Arquivo da categoría: Noticias

O consumo, o punto débil da produción ecolóxica

Europa fai unha aposta pola agricultura ecolóxica e mostra diso son o Pacto Verde, o novo marco legal e a futura Política Agrícola Común (PAC). España é o país europeo con máis superficie ecolóxica, 2,44 millóns de hectáreas no 2020, da UE e o terceiro a nivel mundial. A pesar diso, a día de hoxe só o 10 % da superficie agrícola española se dedica a producir alimentos orgánicos.

O obxectivo fixado pola Comisión Europea está no 25 % de superficie sustentable para 2030, con todo, o “punto débil” do sector ecolóxico é o consumo e así o afirma o conselleiro principal da Dirección Xeral de Agricultura e Desenvolvemento Rural da CE, Diego Canga. A media comunitaria sitúase en 84 € per cápita, pero en España está en 53,41 €, segundo datos de 2020.

O sector ecolóxico español non se mostra conforme con todos os cambios que se estableceron en Bruxelas e en Madrid para o futuro da súa actividade. En liñas xerais, é prudente sobre que se poida conseguir en Europa o Modelo Agroalimentario Ecolóxico no horizonte 2030 se non vai acompañado de máis fondos públicos tanto para a produción como para o transvasamento de agricultores convencionais ás prácticas ecolóxicas certificadas ou o impulso do consumo de alimentos bio.

O Ministerio de Agricultura, Pesca e Alimentación (MAPA) publicou o pasado mes de decembro a proxección dun “escenario sectorial” no suposto de cumprirse que o 25 % da superficie agraria útil (SAU) do España estivese baixo o modelo de produción ecolóxica. Cabe destacar que ao longo do presente ano, o MAPA terá en marcha a nova “folla de ruta nacional” para a agricultura ecolóxica, con medidas prioritarias, como o incremento da promoción para fortalecer o consumo interior e a elaboración de informes e estatísticas para a toma de decisións dos operadores.

Montserrat Escutia, secretaria de Vida Sana, recoñeceu que agora é un “momento histórico” para cambiar o modelo de alimentación europeo da man das estratexias “Da granxa á mesa” e “Biodiversidade do Pacto Verde”. “Sobre o papel, todos saben na UE que o modelo sobre consumo de proximidade e de tempada, desperdicio, envases e produción ecolóxica ten que cambiar, pero, cando chegamos a España, chocamos cun muro”, sentenciou. Así mesmo, mencionou a importancia da agricultura ecolóxica para a fixación da poboación nova e de mulleres no medio rural, xa que a idade media nesta actividade é moito menor que na agricultura convencional.

Reportaxe completa: “Somos Agro”,  La Voz de Galicia

Fitur coñece a campaña “Galicia etiqueta calidade”

A Xunta de Galicia presentou a pasada semana na Feira Internacional de Turismo (Fitur 2022) de Madrid a nova campaña “Galicia etiqueta calidade”, impulsada pola Consellería do Medio Rural para divulgar o bo facer da xente do mar e do campo. Ademais, promoveu as 36 certificacións agroalimentarias de calidade que hai na comunidade galega, entre as que se atopa a agricultura ecolóxica.

O director da Axencia Galega da Calidade Alimentaria (Agacal), José Luis Cabarcos, foi o encargado de dar a coñecer a iniciativa que vai da man das estratexias sectoriais que ten en marcha a Xunta. Durante a súa exposición, Cabarcos puxo en valor os produtos de calidade galegos, os cales fan de Galicia un destino turístico e gastronómico por excelencia. Tamén lembrou que a marca Galicia Calidade contará cunha sección chamada “Galicia Calidade Alimentaria”. Este distintivo agrupará produtos con denominacións de orixe e indicacións xeográficas protexidas do campo e do mar, marcas de garantía como Galega 100%, as producións derivadas das razas autóctonas e o selo pescadeRías.

O director de Agacal deu a coñecer o mercado dixital oficial no que os produtores poderán vender estas producións establecendo contacto eles mesmos co consumidor. Trátase dun mercado online no que se poderán comercializar os produtos de excelencia de Galicia cun só clic.

Coñece máis sobre as 36 Experiencias de Calidade

Xa somos 10.000 nas nosas redes sociais!

A páxina de Facebook do Craega xa alcanzou os 10.000 seguidores e só podemos darlles as grazas a todas as persoas que formades parte disto. Aos operadores, produtores, tendas que comercializades os produtos certificados e a toda esa xente que merca os produtos e se interesa por coñecer máis sobre o noso labor.

Nestes últimos meses as nosas redes sociais foron gañando cada vez máis seguidores, posto que en Instagram superamos os 3.000 seguidores. Unha mostra de que a produción ecolóxica está medrando e calando na sociedade. Desde o Craega traballamos para darlles visibilidade aos nosos produtos, que contan coa certificación que lles dá seguridade aos consumidores de que teñen nas súas mans produtos de calidade.

Tamén no ano que pechamos hai uns días abrimos a conta de Tik Tok, que pouco a pouco vai medrando.

Grazas a todas as persoas que nos seguides nas nosas redes sociais e que apoiades o traballo que facemos. Agardamos seguir medrando neste 2022 e que cada vez sexamos máis.

O gasto en produtos ecolóxicos increméntase un 7 % con respecto ao ano anterior

O Ministerio de Agricultura, Pesca e Alimentación (MAPA) publicou o informe Análise da caracterización e proxección da produción ecolóxica española en 2020. Nel demóstrase que este sector continúa co seu intenso crecemento e configúrase como un importante ámbito de consumo diferenciado dentro do conxunto do sistema alimentario español.

O gasto dos consumidores españois en produtos ecolóxicos alcanzou no ano 2020 os 2.528 millóns de euros, o que supón un incremento do 7 % respecto do ano anterior. Así mesmo, a porcentaxe de gasto en alimentos eco creceu un 10,3 % respecto de 2019. O gasto por persoa e ano chegou aos 53,41 euros, un 6,10 % máis.

O ministro do MAPA, Luis Planas, considera que o crecemento continuado do sector ecolóxico en España é froito da súa profesionalidade, grande experiencia e clara visión de futuro. Ademais, constitúe unha enorme satisfacción colaborar no impulso deste sector, que conta cunhas boas perspectivas de crecemento nos próximos anos.

ESPAÑA, ENTRE OS DEZ PRIMEIROS PAÍSES DO MERCADO MUNDIAL

De acordo cos datos do estudo, España ocupa a novena posición no mercado mundial dos produtos ecolóxicos por valor total das vendas ecolóxicas. En 2020, a distribución organizada comercializou o 54 % dos produtos ecolóxicos aos consumidores españois, seguida do comercio especializado, co 30 %, e o resto das canles (16 %). Así mesmo, as exportacións alcanzaron os 1.165 millóns de euros, o que supón un incremento do 17 % respecto ao ano anterior.

En canto a operadores, en 2020 eran 50.047, que desenvolveron un total de 53.325 actividades ecolóxicas. Por actividade, destacan os 44.493 operadores de producións agrarias, os 5.561 elaboradores e transformadores, e os 2.503 comercializadores, aos que habería que engadir outras tipoloxías como importadores e exportadores, acuicultores e outros.

Informe completo dispoñible para a súa descarga

Feijóo anuncia a creación dun selo ‘Galicia Calidade Alimentaria’

O presidente da Xunta, Alberto Núñez Feijóo, anunciou a creación dun selo Galicia Calidade Alimentaria que englobará produtos agroalimentarios con excelencia recoñecida e afondará na súa promoción. Explicou que este distintivo agrupará “o mellor que dá o país, da man de produtores”. Estarán incluídos os produtos con denominacións de orixe e indicacións xeográficas protexidas, marcas de garantía como Galega 100 %, as razas autóctonas e o selo PescadeRías.

Este anuncio tivo lugar durante a presentación da campaña Galicia etiqueta Calidade no marco da I Mostra de Calidade Alimentaria. Feijóo lembrou que, para garantir o futuro dos produtores, a Xunta impulsa medidas como a Estratexia do lácteo e do viño, que xa está en marcha e a da carne na que están a traballar. Ademais, puxo como exemplo do enorme potencial co que conta o rural galego ao complexo de 100 ha do Pazo Quián, que é “espello dun territorio ordenado, dun rural no que convive a tradición e a innovación e que aposta pola formación”.

Dentro das actividades da I Mostra, onte celebrouse unha conferencia e showcooking sobre Ecocoiña, unha perspectiva turística dos produtos de proximidade e de calidade alimentaria galega, impartida pola directora do Centro Superior de Hostalaría de Galicia, Marta Fernández. O evento contou coa presenza do conselleiro do Medio Rural, José González, e do director da Axencia Galega da Calidade Alimentaria, José Luís Cabarcos. Ademais houbo degustación de varios produtos e música.

O Craega participa nun dos debates do ‘Foro Conversa’ de Cadena Ser

Cadena SER en Galicia ofreceu esta mañá unha nova edición do Foro Conversa, centrada no obxectivo número 12 de desenvolvemento sustentable da ONE. O evento foi moderado polo xornalista de Radio Galicia, Luis Iglesias, e nel estivo presente o secretario do Craega, Javier García, para falar sobre o labor que realizan desde o Consello e analizar algúns datos da produción ecolóxica.

Baixo a lema Legado 2030. A herdanza que deixas, a concelleira de Medio Ambiente do municipio de Santiago, Mila Castro, foi a encargada de inaugurar esta cita. Tras a súa presentación, Teresa Moreira, profesora de enxeñaría química da Universidade de Santiago de Compostela (USC), centrou a súa charla a pegada ambiental e explicou, entre outros aspectos deste tema tan actual, para que serve ou como se identifica.

Acto seguido, realizouse un debate sobre as producións responsables e as empresas pola sustentabilidade. Neste encontro interviñeron Leticia Rodríguez, directora de desenvolvemento sustentable de Viaqua; Ángeles Claro, directora de sustentabilidade de Jealsa, e Javier Domínguez, presidente de Sogama.

Tras un receso, o foro continuou coa intervención do chef Pepe Solla, quen falou sobre a cociña e gastronomía con desperdicio 0. Logo tivo lugar unha mesa redonda sobre “Unha cesta da compra sustentable”, da cal formaron parte Javier García, secretario do Craega; o responsable de sustentabilidade de Vegalsa, Ricardo Castro; a xestora de comunicación de Coca Cola, Gema Domínguez, e a xerente de mercado de abastos de Santiago, Marta Rey.

Para dar paso á intervención do representante do Craega, Luis Iglesias lembrou unha cifra: os máis de cen millóns de facturación que recadou a produción eco certificada en Galicia. A continuación, deulle a palabra a Javier, quen repasou as tres principais funcións do Consello, como son a certificación de producións ecolóxicas na nosa comunidade (desde a produción primaria, pasando pola elaboración e comercialización de produtos ecolóxicos, produtos para consumo humano e animal, excepto a pesca e caza extractivas); a promoción do consumo de produtos ecolóxicos e a formación e información da agricultura ecolóxica cara a consumidores, comedores escolares etc. Ademais, expuxo os principios da agricultura ecolóxica que avala o Consello: “Buscamos producir alimentos sans, que sexan respectuosos co medio ambiente e teñan en conta o benestar animal”.

Na mesa tamén se debateron temáticas candentes hoxe en día, como o abuso de plásticos nos envasados dos produtos. Respecto disto, o secretario de Craega apuntou que algúns “van ter que seguir sendo protexidos por algún tipo de envase para que cheguen protexidos aos nosos fogares”. En referencia aos motivos que levan aos consumidores a preferir produtos ecolóxicos, puntualizou que “hai uns anos, estes elixían os produtos eco porque eran bos para a nosa saúde, pero isto está a cambiar. Agora priman outros valores como que son bos para o medio ambiente”.

Durante a cita tamén dedicaron un espazo ao subsector da gandería, sobre o que o secretario lembrou que “todas as ganderías inscritas no Consello teñen que ter unha base territorial ampla. Unha das bases dos nosos gandeiros é limpar os montes, o que repercute de forma positiva cara aos incendios”. Por fin, en referencia ao custo dos produtos ecolóxicos, os expoñentes concordaron en que esta situación cambiou nos últimos anos e García indicou que “o diferencial, respecto dos produtos convencionais, foise reducindo. Tamén, ao conseguir os produtores un tamaño mínimo, poden colocar máis facilmente os seus produtos”.

Podedes ver o debate completo aquí

“O futuro pasa por ganderías con terras”

O pasado 11 de novembro Roberto Vilar e Rodrigo Vázquez, os dous condutores  do magazine que emite diariamente a Televisión de Galicia (TVG), recibiron no seu plató a José Luis Vaz, o presidente da cooperativa Verín Biocoop e propietario dunha explotación en ecolóxico con 80 reprodutoras da raza vianesa en Outeiro (Ríos, Ourense).

Este gandeiro de vocación chegou ao estudo do programa na súa moto, outra das súas paixóns. Tras relatar de xeito distendido as súas diversas viaxes polo mundo, centrouse no proxecto rural que emprendeu hai uns anos e en cales foron os motivos que o levaron a el. Segundo confesou, a pesar de estudar Filoloxía Inglesa e Información e Turismo na Universidade de Vigo, tiña claro que quería volver para Outeiro, o lugar onde naceu, en Riós (Ourense).

Con 31 anos, ao seu regreso a esta aldea, decidiu tomar as rendas dun proxecto moi especial. “Os estudos servíronme para poder formarme como persoa e acometer iniciativas innovadoras”, apuntaba no programa. Tras montar a primeira cooperativa e ver que non funcionaba, apostou por seguir nese eido e creou Verín Biocoop.

A esencia dos seus produtos é que “coidamos a natureza e os nosos consumidores”. Ademais, recuperan razas que están en perigo de extinción, xa que teñen as cachenas, vianesas, frieiresas e limiás. Entre todos os socios da cooperativa suman na actualidade máis de 2.000 cabezas de gando en case 6.000 hectáreas de base territorial. En concreto, na súa gandería de Outeiro de Riós, ten uns 150 exemplares. Todos estes animais pastorean durante todo o ano e o pouco penso que consomen é ecolóxico. “No meu caso, cando saco os xatos onde as nais, doulles uns dous meses penso para conseguir unha boa carne”.

Ante a pregunta dun dos presentadores de se se pode vivir disto, José Luis teno claro: “Si. Hai que ter en conta que a PAC valora o feito de traballar coa biodiversidade, a redución de emisión de gases de efecto invernadoiro e demais, e páganos por iso. Ao final, representa un 40 % da nosa renda anual e fai que poidamos vivir dunha maneira digna”.

Este gandeiro en ecolóxico, que conta coa certificación do Craega, resalta que “o futuro pasa por ganderías con terras, que é antitético á gandería intensiva sen terra. O intensivo, cando pasen unhas décadas, non vai a ser sustentable. A potencialidade que ten Galicia para desenvolver ganderías extensivas é fundamental; temos un gran futuro e hai que ter criterio e decidirse por este tipo de explotacións, para que non haxa miles de hectáreas baleiras a monte que arden todos os anos”.

Ver reportaxe completa

A campaña do MAPA “Aquí somos eco-lóxicos. Nada que esconder” xa está en marcha

O Ministerio de Agricultura, Pesca e Alimentación (MAPA) deu a coñecer hoxe a nova campaña “Aquí somos eco-lóxicos. Nada que esconder”. Con este lema busca afianzar a confianza dos consumidores na excelencia e calidade dos alimentos ecolóxicos.

Durante a presentación desta iniciativa, o ministro Luis Planas, resaltou que esta campaña pon o acento na transparencia, a trazabilidade, a certificación e o etiquetado. Por iso, considérase fundamental que o consumidor perciba a certificación comunitaria da EuroHoja como un identificativo que asegura a calidade con total  garantía dos produtos ecolóxicos en cada etapa do proceso de produción. Para iso, hai ferramentas de certificación e etiquetado que actúan como o “carné de identidade” que axuda aos consumidores a diferenciar os alimentos ecolóxicos garantidos.

No acto tamén expuxo algúns datos, como que en España o 10 % da superficie xa é ecolóxica. “Isto coloca a España nunha posición privilexiada para poder cumprir co obxectivo da estratexia “Da granxa á mesa” de lograr un 25 % da superficie ecolóxica en 2030″.

Así mesmo, en termos de produción, os alimentos ecolóxicos ofrecen máis valor e mellor remuneración a agricultores, gandeiros e pescadores. É preciso concienciar a cidadanía dos beneficios que achega este tipo de alimentos. Planas explicou que esa “é a razón pola que o MAPA asume a tarefa de fomento do consumo nacional. Temos que conseguir, ademais, que os alimentos ecolóxicos estean ao alcance de todos os petos”.

O sector ecolóxico tamén formou parte deste evento de presentación e a el dirixiuse o ministro para agradecerlles a estreita colaboración na ideación e deseño desta campaña e animouno a continuar pola mesma senda de entendemento co obxectivo compartido de transformar o noso sistema alimentario e facelo máis sostible, xusto e equilibrado.

información completa

Percorremos a Galicia ecolóxica, falamos con Belén Toimil e moito máis na nosa revista de outono

Como cada outono, traemos un novo número da nosa revista que podedes visitar de maneira virtual. No número 58 facemos un percorrido narrado e fotográfico pola Galicia máis ecolóxica, a través das Ecoexperiencias que organizamos conxuntamente con Slow Food Compostela nos meses de setembro e outubro. Unhas rutas que nos levaron a coñecer varios operadores das catro provincias, nas que estivemos acompañados de influencers e deportistas recoñecidos.

Na nosa sección de entrevistas, desta vez, charlamos con Belén Toimil, lanzadora de peso que este ano participou nos Xogos Olímpicos de Toquio. Esta deportista galega, que nos acompañou na Ecoexperiencia de Pontevedra, cóntanos a importancia que ten a alimentación na súa vida e o seu coñecemento sobre os produtos ecolóxicos.

Tamén falamos con Marcos Vázquez Marey, produtor de Láncara (Lugo), quen nos explica como é a produción da mazá na Casa de Vázquez. Os diversos aspectos do cultivo, a onde se destina ou a rendibilidade que ten son algúns dos temas que trata na sección “De temporada”.

Rocío Garrido volve á cociña eco acompañada de Fran Jamardo e Coque Fariña, cos que forma Indo e Vindo Gastronomía. Tráennos dous pratos moi apetecibles para a época de outono.

Nesta nova edición, achegámosvos ás feiras que se levaron a cabo nos últimos meses, onde estivemos presentes, así como os diferentes cursos de formación ecolóxica que celebramos e outros que aínda están en activo. Tamén vos deixamos as últimas novas do sector e as próximas citas previstas de cara ao vindeiro ano.

Para pechar este número, en “Aliméntate bio” poñemos punto e final a campaña “Come Local”, na que colaboramos achegando alimentos para os menús escolares.

A revista está dispoñible en formato dixital.

Planas presenta a campaña de Alimentos de España “Somos eco-lóxicos”

Este mércores preséntase a nova campaña de Alimentos de España “Somos eco-lóxicos”, para apoiar a produción ecolóxica. O acto terá lugar na Estación de Chamartín (Madrid) ás 10:00 horas e estará presidido polo ministro de Agricultura, Pesca e Alimentación, Luis Planas, e será unicamente de forma presencial.

Durante o evento haberá un faladoiro sobre a situación da agricultura ecolóxica e o seu futuro, moderada pola catedrática da Universidade Politécnica de Valencia Dolores Raigón e na que participarán o presidente de Ecovalia, Álvaro Barrera; a presidenta da Asociación Vida Sana, Ángeles Parra; o vicepresidente de Intereco, David Samper, entidade da que somos socios;  a presidenta da Sociedad Española de Agricultura Ecológica/Agroecología (SEAE), Concepción Fabeiro, e o presidente da Asociación Española de Elaboradores y Comercializadores Ecológicos (ASOBIO), Joan Picazos.