Arquivos da etiqueta: #Eventos

Luis Planas mantivo un encontro co ministro de Alimentación e Agricultura de Alemaña en BioFach

O ministro de Agricultura, Pesca e Alimentación, Luis Planas, reuniuse durante BioFach co ministro federal de Alimentación e Agricultura, Cem Özdemir, para intercambiar opinións sobre asuntos de actualidade agroalimentaria.

No encontro, Planas manifestou o apoio de España ás iniciativas europeas en materia de produción ecolóxica, xa que contribúen á transición verde do sistema alimentario pola súa achega en termos de sustentabilidade social e ambiental. Remarcou a aposta decidida do Goberno por axudar a agricultores e gandeiros cara a unha agricultura cada vez máis sustentable que, sen dúbida, ten que ser rendible, porque non existe sustentabilidade sen rendibilidade.

VISITA AOS POSTOS DOS PRODUTORES GALEGOS

Luis Planas visitou o pavillón que o Ministerio de Agricultura, Pesca e Alimentación instalou en BioFach, feira de referencia mundial para a produción ecolóxica que se celebrou na cidade de Núremberg do 26 de xullo ata hoxe, onde puxo de relevo o carácter estratéxico do sector ecolóxico español, a quen reiterou o apoio do Goberno para aproveitar o seu gran potencial de crecemento nos próximos anos.

Planas dirixiuse aos representantes das 104 empresas españolas, distribuídas en 11 pavillóns, aos que asegurou que a súa presenza nesta feira está “moi xustificada”, xa que Alemaña é o primeiro mercado para os alimentos ecolóxicos españois. Nesa visita, o ministro achegouse ata os postos dos operadores galegos  eco co selo do Craega que asistiron a esta edición.

Ler nota completa

 

O Craega darase cita na Feira Biofach

A Feira Internacional de Produtos Orgánicos Biofach celebra este ano a XXXIII edición, combinada con Vivaness, a Feira Internacional do Coidado Persoal Natural e Orgánico. Trátase do tándem feiral de Núremberg recibido con grande entusiasmo polo mundo ecolóxico, como demostran os datos da última edición (2020), que convocou  3.738 expositores.

A cita será entre o 26 e o 29 de xullo no Exhibition Centre Nuremberg e, por terceiro ano consecutivo, será a Federación Española de Industrias de Alimentación e Bebidas (FIAB), co apoio do Ministerio de Agricultura, Pesca e Alimentación (MAPA), a que organizará o pavillón español. Nel estarán presentes varios operadores galegos certificados polo Craega: Refix, Conservas del Noroeste (Connorsa), Avilugo, Lacto Baltar, Camemorcol, Mieles Anta, Conservas Ortiz e Porto-Muiños

Tras o encontro virtual por mor da pandemia, a feira alemá regresa cun completo programa de actividades: seminarios, workshops e conferencias sobre diversos temas de actualidade. O Congreso, que terá lugar paralelamente, é desde hai un tempo un foro importante para o sector biolóxico, entre outras cousas porque é onde se amosan as cifras e os feitos máis actuais acerca do seu desenvolvemento.

Todos os detalles da feira, nesta ligazón.

“O sector ecolóxico é clave para o noso rural galego”

José Luis Cabarcos na súa visita ao stand do Craega na BioCultura A Coruña

Reproducimos a entrevista que recolle El Ecomensajero Digital (Asociación Vida Sana) a José Luis Cabarcos, director da Axencia Galega da Calidade Alimentaria (Consellería do Medio Rural), en recoñecemento ao apoio que esta entidade lle proporcionou a BioCultura A Coruña, celebrada por terceira vez na nosa comunidade. Esta reportaxe foi realizada no marco do devandito evento, que tivo lugar a comezos do pasado mes de marzo.

Entre outros datos, Cabarcos falou do incremento da superficie ecolóxica da comunidade galega na última década, que pasou dunhas 14.000 hectáreas no ano 2010 a máis de 32.000 no 2020. Así mesmo, fixo referencia a importancia do papel da muller neste sector: “A muller ten un peso moi importante no rural galego, en todos os sentidos. Por iso, é tamén normal que o teña dentro do ecolóxico”, afirmou.

Así mesmo, puxo en valor o feito de que a produción ecolóxica está a contribuír de maneira destacada “á creación de riqueza e emprego no rural, incidindo no coidado do noso territorio e na loita contra o cambio climático, na liña coas directrices establecidas”.

Ler entrevista completa

Aberto o prazo de solicitude das axudas para a execución de accións de promoción exterior das empresas galegas

Co obxectivo de mellorar a competitividade das empresas galegas, o Diario Oficial de Galicia (DOG núm. 53) publicou as convocatorias de axudas a execución de accións de promoción exterior das empresas galegas (Galicia Exporta Empresas 2022), cofinanciadas polo Fondo Europeo de Desenvolvemento Rexional no marco do programa operativo Feder Galicia 2014-2020. O prazo de solicitude destas subvencións rematará o 26 de maio de 2022.

GALICIA EXPORTA EMPRESAS 2022

Diríxese a pemes con centro de traballo en Galicia, con polo menos 3 traballadores e serve para subvencionar actuacións de:

  • Campañas publicitarias no estranxeiro.
  • Elaboración de material promocional para a súa difusión en mercados exteriores.
  • Participación como expositor en feiras internacionais.
  • Visitas á sede da empresa en Galicia de clientes, importadores, distribuidores, medios de comunicación etc. do estranxeiro.
  • Actuacións de prospección no exterior (axendas de reunións, desenvolvemento de clientes, análise da competencia, seguimento de contactos, implantación promocional).
  • Xestión de acordos comerciais internacionais, certificacións, rexistros de marcas e patentes no estranxeiro.
  • Seguro de crédito á exportación.

Máis información

Biocultura Galicia 2022, tres días de sinerxias ecolóxicas

Ofrecemos un percorrido polo que foi a terceira edición desta gran feira en Galicia, que por fin puido volver ao seu formato presencial. Organizada pola Asociación Vida Sana e celebrada no pavillón de ExpoCoruña, os días 4, 5 e 6 de marzo xuntáronse na cidade herculina preto de 200 expositores e 11.000 visitantes, cifras semellantes ao ano 2020, xusto antes da pandemia, as cales reafirman a boa saúde do sector.

Neste sentido, os nosos produtores amosáronse moi satisfeitos con esta experiencia por varias razóns: pola visibilidade, polo contacto co público e con outra xente do sector, “o que fai que se avance, se aprenda e se procure mellorar” e, por suposto, pola oportunidade de vender de xeito directo os seus produtos.

Foron un total de 18 empresas galegas certificadas en ecolóxico as que asistiron baixo o paraugas do Craega, que conviviron con cinco postos máis con stand propio, todos eles situados na zona azul, cor que representaba o sector da alimentación. Os visitantes puideron descubrir, e en moitos casos saborear, un sinfín de produtos con selo ecolóxico: conservas vexetais ou de peixe, produtos lácteos ou cárnicos, mel, cervexas, galletas, cafés, infusións, especias, doces, xeados, empanadas…

 

 

INAUGURACIÓN OFICIAL

A feira quedou inaugurada oficialmente o venres 4 ás 12:30 no espazo denominado “Zona Reserva da Biosfera”. Participaron no evento Pilar López, directora de Eventos de ExpoCoruña; Manuel Heredia, presidente do Consello de Dirección desta entidade (Dirección Xeral de Comercio); Ángeles Parra, presidenta da Asociación Vida Sana, organizadora da feira e directora de Biocultura; José Antonio Santiso, presidente da Reserva da Biosfera Mariñas Coruñesas; Cesáreo Pardal, presidente do Clúster de Turismo; José Luis Cabarcos, director xeral da Axencia Galega de Calidade Alimentaria (Agacal, Consellería do Medio Rural); Juan Ignacio Borrego, primeiro tenente de alcaldesa e concelleiro de Relacións Institucionais, Turismo e Seguridade Cidadá; José Ramón Rioboo, alcalde de Culleredo e deputado da Deputación da Coruña, Comisión de Transición Ecolóxica, Emprego e Territorio Sostible, e Xosé Luis Raposo, deputado da Área de Medio Ambiente da Deputación Provincial de Lugo.

Entre as diversas intervencións, destacamos a de José Luis Cabarcos, quen celebrou o forte crecemento que ten experimentado o sector ecolóxico nos últimos anos. Neste sentido, manifestou que estes datos “reflicten que a produción ecolóxica é unha actividade que xera riqueza e emprego no agro” e incidiu en que “a Xunta seguirá apostando por ela, tanto desde o punto de vista ambiental como desde a perspectiva económica”. Pechou a súa exposición lembrando que os produtores “son os verdadeiros protagonistas da feira”. > Máis información

  RONDA DE VISITAS EN APOIO DO SECTOR

Tras o acto de inauguración, o grupo de autoridades e organizadores da feira achegáronse aos diferentes postos para darlles apoio aos expositores e ás accións de promoción e divulgación programadas.

Pola súa banda, o equipo do programa da TVG Labranza tamén quixo facerse eco deste encontro e visibilizar o traballo do sector, polo que realizou unha ronda de visitas por todos os expositores co selo do Craega, incluíndo o noso propio stand, onde entrevistaron a Francisco L. Valladares, o noso presidente, quen, entre outros aspectos, lembrou a importancia do apoio do Consello ao sector para facer posible a asistencia dos produtores a este tipo de eventos.

Así mesmo, un grupo de influencers asistiu á feira co propósito de realizar tamén promoción dalgúns dos produtos ecolóxicos galegos: @silviafooding, @rogeliosantosqueiruga, @slowlife_slowtime, @engaliciamorate, @enxebreword e @lolaframbuesa.

Rocío Freire, vicepresidenta do Craega, posa co grupo de influencers asistentes á feira

A NOSA PEGADA NO PROGRAMA DE ACTIVIDADES

Ademais dos preto de 200 expositores que amosaron os seus produtos nesta feira (téxtil, cosmética, alimentación, bebidas…), Biocultura programou durante os tres días un amplísimo programa de actividades: música, degustacións de cociña ecolóxica, catas de viños e cervexas, charlas e mesas redondas. No pavillón de ExpoCoruña foron moitas e moi variadas as visitas das persoas interesadas en percorrer os expositores e apuntarse ás diferentes ofertas. O Craega tamén quixo poñer o seu gran de area coa programación de varias actividades.

A continuación, podedes ver algunhas instantáneas dos diferentes eventos nos que participamos:

  • Degustacións

Cata sensorial de viños, cervexas e outros licores ecolóxicos

Javier García, secretario do Consello, participou nesta cata, dirixida por David Pascual, presidente da Asociación Galega de Enólogos. No acto o secretario explicoulles os asistentes cales son os requisitos para poder certificar as viñas en ecolóxico.

Os produtos ecolóxicos galegos son tendencia

Foron tres degustacións conformadas por un menú composto dun produto de mar, outro de terra e unha sobremesa. Na primeira, cociñou Alf Mota (responsable do recetario do proxecto Menudatierra e das degustacións organizadas por Biocultura) e as dúas seguintes estiveron a cargo de Martín Mantilla (restaurante Berso, Sober).

Nos tres casos asistiu Javier García, quen ofreceu unha introdución na que resumiu brevemente en que consiste a certificación do Consello, cales son as características dos produtos ecolóxicos de terra e de mar e resaltou algúns dos seus beneficios, así como as diferenzas existentes respecto da alimentación convencional.

  • Charlas e mesas redondas

Taller de etiquetaxe de produtos ecolóxicos e Taller de consultas, novo regulamento europeo foron dos obradoiros, dirixidos por Manuel María Cancio, director técnico do Craega, e Ana Saiz, directora de Intereco. No segundo obradoiro participou tamén o cociñeiro Alf Mota.

Como aumentar o consumo de produtos ecolóxicos? A introdución dos produtos ecolóxicos nas compras públicas verdes

Nesta mesa redonda participaron Ramón J. Lamelo, responsable do Departamento de Promoción e Calidade Agroalimentaria de Agacal; Belén Rodríguez, coordinadora da Asociación Labregos Ecolóxicos de Galicia; Beatriz Ferreira, directora da Escola Infantil Municipal A Caracola e coordinadora do proxecto Ecocomedores, conxuntamente co GDR de Mariñas Betanzos; Iria Suárez, técnica Asoc. Desenvolvemento Rural Mariñas Betanzos, responsable do proxecto de Ecocomedores da Reserva de Biosfera de Mariñas Coruñesas e Terras do Mandeo. Moderou a mesa Diego Roig (Vida Sana).

Na súa intervención, Lamelo presentou as campañas orientadas a aumentar a presenza da alimentación ecolóxica en diversos espazos, como Come Local, destinada aos máis cativos, ou nas residencias de maiores; así mesmo, fixo referencia á nova Lei de calidade alimentaria e presentou o proxecto de invernadoiros para produción eco nos colexios rurais agrupados.

Mulleres ecoemprendedoras

A produción ecolóxica e a importancia da actividade das mulleres no medio rural galego como motor para evitar a despoboación foron os eixes principais desta mesa redonda, na que participaron Concepción Blanco, vogal do Craega (copropietaria de Casa Bértolo SC), María José Tallón (Trasdeza Natur), Lucía Afonso (Sovoral), Carmen Sánchez (Galuriña), María Isabel González (Traloagro) e Concepción Docampo (explotación agrícola), as cales expuxeron cadanseu proxecto rural e contrastaron as súas experiencias como empresarias no sector.

DESPEDIDA ATA A SEGUINTE EDICIÓN

O Craega dille adeus a esta feira ata a vindeira edición, prevista para marzo de 2023, e despídese orgulloso e satisfeito de formar parte deste evento, cuxo obxectivo primordial é o de darlles apoio e difusión aos seus operadores.

BioCultura A Coruña quenta motores

Asistencia á BioCultura de Madrid

Xa queda menos para o grande evento ecolóxico na nosa comunidade. Será do 4 ao 6 de marzo, na ExpoCoruña cando teña lugar a celebración de BioCultura, a feira de produtos ecolóxicos, consumo responsable e turismo sustentable. Co obxectivo de potenciar outro sector, ademais do ecolóxico, nesta edición galega o ecoturismo será o gran protagonista.

ACTIVIDADES

Nas actividades principais da feira porase o acento nesta dobre temática e centraranse na simbiose entre o mundo ecolóxico e o ecoturismo. Nese sentido, os showcooking servirán para achegar propostas de gastronomía ecolóxica vinculadas ao territorio e á oferta turística e, ademais, levarán a cabo catas de produtos de zonas para visitar en Galicia. Tamén contarán con charlas relacionadas con diferentes aspectos do coidado do medio ambiente e a sustentabilidade.

Haberá seccións dedicadas ao sector ecolóxico e os seus mundos, degustacións de produtos da zona, así como receitas tradicionais e tamén se presentarán actuacións de grupos emerxentes de folk, conferencias sobre ámbitos patrimoniais e territoriais e debates sobre agricultura e gandería ecolóxica, extensiva e local, vinculadas á tradición cultural de cada zona. Así mesmo, contarán cunha ampla gama de expositores, desde casas rurais con certificado, ata produtores de alimentos como algas ou xeados, entre outros. En definitiva, terá de todo, pero sempre relacionado co mundo eco.

PRESENZA DO CRAEGA

O Craega contará con stand propio dentro da cita, onde dará a coñecer o traballo que realiza diariamente para poder certificar e avalar os diferentes produtos de Galicia que se producen en ecolóxico. Ademais, acollerá a unha vintena de empresas certificadas.

PROGRAMA COMPLETO

O Craega deu a coñecer no II Foro de Innovación Produtiva do Sector Agrario o seu proxecto vinculado á carne de vacún eco

José Luis Cabarcos (esq.) e Manuel López Luaces, director e subdirector da Agacal

A Cidade da Cultura acolleu onte a segunda edición do Foro de Innovación Produtiva do Sector Agrario. O director da Axencia Galega da Calidade Alimentaria (Agacal), José Luis Cabarcos, e mais o subdirector, Manuel López Luaces, foron os encargados de inaugurar a cita, que se estendeu durante todo o día.

Este evento serviu para dar a coñecer diferentes iniciativas apoiadas cos fondos Feader e da Consellería do Medio Rural, para así impulsar a innovación no sector produtivo. Un comité de selección, presidido polo propio Cabarcos e coa presenza do investigador do Centro de Investigacións Agrarias de Mabegondo (CIAM) Juan Piñeiro, avaliou durante toda a xornada os diferentes proxectos que se expuxeron nun formato “áxil” (dispuñan de 10 minutos). O obxectivo era seleccionar varios que se identifiquen cunha clara vocación de transferencia cara ao sector agroalimentario galego, é dicir, coa finalidade de trasladar ao ámbito produtivo innovacións e melloras que necesita para incrementar a súa competitividade.

En total, presentáronse 16 proxectos pilotos, todos eles finalizados no ano 2021 e que se beneficiaron das axudas para o desenvolvemento de novos produtos, prácticas, procesos e tecnoloxías no ámbito agroforestal na convocatoria correspondente a 2019. Para avalialos, tivéronse en conta factores como o seu ámbito territorial, o seu orzamento, o problema que pretendía resolver ou a mellora que buscaba, os resultados obtidos, a súa aplicabilidade ao sector produtivo do rural galego ou os obxectivos de desenvolvemento sustentable que resolve.

ENTRE AS INICIATIVAS, VARIAS PROPOSTAS ECOLÓXICAS

Entre as iniciativas participantes, atopábanse varias vinculadas á produción ecolóxica, que citamos a continuación: 

O “Estudo de técnicas de produción para rentabilizar o uso de pataca en ecolóxico en Galicia” foi defendido por Laura Rodríguez, gandeira inscrita no Consello e membro da Unión de Empresarios, de Gandeiros e de Agricultores da Comarca da Limia (Adegal). Cómpre destacar que o Craega tamén formou parte deste proxecto.

Laura Rodríguez, integrante de Adegal

A seguinte iniciativa de carácter eco en subir ao escenario foron as “Bases para o cultivo ecolóxico de trigo autóctono en Galicia”, un traballo elaborado pola Panadería da Cunha, empresa tamén certificada en ecolóxico, que deu a coñecer Roberto López. 

Roberto López (Panadería da Cunha)

O “Desenvolvemento de producións avícolas ecolóxicas diferenciadas: carne e ovos como alimentos ecocardiosaludables”, é o título do estudo realizado por Sueiro y Lorenzo Avicultura Artesanal SL., que se encargou de amosar ante o público David Sueiro. 

David Sueiro, (Sueiro y Lorenzo Avicultura Artesanal SL.)

Finalmente, cara ao mediodía foi a quenda de Javier García, secretario do Craega, quen expuxo a proposta titulada “Desenvolvemento de produtos elaborados en base a carne de vacún de raza autóctona con certificación ecolóxica”. 

Javier García, secretario do Craega

NOVA CONVOCATORIA 

La iniciativa conta este ano cun orzamento de 2,4 millóns de euros e xa ten aberta a convocatoria de axudas para a execución de proxectos de grupos operativos da Asociación Europea de Innovación (AEI) con 6,1 millóns de euros de orzamento. Así, as persoas interesadas teñen ata o luns 28 de febreiro para solicitar as devanditas subvencións de forma telemática.

O Craega asistirá a BioCultura da Coruña o vindeiro mes de marzo

Craega participa habitualmente neste grande encontro de produción ecolóxica

BioCultura da Coruña celebrarase do 4 ao 6 de marzo na ExpoCoruña. No evento estarán presentes unha vintena de empresas que contan coa certificación do Craega. A cita estará marcada polas condicións sanitarias derivadas da pandemia.

Trátase da primeira feira de ecoturismo dentro de BioCultura, que xa ten un percorrido de éxito. Por iso, as administracións galegas reaccionaron de forma positiva e a feira conta co apoio da Xunta de Galicia, o Craega, a Deputación da Coruña, o Concello, Turismo Coruña e o Clúster de Turismo de Galicia, entre outros que seguro que se sumarán. Esta é unha oportunidade para Galicia que aposta por un turismo de calidade.

A directora, Ángeles Parra, afirma que esta nova edición ampliará a gama de posibilidades que lle ofrece ao público e será unha aposta polo ecoturismo. A cita cambia algunhas das súas dinámicas e, segundo Parra, o obxectivo é chegar á mesma xente de toda a vida, pero tamén sumar novos públicos. “O visitante poderá atopar o ámbito “biocultureiro” de sempre máis unha notable aposta polo sector do ecoturismo, no que Galicia é clave”.

En canto ás actividades, haberá seccións dedicadas ao sector “eco” e os seus mundos e toda unha serie de propostas centradas principalmente no ecoturismo. Haberá degustacións de produtos da zona, así como de receitas tradicionais e tamén se presentarán actuacións de grupos emerxentes de folk, conferencias sobre ámbitos patrimoniais e territoriais e debates sobre agricultura e gandería ecolóxica, extensiva e local vinculadas á tradición cultural de cada zona.

En canto á gama que ofrecerán, Parra afirma que é unha “paleta de posibilidades moi ampla. Imos ter expositores que serán casas rurais con certificado e hoteis urbanos nos que se cumpren todos os requisitos ambientais, ademais de ofrecer produtos ecolóxicos na súa carta…”. En definitiva, a directora afirma que haberá de todo, pero sempre en ecolóxico.

Información de VidaSana