Arquivo da categoría: Formación

A Xornada do XXV aniversario do Craega conclúe que “o sector eco ten futuro, si ou si”

O Consello Regulador da Agricultura Ecolóxica de Galicia (Craega) congregou esta mañá no salón de actos do Pazo de Feiras e Congresos de Lugo numerosos asistentes con motivo da xornada divulgativa, que levou por título “Craega: 25 anos medrando co sector ecolóxico galego”.

O acto deu comezo ás 10:00 horas e foi inaugurado polo presidente da Axencia Galega de Calidade Alimentaria (Agacal), José Luis Cabarcos, quen, tras felicitar o Consello polos seus 25 anos de existencia, resaltou que Galicia está no camiño de seguir medrando para alcanzar as esixencias da normativa europea (cuxa axenda é acadar que o 25 % da superficie agraria última (SAU) sexa ecolóxica en 2030), pois nesta última década o incremento na nosa comunidade foi do 127 %. Así mesmo, incidiu en que hai que aproveitar este crecemento, porque a clave do éxito está en “facer cousas ordinarias de maneira extraordinaria”.

A continuación, foi a quenda de José Miguel González, xefe da Área de Produción Ecolóxica na Subdirección Xeral de Calidade e Sostibilidade Alimentaria (MAPA), quen disertou sobre a situación actual e de futuro da produción ecolóxica en España e en Galicia no marco europeo. Tras a introdución histórica da normativa eco en Europa e en España, repasou os datos estatísticos máis salientables tanto a nivel nacional como na nosa comunidade e, entre os fitos conseguidos, lembrou o feito de que España foi un dos primeiros países en certificar en ecolóxico, en 1988, e que na actualidade o gasto per cápita en consumo eco está xa por riba da media da Unión Europea. Neste sentido arroxou un dato moi significativo: en 2006 o gasto per cápita do consumidor en produto ecolóxico era de 2 euros; na actualidade é de 60. Finalmente, ofreceu un percorrido pola situación da normativa e polo futuro do sector.

O terceiro en subir ao estrado foi Manuel López Luaces, xefe de Área de Formación, Innovación e Investigación Agraria na Agacal, quen dedicou parte da súa intervención a presentar a área I+D+i ao servizo do sector agrario. Entre os proxectos que engloban o seu departamento, deu conta dos centros de investigación galegos vinculados ao sector agro, un por provincia: Centro de Investigacións Agrarias de Mabegondo, Estación Experimental de Gandería de Montaña de Marcos da Curra, Estación Experimental Agrogandeira da Pobra do Brollón e Estación Experimental Agrícola do Baixo Miño. Para seguir, enunciou os instrumentos da Agacal para a I+d+i e presentou o contrato de xestión para os anos 2021-2024, co fin de mellorar a produción agropecuaria galega na liña coa estratexia europea de investigación en materia agraria. Rematou a súa intervención facendo referencia ao ámbito dos centros formativos, que reivindicou como espazos “para xerar man de obra entre os mozos e mozas agricultores” co fin de garantir o futuro do sector.

A compra pública verde como oportunidade para a produción eco foi o tema das seguintes relatoras, que expuxeron dous interesantes proxectos: o de Josefina Irles, xefa de sección de Dietética e Xestión de Hostalería no Hospital Xeral de Valencia, e o de Slow Food Compostela, que o amosou Rocío García, secretaria da asociación.

Tras rememorar o camiño que a levou á introdución da alimentación eco no hospital onde exerce como nutricionista, Irles incidiu nos motivos principais que a levaron a facer esta aposta: ser garante dunha nutrición sa para un colectivo especialmente vulnerable como son os pacientes, e ser respectuosa co medio ambiente e co planeta.

Pola súa banda, García fixo balance de “Come Local”, a campaña que organiza o colectivo desde hai tres anos, promovida pola Agacal, e na que o Craega participa coa achega de alimentos ecolóxicos con moi boa acollida por parte dos usuarios dos centros.

Tras a pausa do café, subiron ao estrado Xosé Lois Lamazares (xerente de Daveiga) e Guillermo Martínez (xerente de Casa Grande de Xanceda) e ambos centraron o seu relato en ofrecerlle ao público asistente un completo percorrido por cada unha das empresas que teñen ao seu cargo, expoñendo as trabas que se atoparon na súas traxectorias e como lograron facer das súas marcas un negocio de éxito.

“Emprender en ecolóxico: experiencias, retos e ideas” foi o fío común sobre o que debateron José Manuel Vázquez (Burgo de Negral), José Luis Vaz (Verín Bioocoop) e Rocío Freire (Alibos Galicia), para facer partícipe ao público da súa experiencia como produtores en ecolóxico e poñer en común retos e ideas para o futuro. Entre as moitas propostas que emerxeron na mesa, unha destacada foi o camiño que se debe seguir e todos estiveron de acordo en que a clave está en “compartir e repartir” para poder mirar ao futuro, porque a agricultura ecolóxica “ten futuro, si ou si, porque non nos queda outra”. A mesa foi moderada polo director dos programas O agro e Labranza da CRTVG, Manuel Cruz.

O presidente do Craega, Francisco López Valladares, foi o encargado de pechar esta actividade formativa, repasando brevemente algúns datos destacados da certificación e agradecéndolles a presenza a todas as persoas asistentes.

ÁLBUM DE FOTOS DA XORNADA

O Craega organiza unha xornada divulgativa para abordar as oportunidades eco certificadas en Galicia

Co gallo do 25 aniversario do Craega como órgano de control e certificación da produción ecolóxica galega, faise indispensable a realización dunhas xornadas presenciais para analizar as experiencias pasadas, compartir os bos datos de produtos certificados en ecolóxico e estudar a xestión do crecemento que o sector vivirá nos próximos anos.

Por iso, baixo o lema “Craega: 25 anos crecendo co sector ecolóxico galego”, o vindeiro xoves 1 de decembro terá lugar no Pazo de Feiras e Congresos de Lugo unha xornada divulgativa na que se fará  balance e se analizarán as oportunidades da produción ecolóxica na nosa comunidade. 

UN PROGRAMA CARGADO DE PROPOSTAS

Ás 10:00 horas, abrirase o evento coa inauguración a cargo do director da Axencia Galega da Calidade Alimentaria (Agacal), José Luis Cabarcos.

A continuación, José Miguel González, xefe da área de Produción Ecolóxica no Ministerio de Agricultura, Pesca e Alimentación (MAPA), tratará a situación da produción ecolóxica en España e mostrará elementos de futuro. Seguiralle Manuel López Luaces, xefe de Área de Formación, Innovación e Investigación Agraria na Agacal, coa súa charla “A I+D+i ao servizo do sector agrario”.  

Logo terán lugar dúas charlas que se centrarán na oportunidade para a produción eco que ofrece a compra pública. Nesta área falarán Josefina Irles, xefa de sección de Dietética e Xestión de Hostalería no Hospital Xeral de Valencia, co relatorio “Alimentación ecolóxica no Hospital Xeral de Valencia”, e Rocío García, secretaria da asociación Slow Food Compostela, que tratará a campaña “Come Local” como un exemplo galego de xestión viable nos comedores escolares.

Tras unha pausa, mostraranse dous exemplos de éxito dentro do sector: DaVeiga, con Xosé Lois Lamazares, e Casa Grande de Xanceda, con Guillermo Martínez. Finalmente, celebrarase unha mesa redonda moderada por Manuel Cruz, director dos programas O Agro e Labranza da CRTVG, que xirará ao redor do emprendemento en ecolóxico, con experiencias, retos e ideas. Intervirán José Manuel Vázquez, socio de Burgo do Negral; Paula Bernárdez, directora de Mieles Anta; José Luis Vaz, xerente de Verín Biocoop, e Rocío Freire, directora de Produción de Alibos Galicia.

Para poñer o broche final, o presidente do Craega, Francisco L. Valladares, clausurará a cita.

Todas as persoas interesadas poden inscribirse cubrindo o formulario antes do 29 de novembro. 

Ler programa completo

O CFEA Sergude arranca setembro cun curso sobre cultivos de horta ecolóxica

Imaxe dun curso celebrado o pasado ano

A Axencia Galega da Calidade Alimentaria (Consellería do Medio Rural) organiza unha nova acción formativa, desta volta para adquirir competencias sobre cultivos de outono/inverno na horta ecolóxica. O obradoiro terá lugar os días 5, 7, 12, 14, 19 e 21 de setembro no Centro de Formación e Experimentación Agraria de Sergude (Boqueixón, A Coruña). Será en horario de tarde, de 16:00 a 20:00 horas.

Cada día tratarase un tema, que será explicado en detalle na parte teórica antes de realizar exemplos prácticos. Os bloques do contido do curso inclúen nocións sobre a obtención de sementes, a eficiencia na explotación e traballos agrícolas e infraestruturas para cubrir os cultivos, entre outros temas.

Para asistir é preciso cubrir o formulario que se encontra dispoñible na páxina da Consellería e logo o coordinador poñerase en contacto coas persoas interesadas a través do correo electrónico para comunicarlle se está admitida ou non.

Nova formación en Sergude sobre cultivos de verán na horta ecolóxica

O Centro de Formación e Experimentación Agroforestal de Sergude (Boqueixón), dependente da Consellería do Medio Rural, acollerá un curso para a adquisición de competencias sobre os cultivos de verán en hortas ecolóxicas. A acción formativa será do 13 de xuño ao 20 de xullo e terá unha duración total de 48 horas, repartidas en quendas de tarde, no horario de 16.00 a 20.00 horas.

Este obradoiro abordará tanto aspectos teóricos coma prácticos sobre o estudo da horticultura e a produción vexetal.

A Axencia Galega da Calidade Alimentaria (Agacal) pretende contribuír á formación axeitada de persoal cualificado co fin de que acaden o nivel adecuado para cumprir coa normativa vixente. Con isto, trata de achegarlle ao alumnado técnicas modernas da agricultura tradicional, así como de ensinar o coidado dos recursos naturais e da saúde das persoas.

Esta iniciativa está dirixida ás persoas vinculadas profesionalmente cos sectores produtivos relacionados coa agricultura, gandería, industria agroalimentaria e cadea forestal-madeira, e tamén a aquelas que teñan expectativa de incorporación, en concreto a mocidade do medio rural.

Para asistir, as persoas interesadas poden facer a preinscrición na páxina da Xunta e a persoa encargada de coordinar esta formación poñerase en contacto a través do correo electrónico para comunicarlle se está admitido ou non.

O CFEA de Monforte acolle unha xornada sobre agricultura orgánica o 31 de maio

O 31 de maio terá lugar no Centro de Formación e Experimentación Agroforestal de Monforte de Lemos unha xornada sobre técnicas de agricultura orgánica aplicadas a fruticultura e outros cultivos. A cita, organizada pola Consellería do Medio Rural a través da Axencia Galega da Calidade Alimentaria (Agacal), será de 10:00 a 14:15 horas.

O eixe central desta formación é a sustentabilidade e a resiliencia do medio rural, así como a rexeneración de terras pola súa relación coa saúde dos cultivos. Na sesión mostrarase a importancia da agricultura orgánica co obxectivo de que os asistentes entendan e compartan a interacción entre técnicas e prácticas sustentables co desenvolvemento, non só das súas producións, senón tamén do seu ambiente.

O programa formativo iniciarase tratando a saúde do solo e a teoría da trofobiose, seguindo co repouso vexetativo e os caldos minerais e a poda e os tratamentos cicatrizantes. Seguidamente, falarase da elaboración de caldo sulfocálcico e de biofertilizantes, para rematar cunha receita de microorganismos.

Para asistir, é preciso cubrir a inscrición e enviala ao correo electrónico ceca.monforte@edu.xunta.gal.

Aberto o prazo de inscrición para o curso sobre xardinería ecolóxica de Bergondo

A Consellería do Medio Rural, a través da Axencia Galega da Calidade Alimentaria (Agacal), celebrará en Bergondo un taller temático sobre xardinería ecolóxica do 30 de maio ao 2 de xuño, en horario de 16:00 a 20:00 horas. O curso terá lugar no Centro de Formación e Experimentación Agroforestal de Guísamo.

Ao longo de 16 horas lectivas, daranse a coñecer as técnicas empregadas en xardinería ecolóxica, os conceptos e métodos de control biolóxico das principais pragas e a normativa europea e española ao respecto. A formación consta tamén dunha parte práctica na que os participantes poderán aplicar as técnicas ensinadas.

A iniciativa está destinada a calquera persoa vinculada profesionalmente cos sectores produtivos relacionados coa agricultura, gandería, industria agroalimentaria e cadea forestal-madeira, así como a mozos e mozas do medio rural galego e a persoas con expectativas de incorporación ao sector.

A solicitude de preinscrición pode realizarse a través da páxina da Xunta e debe enviarse ao correo electrónico cfea.guisamo@edu.xunta.gal.

Brión acollerá dous cursos sobre sementes hortícolas locais das comarcas de Santiago e Barbanza

A Consellería do Medio Rural, a través da Axencia Galega da Calidade Alimentaria (Agacal), organiza dous cursos sobre sementes hortícolas locais no municipio coruñés de Brión, en concreto terán lugar na Aula da Terra do centro comercial Monte Balado; un deles comeza  o vindeiro 24 de maio e o segundo, ao día seguinte, cunha duración en ambos os casos de 60 horas lectivas en total. 

Estas sesións formativas están dirixidas a calquera persoa vinculada cos sectores produtivos relacionados coa agricultura, gandería, industria agroalimentaria e cadea forestal-madeira, así como a mozas e mozos do medio rural galego e a persoas con expectativas de incorporación ao sector.

O obxectivo é dar a coñecer as variedades das comarcas de Santiago e Barbanza, e trataranse outros temas como a correcta plantación en invernadoiros ou fincas ao aire libre, así como tratamentos ecolóxicos preventivos ou a rotación de cultivos.

Para asistir cómpre cubrir o formulario e envialo ao correo electrónico cursos.agacal.sergude@xunta.gal.

O Craega participa na 1.ª Reunión Anual Presencial do Proxecto AE4EU

O Edificio Cactus da Escola Politécnica Superior de Enxeñería da Universidade de Santiago de Compostela (EPSE) acolleu a 1.ª Reunión Anual Presencial do proxecto AE4EU (Agroecology for EU) do 3 ao 5 de maio. O mércores 4, no marco do taller de transferencia e deseño da folla de ruta para unha exitosa transición dos sistemas agrarios cara á agroecoloxía, tivo presenza o Consello Regulador da Agricultura Ecolóxica de Galicia (Craega). O seu secretario, Javier García, presentou o proxecto Desenvolvemento de produtos elaborados en base a carne de vacún de raza autóctona con certificación ecolóxica. O traballo mostrouse ante o equipo de investigación que dirixe Rosa Mosquera, catedrática do Departamento de Produción Vexetal e Proxectos de Enxeñería da USC na EPSE. 

AGRICULTURA ECOLÓXICA PARA EUROPA 

AE4EU é un estudo europeo, cunha duración de 3 anos, que comezou en xaneiro de 2021 e ten como obxectivo permitir unha transición exitosa dos sistemas agrarios cara á agroecoloxía. Pretende crear unha rede europea sólida na que actores de diversos sectores deseñen e desenvolvan estratexias e accións conxuntas que permitan facer fronte aos retos aos que se enfrontan a agricultura e os sistemas alimentarios europeos.

PROXECTO DO CRAEGA

O obxectivo do estudo exposto por Javier García é pór a punto a produción galega dos transformados cárnicos de vacún a partir de carne de tenreiros de razas cachena, rubia galega e frieresa, criados en réxime ecolóxico. Desenvólvese nas provincias de Lugo e Ourense conxuntamente entre o Craega e a Fundación Centro Tecnolóxico da Carne.

Tras a selección das explotacións de vacún ecolóxico e das tres razas autóctonas, nunha terceira fase analizouse a calidade da carne a través de análises físico-químicas e nutricionais. Logo elaboráronse os produtos tasajo e chacina, que se deron a probar a consumidores e colaboradores.

 

Os resultados obtidos mostran que as explotacións enquisadas se caracterizan por non utilizar antibióticos e manter un bo estado sanitario, cumprindo coas normas e recomendacións de benestar animal vixentes para a produción ecolóxica. Non se observaron diferenzas importantes na composición química, a cor ou a textura, pero si nas concentracións de ácidos graxos esenciais entre as diferentes razas: a carne de cachena ten maior contido en ácidos graxos poliinsaturados; a de frieiresa, maior pH e, por tanto, maior capacidade de retención de auga, e a de rubia galega, menor infiltración de graxa. Así mesmo, a variabilidade na composición e, especialmente, nos atributos sensoriais dos transformados cárnicos revela un amplo mercado no que poderían asentarse estes produtos ecolóxicos de elevada calidade organoléptica. Ademais, conséguense cumprir varios dos Obxectivos de Desenvolvemento Sustentable (ODS).

Os produtores eco confirman o bo momento e o mellor futuro para o sector

Esta é a conclusión que podemos extraer das intervencións de seis dos relatores convidados ás Xornadas de Promoción e Comercialización de Producións Cárnica e Silvícola, que tiveron lugar os días 27 e 28 de decembro, emitidas en directo na nosa canle de Youtube, e que tedes xa á vosa disposición nestas ligazóns:

Foron dúas xornadas abertas en liña que xa suman centos de visualizacións e onde varios produtores e expertos contaron as súas experiencias nos seus sectores para logo ir resolvendo dúbidas dos participantes no chat aberto na canle de Youtube do Craega. Promovida polo Craega, os seis invitados abarcaron todos os aspectos de interese: lexislación europea, consultoría agroalimentaria, distribución e experiencias de traballo en cooperativas e empresas. “España é o país líder en superficie ecolóxica da UE, písannos os talóns o franceses, pero non todo vai perfecto”.

DÍA 27 DE NADAL

As Xornadas arrancaron coa presentación de Rocío Freire, vicepresidenta do Consello, quen deu paso a José Luis Cabarcos, director xeral da Axencia Galega de Calidade Alimentaria (Agacal), o cal destacou que os produtos ecolóxicos, ao contribuír a protexer o medio natural, son cada vez máis demandados polos consumidores a nivel internacional e apostou por que o mel, a castaña e a carne -acollidos a indicacións xeográficas protexidas en Galicia- avoguen por este tipo de produción máis respectuosa coa contorna para lograr ao mesmo tempo vantaxes na competitividade. 

Un gran coñecedor das institucións europeas nas que traballa desde principios dos anos 90, Diego Canga, foi o primeiro dos relatores en intervir analizando o Plan de Acción para a Producción Ecolóxica e a “Estratexia da Granxa á Mesa (Farm to Fork en inglés), que quere ampliar a superficie ecolóxica de aquí a 2030. O conselleiro principal da Comisión Europea na Dirección Xeral de Agricultura e Medio Rural lembrou que os mercados máis importantes son o alemán e despois o francés. “Pero o punto débil de España é o consumo per cápita, está moi por baixo da media europea, é a gran lagoa: como facer que a xente consuma máis produtos ecolóxicos?”. Tamén sinalou que as grandes superficies agrarias están no Mediterráneo e que as do Cantábrico están por baixo da media, como pasa na produción convencional. “Sei perfectamente que a agricultura no norte é completamente diferente, pero unha das cousas que máis me preocupa é que atopo moitos agricultores e gandeiros con producións moi sostibles pero que lles custa dar o paso á conversión en ecolóxico”, xa que consideran que a súa produción xa é sostible. “Pero nós poñemos moito diñeiro encima da mesa para quen xa son ecolóxicos, aínda que o logo non cho regalan, o logo certifica que cumpres uns estándares europeos”. E continuou afirmando que “para os que sodes produtores ecolóxicos só teño boas noticias. Acaba de entrar en vigor o novo regulamento sobre agricultura ecolóxica e non o imos tocar en varios anos, non podemos marear os produtores. Vai haber estabilidade legal. En 2022 gastarémonos 50 millóns en promoción de produtos ecolóxicos e imos crear premios europeos á mellor cidade, peme e rexión ecolóxica, farémolo público en semanas, un boom tremendo de publicidade”.

Jon Garai, coordinador da Asociación navarra Ekoalde, explicou na súa intervención posterior que na agrupación de produtores ecolóxicos os seus asociados obteñen un prezo xusto pola venda aos clientes, aos que chegan coa distribución e loxística que se fai desde Noáin. “Proxectos como o noso serven para estruturar o sector e xera novas oportunidades”, comentaba na xornada do 27 de decembro. “Aprobouse un convenio de 100.000 euros co Goberno navarro para profesionalizar o noso sistema e poder exportalo, desde a humildade. Cremos que se pode avanzar, falamos dunha oportunidade para dar un salto de escala”. Ekoalde foi creadada polos produtores como asociación sen ánimo de lucro, elemento importante no desenvolvemento. Non é unha cooperativa senón que permitiu un traballo directo co goberno de Navarra para participar das axudas no campo. “Somos 69 operadores e moi diversos, pero hoxe participamos en proxectos que no Estado créanse como o noso desde a súa realidade diferencial. Cremos que Ekoalde é fito porque conseguimos promocionar e facer unha distribución conxunta cun proxecto loxístico adecuado para iso. E vendendo a prezos xustos, non negociamos os prezos senón que representamos os intereses da parte produtora”. 

A última intervención do día 27 foi a da xerente de Traloagro, Isabel Gómez Rodríguez. Unha empresaria recentemente premiada cos Premios de Excelencia á Innovación para Mulleres Rurais que outorga o Ministerio de Agricultura e que narrou a súa experiencia nesta empresa empresa familiar que xestiona co seu irmán e a súa cuñada. Produce carne de vacún e pito en ecoló gico e venden desde a sala de despezamento e tenda-supermercado de Friol, ademais da Praza de Abastos en Lugo. “Somos fillos de emigrantes retornados de Bélxica e o meu irmán e eu queriamos emprender no rural pero non tiñamos claro a que dedicarnos ao comezo”. Tras estudalo e dada a experiencia hostaleira que traían decidiron con ilusión levar adiante un proxecto de gandería bovina e avícola cun plan de mellora e coa conversión de terreos na casa, mantendo a biodiversidade. “Respectando os arboledos que xa existían porque o que queriamos era unha produción sostible”. Cando o decidiron non tiñan garantida a comercialización de ecolóxico, “isto foi no 2010 e estivemos dous anos coa reconversión de terreos. Pero nese tempo xurdiu a oportunidade de que o pito fose certificado en ecolóxico, unha empresa nese momento iniciou a comercialización”. Pero non pasaba igual co bovino, só contaban cun intermediario que non tiña interese por vender en ecolóxico así que estiveron a producir en ecolóxico e vendendo convencional. “Pero sabiamos que chegaría o momento en que que comercializariamos a carne. En 2019 decidimos iniciar cun posto na Praza de Abastos en Lugo, e mentres construímos o biocentro cárnico, unha salda de despezamento para todo tipo de carnes onde facemos almacenamento, transformación e elaboración de produtos” que inclúen entre outros nuggets e hamburguesas para achegarse tamén a un público novo e familiar que crece día a día.

DÍA 28 DE NADAL

A segunda xornada, a do 28 de decembro, foi inagurada por Jean Luc Bellat, que falou do funcionamento do mercado da castaña francés, escaso en canto a produción pero cunha venda dinámica e de gran volume. É a zona sur do país a principal. “Non somos moi produtores, temos a quinta praza de Europa detrás de Portugal, Italia, España e Grecia”. Francia produce unhas 8.000 toneladas anuais, aínda que como explica o Consultor en JLB Consulting e xerente en Decorin Sárl, “é un pouco irregular porque tivemos problemas coa avispilla do castiñeiro, problema que ten case toda Europa”. O experto cre que “a tendencia nestes últimos anos tende cara a un equilibrio porque nalgúns sitios instaláronse sistemas de rega e cultívase con maquinaria que permite axilizar a tarefa”. De toda a produción francesa o 62 % é ecolóxica, decenas de miles de hectáreas están en conversión xa porque é un tipo cultivo que foi desenvolto nas rexións de nova produción polo interese que espertou. “É natural, parécenos a todos como de sempre, non hai tratamentos, é un traballo de campo de regar, arar e podar as árbores. É moi sostible”. E lembrou que en Francia precisamente son as datas navideñes cando aumenta o seu consumo, “como as uvas en España, é tradicional nas comidas de Nadal e fin de Ano, comer castañas” xerando unha facturación de 160 millóns de euros. A produción e venda repártese entre as maioritarias 13.000 toneladas en crema e puré de castaña, despois a conserva de castaña pelada e cocida que permite o seu uso nun prato combinado con carnes diferentes como unha pataca en guarnición e finalmente en formas como o marrón confeitado e glasé. 

“Estamos no alto da montaña lucense desde 1999. Unha pequena empresa que nace polo agarimo polas cousas ben feitas”. Así comezou a súa intervención Rubén Fernández, conselleiro delegado da empresa familiar fonsagradina Casa Castelao.

Fundada en 1999 e especializada na produción de porco celta e ecolóxico, carnes e derivados foron crecendo aos poucos “ampliando instalacións pero sen esquecer apostar pola calidade, a diferenciación”. Introduciron cada vez máis porco celta “unha produción de calidade que non se fai con carácter industrial senón a base pequenas explotacións. Pero custábanos conseguir un porco de 100 quilos porque ten moita menos graxa, e falamos cos produtores para chegar a un consenso. En 2017 demos cunha raza un 50 % duroc e dar coa tecla, porque ofrece un pouco mais de touciño e infiltración que fai que a carne sexa máis melosa ao padal e axuda a depurar o produto en xamón e embutidos”. Isto axudoulles a meterse no mercado e en 2018 fixeron probas a un nivel mais amplo. “Criamos que co porco ecolóxico tiñamos que apostar pola canle completa, e non centrarnos só en facer o produto senón chourizos, lacóns, xamóns, touciño entrefebrado… para chegar a un mercado maioritario”. Ao traballar certificados polo Craega están condicionados a un marco, “pero conseguimos un produto moi ben feito e chegamos a un consumidor diferente. O produto foi difícil posicionalo porque ten un prezo máis elevado, hai que enfocalo pola calidade”, pero nestes anos Casa Castelao conseguiu crecer nas súas tres liñas: porco tradicional, celta e ecolóxico “e seguiremos sumando mais cousas, porque pola primavera teremos novidades en marcha”. 

O pintor Peteiro e a relación co fundador de Meles Anta, David Corral, marcou os acenos de identidade desta firma apícola. Maite Bruzos Simón, é a responsable de Calidade en Pazo de Lusio, a marca que acolle o mel ecolóxico desta empresa familiar con orixe en Samos. Ela explicou como última relatora convidada nestas dúas xornadas como foron mudando colmeas a loecológico, a reconversión. Traballan con apis melifera, unha abella ibérica moi dura e que dá boa produción. “Temos 4700 ecolóxicas fixas e tamén trashumantes. Os panales están no Courel e Ancares cunha vexetación impresionante en zonas de difícil acceso, con transportes acomodados para poder entrar”, explica. Modernizaron o envasado e venden tanto a nivel nacional como fóra con dúas marcas como ecolóxico: Pazo de Lusío e Toca. “Pazo vendémola nas grandes superficies a nivel estatal e Toca, que é máis gourmet, para Francia, Reino Unido, Estados Unidos, Alemaña, China… o mercado ecolóxico está a ser bastante demandando e queremos seguir crecendo, xa o fixemos a niveis impresionantes nos últimos anos”, recoñece Maite Bruzos. “Non pensabamos que o mel ecolóxico ía ter esa saída. Pero cada vez que imos a unha feira os clientes pídennos moito produto ecolóxico. E vémolo tamén na nosa tenda en liña, a demanda vai en crecemento. Vemos a gran diferenza que hai coas dúas producións”. 

O Craega organiza unha nova Xornada ‘on line’ sobre as producións cárnica e silvícola

Os vindeiros días 27 e 28 terá lugar unha nova acción formativa organizada polo Craega,  que abordará a promoción e comercialización das producións cárnica e silvícola. 

Esta Xornada será emitida por YouTube en directo na canle do Craega e cada sesión terá unha duración de dúas horas, en horario de 10:25 a 12:30 h.

PROGRAMA

O día 27 de Nadal, o director de AGACAL, José Luis Cabarcos, inaugurará esta primeira sesión na que estarán presentes Diego Canga Fano, conselleiro principal da Comisión Europea na  Dirección Xeral de Agricultura e Medio Rural, quen analizará o Plan de Acción para a Produción Ecolóxica, así como a Estratexia da Granxa á Mesa, ambos da Comisión Europea; Jon Garai, coordinador de Asociación Ekoalde Elkartea, agrupación de produtores e elaboradores ecolóxicos de Navarra, quen amosará o exemplo da produción e comercialización no seu territorio, e Isabel Gómez, xerente de Traloagro S.L. (Friol, Lugo), quen contará a súa experiencia de empresa familiar que produce actualmente carne de vacún e polo en ecolóxico, e que vende dende a sala de despezamento e tenda supermercado de Friol, así como dende a Praza de Abastos en Lugo.  

O día 28  integran o programa Jean Luc Bellat, consultor en JLB Consulting no ámbito agroalimentario, especialista no mundo da castaña e xerente en Decorin Sàrl, quen nos ensinará como funciona en Francia o mercado da castaña; Rubén Fernández, conselleiro delegado da empresa familiar fonsagradina Casa Castelao SL, abordará o sector porcino en ecolóxico, e Maite Bruzos, responsable de Calidade en Pazo de Lusío S.L., amosará como evolucionou a empresa, cales son as dificultades desta produción e como están a vender en diferentes mercados. Finalmente, Rocío Freire, vicepresidenta do Craega, será a encargada de clausurar estas xornadas formativas.