Comezamos 2023 co número de inverno da nosa Revista.
Ao longo de 32 páxinas recompilamos algunhas das actividades máis salientables do Consello ao final do pasado ano. Entre elas, podedes consultar a panorámica do que foi a nosa Xornada do 1 de decembro no Pazo de Feiras de Lugo, con motivo do noso 25 aniversario, que levou o título de “25 anos medrando co sector”, así como as entrevistas aos diversos relatores que participaron e fixeron posible o devandito encontro. Tanto as xornadas como as entrevistas dispoñen de cadanseu QR para que poidades visualizalas a través da nosa canle de YouTube.
“A reportaxe” está dedicada á explotación gandeira de leite Casa Codesal, que volveu ser medalla de ouro na categoría eco nos premios Exceleite; “Cociña eco...” volve da man do trío gastronómico Indo e Vindo, que nos trae un suxestivo menú invernal; “Faite Eco” fai a última chamada para participardes na campaña de difusión “Alimenta o futuro”; a “Axenda” adianta as feiras nas que esperamos estar presentes e, por fin, “Aliméntate bio” pecha este número co artigo asinado pola nutricionista Josefina Irles, quen nos narra o seu periplo para conseguir que no Hospital Xeral de Valencia, onde exerce como xefa Unidade de Dietética e Xestión de Hostalería, os pacientes teñan alimentos eco na súa dieta.