrativa. A sesión está coordinada coa SAT La Sobreira e céntrase na identificación de oportunidades no control de herbas adventicias na produción forraxeira ecolóxica. Celebrarase en Pazo (Boimorto, A Coruña) de 11:00 a 14:00 horas e de 16:00 a 20:00 horas. Para máis información pódese solicitar no correo cursos.agacal.sergude@xunta.gal.

A campaña ‘Come Local 2021’ conta con páxina web propia e un mapa interactivo

A Xunta, a través da Axencia Galega da Calidade Alimentaria (Agacal), impulsa por segundo ano consecutivo a campaña “Come Local” nos comedores escolares galegos no marco da canle #Mercaproximidade. Slow Food Compostela é a encargada de promover os produtos dentro das DOP, IXP e da agricultura ecolóxica de proximidade, nos que se inclúen alimentos proporcionados polo Craega, para seguir na súa liña de transparencia e fomentar o produto galego de pequenos produtores. Este cometido estase a levar a cabo en 20 centros escolares repartidos polas catro provincias galegas, entre eles, os Comedores Escolares distinguidos como km 0.

Agora acaba de ver a luz a súa propia páxina web, na que recollen toda a información do desenvolvemento desta campaña, ademais dun mapa interactivo no que se poden ver os centros que participan por provincias, que menú puideron degustar e quen foi o encargado de facelo. Segundo vaian participando os centros, o mapa irase actualizando.

Ata o vindeiro 31 de outubro, Agacal impartiralles formación e asesoramento aos responsables de comedor. Non só se trata de degustacións de menús especiais elaborados con produtos de proximidade galegos senón que tamén se desenvolverán actividades formativas, tanto sobre as características nutricionais dos propios produtos como o impacto que supón o consumo de produtos certificados na consecución dos Obxectivos de Desenvolvemento Sostible da ONU (ODS).

Nesta campaña elixíronse centros con proximidade a posibles provedores de produtos con denominación de orixe, indicación xeográfica protexida ou ecolóxicos para poder acceder a recoñecementos como o de “Comedores km 0”. Outro criterio para a elección dos centros foi a de considerar os distintos sistemas de xestión tanto educativa como do comedor e, así, na campaña participan centros escolares públicos, concertados, comedores xestionados por ANPAS ou os servizos de catering.

Visita o mapa interactivo

O Craega implícase por segundo ano consecutivo na campaña Come Local

A Consellería do Medio Rural, a través da Axencia Galega da Calidade Alimentaria (Agacal), lanza a segunda edición da campaña Come Local nos comedores escolares no marco da canle Mercaproximidade. A iniciativa será posta en marcha por Slow Food Compostela co obxectivo de impulsar o consumo dos produtos agroalimentarios galegos con indicativo de calidade: as DOP (Denominación de Orixe Protexida), IXP (Indicación Xeográfica Protexida) e a agricultura ecolóxica de proximidade. Esta última será levada ás mesas dos comedores escolares participantes grazas á colaboración do Craega, que achegará diversos alimentos certificados, como carne de polo e hortalizas, entre outros.

Esta campaña, que tivo unha grande acollida na súa primeira edición,  desenvolverase ata o 31 de outubro. Nesta ocasión contará con formación e asesoramento aos responsables dos comedores adherido, polo que non só serán degustacións de menús, senón tamén actividades formativas, tanto das características nutricionais dos alimentos como do impacto que supón o consumo de alimentos certificados na consecución dos Obxectos de Desenvolvemento Sostible da ONU.

ACTIVIDADES DA CAMPAÑA

  • Achegar aos comedores seleccionados, de forma totalmente gratuíta, produtos galegos con certificado de calidade. Darase a oportunidade de que nenos e nenas usuarios do comedor poidan degustar varios produtos dunha excelente calidade con orixe Galicia e cunha trazabilidade garantida.
  • Realizar un escandallo semanal para dotar os comedores dunha ferramenta que facilite o cálculo do gasto que lles permita planificar mellor a súa conta de gastos.
  • Enviar un vídeo aos estudantes sobre educación alimentaria, que ten como fío condutor o papel da biodiversidade agrícola e o que xogan os produtos certificados á hora de conservala, así coma a importancia de comer de xeito local.
  • Formación a través de Zoom aos cociñeiros/as dos comedores e caterings.

PARTICIPANTES

Ademais dos catro Comedores Escolares KM 0 que xa participaron na primeira campaña: CEIP Xacinto Amigo Lera (Portomouro), CEIP Os Muíños (Muxía), CEIP Vicente Otero Valcárcel (Carral) e CEIP López Ferreiro (Compostela) súmanse Divino Maestro e Colexio La Milagrosa de Santiago de Compostela; Colexio Alca de Ames, CEIP Santa Baia de Boiro; CPI Dr. López Suárez de Friol; CEIP San Cosme de Barreiros; CEIP Juan Rey de Lourenzá; CEIP Manuel Mato Vizoso de Vilalba; CEIP Rosalía de Castro de Bóveda; IES Lagoa de Antela de Xinzo de Limia; CEIP Joaquina Gallego Jorreto de A Merca; CEIP Carlos Cid Arregui de Rairiz de Vega; Colexio Salesianos-A Mercé de Cambados; CEIP Xoaquín Loriga de Prado (Lalín); CEIP A Lomba de Vilagarcía de Arousa e CEIP A Paz de Coruxo (Vigo).

González: “En Galicia sabemos facer produtos eco saudables e de calidade. Se van co selo do Craega, temos esa garantía”

De esq. a dta, José Luis Cabarcos (director xeral do Agacal); José González, conselleiro do Medio Rural; Francisco L. Valladares e  Javier García, presidente e secretario do Craega respectivamente

  • O presidente do Craega resaltou un dos datos da enquisa: “Por primeira vez a porcentaxe de consumidores supera a de non consumidores”
  • Cabarcos manifestou que a produción ecolóxica é unha “oportunidade para medrar en cultivos e fomentar a biodiversidade”

O presidente do Craega, Francisco López Valladares, presentou hoxe no Hotel Cardenal de Monforte de Lemos o Barómetro 2020 sobre percepción e consumo de alimentos ecolóxicos en Galicia. Estivo acompañado polo secretario, Javier García; o presidente da Axencia Galega de Calidade Alimentaria (Agacal), José Luis Cabarcos, e o conselleiro do Medio Rural, José González.

Os resultados do Barómetro foron obtidos a raíz dunha enquisa telefónica, realizada á poboación galega maior de 18 anos  e con responsabilidade a través do sistema CATI. A mostra dos 900 enquisados foi feita no último trimestre do pasado ano.

O presidente do Craega foi o encargado de abrir a sesión e detallou algúns dos datos máis relevantes da enquisa, como é o lugar de compra, que segue sendo o supermercado. “O dato máis salientable da enquisa foi que por primeira vez a porcentaxe de consumidores supera a de non consumidores”, indicou López Valladares. Outro dos temas que tocou foi que case a terceira parte os enquisados recoñecen algún tipo de certificación vencellado á alimentación eco, “non obstante, só unha pequena parte é quen de identificar concretamente o selo do Craega; nese aspecto temos que traballar máis”, resaltou durante a presentación. Neste eido, sinalou que “cada vez se esixen máis selos para os produtos, e isto supón que o consumidor non saiba que está comprando; creo que hai que acortar en certificacións”.

O seguinte en intervir foi o conselleiro do Medio Rural. Empezou resaltando os resultados do Barómetro xa que “nos inflúe a nós na toma de decisións”. Ademais, engadiu que “hai moitos selos, pero o do Craega é o máis importante, é o selo do ecolóxico o que liga a orixe natural dos produtos, polo que é relevante ter en conta esta orixe, a base territorial”. Explicou a súa importancia, xa que “en Galicia sabemos como facer produtos ecolóxicos saudables e de calidade. Se van co selo do Craega temos esa garantía”.

“Falamos de produtos que respectan o medio ambiente e que respectan o noso territorio e para nós iso é importante”, explicou. “Temos que dicir todos con orgullo, moito grazas ao traballo do Consello Regulador, que o consumo de produtos eco non é unha moda senón unha tendencia”, engadiu. Ademais, resaltou que Galicia é líder en denominacións de orixe, “pero temos que seguir traballando”, e nesta liña incidiu en que actualizarán a Lei de Calidade Alimentaria e traballarán na Lei da Recuperación da Terra Agraria de Galicia. “É importante ter máis hectáreas e se é de eco, mellor, e con esta lei podemos conseguilo”. Outra das áreas que salientou foi que “contamos con tres aldeas en funcionamento e pronto teremos oito, ás que se poden presentar proxectos ligados a produción ecolóxica”. Para rematar a súa intervención felicitou ao Craega polo traballo a “prol do ecolóxico”.

José Luis Cabarcos puxo de manifesto a importancia dos traballos que realizan desde a Xunta de Galicia. “O Craega, neste sentido, é estratéxico porque pon en valor varios aspectos aliñados cos nosos obxectivos”. Engadiu que todo o que se fala a nivel internacional, Pacto Verde ou Cambio Climático, “todos eles encaixan cos valores do Craega”. Indicou que é estratéxico para os produtores “que están defendendo este modo de traballar máis enfocado ao extensivo” e concluíu lembrando “que hai que medrar nos cultivos extensivos e fomentar a biodiversidade”.

O secretario do Craega foi o encargado de pechar o evento mostrando polo miúdo os datos que se obtiveron na enquisa realizada e que deron lugar ao Craega_barometro2020.

 

Granxa Maruxa + Milhulloa = Muuhlloa, cosmética galega, ecolóxica e colaborativa

De izquierda a derecha: María Álvarez, Carmela Valiño, Marta Álvarez, Chusa Expósito e Anxos Orgueira.

Na comarca da Ulloa aséntanse dúas marcas de produtos ecolóxicos do Craega con máis de vinte anos de historia. Por un lado, Granxa Maruxa que está rexentada por Marta Álvarez e, desde hai uns sete anos, axúdalle súa irmá María. Ambas traballan para obter o mellor leite ecolóxico que sae da súa granxa situada en Monterroso. Por outro lado, en Palas de Rei está Milhulloa, unha empresa que se centra no cultivo ecolóxico de plantas medicinais e hortalizas. Esta cooperativa está rexentada pola farmacéutica Chusa Expósito e a bióloga Carmela Valiño, xunto con Anxos Orgueira. O baixo pago dos produtos das cinco levounas a ter que innovar, pero sempre mantendo a súa filosofía de traballo e produción. Así é como naceu Muuhlloa, unha firma de produtos cosméticos galegos e ecolóxicos.

Este ano recibiron o premio Son Muller da Asociación de Mulleres Empresarias de Lugo, no apartado Empresaria Rural, pola calidade dos seus produtos e pola súa firmeza ao apostar polo ecolóxico, o rural e desde o feminino. Un premio que para estas cinco mulleres significa moito, máis ao ser económico “algo que precisamos moito para seguir traballando, investigando e innovando”.

O produto que saíu á luz para dar a coñecer a marca foi un leite corporal feito con leite e milfollas. Como a propia María relata, “fixemos o evidente: un leite corporal con leite, algo que até o de agora non hai”. Os comezos foron bos, xa que ambas as firmas que as preceden son uns referentes en Galicia, en canto a produtos ecolóxicos. Pero tamén fixeron un labor de dalo a coñecer en diferentes feiras. Actualmente, contan con tres produtos á venda, aínda que en breve lanzarán outros como un xampú e un labial. Os produtos que sacan contan co selo de bio.inspecta e ECOPlus de Bio Vida Sana.

Describen Muuhlloa como unha entidade colaborativa, xa que, para cada produto que sacan, contan con outra entidade da zona que traballa coa mesma filosofía que estas cinco emprendedoras. “As dúas primeiras empresas fomos nós, pero por exemplo, para a crema da cara contamos con mazá de Ribela, leituga de mar de Mar de Ardora e cera de abella de Polemel”, explica María. Para os produtos que sairán entrarán novas empresas, tamén ecolóxicas e que buscan o mesmo obxectivo. Esta forma de traballo permítelles a outras empresas medrar e tamén así, conseguen que Muuhlloa chegue máis lonxe e medre.

“Todos os que somos pequenos, estamos máis unidos e facémonos publicidade”

Como xurdiu a idea?

Marta: Pois do mal que nos pagan o leite. Un día de inverno achegueime ata Milhulloa queixándome diso e elas tamén se lamentaban polos prezos dos seus produtos. Ao final, nós vemos que temos boas materias primas. Temos a mesma filosofía de traballo e somos contrarias ás grandes superficies. O primeiro que pensamos foi facer un leite corporal co leite da granxa e as súas plantas. A partir de aí, dixemos que podía ir para diante e seguimos.

Chusa: Nós desde o principio traballabamos con algún balneario para facerlle uns aceites. Entón isto foi como o xermolo da cosmética, que era a nosa ilusión. Ademais, ao xuntarnos cunha persoa coma Marta, que é unha bomba, tiñamos que tirar para adiante. Non pensamos en ningún momento en non levalo a cabo. Esa idea sempre a tivemos e cando ela nos falou do leite pareceunos marabilloso.

Como foi o proceso de elaboración?

María: Chusa e Carmela son farmacéutica e bióloga. Elas pensaron cales serían as plantas que se axustaban a cada produto. A milfollas, ou herba dos carpinteiros, é moi cicatrizante, calmante e encima e haina por todas partes. Chusa dixo que mesturándoo daba un bo resultado e probamos. Nós tiñamos claro que tiña que levar unha boa parte de leite, e leva un 40 %. Logo elas recolleron a milfollas, maceraron os pétalos e fan o hidrolato. O día que se ten que levar todo a Iuvenor Lab (O Carballiño) prepárase. O laboratorio é o que lle dá un rexistro sanitario, fai as análises e certifica que é unha crema estable no tempo e que non contamina. Ademais, para nós é un aforro, porque senón teríamos que facer obra e sería máis custoso. Nós levámoslle as materias primas bastante elaboradas e logo eles fan a emulsión e empaquetado.

Por que a milfollas para o leite corporal?

Carmela: É a que predomina nesta finca e no estudo que fixemos vímoslle moitas propiedades. No tema de pel é cicatrizante. De feito, chámanlle a herba dos carpinteiros porque ten a capacidade rexeneradora. É calmante. Cada día vémoslle novas propiedades. Os compoñentes que teñen e os principios activos teñen esas capacidades.

O leite está claro en cada produto, pero como facedes a escolla das herbas para cada produto?

Carmela: Das que temos aquí vemos as propiedades que teñen e que queremos meter a cada crema. A facial ten por obxectivo darlle elasticidade á pel para prever o envellecemento, pois poñemos plantas que teñen a capacidade antioxidante. Todo iso xunto cos estratos que buscamos doutros produtores que integramos.

Chusa: Desde o século XIX, que houbo a revolución da química moderna, está todo estudado, e a partir de aí imos mirando. O importante é que sexa unha mestura boa para que melloren as propiedades. Ademais, encántanos o sistema de facer unha cosmética colaborativa. Cada vez que sacamos algo novo, miramos a que colegas produtores podemos sacarlle algo novo para o produto. Ao final, todos os que somos pequenos estamos máis unidos e facémonos publicidade entre nós.

Marta: Son os tres que temos agora mesmo, pero depende das épocas. Estamos moi contentas nese aspecto porque o mundo da cosmética non é un mundo fácil, nin moito menos, pero a xente que proba apunta que ten unha boa calidade.

Cal diriades que é o produto estrela?

Marta: Son os tres que temos agora mesmo, pero depende das épocas. Estamos moi contentas nese aspecto porque o mundo da cosmética non é un mundo fácil, nin moito menos, pero a xente que proba apunta que ten unha boa calidade.

Agora están pendentes novos produtos…

Chusa: Si. Un labial do que xa temos todo feito, pero fannos falta cartos. Para todo isto, para o proceso de estudo e todo… Nós non temos maquinaria. Para que cumpra a función do produto, necesita un plan de estudo e maquinaria para iso. Agora mesmo temos liquidada a fórmula do xel e labial.

Carmela: Temos pendente outra colaboración con outra científica de aquí, e estamos aí para seguir co tema de novas especies para a cosmética.

Cales diriades que son as razóns para mercar estes produtos?

María: O primeiro, por suposto, é que son produtos ecolóxicos. Son bos. E despois tamén a xente se decata de que somos cinco mulleres cunha empresa moi pequena e que estamos tratando de facer algo ben feito e desde a solidariedade. Entón isto tamén os incita a mercar para colaborar. Sempre falamos da xente que colaboramos, e poñémolo nas etiquetas.

Marta: É unha innovación grandísima. Empezou nunha granxa que fai cosmética.

En canto aos consumidores, de onde é a clientela?

Marta: Empezamos en Madrid e estamos moi estendidas alí a verdade. Grazas a un programa no que saímos. En Cataluña e no País Vasco tamén temos boas vendas. O que nos falta fóra de Galicia son tendas físicas; temos en sitios puntuais.

GRANXA MARUXA


Neste momento contan cunhas 62 vacas, das que moxen unhas 28. En canto a produtos agrarios só teñen horta para autoconsumo, pero foi unha das ideas que tamén se lle pasou pola cabeza a esta emprendedora. “Vino moi complicado e preferín centrarme no leite”. Granxa Maruxa conta con máis de vinte anos como tal, pero a súa historia remóntase a cincuenta anos atrás cando o pai de María e Marta iniciou o proxecto. Cando Marta estaba a piques de rematar os seus estudos de Empresariais, chegou a casa e “escaparan as vacas, tróuxenas e pareceume sinxelo”. A partir de aí comezou a súa andaina. Tivo que aprender todo de cero, xa que non contou con moita axuda, “non confiaban”. Tras aprender todo o relacionado con isto, visitou a granxa Casa Codesal con seu pai “e el mesmo se decatou que era posible o ecolóxico”. Contando co selo do Craega, empezou coa súa produción de leite. Actualmente está a punto de saír a Cooperativa As Vacas da Ulloa, un proxecto que nace xunto con Ganados A Cernada e co que farán todos os produtos derivados do leite. Desde hai sete anos conta coa axuda de súa irmá María que pechou o estudo fotográfico para irse vivir para o rural: “Estou encantada, non me cambiaría por nada”.

Na carballeira que hai ao redor da súa vivenda e da granxa tamén acollen o Festival Agrocuir. Unha idea que naceu para darlle máis vida ao rural. Ademais deste, que xa ten historia, tamén se celebrou o Monterrosón ou o de Arte no Rural, que xa se mostra no exterior da granxa e vivenda.

MILHULLOA


No inverno a cámara de secado estaba baleira, polo que decidiron buscar unha alternativa. Empezaron co excedente de produción da espinaca, pero volveron á súa filosofía de produtos autóctonos e probaron co grelo. Tras as probas, viron que quedaba ben e foi unha salvación para darlle uso ao secadoiro nese período.

O proxecto de Milhulloa tamén conta con máis de vinte anos de vida. Ao finalizar as carreiras de Chusa e Carmela decidiron meterse nun máster de creación de empresas. A idea que iniciaron xa comprendía as plantas medicinais.

O seu proxecto foi escollido e, tras finalizar o ano de estudos, decidiron que tiñan que seguir adiante. A idea que lles propuñan era que empresas de fóra lles mercasen os produtos, “pero non pagaban nin a colleita”. Desde o inicio, decidiron contar con selo do Craega para o seu proxecto pioneiro. “Empezar con plantas medicinais non foi vantaxoso, porque daquelas non se consumían tantas infusións”, explican. Pero pouco a pouco foron calando e a entidade foi medrando.

Actualmente contan cunhas 65 variedades, incluíndo as mesturas. E a forma de traballar é tratar con xente que está en ecolóxico e ten plantacións de grelos. Ademais, sécanlle diferentes produtos a variadas empresas. Realízanlle un pequeno estudo para saber como vai quedar e logo xa traballan coas diferentes marcas. Milhulloa conta cunhas 10 hectáreas de cultivo das plantas, aínda que ata a primavera non hai nada.

A pandemia neste sector semella non ter pasado. “Quizais porque a tendencia foi ir máis ao pequeno comercio e aí é onde estamos nós”, apuntan. Aproveitaron esta época tan atípica para facer un etiquetado diferente, “unha homenaxe para os avós e padriños, que ao final son os que sempre nos consenten e os que máis se están vendo afectados pola pandemia”.

 

Hortaliza, froita e mexillón eco para 14 comedores escolares de toda Galicia

Cremas de cabaza e de cabaciña ecolóxicas para abrir o menú e mazá ou kiwi bio para pechalo. O Craega levou produto con selo a 14 centros escolares de toda Galicia -1.919 comensais- no marco da campaña Come Local. Promovida por Slow Food Compostela (SFC) co amparo da Axencia Galega da Calidade Alimentaria (Agacal), a iniciativa arrancou o 16 de outubro coincidindo co Día Mundial da Alimentación e estase levando a cabo durante o primeiro trimestre do curso.

A acción fixo especial fincapé en Santiago e comarca. Con 1.400 usuarios, á Rede Municipal de Comedores Escolares do Concello de Ames destináronse 100 quilos de cabaciña certificada. Os equipos de cociña -centralizados en Milladoiro e Ortoño- encargáronse de preparar un nutritivo puré para os sete centros que integran o servizo. Na capital galega, foron os cativos das escolas infantís municipais os que tiveron ocasión de degustar produto ecolóxico. Para os 180 nenos de Conxo, Fontiñas e Meixonfrío, houbo unha apetitosa crema na que se empregaron 10 quilos de cabaza bio. E nas merendas, entre os tres centros repartíronse tres quilos de kiwi e outros tantos de mazá con selo.

Aos 80 comensais do CEIP Xacinto Amigo Lera de Portomouro (Val do Dubra) tocoulles probar mexillón bio en diferentes versións: ao vapor, con vinagreta de granada, en croquetas, e gratinados con bechamel e queixo da DOP Arzúa-Ulloa.

CHARLAS EN VÍDEO. No marco da campaña de SFC, o comedor do CEIP Os Muíños (Muxía) incluíu sete quilos de polo certificado acompañado de ensalada. De sobremesa, os 127 comensais tiveron unha das froitas de outono por antonomasia: a mazá. O mesmo produto puxo tamén o peche ao xantar ecolóxico da Eleven School – Montessori British Education Vigo. Así mesmo, os 114 usuarios da escola da cidade olívica tomaron crema de cabaza.

Xa por último, a Come Local tamén se sumou a Escola Infantil Municipal O Bítere, de Barreiros (Lugo). Ademais de hortalizas e froitas de tempada, o menú incorporou iogures ecolóxicos.

A maiores das degustacións, SFC tiña previsto complementar a acción cunha charla por vídeo para explicar aos nenos por que é importante consumir produto local e como identificar os diferentes selos de calidade.

Ampliado ata agosto o prazo para solicitar axudas en réximes de calidade

Os agricultores interesados en incorporarse a réximes de calidade terán ata o 18 de agosto (incluído) para solicitar axudas. A Axencia Galega da Calidade Alimentaria (Agacal) prorroga dous meses máis o prazo para realizar o trámite, suspendido a causa do estado de alarma decretado pola COVID-19.

Cofinanciadas co Fondo Europeo Agrícola de Desenvolvemento Rural (Feader), das subvencións poderán beneficiarse as persoas físicas ou xurídicas, titulares de explotacións agrarias que cumpran a condición de atoparse en activo.

No caso da produción ecolóxica, tamén se considerará nova participación aquela que se refira a agricultores que, tendo actividade previa no programa de calidade, inicien o seu labor no sector con destino ao mercado en relación a algunha nova orientación produtiva. En todo caso, esta nova orientación debe ter unha dimensión económica suficiente para superar a consideración de actividade de autoconsumo.

A contía da axuda será do 100% dos gastos subvencionables realizados, sen superar os 3.000 euros anuais por explotación, durante un período máximo de cinco anos. Non se tramitarán expedientes cunha contía inferior a 50 €.

ENLACE AXUDA: https://www.xunta.gal/dog/Publicados/2020/20200213/AnuncioG0528-161219-0001_gl.html

PRAZO: 18/08/2020