Arquivos da etiqueta: agacal

A Xornada do XXV aniversario do Craega conclúe que “o sector eco ten futuro, si ou si”

O Consello Regulador da Agricultura Ecolóxica de Galicia (Craega) congregou esta mañá no salón de actos do Pazo de Feiras e Congresos de Lugo numerosos asistentes con motivo da xornada divulgativa, que levou por título “Craega: 25 anos medrando co sector ecolóxico galego”.

O acto deu comezo ás 10:00 horas e foi inaugurado polo presidente da Axencia Galega de Calidade Alimentaria (Agacal), José Luis Cabarcos, quen, tras felicitar o Consello polos seus 25 anos de existencia, resaltou que Galicia está no camiño de seguir medrando para alcanzar as esixencias da normativa europea (cuxa axenda é acadar que o 25 % da superficie agraria última (SAU) sexa ecolóxica en 2030), pois nesta última década o incremento na nosa comunidade foi do 127 %. Así mesmo, incidiu en que hai que aproveitar este crecemento, porque a clave do éxito está en “facer cousas ordinarias de maneira extraordinaria”.

A continuación, foi a quenda de José Miguel González, xefe da Área de Produción Ecolóxica na Subdirección Xeral de Calidade e Sostibilidade Alimentaria (MAPA), quen disertou sobre a situación actual e de futuro da produción ecolóxica en España e en Galicia no marco europeo. Tras a introdución histórica da normativa eco en Europa e en España, repasou os datos estatísticos máis salientables tanto a nivel nacional como na nosa comunidade e, entre os fitos conseguidos, lembrou o feito de que España foi un dos primeiros países en certificar en ecolóxico, en 1988, e que na actualidade o gasto per cápita en consumo eco está xa por riba da media da Unión Europea. Neste sentido arroxou un dato moi significativo: en 2006 o gasto per cápita do consumidor en produto ecolóxico era de 2 euros; na actualidade é de 60. Finalmente, ofreceu un percorrido pola situación da normativa e polo futuro do sector.

O terceiro en subir ao estrado foi Manuel López Luaces, xefe de Área de Formación, Innovación e Investigación Agraria na Agacal, quen dedicou parte da súa intervención a presentar a área I+D+i ao servizo do sector agrario. Entre os proxectos que engloban o seu departamento, deu conta dos centros de investigación galegos vinculados ao sector agro, un por provincia: Centro de Investigacións Agrarias de Mabegondo, Estación Experimental de Gandería de Montaña de Marcos da Curra, Estación Experimental Agrogandeira da Pobra do Brollón e Estación Experimental Agrícola do Baixo Miño. Para seguir, enunciou os instrumentos da Agacal para a I+d+i e presentou o contrato de xestión para os anos 2021-2024, co fin de mellorar a produción agropecuaria galega na liña coa estratexia europea de investigación en materia agraria. Rematou a súa intervención facendo referencia ao ámbito dos centros formativos, que reivindicou como espazos “para xerar man de obra entre os mozos e mozas agricultores” co fin de garantir o futuro do sector.

A compra pública verde como oportunidade para a produción eco foi o tema das seguintes relatoras, que expuxeron dous interesantes proxectos: o de Josefina Irles, xefa de sección de Dietética e Xestión de Hostalería no Hospital Xeral de Valencia, e o de Slow Food Compostela, que o amosou Rocío García, secretaria da asociación.

Tras rememorar o camiño que a levou á introdución da alimentación eco no hospital onde exerce como nutricionista, Irles incidiu nos motivos principais que a levaron a facer esta aposta: ser garante dunha nutrición sa para un colectivo especialmente vulnerable como son os pacientes, e ser respectuosa co medio ambiente e co planeta.

Pola súa banda, García fixo balance de “Come Local”, a campaña que organiza o colectivo desde hai tres anos, promovida pola Agacal, e na que o Craega participa coa achega de alimentos ecolóxicos con moi boa acollida por parte dos usuarios dos centros.

Tras a pausa do café, subiron ao estrado Xosé Lois Lamazares (xerente de Daveiga) e Guillermo Martínez (xerente de Casa Grande de Xanceda) e ambos centraron o seu relato en ofrecerlle ao público asistente un completo percorrido por cada unha das empresas que teñen ao seu cargo, expoñendo as trabas que se atoparon na súas traxectorias e como lograron facer das súas marcas un negocio de éxito.

“Emprender en ecolóxico: experiencias, retos e ideas” foi o fío común sobre o que debateron José Manuel Vázquez (Burgo de Negral), José Luis Vaz (Verín Bioocoop) e Rocío Freire (Alibos Galicia), para facer partícipe ao público da súa experiencia como produtores en ecolóxico e poñer en común retos e ideas para o futuro. Entre as moitas propostas que emerxeron na mesa, unha destacada foi o camiño que se debe seguir e todos estiveron de acordo en que a clave está en “compartir e repartir” para poder mirar ao futuro, porque a agricultura ecolóxica “ten futuro, si ou si, porque non nos queda outra”. A mesa foi moderada polo director dos programas O agro e Labranza da CRTVG, Manuel Cruz.

O presidente do Craega, Francisco López Valladares, foi o encargado de pechar esta actividade formativa, repasando brevemente algúns datos destacados da certificación e agradecéndolles a presenza a todas as persoas asistentes.

ÁLBUM DE FOTOS DA XORNADA

O Craega organiza unha xornada divulgativa para abordar as oportunidades eco certificadas en Galicia

Co gallo do 25 aniversario do Craega como órgano de control e certificación da produción ecolóxica galega, faise indispensable a realización dunhas xornadas presenciais para analizar as experiencias pasadas, compartir os bos datos de produtos certificados en ecolóxico e estudar a xestión do crecemento que o sector vivirá nos próximos anos.

Por iso, baixo o lema “Craega: 25 anos crecendo co sector ecolóxico galego”, o vindeiro xoves 1 de decembro terá lugar no Pazo de Feiras e Congresos de Lugo unha xornada divulgativa na que se fará  balance e se analizarán as oportunidades da produción ecolóxica na nosa comunidade. 

UN PROGRAMA CARGADO DE PROPOSTAS

Ás 10:00 horas, abrirase o evento coa inauguración a cargo do director da Axencia Galega da Calidade Alimentaria (Agacal), José Luis Cabarcos.

A continuación, José Miguel González, xefe da área de Produción Ecolóxica no Ministerio de Agricultura, Pesca e Alimentación (MAPA), tratará a situación da produción ecolóxica en España e mostrará elementos de futuro. Seguiralle Manuel López Luaces, xefe de Área de Formación, Innovación e Investigación Agraria na Agacal, coa súa charla “A I+D+i ao servizo do sector agrario”.  

Logo terán lugar dúas charlas que se centrarán na oportunidade para a produción eco que ofrece a compra pública. Nesta área falarán Josefina Irles, xefa de sección de Dietética e Xestión de Hostalería no Hospital Xeral de Valencia, co relatorio “Alimentación ecolóxica no Hospital Xeral de Valencia”, e Rocío García, secretaria da asociación Slow Food Compostela, que tratará a campaña “Come Local” como un exemplo galego de xestión viable nos comedores escolares.

Tras unha pausa, mostraranse dous exemplos de éxito dentro do sector: DaVeiga, con Xosé Lois Lamazares, e Casa Grande de Xanceda, con Guillermo Martínez. Finalmente, celebrarase unha mesa redonda moderada por Manuel Cruz, director dos programas O Agro e Labranza da CRTVG, que xirará ao redor do emprendemento en ecolóxico, con experiencias, retos e ideas. Intervirán José Manuel Vázquez, socio de Burgo do Negral; Paula Bernárdez, directora de Mieles Anta; José Luis Vaz, xerente de Verín Biocoop, e Rocío Freire, directora de Produción de Alibos Galicia.

Para poñer o broche final, o presidente do Craega, Francisco L. Valladares, clausurará a cita.

Todas as persoas interesadas poden inscribirse cubrindo o formulario antes do 29 de novembro. 

Ler programa completo

Os produtos ecolóxicos conquistan padais en Xantar 2022

 

Ourense acolleu a 23.ª edición do Salón Internacional de Turismo Gastronómico Xantar do 9 ao 13 de novembro. O evento congregou 165 expositores 8 restaurantes que atraeron a 16.000 visitantes.

Os produtos ecolóxicos galegos certificados polo Craega tamén tiveron presenza neste evento. En concreto, o xoves, dentro do programa de Experiencias de Calidade que ofreceu a Axencia Galega da Calidade Alimentaria (Agacal), o chef Martín Mantilla, do restaurante Berso (Sober, Lugo), elaborou un menú con diferentes alimentos eco, mentres que Juan Ramón Díaz, do Departamento de Promoción do Consello, explicou a importancia da certificación e o valor engadido que lles dá  a estas elaboracións.

Pola tarde, como parte da programación da Consellería do Mar, tivo lugar a actividade “Galicia sabe a mar: Ecolóxicos a mares”. Nela, a cociñeira Begoña Vázquez, do restaurante Regueiro da Cova (Verín, Ourense), preparou un menú con produtos do mar, que estivo acompañado por viño ecolóxico. Durante a sesión, Díaz expuxo o crecemento que ten a acuicultura ecolóxica en Galicia e como traballan desde o Consello para potenciala.

MÁIS INVESTIMENTO PARA OS PRODUTOS GALEGOS DE CALIDADE

Como é habitual nas últimas edicións, o domingo é o día dedicado ao Medio Rural, polo que contou coa presenza do conselleiro do Medio Rural da Xunta de Galicia, José González, que acudiu a clausurar o evento e aproveitou para anunciar que en 2023 investirán máis de 5,4 millóns de euros na promoción dos produtos galegos de calidade, aqueles incluídos nas “Experiencias de Calidade” e que son os recoñecidos con algún selo de garantía como a denominación de orixe, a indicación xeográfica protexida ou o de produción ecolóxica.

Operadores certificados polo Craega presumirán dos seus produtos en Galicia Etiqueta de Calidade

Santiago de Compostela será a sede da segunda edición de Galicia Etiqueta Calidade, que organiza a Consellería do Medio Rural. O encontro será a partir do mércores 26 de outubro no Hotel Monumento de San Francisco e nel poñeranse en valor as producións galegas.

Durante a xornada do xoves haberá unha exposición de produtos ecolóxicos que contan coa certificación do Consello Regulador da Agricultura Ecolóxica de Galicia (Craega), que poden ser incorporados en comedores de colectividades. Durante a mesma sesión, darase a coñecer a campaña “Come Local”, que organizan conxuntamente a Axencia Galega da Calidade Alimentaria (Agacal) e Slow Food Compostela e na que colabora o Craega. Haberá unha mesa redonda para coñecer cales son os retos do futuro e como é posible adaptar estas estratexias para ofrecer comidas responsables de calidade.

Ademais, o presidente da entidade, Francisco López Valladares, estará presente no acto de clausura do venres, no que se presentarán as conclusións dos intercambios e debates que xurdan nas xornadas previas.

Programa completo de Galicia Etiqueta Calidade

Craega proporcionará alimentos ecolóxicos para a I Campaña de Comedores Responsables nas residencias de maiores

O director da Axencia Galega da Calidade Alimentaria (Agacal), José Luis Cabarcos, presentou na residencia pública autonómica de Campolongo a primeira  edición da campaña denominada “Comedores responsables” orientada a residencias de maiores de Galicia, co fin de impulsar o consumo dos produtos agroalimentarios galegos ecolóxicos e con indicativo de calidade nestes espazos. Esta é unha iniciativa que promove a Xunta de Galicia e que contará con formación e asesoramento aos responsables de cociña da man de Agacal.

O obxectivo das sesións formativas  é que o persoal de cociña coñeza a importancia de consumir produtos locais e como poder identificalos de xeito sinxelo grazas ás distintas etiquetas dos selos de calidade. Tamén se informará sobre as características nutricionais dos propios produtos e o impacto que supón o consumo de alimentos certificados na consecución dos Obxectivos de Desenvolvemento Sostible da ONU. Outra ferramenta coa que se vai traballar é a xestión dos custos dos ingredientes nas receitas para poder ter maior control dos gastos na elaboración dos seus menús.

Así mesmo, Cabarcos anunciou que se celebrarán diversas degustacións de menús especiais con produtos con denominación de orixe, indicación xeográfica protexida e produtos ecolóxicos, que serán achegados polo Consello Regulador da Agricultura Ecolóxica de Galicia (Craega). Polo de agora, beneficiaranse uns 600 residentes dos centros Divina Pastora (Vilagarcía de Arousa), a residencia Hermanos Prieto (O Carballiño), a residencia de anciáns de San Marcos (Santiago de Compostela) e a residencia da terceira idade de Campolongo (Pontevedra).

Nove explotacións de horta ecolóxica abastecen actualmente cos seus produtos unha ducia de comedores

A xornada Ecocomedores da Biosfera: ferramenta para un cambio social, animando o consumo de produtos ecolóxicos, de tempada e proximidade en comedores escolares e colectivos clausurouse o 30 de setembro coa presenza do director da Axencia Galega da Calidade Alimentaria (Agacal), José Luis Cabarcos. Durante o acto, puxo en valor a comercialización e o consumo de produtos ecolóxicos en circuítos curtos de cara á mitigación do cambio climático.

Durante a xornada fíxose balance da iniciativa posta en marcha en 2015, que recibiu unha axuda de case 51.000 euros e foi xestionada pola Xunta no marco dos proxectos de cooperación da medida Leader. Cabarcos gabou o proxecto coordinado pola escola infantil municipal A Caracola e a Reserva da Biosfera Mariñas Coruñesas e Terras do Mandeo que ten por obxectivo que centros educativos e empresas poidan elaborar menús saudables con producións locais, de temporada e ecolóxicas.

Nese sentido, a día de hoxe están adheridas ao proxecto un total de nove explotacións de horta ecolóxica que abastecen de produto a seis escolas infantís, tres centros de educación infantil e primaria, un de educación infantil, primaria e secundaria e dous comedores de empresa.

Tamén puxo de manifesto que proxectos coma este poden darlle un pulo á agricultura ecolóxica de Galicia, demostrando que existe unha alta demanda por parte da restauración colectiva. Así mesmo, destacou que se busca impulsar estas producións a través das novas tecnoloxías e por iso se está promovendo unha plataforma virtual na que se poden mercar producións ecolóxicas das empresas participantes.

O Craega cumpre 25 anos certificando a calidade galega do sector

 

  • O presidente do Craega, Francisco L. Valladares, á fronte da entidade dende o ano 2017, salientou que a tendencia do sector sempre foi á alza dende o seu inicio, tanto do Consello coma dos seus propios comezos como produtor ecolóxico.
  • O balance presentado no acto nos últimos cinco anos (2016-2022) marca unha liña ascendente nos tres piares fundamentales: número de inscritos (cun aumento do 61 % respecto de 2016); hectáreas ecolóxicas (+64 %) e facturación (+170 %).
  • A Cooperativa Santa María de Loureiro, Alibos Galicia, Verín Biocoop SCG, Jesús Boán Méndez e Miguel Areán e Hijos SL recibiron unha homenaxe porseren os cinco primeiros operadores inscritos no Consello.

O Consello da Agricultura Ecolóxica de Galicia (Craega) celebrou hoxe o 25.° aniversario nun acto que uniu diversas autoridades e operadores e no que non faltaron a música nin a representación de produtos ecolóxicos galegos. A cerimonia, que a entidade fixo coincidir coa celebración do Día da Agricultura Ecolóxica da Unión Europea, deu comezo á media mañá no complexo rural lucense A Parada das Bestas (Pidre, Palas de Rei).

O actor galego Luis Iglesia foi o encargado de conducir o evento, que arrancou coas intervencións das autoridades. O presidente do Craega, Francisco López Valladares, estivo acompañado polo conselleiro do Medio Rural, José González; polo director da Axencia Galega da Calidade Alimentaria (Agacal), pola conselleira de Medio Ambiente, Territorio e Vivenda, Ángeles Vázquez; pola conselleira do Mar, Rosa Quintana; polo presidente da Deputación de Lugo, José Tomé, e polo alcalde de Palas de Rei, Pablo Taboada, ademais doutras autoridades autonómicas, provinciais e locais que tamén asistiron como convidados.

Abriu a rolda de intervencións López Valladares, quen lembrou o seu propio comezo coma un dos primeiros operadores, hai 23 anos e, a continuación, recordou as palabras do anterior presidente da Xunta de Galicia, Alberto Núñez Feijóo, que na súa presentación no vixésimo aniversario do Craega lle pedira medrar un 20 % a produción ecolóxica. Apoiándose no cadro de datos comparativos entre os anos 2016 e 2022, o presidente do Consello amosouse moi satisfeito por “ter feito os deberes”, pois o balance nese período arroxou unha dinámica ascendente nos piares fundamentais, pasando de 27.716 hectáreas ecolóxicas ás 45.510, é dicir, a superficie ecolóxica galega incrementouse en 17.794 ha (+64 %); en canto ao número de operadores ecolóxicos, a lista de inscritos subiu de 945 a 1.523, isto é, 578 máis (+61 %); finalmente, o volume de negocio tamén mostrou unha evidente tendencia á alza, xa que hai cinco anos se facturaron preto de 42 millóns de euros, e en xuño deste ano acadáronse cerca de 113 millóns, é dicir, o aumento foi de máis de 70 millóns de euros (+170 %). Con estas cifras, considera que deron “a misión por cumprida”.

Tras agradecer a presenza dos tres conselleiros asistentes a este evento, o presidente tamén aproveitou para advertir que aínda queda “moito camiño por percorrer” e que “hai que arrimar o ombro” para acadar a axenda da Unión Europea, que esixe acadar para o ano 2030 que o 25 % de superficie agraria útil (SAU) sexa de produción ecolóxica. López Valladares tamén lles deu as grazas a todos os convidados, aos antigos presidentes, a todas as institucións e ao equipo humano e congratulouse de estar celebrando o seu cuarto de siglo no primeiro Día da Agricultura Ecolóxica da UE.

A continuación tomou a palabra o presidente da Deputación, José Tomé, quen destacou o Craega como “un elemento clave para a evolución do sector” e manifestou a importancia do “valor engadido que significa a produción ecolóxica para o sector primario” e animou a seguir traballando.

A terceira en intervir foi Rosa Quintana, a titular da Consellería do Mar, quen, tras darlle os parabéns ao equipo de hoxe e do pasado, agradeceu o compromiso adquirido coa terra e co mar, “máis verde e máis azul” grazas ao seu labor destes 25 anos e, como representante da Administración pública, comprometeuse a seguir traballando polo subsector eco do mar: “Galicia seguirá sabendo a mar”, apuntou no final da súa charla.

Tras ela subiu á palestra Ángeles Vázquez, conselleira de Medio Ambiente, Territorio e Vivenda, quen tamén se sumou aos parabéns e deulle as grazas ao Consello por “facer de Galicia un lugar mellor” e convidou a continuar neste camiño para “alcanzar a excelencia”.

Pechou a rolda de intervencións José González, o conselleiro do Medio Rural, quen no seu discurso puxo o foco na importancia do labor da agricultura ecolóxica para impedir os incendios do noso territorio e recordou que, tras acadar as case 46.000 ha de superficie agraria en ecolóxico, o “gran reto é mantelas”. Así mesmo, apuntou dous grandes obxectivos máis: reverter o abandono da terra e cumprir a normativa que impón Europa de conseguir chegar a producir o 25 % da superficie agraria en ecolóxico.

HOMENAXE AOS HISTÓRICOS

O Craega quixo renderlles unha homenaxe aos cinco operadores máis veteranos, pois foron partícipes do nacemento deste Consello. No transcurso do acto proxectáronse vídeos coas declaracións dos cinco empresarios, que recibiron cadanseu galardón en recoñecemento a todos estes anos de traballo:

A Cooperativa Santa María de Loureiro (O Irixo, Ourense), con Antonio González Bernárdez á fronte, empezou a certificar quefir, queixo fresco e iogur natural. González Bernárdez fixo fincapé nas inspeccións que fan dende o Consello para outorgar o selo: “Isto fai que se presente un produto de calidade e extraordinario para a saúde”.

Pola súa banda, a entidade Alibos Galicia (Monterroso, Lugo) dispón en ecolóxico de castañas conxeladas a granel e en puré. O seu representante, Xesús Quintá García, rememorou o seu inicio: “Para nós foi unha oportunidade, xa que moitos clientes estranxeiros nos demandaban produtos ecolóxicos” e congratulouse de que o seu proxecto continúe a medrar a escala internacional.

Verín Biocoop SCG (Verín, Ourense), dirixida por José Luis Vaz, é outra das primeiras firmas co selo do Craega. Esta cooperativa certifica carne de carnes de caprino, ovino, vacún e hamburguesas de tenreira. “Para min foi unha honra meterme na produción ecolóxica, traballar co Craega e ver que xa temos uns resultados interesantes despois de percorrer este proceso”, sinalou Vaz.

Miguel Areán e Hijos SL (Chantada, Lugo) tamén forma parte da lista máis antiga. Baixo a firma comercial Naiciña, Miguel Areán e o seu fillo Miguel Ángel Areán producen castañas conxeladas a granel, en caldo de azucre, en puré, en crema, precocidas e en fariña. “Levamos 25 anos traballando co Craega e cada día temos máis vendas, hai máis futuro”, apuntou Miguel Areán.

O quinto homenaxeado foi Jesús Boán, outro produtor de castañas que traballa dende Taboada (Lugo), quen se mostrou moi satisfeito por producir castaña en ecolóxico e declarou que “merece a pena, pero oxalá houbese máis xente e máis interese en promover este tipo de produtos, que son excelentes e sans”.

MÚSICA, GASTRONOMÍA ECO E ESCAPARATE DE PRODUTOS ECOLÓXICOS

Tras os discursos oficiais e a entrega de premios, os convidados gozaron dun día festivo, no que puideron saborear un menú a base de petiscos elaborados con produtos eco in situ por María Varela (A Parada das Bestas), Álvaro Villasante (restaurante Paprica, Lugo), Martín Mantilla (restaurante Berso, Sober), Criselda Iglesias (Tapería Lecer, Cangas do Morrazo, Pontevedra), Héctor López (restaurante España, Lugo) e José Manuel Mallón (Espazo Gastronómico Remollo, Ames, A Coruña), un xantar que estivo amenizado polas actuacións de The Sar Swing Quintet, Marcos Vázquez e Mekanika Rolling Band.

Así mesmo, co obxectivo de darlle máis visibilidade a produción ecolóxica galega que conta co selo do Craega, durante todo o acto púidose ver unha mostra significativa de produtos que achegaron algúns dos operadores que se integran na entidade.

 AGRADECEMENTOS 

Dende o Consello agradécenlles a todas as autoridades a súa presenza neste acto conmemorativo, así como aos operadores que se achegaron a conmemorar o cuarto de século, posto que sen eles todo isto non sería posible. Tamén lles dan as grazas a todas as persoas que se encargaron da organización da cita na Parada das Bestas e aos músicos que puxeron a banda sonora a esta xornada.

O CFEA Sergude arranca setembro cun curso sobre cultivos de horta ecolóxica

Imaxe dun curso celebrado o pasado ano

A Axencia Galega da Calidade Alimentaria (Consellería do Medio Rural) organiza unha nova acción formativa, desta volta para adquirir competencias sobre cultivos de outono/inverno na horta ecolóxica. O obradoiro terá lugar os días 5, 7, 12, 14, 19 e 21 de setembro no Centro de Formación e Experimentación Agraria de Sergude (Boqueixón, A Coruña). Será en horario de tarde, de 16:00 a 20:00 horas.

Cada día tratarase un tema, que será explicado en detalle na parte teórica antes de realizar exemplos prácticos. Os bloques do contido do curso inclúen nocións sobre a obtención de sementes, a eficiencia na explotación e traballos agrícolas e infraestruturas para cubrir os cultivos, entre outros temas.

Para asistir é preciso cubrir o formulario que se encontra dispoñible na páxina da Consellería e logo o coordinador poñerase en contacto coas persoas interesadas a través do correo electrónico para comunicarlle se está admitida ou non.

Os cativos volveron a desfrutar de alimentos eco nos comedores ecolares

A Consellería do Medio Rural, a través da Axencia Galega da Calidade Alimentaria (Agacal), promoveu por terceiro ano consecutivo a campaña “Come Local” nos comedores escolares. Esta actividade, organizada por Slow Food Compostela, tivo como finalidade impulsar o consumo dos produtos agroalimentarios galegos con indicativo de calidade nestes espazos educativos. Como en cada edición, o Craega colaborou achegando produtos certificados para a elaboración dos menús.

Á parte da degustación de menús especiais, desenvolvéronse actividades formativas tanto sobre as características nutricionais dos propios produtos, como o impacto que supón o consumo de produtos certificados na consecución dos Obxectivos de Desenvolvemento Sostible da ONU. 

Foron 15 comedores escolares das catro provincias galegas os que participaron nesta iniciativa, que se desenvolveu dende febreiro ata xuño, ademais dos 9 que contan coa certificación de “Comedores Escolares KM 0”. Así mesmo, como novidade, os catro centros de formación agroforestal galegos comezaron o proceso para lucir o certificado de KM 0.

Este proxecto conta cunha páxina web propia na que se recolle toda a información sobre a campaña e tamén dispón dun mapa interactivo no que se poden visualizar os comedores escolares que formaron parte desta edición e se subiron fotos das diferentes actividades e dos menús que se degustaron.

Despedimos a primavera co número 60 da nosa revista

 

Xa podedes consultar en formato dixital o número 60 da nosa  publicación cuadrimestral. Este especial de primavera ábrese cun amplo monográfico dedicado ás feiras celebradas nestes últimos meses, ás que asistimos cun dos nosos principais obxectivos como entidade: apoiar e difundir o labor dos nosos operadores. BioCultura A Coruña e BCN, Acuafuture Spain’22, Salimat e Alimentaria Barcelona volveron ao seu formato presencial e o selo ecolóxico galego achegou o seu gran de area en cada un destes eventos.

Este apartado complétase coas entrevistas a Francisco L. Valladares, o presidente da nosa entidade, que reflexiona sobre os cinco anos á fronte da presidencia, e a Ángeles Parra, directora de BioCultura e presidenta de Vida Sana, quen, entre outros aspectos, nos ofrece unha retrospectiva da súa asociación, que cumpre cuarenta anos de existencia. 

Nas seguintes páxinas inclúense as nosas habituais seccións: “Novas breves”; “Formación”; “Axenda”; “Cocina eco”, coas innovadoras receitas que nos propón o trío gastronómico Indo e Vindo e, como peche, “Aliméntate bío”, apartado no que se recolle a colaboración do Consello coa campaña Come Local, unha iniciativa da Agacal, que organiza Slow Food Compostela por terceiro ano consecutivo nos comedores escolares galegos.