Arquivos da etiqueta: #mapa

O bo facer ecolóxico galego conquista Alemaña

O Consello Regulador da Agricultura Ecolóxica de Galicia (Craega) volveu viaxar a Núremberg, tras o parón obrigado por mor da pandemia, xunto a preto dunha decena de operadores certificados, para asistir á 33.ª edición da Feira Internacional de Produtos Orgánicos Biofach, combinada con Vivaness (Feira Internacional do Coidado Persoal Natural e Orgánico), que se desenvolveu entre o martes 26 e o venres 29 de xullo no Exhibition Centre Nuremberg (Alemaña).

Nesta ocasión os embaixadores galegos ecolóxicos co selo do Craega foron Lacto Baltar, AviecoCamoco Foods, Connorsa, Refix, Conservas Ortiz, Mieles Anta e Porto-Muíños, ademais de Mariñeiras Daveiga, que asistiu con expositor propio.  

Bodegón dos produtos ecolóxicos galegos  no centro histórico de Núremberg

A PALABRA DO PRODUTOR

Os nove operadores amosáronse satisfeitos por volver encontrarse con produtores internacionais neste evento e intercambiar sinerxias, coñecer o labor doutros países, levar a produción galega eco fóra das nosas fronteiras… Nas súas propias palabras, Álvaro Pérez, xerente de Lacto Baltar, afirmou o seu interese na feira “por mostrar a súa liña ecolóxica para consumo directo e para o uso na elaboración de xeados”.  Íñigo Tena,  Export Manager de Connorsa, declarou que “Conservas del Noroeste presenta en Biofach a súa nova imaxe, máis moderna e atractiva, da marca Cabo de Peñas ecolóxica”; Ander Montalvo, Export Manager de Conservas Ortiz, incidiu en que “a marca busca dar a coñecer a súa gama ecolóxica nos mercados europeos”; pola súa banda, Laura Pérez, Export Manager de Mieles Anta, lembrou que “tras máis de quince anos asistindo a Biofach, Mieles Anta continúa representando o mel orgánico galego en Europa”; Raúl Anta, Founder de Refix, resaltou que “Refix, bebida natural alcalina, isotónica e de recuperación con 20 % de auga de mar de Galicia e 78 minerais, comeza a grande expansión por Europa coa presentación dos seus produtos en Biofach”; Gabriela Licett, delegada comercial de Camoco Foods, pensa que é “unha grande oportunidade para presentar a nosa liña orgánica destinada a fabricantes do sector bio” e, finalmente, Bibiana Canosa, Export Manager de Porto-Muíños, salienta que un ano máis volveron a Alemaña “coa nosa liña de produtos con algas e envases máis sostibles, tan demandados no momento actual”.

ENCONTRO CON  LUIS PLANAS, MINISTRO DE AGRICULTURA

Por terceiro ano consecutivo, a Federación Española de Industrias de Alimentación e Bebidas (FIAB), co apoio do Ministerio de Agricultura, Pesca y Alimentación (MAPA), organizou o pavillón agrupado español e ata alí se achegou o ministro, Luis Planas, quen tamén se reuniu co ministro federal de Alimentación e Agricultura, Cem Özdemir, para intercambiar opinións sobre asuntos de actualidade agroalimentaria.

Durante a visita, Planas puxo de relevo o carácter estratéxico do sector ecolóxico español e reiteroulles aos produtores o apoio do Goberno para aproveitar o seu gran potencial de crecemento nos vindeiros anos.

O ministro dirixiuse aos representantes das 104 empresas españolas, distribuídas en 11 pavillóns, aos que asegurou que a súa presenza nesta feira está “moi xustificada”, xa que Alemaña é o primeiro mercado para os alimentos ecolóxicos españois.

No seu percorrido polo pavillón, tamén se achegou ata os postos do Craega, nos que puido coñecer de preto o bo facer dos operadores ecolóxicos galegos.

BIOFACH&VIVANESS, REFERENTE MUNDIAL PARA O SECTOR

Este ano o tándem tan esperado composto por Biofach Vivaness celebrou o seu regreso cunha “edición de verán” única na que se rexistraron máis de 24.000 visitantes profesionais procedentes de 137 países. Aproveitando a oportunidade de intercambios persoais, redes e debates en profundidade sobre temas de actualidade, descubriron innovacións e tendencias e gozaron da experiencia dunha variada gama de produtos dos 2.276 expositores de 94 países, polo que tamén foi, sen dúbida, unha excelente oportunidade para difundir a produción galega certificada en ecolóxico.

PRÓXIMA CITA, FEBREIRO DE 2023

Este encontro volverá ao recinto ferial de Núremberg entre o 14 e o 17 de febreiro de 2023 e para esta edición a organización ten pensado afondar na pregunta “Agricultura ecolóxica, protección do clima e saúde: cal é a conexión entre un chan san e persoas sas?”, un enfoque temático que será desenvolvido conxuntamente por IFOAM-Organics International, BÖLW (Federación Alemá de Produtores de Alimentos Ecolóxicos) e Biofach.

 

Luis Planas mantivo un encontro co ministro de Alimentación e Agricultura de Alemaña en BioFach

O ministro de Agricultura, Pesca e Alimentación, Luis Planas, reuniuse durante BioFach co ministro federal de Alimentación e Agricultura, Cem Özdemir, para intercambiar opinións sobre asuntos de actualidade agroalimentaria.

No encontro, Planas manifestou o apoio de España ás iniciativas europeas en materia de produción ecolóxica, xa que contribúen á transición verde do sistema alimentario pola súa achega en termos de sustentabilidade social e ambiental. Remarcou a aposta decidida do Goberno por axudar a agricultores e gandeiros cara a unha agricultura cada vez máis sustentable que, sen dúbida, ten que ser rendible, porque non existe sustentabilidade sen rendibilidade.

VISITA AOS POSTOS DOS PRODUTORES GALEGOS

Luis Planas visitou o pavillón que o Ministerio de Agricultura, Pesca e Alimentación instalou en BioFach, feira de referencia mundial para a produción ecolóxica que se celebrou na cidade de Núremberg do 26 de xullo ata hoxe, onde puxo de relevo o carácter estratéxico do sector ecolóxico español, a quen reiterou o apoio do Goberno para aproveitar o seu gran potencial de crecemento nos próximos anos.

Planas dirixiuse aos representantes das 104 empresas españolas, distribuídas en 11 pavillóns, aos que asegurou que a súa presenza nesta feira está “moi xustificada”, xa que Alemaña é o primeiro mercado para os alimentos ecolóxicos españois. Nesa visita, o ministro achegouse ata os postos dos operadores galegos  eco co selo do Craega que asistiron a esta edición.

Ler nota completa

 

O Craega darase cita na Feira Biofach

A Feira Internacional de Produtos Orgánicos Biofach celebra este ano a XXXIII edición, combinada con Vivaness, a Feira Internacional do Coidado Persoal Natural e Orgánico. Trátase do tándem feiral de Núremberg recibido con grande entusiasmo polo mundo ecolóxico, como demostran os datos da última edición (2020), que convocou  3.738 expositores.

A cita será entre o 26 e o 29 de xullo no Exhibition Centre Nuremberg e, por terceiro ano consecutivo, será a Federación Española de Industrias de Alimentación e Bebidas (FIAB), co apoio do Ministerio de Agricultura, Pesca e Alimentación (MAPA), a que organizará o pavillón español. Nel estarán presentes varios operadores galegos certificados polo Craega: Refix, Conservas del Noroeste (Connorsa), Avilugo, Lacto Baltar, Camemorcol, Mieles Anta, Conservas Ortiz e Porto-Muiños

Tras o encontro virtual por mor da pandemia, a feira alemá regresa cun completo programa de actividades: seminarios, workshops e conferencias sobre diversos temas de actualidade. O Congreso, que terá lugar paralelamente, é desde hai un tempo un foro importante para o sector biolóxico, entre outras cousas porque é onde se amosan as cifras e os feitos máis actuais acerca do seu desenvolvemento.

Todos os detalles da feira, nesta ligazón.

Os Premios de Excelencia á Innovación das Mulleres Rurais inclúen novidades para a presente edición

Imaxe da edición celebrada en 2021

Como cada ano, o Ministerio de Agricultura, Pesca e Alimentación (MAPA) convoca os Premios de Excelencia á Innovación das Mulleres Rurais, unha iniciativa que busca poñer en valor o traballo e os proxectos de vida das mulleres do rural e o imprescindible labor que realizan para manter e revitalizar estes territorios.

A convocatoria da 13.ª edición contará cunha dotación de 150.000 euros e publicarase nos próximos días.

CATEGORÍAS

Recoñeceranse proxectos excelentes, orixinais e innovadores de catro categorías:

  1. Excelencia á innovación na actividade agraria
  2. Excelencia á innovación na actividade pesqueira ou acuícola
  3. Excelencia á innovación en diversificación da actividade económica no medio rural ou zonas costeiras rurais
  4. Excelencia á comunicación

NOVIDADES

Este ano poñeranse en marcha algunhas novidades, como a ampliación do ámbito xeográfico dos premios para incluír proxectos localizados en concellos de menos de 5.000 habitantes. Ao igual que a definición de “zonas pesqueiras rurais”, que engloba os concellos de menos de 30.000 habitantes nos que se realiza actividade pesqueira ou acuícola. A categoría “excelencia á innovación na actividade pesqueira ou acuícola” abrangue todas as candidaturas relacionadas con este ámbito.  Para as propostas das persoas físicas, substitúese o requisito de que a persoa teña o seu domicilio no medio rural para que sexa o proxecto ou actividade económica a que se atope nesta área ou, no seu caso, en zonas pesqueiras rurais.

Toda a información na web do Ministerio

Nova convocatoria dos Premios Alimentos de España

Como cada ano, os Premios Alimentos de España buscan darlles recoñecemento aos profesionais ou entidades que contribúen a impulsar este sector tan importante na economía. O Ministerio de Agricultura, Pesca e Alimentación (MAPA) promocionará os alimentos agroalimentarios españoles na XXXIV edición, á que se poden presentar as solicitudes ata o 30 de marzo.

Este certame ten por finalidade dar visibilidade ás accións levadas a cabo por profesionais, entidades e empresas que participan na cadea alimentaria, os traballos de innovación e investimento tecnolóxico, as estratexias de comercialización nacional e internacional, así como accións que favorezan a difusión, coñecemento e promoción dos alimentos españois.

MODALIDADES 

  • Premio Alimentos de España á Industria Alimentaria
  • Accésit á Iniciativa Emprendedora
  • Premio Alimentos de España á Produción Ecolóxica
  • Premio Alimentos de España á Internacionalización Alimentaria
  • Premio Alimentos de España Produción da Pesca e da Acuicultura
  • Premio Alimentos de España de Comunicación
  • Premio Alimentos de España á Restauración
  • Premio Extraordinario Alimentos de España

Todos os participantes nestes premios deberán cumprir os requisitos de cada modalidade, segundo se recolle na orde AAA/854/2016, do 26 de maio pola que se establecen as bases reguladoras da concesión dos Premios Alimentos de España. 

Máis información e solicitude

O consumo, o punto débil da produción ecolóxica

Europa fai unha aposta pola agricultura ecolóxica e mostra diso son o Pacto Verde, o novo marco legal e a futura Política Agrícola Común (PAC). España é o país europeo con máis superficie ecolóxica, 2,44 millóns de hectáreas no 2020, da UE e o terceiro a nivel mundial. A pesar diso, a día de hoxe só o 10 % da superficie agrícola española se dedica a producir alimentos orgánicos.

O obxectivo fixado pola Comisión Europea está no 25 % de superficie sustentable para 2030, con todo, o “punto débil” do sector ecolóxico é o consumo e así o afirma o conselleiro principal da Dirección Xeral de Agricultura e Desenvolvemento Rural da CE, Diego Canga. A media comunitaria sitúase en 84 € per cápita, pero en España está en 53,41 €, segundo datos de 2020.

O sector ecolóxico español non se mostra conforme con todos os cambios que se estableceron en Bruxelas e en Madrid para o futuro da súa actividade. En liñas xerais, é prudente sobre que se poida conseguir en Europa o Modelo Agroalimentario Ecolóxico no horizonte 2030 se non vai acompañado de máis fondos públicos tanto para a produción como para o transvasamento de agricultores convencionais ás prácticas ecolóxicas certificadas ou o impulso do consumo de alimentos bio.

O Ministerio de Agricultura, Pesca e Alimentación (MAPA) publicou o pasado mes de decembro a proxección dun “escenario sectorial” no suposto de cumprirse que o 25 % da superficie agraria útil (SAU) do España estivese baixo o modelo de produción ecolóxica. Cabe destacar que ao longo do presente ano, o MAPA terá en marcha a nova “folla de ruta nacional” para a agricultura ecolóxica, con medidas prioritarias, como o incremento da promoción para fortalecer o consumo interior e a elaboración de informes e estatísticas para a toma de decisións dos operadores.

Montserrat Escutia, secretaria de Vida Sana, recoñeceu que agora é un “momento histórico” para cambiar o modelo de alimentación europeo da man das estratexias “Da granxa á mesa” e “Biodiversidade do Pacto Verde”. “Sobre o papel, todos saben na UE que o modelo sobre consumo de proximidade e de tempada, desperdicio, envases e produción ecolóxica ten que cambiar, pero, cando chegamos a España, chocamos cun muro”, sentenciou. Así mesmo, mencionou a importancia da agricultura ecolóxica para a fixación da poboación nova e de mulleres no medio rural, xa que a idade media nesta actividade é moito menor que na agricultura convencional.

Reportaxe completa: “Somos Agro”,  La Voz de Galicia

O gasto en produtos ecolóxicos increméntase un 7 % con respecto ao ano anterior

O Ministerio de Agricultura, Pesca e Alimentación (MAPA) publicou o informe Análise da caracterización e proxección da produción ecolóxica española en 2020. Nel demóstrase que este sector continúa co seu intenso crecemento e configúrase como un importante ámbito de consumo diferenciado dentro do conxunto do sistema alimentario español.

O gasto dos consumidores españois en produtos ecolóxicos alcanzou no ano 2020 os 2.528 millóns de euros, o que supón un incremento do 7 % respecto do ano anterior. Así mesmo, a porcentaxe de gasto en alimentos eco creceu un 10,3 % respecto de 2019. O gasto por persoa e ano chegou aos 53,41 euros, un 6,10 % máis.

O ministro do MAPA, Luis Planas, considera que o crecemento continuado do sector ecolóxico en España é froito da súa profesionalidade, grande experiencia e clara visión de futuro. Ademais, constitúe unha enorme satisfacción colaborar no impulso deste sector, que conta cunhas boas perspectivas de crecemento nos próximos anos.

ESPAÑA, ENTRE OS DEZ PRIMEIROS PAÍSES DO MERCADO MUNDIAL

De acordo cos datos do estudo, España ocupa a novena posición no mercado mundial dos produtos ecolóxicos por valor total das vendas ecolóxicas. En 2020, a distribución organizada comercializou o 54 % dos produtos ecolóxicos aos consumidores españois, seguida do comercio especializado, co 30 %, e o resto das canles (16 %). Así mesmo, as exportacións alcanzaron os 1.165 millóns de euros, o que supón un incremento do 17 % respecto ao ano anterior.

En canto a operadores, en 2020 eran 50.047, que desenvolveron un total de 53.325 actividades ecolóxicas. Por actividade, destacan os 44.493 operadores de producións agrarias, os 5.561 elaboradores e transformadores, e os 2.503 comercializadores, aos que habería que engadir outras tipoloxías como importadores e exportadores, acuicultores e outros.

Informe completo dispoñible para a súa descarga

Planas presenta a campaña de Alimentos de España “Somos eco-lóxicos”

Este mércores preséntase a nova campaña de Alimentos de España “Somos eco-lóxicos”, para apoiar a produción ecolóxica. O acto terá lugar na Estación de Chamartín (Madrid) ás 10:00 horas e estará presidido polo ministro de Agricultura, Pesca e Alimentación, Luis Planas, e será unicamente de forma presencial.

Durante o evento haberá un faladoiro sobre a situación da agricultura ecolóxica e o seu futuro, moderada pola catedrática da Universidade Politécnica de Valencia Dolores Raigón e na que participarán o presidente de Ecovalia, Álvaro Barrera; a presidenta da Asociación Vida Sana, Ángeles Parra; o vicepresidente de Intereco, David Samper, entidade da que somos socios;  a presidenta da Sociedad Española de Agricultura Ecológica/Agroecología (SEAE), Concepción Fabeiro, e o presidente da Asociación Española de Elaboradores y Comercializadores Ecológicos (ASOBIO), Joan Picazos.

O 9 de abril finaliza o prazo de presentación para os Premios Alimentos de España 2020

No teu desenvolvemento profesional dentro da produción ecolóxica prestas especial atención á biodiversidade, ó desenvolvemento rural, ós recursos locais ou á innovación? Pois tes a opción de participar nos Premios Alimentos de España 2020 para a produción ecolóxica ou outras modalidades, enviando a túa solicitude antes do 9 de abril. Os participantes, xa sexan empresas, entidades ou persoas físicas ou xurídicas de natureza pública ou privada, deberán cumprir cos requisitos das bases reguladoras da concesión dos devanditos premios. A documentación presentarase a través do rexistro electrónico do Ministerio de Agricultura, Pesca e Alimentación.

Estes premios convócanse anualmente desde 1987 en recoñecemento aos profesionais ou entidades que contribúen a impulsar o sector tan importante na economía española. Os galardoados son elixidos por un xurado formado por persoas de recoñecido prestixio.

Documentación

Para poder participar será necesario cumprimentar e achegar a seguinte información:

  • Anexos I e II da convocatoria debidamente cumprimentados, dispoñibles na sede electrónica do MAPA
  • Unha memoria coas actuacións máis destacadas polas que se desexa optar ao premio (cun máximo de 10 páxinas, escritas con letra Arial, tamaño 12, e interlineado sinxelo de acordo co especificado no anexo IV da convocatoria)
  • A documentación complementaria que se estime oportuna, (ver o especificado no anexo IV da convocatoria)

Tanto a Memoria como a Documentación complementaria irán en formato dixital. As persoas físicas que opten por cumprimentar e presentar os Anexos I e II en papel, tamén presentarán, en formato dixital, a memoria e a documentación complementaria.

Modalidades

Establécense as seguintes modalidades:

  • Premio Alimentos de España á Industria Alimentaria
  • Accésit á Iniciativa Emprendedora
  • Premio Alimentos de España á Produción Ecolóxica
  • Premio Alimentos de España á Internacionalización Alimentaria
  • Premio Alimentos de España Produción da Pesca e da Acuicultura
  • Premio Alimentos de España de Comunicación
  • Premio Alimentos de España á Restauración
  • Premio Extraordinario Alimentos de España

Toda a información 

O MAPA convoca os Premios “Alimentos de España 2020”

Desde 1987, convócase anualmente o Premio “Alimentos de España” en recoñecemento aos profesionais ou entidades que contribúen a impulsar este sector tan importante na economía española. No ano 2020, estes premios alcanzan a súa XXXIII edición. Os galardoados son elixidos por un Xurado formado por persoas de recoñecido prestixio. Entre as modalidades que se establecen, inclúese o Premio Alimentos de España á Produción Ecolóxica.


PREMIO “ALIMENTOS DE ESPAÑA Á PRODUCIÓN ECOLÓXICA”
Enfocado a premiar as accións que dunha maneira global mellor integren a conservación da biodiversidade, o respecto ao medio ambiente, a potenciación do desenvolvemento rural e os recursos locais e a innovación tecnolóxica, redundando na obtención de produtos de calidade conformes ao método de produción ecolóxica, seguindo as directrices do Regulamento (CE) número 834/2007 do Consello, de 28 de xuño de 2007, sobre produción e etiquetaxe dos produtos ecolóxicos.
Poderán participar explotacións agrarias e empresas alimentarias, con sede principal dentro do territorio nacional e co certificado valido en vigor que acredite o cumprimento da normativa sobre produción ecolóxica.

OUTRAS MODALIDADES 
As outras modalidades son Premio Alimentos de España á Industria Alimentaria, Accésit á Iniciativa Emprendedora, Premio Alimentos de España á Internacionalización Alimentaria, Premio Alimentos de España Produción da Pesca e da Acuicultura, Premio Alimentos de España de Comunicación, Premio Alimentos de España á Restauración, Premio Extraordinario Alimentos de España.

PARTICIPANTES
Todos os participantes nestes premios, xa sexan empresas, entidades ou persoas físicas ou xurídicas de natureza pública ou privada, haberán de cumprir os requisitos de cada modalidade, segundo se recolle na orde AAA/854/2016, de 26 de maio pola que se establecen as bases reguladoras da concesión dos Premios Alimentos de España.
Non poderá optar aos premios ningunha persoa física ou xurídica na que concorra as circunstancias descritas no artigo 13.2 e 13.3 da lei 38/2003, de 17 de novembro, Xeneral de Subvencións e que fose sancionada, nos dous anos anteriores á data de presentación da solicitude, por infracción da lexislación en materia agroalimentaria.

PRAZO DE PRESENTACIÓN
O prazo máximo para a presentación de solicitudes será de tres meses contados a partir do día seguinte ao da publicación do extracto da convocatoria no Boletín Oficial do Estado. A data límite para a presentación de solicitudes finaliza o 9 de abril de 2021 (este inclusive).

Formulario

Información completa ⇒ Infórmate aquí 

Para calquera dúbida⇒premiosalimentacion@mapa.es