Arquivo da categoría: Noticias

O monopolio do mexillón eco, Xanceda e leites bio con premio, na revista 52 do Craega

Con 2.500 km de costa, Galicia é líder absoluto en acuicultura bio de España. Salvo unha mínima porcentaxe procedente de Aldán (Cangas do Morrazo), da ría de Arousa saíron as 3.124 toneladas que o Craega rexistrou en 2018, tal e como se desprende do último informe do Ministerio de Agricultura. 

A revista 52 do Consello -xa dispoñible en formato dixital– leva este tema a portada e fala con Juan Carlos Juncal Piñeiro, presidente da Asociación de Mexilloeiros San Amaro, para lembrar como foi o despegue do sector e cales son as súas perspectivas.

Premio Empresarias de Galicia 2019, Cristina Fernández-Armesto, socia de Casa Grande de Xanceda e neta dos fundadores, protagoniza as dúas páxinas de entrevista. Tamén figuran no sumario os gañadores en ecolóxico dos Exceleite, Casa Codesal e Gandería Pear SC. 

Nesta edición non faltan as ecorreceitas, desta vez con Adrián Maneiro (cociñeiro do Hotel Attica 21 Coruña Matogrande e gañador do primeiro premio na IX edición Cociña con Castaña de Galicia), e o calendario de feiras sectoriais.

Descargar revista

Carrera Valín (Arqueixal): “O modelo intensivo tal e como se concibiu está caducado”

Xosé Luís Carrera Valín leva as rendas de Arqueixal, un proxecto integral que defende un modelo de vida sostible desde o corazón da Ulloa. Os seus lácteos non deixan de recibir parabéns, tanto do consumidor de a pé como dos xurados de reputados certames. O último vén da man da XXII Cata dos Queixos de Galicia. O que se fai en Palas de Rei (Lugo) mereceu o ouro na categoría DOP Arzúa Ulloa Curado.  

Para Carrera Valín, a produción ecolóxica marcará o referente para un cambio global. “Estou convencido de que o modelo intensivo tal e como foi concibido ata agora está caducado”. 

 

Os chefs Kike Piñeiro e Eloy Cancela sacan proveito ao produto eco no Centro Superior de Hostelería de Galicia

Kike Piñeiro, esquerda, e Eloy Cancela, chefs da Horta do Obradoiro, con José Ángel Regueiro Real durante o ‘show cooking’ celebrado no CSHG

Vacún, horta e mexillón con selo ecolóxico. Son os tres produtos que o Consello Regulador de Agricultura Ecolóxica de Galicia (Craega) presentou o pasado mércores aos alumnos do Centro Superior de Hostelería de Galicia (CSHG). O testemuño de José Ángel Regueiro Real, gandeiro de vacún e vogal na comisión de goberno do Craega, e o show cooking impartido polos chefs do restaurante compostelán A Horta do Obradoiro serviron para achegar algúns dos segredos dos alimentos certificados aos que no futuro van a tomar o relevo no sector hostaleiro.

Operador de vacún ecolóxico e integrante da dirección do Consello (en representación das empresas de produción animal), Regueiro Real encargouse de explicar aos alumnos de segundo e último curso de Gastronomía e Xestión en Cociña como funciona a súa gandería. Situada a oito quilómetros de Lugo, a súa explotación suma 25 vacas nodrizas. Tramitou a solicitude para converserte ao ecolóxico en 2003 e foi un dos primeiros en adherirse á entidade que controla e certifica este sistema de produción na comunidade. Falou das características do produto, pero tamén das dificultades que supón manter en pé un negocio no rural e, en particular, de atopar un oco nun mercado que non sempre sabe poñer en valor os alimentos de calidade.

Mentres Regueiro Real abundaba na faciana empresarial do sector, Kike Piñeiro e Eloy Cancela, do restaurante A Horta do Obradoiro, preparaban un menú a base de produtos ecolóxicos no CSHG que posteriormente os estudantes degustaron. Cuscús de coliflor con cabaza asada, guiso de mexillón tigre e snack de vacún ecolóxico (con xarrete de tenreira).

A sobremesa foi un dos momentos máis especiais do show cooking. Co queixo e o mel como ingredientes estrela, os chefs deseñaron dunhas presentacións diferentes: rolo con crema de queixo e mel; e queixo de nabiza con mel fresco do panal.

SEMANA DE EXPLOTACIÓN. Durante o segundo trimestre do curso, no mes de marzo, os alumnos do CSHG terán ocasión de incluír os produtos ecolóxicos nos seus traballos fin de carreira. Como vén sendo habitual, os estudantes de último curso de Gastronomía e Xestión en Cociña terán que pechar o ciclo de formación desenvolvendo o proxecto empresarial dun restaurante con todos os aspectos que iso implica: definición do negocio, estudos de mercado e viabilidade; e posta en funcionamento. Finalmente o restaurante abrirase ao público xeral durante unha semana nas instalacións que o centro posúe na zona da Barcia.

A campaña do Craega ‘Somos Semente’ gaña un Premio Paraugas

A campaña do Consello Regulador da Agricultura Ecolóxica (Craega) Somos Semente vén de recibir un Premio Paraugas á Mellor Estratexia Dixital. Convocado polo Clúster da Comunicación de Galicia e entregado o pasado venres en Expourense, o certame pon en valor o traballo das empresas e creativos galegos.

O xurado decantouse pola campaña que asina a axencia Roi Scroll para dar a coñecer a marca Craega e a agricultura ecolóxica en Galicia. Concebido como un relato audiovisual de tres capítulos e con difusión exclusiva en redes sociais (Facebook, Twitter, Instagram e Youtube), o Consello apostou desta vez por unha fórmula revolucionaria co obxectivo de impulsar un movemento arredor da sector. Cun marcado compoñente emocional, a proposta afonda nos fortes valores do organismo (respecto polo medio ambiente, benestar animal, desenvolvemento rural, etc) e nas vantaxes que ten tanto para a saúde como para o tecido económico consumir alimentos ecolóxicos.

Con máis de 3,2 millóns de impresións e 764.841 visualizacións desde o mes de outubro ata hoxe, a campaña no seu conxunto está a colleitar excelentes resultados. É a primeira vez que o Craega decide poñer en marcha un formato promocional con difusión exclusiva en soportes dixitais.

MÁIS DE MIL OPERADORES. O Craega botaba a andar en 1997 con só 11 operadores e 13,35 hectáreas de superficie certificada. Hoxe hai máis de mil inscritos e máis de 33.000 ha dedicadas ao cultivo ecolóxico. Os balances económicos soben ano tras ano e poñen de relevo o músculo dun sector que cada vez cobra máis peso dentro e fóra de Galicia. Co lácteo como eixo estratéxico, 2018 pechaba cun volume de vendas certificadas de 78,7 millóns de euros.

O Consello é a única autoridade de control que certifica este modelo de produción na comunidade. Co seu selo, é posible atopar produtos agrarios de orixe animal ou vexetal (transformados e non transformados) destinados á alimentación humana; pensos; material de reproducción vexetativa e sementes para cultivo; fermentos para o consumo humano ou animal; e produtos de acuicultura ecolóxica (peixes, algas e moluscos). O Craega non certifica pesca extractiva ou caza.

A campaña ‘Somos Semente’ e unha radiografía da castaña eco, na revista 51 do Craega

A revista 51 do Craega chega á caixa de correo dos operadores cunha edición especial que outorga todo o protagonismo a Somos Semente, a campaña publicitaria que acaba de lanzar o Consello para dar un pulo á agricultura ecolóxica en Galicia. O sumario da edición de outono tamén inclúe unha radiografía do sector da castaña. Ademais de realizar un balance sobre o seu cultivo, o traballo incorpora unha entrevista con Jesús Quintá, xerente de Alibós, e algunha que outra receita para sacarlle proveito na cociña.

A publicación conta desta vez coa colaboración da restauradora e blogueira Rocío Garrido Caramés para a sección de gastronomía bio. Da súa man chegan pratos como as croquetas de cabaciña e queixo ou o xarrete de Caldelá.

A entrevista a Evaristo Rodríguez, xerente de Adegas Moure, completa os contidos da revista. Comercializado baixo a marca Abadía da Cova, o seu viño ecolóxico conseguiu o Acio de Ouro nas Catas de Galicia 2019.

Para o público xeral, a revista está dispoñible en formato dixital

Preto dun cento de persoas participan nos cursos de compostaxe organizados polo Craega

Asistentes ao curso de compostaxe celebrado o 23 de outubro no pazo de Quián (Boqueixón). Foto: Craega

Cerca dun cento de persoas, entre operadores e público externo, asistiu aos cursos sobre compostaxe doméstica que vén de celebrar o Craega en colaboración coa Sociedade Galega do Medio Ambiente (Sogama). Impartido por persoal da entidade pública, os participantes tiveron ocasión de achegarse en dúas sesións presenciais ao proceso que permite transformar a materia orgánica xerada nos fogares en compost. En realidade, trátase dunha práctica natural de gran tradición, agora modernizada co emprego de recipientes específicos, os composteiros.

A primeira das charlas tivo lugar na sede que o Consello posúe en Monforte de Lemos o 16 de outubro. A segunda desenvolveuse o 23 do mesmo mes en Boqueixón, no novo domicilio do Craega. As xornadas formativas serviron para aclarar cuestións como a localización do compostador (debe estar en contacto coa terra para facilitar a entrada dos microorganismos descompoñedores), así como aspectos vencellados ao control de parámetros como o osíxeno, a temperatura e a humidade.

Despois de seguir atentamente as explicacións técnicas, os asistentes levaron para a súa casa os colectores a fin de poñer en práctica os coñecementos adquiridos. De 390 litros de capacidade e fabricados con materiais reciclados e reciclables, os 100 composteiros foron cedidos pola Consellería de Medio Ambiente (a través de Sogama) ao Consello. Con esta actividade formativa, o Craega culmina a súa adhesión ao Programa de Compostaxe Doméstica promovido pola Xunta.

O Craega lanza ‘Somos semente’ para impulsar o consumo de produto ecolóxico en Galicia

O Consello Regulador da Agricultura Ecolóxica de Galicia (Craega) acaba de poñer en marcha Somos semente, a súa primeira campaña de publicidade online. Concebido como un relato audiovisual de tres capítulos, o primeiro spot publicouse en Internet o pasado luns e hoxe mesmo sae á luz o segundo. O seu leitmotiv é grabar a marca Craega na mente do consumidor galego. Para iso, e por primeira vez desde que botou a andar en 1997, o organismo que controla e certifica a agricultura ecolóxica na comunidade aposta por un novo formato promocional con difusión exclusiva en redes sociais. 

“O noso gran reto segue a ser o mercado galego. Estudos propios demostran que o selo non se coñece. Apostamos por unha fórmula revolucionaria para crear un movemento arredor da agricultura ecolóxica que perdure no tempo”, explica Francisco López Valladares, presidente do Consello. Cun forte compoñente emocional, a campaña afonda nos valores do Craega (respecto polo medio ambiente, benestar animal, desenvolvemento rural, etc) e nas vantaxes que ten tanto para a saúde como para o tecido económico consumir alimentos certificados. 

Somos semente arranca en outubro co lanzamento dos tres vídeos nos perfís dixitais corporativos (Facebook, Twitter, Instagram e Youtube). Dispoñibles en www.somossemente.com, os contidos audiovisuais levarán en paralelo publicidade online que ten como cometido posicionar na Rede a marca Craega e os seus valores. A través dun relato coherente que irá saíndo á luz ao longo de todo o mes, as tres pezas audiovisuais servirán para debullar os piares básicos da agricultura ecolóxica. 

Ademais de explicar que é o selo e que significa a certificación, a campaña quere espertar a conciencia do consumidor galego e lograr que se comprometa co sector.  

En paralelo, desde o seo do Consello impulsaranse diferentes accións que van máis alá do soporte dixital. Nos vindeiros meses, as principais cidades galegas amosarán a nova imaxe do Craega en localizacións estratéxicas e no transporte urbano. Asemade, levaranse a cabo diversas actividades a pé de rúa para dar visibilidade aos produtos bio. 

Todas estas actividades difundiranse progresivamente na web www.craega.es, os perfís de Facebook, Twitter, Instagram e Youtube, o grupo de WhatsApp e tamén na revista corporativa do Consello. Con este conxunto de accións, a campaña procura visibilizar a marca Craega e un estilo de vida saudable a través do consumo de produtos ecolóxicos. 

MÁIS DE MIL OPERADORES. O Craega botaba a andar en 1997 con só 11 operadores e 13,35 hectáreas de superficie certificada. Hoxe hai máis de mil inscritos e máis de 33.000 ha dedicadas ao cultivo ecolóxico. Os balances económicos soben ano tras ano e poñen de relevo o músculo dun sector que cada vez cobra máis peso dentro e fóra de Galicia. 

Co lácteo como eixo estratéxico, 2018 pechaba cun volume de vendas certificadas de 78,7 millóns de euros. “O ecolóxico non é unha moda. O consumidor está cada vez máis concienciado e sabe que cada compra ten unha consecuencia: co medio ambiente, co rural, coa economía local e coa súa saúde”, recalca Valladares. 

Neste contexto de eclosión da ecoloxía, é importante –insiste o presidente do Consello- asegurarse de que se cumpren as regras. “Cómpre buscar sempre o noso selo, única garantía oficial de que un produto se axusta á normativa europea”, sinala. “O distintivo serve para protexer ao produtor fronte ao fraude, pero sobre todo ao consumidor”, insiste.

 

O Craega súmase ao programa de compostaxe doméstica de Sogama

Persoal técnico, pola esquerda, explica o funcionamento do composteiro en presenza de Javier García Lozano (secretario do Craega); Javier Domínguez Lino (presidente de Sogama); Gerardo Lagares (socio director de Orballo); Francisco López Valladares (presidente do Craega) e Ángeles Vázquez (conselleira de Medio Ambiente)

O Consello Regulador da Agricultura Ecolóxica de Galicia (Craega) dá un paso máis no seu compromiso co medio ambiente e vén de adherirse ao programa de compostaxe doméstica que xestiona a Xunta a través da Sociedade Galega do Medio Ambiente (Sogama). En virtude deste acordo, a entidade recibirá un cento de composteiros, de 390 litros de capacidade e fabricados con materiais reciclados e reciclables. Ademais, os seus asociados recibirán un par de cursos de formación sobre a posta en valor da materia orgánica e o uso dos colectores.

“A compostaxe é algo que xa se practicou desde sempre en agricultura ecolóxica. Estamos recuperando o que vén de atrás, o que facían os nosos avós. Ían ao toxo, botábano no corral e, despois con iso, araban as terras para o cultivo”, explicou hoxe en Paderne Francisco López Valladares, presidente do organismo. Acompañado pola conselleira de Medio Ambiente, Ángeles Vázquez, e o presidente de Sogama, Javier Domínguez Lino, percorreu a finca de Orballo, unha empresa certificada polo Craega que acaba de sacar adiante o primeiro té ecolóxico galego.

“Orballo é un bo exemplo de que as persoas novas teñen futuro no rural e que non precisan marchar á cidade”, sinalou López Valladares. Produtora de infusións de diverso tipo, arroces, herbas aromáticas e especias, a compañía con sede no concello coruñés de Paderne é unha das tres empresas galegas que conseguiu o certificado de Reserva da Biosfera a nivel nacional. Por iso, o primeiro dos cen composteiros que Sogama doa ao Craega destinarase a esta finca. “Co cambio climático, temos que preocuparnos máis de coidar o medio ambiente, o aire que respiramos, e tamén o noso chan, en particular os nosos acuíferos e aguas, por certo cada vez máis contaminados”; recalcou o presidente do Consello.

Con case medio millar de operadores, a produción vexetal –principal beneficiaria deste programa- representa un tercio da actividade do Craega. A maioría repártense entre Lugo e Pontevedra. Asemade, as vendas deste segmento acadan os 20,3 millóns de euros e acaparan a cuarta parte da facturación do organismo, tal e como e desprende do seu balance de 2018. 

A conselleira puxo en valor o compromiso ecolóxico que demostran as entidades adscritas a Craega, demostrando que desde o respecto ao medio ambiente tamén se poden impulsar negocios sustentables e rendibles. Ángeles Vázquez lembrou que grazas á compostaxe se poden lograr numerosos beneficios ambientais e económicos xa que, por termo medio, a bolsa negra de lixo dun fogar está composta nun 42% por materia orgánica.

“Se en vez de desbotar esa fracción orgánica a aproveitamos para xerar compost, como se facía tradicionalmente no rural galego, reduciremos os residuos, diminuiremos a emisión de CO2 e conseguiremos ademais fertilizantes de primeira calidade”, engadiu.

DOUS CURSOS. Coa colaboración de Sogama, o Craega celebrará un par de cursos sobre compostaxe o vindeiro mes de outubro. Con 50 prazas cada un e de carácter gratuíto, o primeiro terá lugar o mércores 16 (de 18 a 19 h.) na sede que o Consello posúe en Monforte de Lemos. Previsto para o día 23, o segundo terá en lugar no novo domicilio do organismo, en Boqueixón. Impartidos por persoal da Sociedade Galega do Medio Ambiente, as sesións están dirixidas principalmente aos operadores certificados. Se quedan vacantes, a convocatoria abrirase ao público en xeral.

A compostaxe doméstica consiste na reciclaxe de materia orgánica en orixe, convertíndoa nun abono natural con excelentes propiedades para o solo e que o propio produtor pode empregar na súa horta, xardín e terras de cultivo, en substitución dos fertilizantes artificiais.

Máis dun cento de persoas xogaron co Craega no festival Agrocuir da Ulloa

Os nenos foron o público máis activo na estrea da xincana ecolóxica do Craega

O Consello Regulador vén de poñer en marcha unha nova actividade para achegar a agricultura ecolóxica a públicos de todas as idades. O pasado 31 de agosto estreou no festival Agrocuir da Ulloa unha xincana que, ao longo de dez probas, serviu para debullar os conceptos fundamentais do sector. Máis dun cento de persoas, particularmente familias, percorreron o souto do Caracacho (Monterroso) na procura de respostas.

Entre outras cuestións, tiveron que descubrir como se identifica un alimento certificado polo Craega, cales son as condicións de vida dun animal ecolóxico ou que beneficios ten consumir produtos de tempada. Unha vez solventados todos e cada un dos enigmas, foron quen de cubrir o ecoencrucillado que lles proporcionaba a solución global da xincana.

O percorrido lúdico rematou na food truck que o Craega instalou na zona habilitada para tal fin pola organización do festival. Alí foi onde o chef monfortino Martín Mantilla deleitou aos participantes no xogo cunha merenda elaborada a base de produtos certificados.

O Craega estrea xincana ecolóxica no festival Agrocuir da Ulloa

Martín Montilla Rodríguez
O chef monfortino Martín Montilla Rodríguez

O Consello Regulador da Agricultura Ecolóxica de Galicia (Craega) estrea o sábado 31 de agosto a súa xincana ecolóxica no festival Agrocuir da Ulloa. O xogo consta de dez probas que permitirán aos participantes achegarse aos conceptos fundamentais da agricultura ecolóxica. Dirixida a públicos de todas as idades e de carácter gratuíto, a recompensa será unha deliciosa ecomerenda preparada polo chef monfortino Martín Mantilla.

A xincana arrancará ás 16.30 horas no souto do Caracacho (Monterroso, Lugo). A dinámica é moi sinxela. Unha vez inscritos, os grupos -de ata cinco integrantes- estarán en disposición de resolver diferentes incógnitas que sempre terán como pano de fondo a agricultura ecolóxica. Como recoñecer un produto certificado, cales son as vantaxes dos alimentos de tempada ou como se cría un animal en ecolóxico son algunhas das cuestións que haberá que debullar durante o percorrido. Ao longo das dez probas e nun período de arredor de media hora, os equipos terán que ser capaces de reunir as respostas do ecoencrucillado que lles proporcionará a solución global da xincana.

Para repoñer forzas despois de descifrar o quebracabezas, todos os que se anoten na actividade poderán degustar de xeito totalmente gratuíto unha ecomerenda na food truck que o Craega instalará no souto do Caracacho. De preparar os petiscos ocuparase o chef monfortino Martín Mantilla, a piques de inaugurar o restaurante Berso, no concello lucense de Sober, e colaborador habitual desta entidade.

Con este xogo, o Consello quere difundir os conceptos relacionados coa agricultura ecolóxica dun xeito lúdico, participativo e divertido. A xincana está concebida como un modelo integral que, ademais de promover aspectos teóricos vencellados ao sector, inclúe unha degustación de produto certificado.

FESTIVAL AGROCUIR. O festival que naceu hai seis anos en Monterroso é a primeira parada da ecoxincana do Craega. A celebrar entre o venres 30 o sábado 31 de agosto, o Agrocuir xorde no eido rural para defender a diversidade sexual e afectiva. De carácter interxeracional, reivindica valores como o ecoloxismo e o feminismo.

O programa inclúe proxeccións documentais, concertos, performance, obradoiros, contacontos e ata un partido de fútbol feminino. No apartado musical destacan as actuacións de Boyanka Kostova, Laura LaMontagne & Pico Amperio e Omiri.