Arquivo da categoría: Axudas

 A Xunta destina 1,9 millóns de euros á agricultura ecolóxica

O Fondo Galego de Garantía Agraria (Fogga), organismo dependente da Consellería do Medio Rural, realizou as transferencias a 3.670 persoas beneficiarias das axudas de agroambiente e clima e de agricultura ecolóxica, correspondentes á campaña de 2021 da Política Agrícola Común (PAC).

Do montante, que suma máis de 14,3 millóns de euros, 12,3 millóns correspóndense ás axudas de agroambiente e clima, que benefician a 3.434 agricultores e gandeiros. En canto ás axudas de agricultura ecolóxica, o importe ascende a máis de 1,9 millóns de euros para 236 produtores.

AMPLIACIÓN DO PRAZO DE SOLICITUDE DA PAC 2022

A Xunta de Galicia ampliou ata o 13 de maio o prazo de presentación da solicitude da PAC para este ano. A dotación para esta campaña é duns 210 millóns de euros, dos cales 170 corresponden a pagos directos e os restantes 40 a medidas de desenvolvemento rural, cun aumento de cinco millóns de euros respecto da anterior convocatoria.

A Xunta fixa as bases reguladoras para solicitar os fondos Nex Generation dirixidos á agricultura e gandería

O Diario Oficial de Galicia (DOG Núm. 84, do 2 de maio de 2022) publica as bases reguladoras de concesión das axudas aos investimentos en sistemas de xestión de estercos en gandería, á transformación integral e modernización de invernadoiros, aos investimentos en eficiencia enerxética e enerxías renovables e á aplicación de agricultura de precisión e tecnoloxías 4.0 no sector agrícola e gandeiro, no marco do Plan de recuperación, transformación e resiliencia, financiado pola Unión Europea a través dos fondos Next Generation.

O obxectivo é adoptar as reformas estruturais necesarias, alcanzando un nivel de investimento que promova o cambio no modelo de produción agrícola e gandeira con resultados beneficiosos para a sociedade, a economía e o medio ambiente.

As prioridades do marco xeral do Plan de recuperación, transformación e resiliencia permitiron a definición dunha liña de investimentos específica para darlles resposta ás necesidades de mellora da competitividade e sustentabilidade dos produtores de cultivo baixo invernadoiro nos sectores de hortalizas, flor cortada e planta ornamental, favorecendo así unha adecuada transición ecolóxica. Tamén se considerou conveniente apoiar investimentos, no ámbito das explotacións agropecuarias, encamiñadas a mellorar a eficiencia enerxética, así como a xeración de enerxía a partir de fontes renovables, en particular biogás e biomasa agrícola. Así mesmo, inclúese un programa de apoio dirixido á agricultura e gandería de precisión, que poden contribuír de maneira significativa á seguridade alimentaria, á inocuidad dos alimentos, e a promover unhas prácticas agrarias máis sustentables.

As solicitudes presentaranse obrigatoriamente por medios electrónicos a través dos formularios normalizados (anexos V, VIN, VII ou VIII) dispoñibles na sede electrónica da Xunta de Galicia.

Máis información

Modificacións na solicitude das axudas para a contratación de seguros agrarios

O Diario Oficial de Galicia publicou hoxe unha modificación da orde do 23 de decembro de 2021 (DOG núm. 8, do 13 de xaneiro de 2022), na que se establecen as bases reguladoras das axudas para o fomento da contratación de seguros agrarios na Comunidade Autónoma de Galicia.

Desta maneira, en canto á concorrencia das axudas, fíxase que non superará as porcentaxes máximas establecidas nas directrices comunitarias das axudas estatais ao sector agrario para atender posibles perdas causadas por desastres naturais, acontecementos de carácter excepcional, fenómenos meteorolóxicos adversos asimilables a desastres naturais, enfermidades animais, pragas vexetais e retirada e destrución de gando morto. Desta maneira, a subvención conxunta entre Enesa e a Consellería do Medio Rural non poderá exceder os límites: 65 % do custo da prima para seguros agrícolas e gandeiros e o 50 % no caso de explotacións acuícolas.

Ademais, no caso de seguros de retirada e destrución de animais mortos nas explotacións, a subvención conxunta non excederá o límite xenérico do 100 % do custo da prima do seguro no que respecta á retirada e o 75 % no tocante á destrución do devandito gando.

Cabe lembrar que o prazo de presentación abarca desde o 1 de xaneiro ata o 15 de novembro, segundo a liña de seguro que se trate, así como do tipo de produción asegurable.

Aberto o prazo de solicitude das axudas para a execución de accións de promoción exterior das empresas galegas

Co obxectivo de mellorar a competitividade das empresas galegas, o Diario Oficial de Galicia (DOG núm. 53) publicou as convocatorias de axudas a execución de accións de promoción exterior das empresas galegas (Galicia Exporta Empresas 2022), cofinanciadas polo Fondo Europeo de Desenvolvemento Rexional no marco do programa operativo Feder Galicia 2014-2020. O prazo de solicitude destas subvencións rematará o 26 de maio de 2022.

GALICIA EXPORTA EMPRESAS 2022

Diríxese a pemes con centro de traballo en Galicia, con polo menos 3 traballadores e serve para subvencionar actuacións de:

  • Campañas publicitarias no estranxeiro.
  • Elaboración de material promocional para a súa difusión en mercados exteriores.
  • Participación como expositor en feiras internacionais.
  • Visitas á sede da empresa en Galicia de clientes, importadores, distribuidores, medios de comunicación etc. do estranxeiro.
  • Actuacións de prospección no exterior (axendas de reunións, desenvolvemento de clientes, análise da competencia, seguimento de contactos, implantación promocional).
  • Xestión de acordos comerciais internacionais, certificacións, rexistros de marcas e patentes no estranxeiro.
  • Seguro de crédito á exportación.

Máis información

Aberto o prazo de axudas para reposición dos animais como consecuencia do sacrificio obrigatorio

A Consellería do Medio Rural establece as bases para a concesión de axudas de compensación complementarias e axudas para a reposición dos animais en explotacións de gando bovino, ovino e caprino, como consecuencia do sacrificio obrigatorio de gando en execución de programas oficiais de erradicación de enfermidades, e convócanse para o ano 2022.

Toda a información:

Orde do DOG n.º 36  de martes 22 de febreiro

Medio Rural publica a orde para solicitar axudas para a creación de empresas para as persoas argicultoras mozas

A Xunta de Galicia, a través da Consellería do Medio Rural, establece as bases reguladoras das axudas para a creación de empresas para as persoas agricultoras mozas, financiadas co instrumento de recuperación da Unión Europea (EURI), para o apoio aos investimentos nas explotacións agrícolas e para a creación de empresas para o desenvolvemento de pequenas explotacións. Están cofinanciadas co Fondo Europeo Agrícola de Desenvolvemento Rural (Feader) no marco do Programa de desenvolvemento rural (PDR) de Galicia 2014-2020.

Información completa: 

DOG n.º 27 de mércores 9 de febreiro

Aberto o prazo de solicitude das axudas para plans de mellora, incorporación de mozos e mozas ao agro e desenvolvemento de pequenas explotacións

O Diario Oficial de Galicia (DOG), núm. 27, 9 de febreiro, publica a orde da Consellería do Medio Rural pola que se convocan as axudas destinadas a plans de mellora nas explotacións agrarias, á creación de empresas por parte de agricultores novos e ao desenvolvemento de pequenas explotacións, cun orzamento global de 37,5 millóns de euros. 

Estas axudas, cofinanciadas co Fondo Europeo Agrícola de Desenvolvemento Rural (Feader) no marco do PDR de Galicia 2014-2024, teñen como obxectivo garantir a continuidade do tecido agrario, así como incrementar a competitividade das explotacións mediante a súa modernización.

Para a concesión das subvencións convocadas destínase un crédito de 37.500.000 euros, repartidos en 20 millóns de euros para investimentos nas explotacións agrícolas, confinanciados co Feader; 15 millóns para a creación de empresas para as persoas agricultoras mozas, financiados a través do instrumento de recuperación da Unión Europea (EURI), e 2,5 millóns para o desenvolvemento de pequenas explotacións, cofinanciados co Feader.

O prazo de solicitude é dun mes, contado desde o 10 de febreiro.

DOG completo

A Xunta convoca as axudas para investimentos en transformación e comercialización de produtos agrarios

A Consellería do Medio Rural estableceu as bases reguladoras das axudas para os investimentos en transformación e comercialización de produtos agrarios do período 2014-2020, cofinanciadas polo Fondo Europeo Agrícola de Desenvolvemento Rural (Feader), e convócanse para o exercicio orzamentario de 2022.

Para a concesión das subvencións convocadas destínase un crédito máximo total de 27.000.000 euros dos orzamentos de 2022, 2023 e 2024. O prazo de presentación das solicitudes para as subvencións desta convocatoria será dun mes contado a partir do día seguinte da publicación desta orde no Diario Oficial de Galicia, nú. 25, 7 de febreiro.  O prazo de presentación de solicitudes de préstamos garantidos desta convocatoria finalizará o día 30 de marzo de 2022.

DOG completo

A Xunta publica as bases das axudas para paliar os danos causados polo lobo e o xabaril

A Xunta de Galicia, a través da Consellería de Medio Ambiente, Territorio e Vivenda, publicou as bases reguladoras das axudas para paliar os danos producidos polo lobo e convócanse para o próximo ano 2022. Poderanse acoller a estas axudas as persoas físicas ou xurídicas titulares das explotacións gandeiras especificadas no documento e que fosen afectadas por ataques de lobos en Galicia.

O prazo de presentación para os danos comunicados entre o 1 de outubro de 2021 e a entrada en vigor desta orde será dun mes contado a partir da entrada en vigor desta orde. Para os danos ocasionados a partir da entrada en vigor desta orde, o prazo de presentación será dun mes contado desde o día seguinte á comunicación do ano.

Tamén publicou as bases reguladoras das axudas para paliar os danos producidos polo xabaril en cultivos agrícolas e convócanse para o próximo ano. Serán beneficiarias aquelas persoas titulares de explotacións agrarias onde constaten os danos aos cultivos agrícolas producidos por este animal, inscritas no Rexistro de Explotacións Agrarias de Galicia (Reaga) e as persoas titulares de explotacións agrarias de autoconsumo onde constaten os danos.

O prazo de presentación para os danos comunicados entre o 11 de outubro de 2021 e a entrada en vigor desta orde, o prazo será dun mes contado desde a entrada en vigor. Para os danos comunicados a partir da entrada en vigor, o prazo será dun mes contado desde o día seguinte ao da comunicación do dano ao teléfono 012.

A CE pídelle a España máis implicación en materia eco para acadar o obxectivo do 25 % en 2030

O pasado xoves 15 de abril asistimos á conferencia virtual na que se incluíu a presentación do Plan de acción ecolóxico europeo, retransmitida dende a web da Asociación Española de Elaboradores y Comercializadores Ecológicos Asobio coa colaboración de Vida Sana, SEAE e Intereco.

O evento, que concentrou máis de mil persoas, estivo coordinado por Joan Picazos, presidente da citada asociación, e nel interviñeron José Miguel Herrero Velasco, director xeral da Industria Alimentaria, MAPA; Diego Canga, conselleiro principal da Dirección Xeral de Agricultura e Desenvolvemento Rural na Comisión Europea, quen previamente ofreceu unha conferencia de prensa; Aina Calafat, técnica de SEAE Ecoregión Mallorca, quen presentou o modelo de biodistrito que se está a levar a cabo nas Baleares; e Marijo Imaz, técnica do concello de Orduña (Biscaia), quen deu a coñecer o sistema de compra pública de produto ecolóxico que se puxo en marcha no seu municipio. Ao final, Picazos trasladoulles aos participantes a rolda de preguntas presentadas polos asistentes.

A REVOLUCIÓN VERDE

Na apertura da xornada, Joan Picazos mostrouse convencido de que este plan vai constituír “unha revolución” e pensa que é “un antes e un despois no sistema agroalimentario e un impulso decidido cara a un sistema máis xusto, máis saudable e máis sostible”.” A execución deste plan parece que pode ser unha contribución ao crecemento económico, máis necesario que nunca, dirixido dende unhas liñas de máis sentido común e, máis concretamente, implica o desenvolvemento da axenda comunitaria no que se refire á produción ecolóxica en relación á estratexia ‘Da granxa á mesa’ co obxectivo coñecido por todos, tan ambicioso e tan importante, de alcanzar en 2030 o 25 % de superficie agraria en produción ecolóxica”, recordou. Entre os datos que destacou en concreto en materia de agricultura ecolóxica en España salientan os seguintes:

  • España gasta 2.400 millóns de euros en consumo eco, é dicir, algo más 50 euros per cápita.
  • O número de operadores aumenta de ano en ano: 50.000 empresas vinculadas profesionalmente ao sector eco na actualidade.
  • Con máis de 2,3 millóns de hectáreas, é o principal produtor europeo, pero a superficie ecolóxica tan só representa o 9,3 % do total e demostra o reto que se ten por diante ata chegar ao 25 % proposto en 2030.

 LIÑAS DE ACTUACIÓN PÚBLICAS

Tras a súa exposición, deulle paso á primeira intervención, a cargo de Herrero Velasco, quen puxo ao día sobre a estratexia nacional en agricultura ecolóxica. Presentou as liñas de actuación da Dirección Xeral de Agricultura Alimentaria, máis concretamente da subdirección específica en materia de agricultura eco, que está a elaborar unha folla de ruta para conseguir os obxectivos que marca a Unión Europea (UE). Entre outras iniciativas, citou a participación activa nos foros na UE, así como coas autoridades de control, impulsando o desenvolvemento e a transformación da agricultura convencional a eco. Así mesmo, fixo fincapé nos datos da evolución da agricultura eco e apuntou que “é difícil atopar nestes momentos un sector que medra a dous díxitos; por iso, o sector eco é unha illa: estase creando emprego, apostando pola gandería e agricultura eco, e as cifras se van incrementando, isto non é ao azar, senón que detrás hai persoas que loitan por esta ‘transformación verde”.

“OBXECTIVO: CHEGAR AO 25 % DE SUPERFICIE ECOLÓXICA NUNHA DÉCADA”

Tras salientar a importancia do plan, cedeulle a palabra a un dos creadores e impulsores deste documento, Diego Canga, quen explicou, paso por paso e lembrando que se inclúe no chamado Pacto Verde”, as estratexias fundamentais “Da granxa á mesa” e “Biodiversidade”. Ademais, remarcou o obxectivo posto en 2030: conseguir que o 25 % do solo agrícola da UE sexa destinado á agricultura ecolóxica e que aumente significativamente a acuicultura ecolóxica, tendo en conta que hoxe estamos no 8 %. Como conseguir eses 10 puntos máis é a base fundamental deste plan e sobre esta se centrou Canga na súa charla.

Entre os principais parámetros nos que se estrutura o plan, citou os seguintes:

  • Efectos positivos para o medio ambiente, clima, biodiversidade, benestar animal etc.
  • Efectos multiplicadores: incrementar a agricultura ecolóxica ten inmediatas repercusións positivas noutros obxectivos de ambas as estratexias arriba citadas.
  • Ata un 10 % máis do que se conseguiría extrapolando a partir das tendencias actuais.
  • Puntos de partida moi diferentes entre os Estados membros (dende un 0,5 % ata un 25 % de terras agrícolas destinadas a este tipo de agricultura): España sitúase nun 9 % da superficie, Bulgaria no 2 % e Austria xa está no 25 %.

Tamén fixo referencia ás recomendacións da PAC en materia de agricultura ecolóxica para España, como o reforzo das superficies, réximes adecuados de reconversión, o mantemento e a incentivación da crecente demanda dos produtos ecolóxicos na cadea alimentaria e na organización dos mercados. Neste sentido, apuntou que vai recibir case 20 millóns de euros para o programa de distribución de froitas, hortalizas e leite nos centros escolares e espera que unha cantidade se destine á agricultura ecolóxica, malia que é unha decisión que lles corresponde ás autoridades españolas.

Canga apuntou que España vai recibir case 20 millóns de euros para o programa de distribución de froitas, hortalizas e leite nos centros escolares e espera que unha cantidade se destine á agricultura ecolóxica

Entre as vantaxes do Plan, o representante europeo citou tres piares básicos: a estabilidade xurídica, fundamental para os agricultores que se plantean a conversión; substanciais incentivos financeiros (a PAC, Horizonte Europa, política de promoción agrícola) e a confianza pública nos produtos eco a través do recoñecemento público do logotipo ecolóxico.

Entre os inconvenientes, citou os diferentes puntos de partida entre os Estados membros e o feito de que “sempre hai risco de fraude”, polo que a confianza dos consumidores é decisiva.

A continuación describiu punto por punto as 23 accións que se inclúen neste proxecto, entre as que se poden salientar o seguimento da aplicación a nivel nacional dos plans para que se traduza nunha realidade, o reforzo da organización do propio sector, a implicación e a colaboración do sector privado en materia ecolóxica ou o apoio á investigación específica para que esta agricultura mellore e avance.

QUE É UNHA ECORREXIÓN?

Tras a presentación do plan, Picazos deu paso á exposición de Aina Calafat, técnica de SEAE Ecorregión Mallorca, quen contou que dende esta entidade están desenvolvendo o caso concreto da Ecorrexión en Mallorca. Tras explicar o concepto de `ecorrexión´, apuntou que hoxe existen 48 rexións en Europa co acordo firmado e 10 más en desenvolvemento. Despois, centrouse no exemplo de Mallorca no seu proceso de ecorrexión, que se plantea como unha grande oportunidade ante a situación socio-económica actual.

COMPRA PÚBLICA VERDE: O EXEMPLO DE ORDUÑA

A última en intervir foi Marijo Imaz, técnica do municipio vasco de Orduña (Biscaia), quen deu a coñecer a súa experiencia concreta na compra pública de produto ecolóxico, un proxecto que arrancou en 2000, nun municipio en crise naquel momento, e con moita destrución de postos de traballo, que apostou polo sector primario e pola transición ecolóxica ata a creación en 2006 do Servizo de Dinamización Local Agroecolóxico. Este servizo, entre outras cousas, puxo en marcha o reforzo de consumo-comercialización en circuíto curto, así como o proxecto “cociña municipal e compra pública verde”, a compra pública de alimentos ecolóxicos, de temporada e de proximidade, para xerar oportunidades entre os pequenos produtores e chegar aos consumidores. O tempo deulle a razón a esta estratexia e na actualidade as cifras a avalan tanto no aumento de superficie agraria en ecolóxico, como no que respecta aos produtores e aos consumidores en ecolóxico así como no investimento en alimentación ecolóxica nos comedores escolares. Picazos definiu o proxecto como “emocionante e espectacular” e cre que debe servir como exemplo á hora de traballar no futuro en materia de agricultura ecolóxica.

Vídeo íntegro da conferencia e máis documentación de interese

Documento íntegro do Plan