Xa é oficial: aprazado ata 2022 o novo regulamento de produción ecolóxica

A partir do 2022, haberá un novo sistema de certificación en grupo para facilitar o acceso de pequenos agricultores

Ía entrar en vigor en xaneiro de 2021, pero finalmente Bruxelas decidiu aprazar a normativa de produción ecolóxica ata 2022 por mor da COVID-19, tal e como recolle o Diario Oficial da Unión Europea (DOUE). “A pandemia e a crise de saúde pública que orixinou representan un reto sen precedentes para os Estados membros e supoñen unha pesada carga para os operadores do sector”, argumenta o texto. A súa prioridade é agora manter a produción e os fluxos comerciais -continúa-, motivo polo cal “non poden prepararse ao mesmo tempo para a aplicación do novo marco normativo”.

Aínda que pode haber algún cambio nos actos delegados e de execución que se están a levar a cabo, as principais novidades do futuro Regulamento (UE) nº 1693/2020 -substituto do 848/2018- serían as seguintes:

  • Novos produtos certificados: sal, tapón de cortiza, aceites esenciais, lá, mate, cápsulas de seda, peles, cera de abella, follas de vide ou resinas naturais.
  • Novas especies animais: coellos e cervos.
  • Cambios na produción vexetal: refórzase a relación entre o cultivo e o solo. Por exemplo, permitirase o uso de material de reprodución vexetativo heteroxéneo e incorporaranse criterios máis transparentes para a autorización de novos produtos (praguicidas, fertilizantes, etc) na agricultura ecolóxica.
  • Certificación en grupo: é un xeito de que os pequenos agricultores poidan acceder á certificación, simplificando trámites administrativos e custos.
  • Produtos de importación: os produtores ecolóxicos de terceiros países terán que cumprir exactamente as mesmas normas de certificación que os operadores da UE (polo de agora só deben respectar as regras de “equivalencia”, é decir, sistemas semellantes, pero non idénticos).
  • Proximidade: estimularanse as canles de distribución curtas e as producións locais.

O obxectivo da CE é triplicar a superficie ecolóxica nunha década, de xeito que no horizonte de 2030 o 25% do terreo agrario da UE sexa orgánico. Unha meta que xa foi incluída no Pacto Verde Europeo e, en concreto, nas estratexias ‘Da granxa á mesa’ e ‘Biodiversidade 2030’.