Arquivos da etiqueta: agricultura ecolóxica

O Craega pecha 2020 superando os 108 millóns de euros en volume de vendas certificadas

De esq. a dta, Javier García (secretario), Francisco López (presidente) e José Luis Cabarcos (director xeral da Agacal)

Hoxe fixemos pública a  Memoria anual cos datos estatísticos correspondentes a 2020 nun acto celebrado no pazo de Quián (Sergude, Boqueixón). Na cita estiveron presentes o director da Axencia Galega de Calidade Alimentaria (Agacal), José Luis Cabarcos, xunto co presidente e o secretario do Craega, Francisco López e Javier García.

O presidente do Consello destacou que a pesar da pandemia, foi un bo ano para a agricultura ecolóxica

 

O presidente do Consello foi o encargado de abrir a sesión falando de que “ 2020, a pesar da pandemia, foi un bo ano para a agricultura ecolóxica e estes datos que recollemos son un pouco excepcionais”. Un dos datos que máis salientou foi o volume de produtos certificados e nese eido lembrou o compromiso que adquirira co conselleiro de Medio Rural hai un ano. “Marcamos o obxectivo de superar no 2020 os 100 millóns de euros, pois chegamos aos 108 millóns de euros”, apunta.  En canto ao incremento de número de operadores, incidiu que vai a seguir en aumento, “o crecemento do sector ecolóxico está medrando e agardamos que para o vindeiro ano os datos sexan mellores”. Para concluír na súa intervención agradeceulles aos consumidores dos produtos ecolóxicos galegos, “na miña curta experiencia, cando falas de Galicia é recoñecida polos seus produtos”. E engadiu que “desde o Craega queremos achegar o noso grao en coidar o medio ambiente e a saúde; por iso queremos traballar nesa liña, para ter unha Galicia máis sostible”.

Javier García debullou os datos que se recollen na memoria, empezando polos da superficie ecolóxica, que nunha década medraron un 126 %, ata acadar as 32.055 hectáreas. As provincias interiores de Lugo e Ourense acaparan o 82 % do total de superficie inscrita en agricultura ecolóxica: Lugo concentra máis da metade (52,6 %) da superficie, con 16.854 ha e Ourense é a provincia que máis medra respecto do 2019, 773 ha (9.404 ha totais). A única provincia que reduce é Pontevedra, -4.047 ha e quédase en 2.096 ha. García explica que isto foi debido, principalmente, “a que se deron de baixa dúas comunidades de montes”. Nas terras arables, resaltou que “o pasado ano había un déficit nas hortalizas frescas; porén, agora contamos con 215,8 ha, o que supón un 73,25 %”.

En canto aos operadores, 2020 péchase con 1.310 inscritos, un 10,83 % máis que o ano anterior. O sector galego ten dous polos territoriais: a provincia de Lugo leva o peso da produción con 369 operadores e a de Pontevedra o da industria, con 122. Cabe incidir en que os elaboradores case se cuadriplicaron na última década e hoxe representan o 25,8 % dos inscritos. Nos produtores, un dos datos máis importante é que, con 158 operadores, as provincias atlánticas concentran a totalidade da actividade acuícola, representando o 16 % dos produtores primarios.

Os lácteos seguen a ser o produto estrela en canto ao volume de vendas en ecolóxico

 

No volume de vendas, García explicou que se viu incrementado polo crecemento das empresas elaboradoras. O 2020 pechouse con 108.366.111 de euros e certificáronse 15,58 millóns de euros máis que o ano 2019, pese a pandemia. A produción animal leva o peso do Craega no que se refire ao volume de vendas certificadas. Con 63,12 millóns de euros, supón o 58 % do volume de vendas certificadas. A Coruña destaca como a provincia que máis medra en facturación. Despediu 2020 cunha cifra de 27,2 millóns de euros, un 30 % máis que no exercicio anterior.

Á marxe do leite, os ingresos do sector eco galego apóianse nas carnes (15,28 millóns de €), conservas de peixe (14,3 millóns de €) e nos ovos (7,8 millóns de €) como principais producións por volume. Ademais, esperta a produción vexetal, cun crecemento nos tubérculos, recolleita silvestre e na horticultura que tanto demanda o consumidor galego.

José Luis Cabarcos salientou que medrar nun ano complexo é unha mostra da aposta do consumidor cara ao consumo responsable

 

Para pechar o acto, o director de Agacal felicitou o Craega polos bos resultados obtidos. “En Agacal hai 36 selos de calidade que son 36 oportunidades para mellorar o sector produtivo con calidade diferenciada dentro de Galicia, o máis relevante é como medran estes selos e un deles é o do Craega, que para nós é moi interesante”. Engadiu que “cando falo das máis de 30.000 hectáreas que se están certificando polo Craega no único que penso é que hai unha oportunidade para medrar, xa que hai moita terra abandonada que é susceptible de convertela en ecolóxica”. En canto ao valor certificado, Cabarcos incidiu en que “medrar nun ano complexo é unha mostra da aposta do consumidor cara ao consumo responsable” e engadiu que a calidade dos produtos de Galicia é incuestionable e “asociar Galicia ao Craega e a ecolóxico é unha aposta importante”.

Memoria 2020

Unha decena de granxas eco ofrécense para acoller prácticas da FP Dual de Produción Agroecolóxica no IES de Arzúa

A falta de man de obra cualificada para traballar no campo fai que sexa un problema en granxas ecolóxicas e nas que non o son. Cada vez son máis os coñecementos técnicos e zoosanitarios que teñen que ter os traballadores dunha granxa gandeira ou agrícola.

Desde o IES de Arzúa propuxéronlle a Jesús Valiño, da Granxa Ecolóxica Figueroa, ser unha das empresas susceptibles de ofrecerlles prácticas aos alumnos e alumnas dun ciclo de FP Dual de Produción Agroecolóxica que teñen pensando poñer en marcha no centro. Valiño non o dubidou. Non foi o único ao que valoraron na comarca, na que naceron varias explotacións que apostan polo modelo ecolóxico. Pilar Castro de A Curiscada, outra das empresas que ofrecerán prácticas, resalta a importancia de atopar xente profesional e máis nunha zona tan produtora. Castro é socia da SAT Lactear, formada pola Ganadería Pear SC e Casa do Xordo, que tamén confirmaron a súa participación no proxecto.

Estas ganderías forman parte das dez empresas que, nun principio, subscribirán un acordo polos dous anos que dura o ciclo para ofrecerlles prácticas aos alumnos. E son elas mesmas as que seleccionarán os estudantes nunha entrevista psicosocial na que tamén estarán presentes docentes. A FP Dual está confirmada, mais falta coñecer as prazas que ofertarán e como será o proceso de acceso. A partir do 25 de xuño abrirase un prazo para presentar as demandas ata o 2 de xullo. Logo publicarase unha listaxe provisional e, tras pechar o período de reclamacións, será cando as empresas colaboradoras da comarca realicen as entrevistas das que sairán os alumnos admitidos para realizar esta FP.

Información de “Somos Agro”,  La Voz de Galicia

A nosa revista de primavera estrea cabeceira

Xa tedes á vosa disposición a edición dixital do número 56 da nosa revista, que ve a luz cun novo formato, e faino co balance do Barómetro de consumo ecolóxico 2020, cuxa presentación tivo lugar en Monforte, onde aproveitamos para conversar con José Luis Carbarcos, o director xeral da Agacal, quen nos falou do traballo que están a levar a cabo para potenciar a agricultura eco. Tamén recollemos unha completa reportaxe do que foi a conferencia sobre o Plan de acción ecolóxico europeo, que se retransmitiu desde a web da Asociación Española de Elaboración y Comercializadores Ecológicos (Asobio).

A reportaxe deste número está dedicada a cinco mulleres emprendedoras da Ulloa que crearon a marca de cosmética ecolóxica Muuhlloa a partir de dúas empresas certificadas polo Craega, Granxa Maruxa e Milhulloa.

Martín Mantilla, restaurador de Berso e colaborador habitual do Consello, é o protagonista da entrevista desta edición, na que nos relata, entre outras moitas cousas, como foron os comezos en pandemia e cal é o truco do seu éxito.

Na nosa sección de cociña eco podedes atopar nos fogóns á editora de La Cocina de mi Abuelo, Rocío Garrido, quen nos ensina a preparar un menú completo e delicioso e moi sinxelo!

E, coma sempre, recompilamos varias novas breves do sector dos últimos meses, así como os eventos que están próximos a celebrarse e novas convocatorias de premios.

A revista completa está dispoñible en formato dixital, preme nesta ligazón.

O Pazo Sabadelle: un espazo ecolóxico cheo de cultura galega

Xosé Figueiroa no balcón interior do pazo

A aldea de Sabadelle (Chantada) alberga un dos pazos históricos de Galicia, datado no século XII. A primeira documentación que consta é do ano 1251. Despois de pasar por varias xeracións, chegou ás mans da nai de Xosé Figueiroa e os seus tres irmáns, os actuais donos do recinto. Agora é un espazo familiar e de turismo, onde prima a natureza e o ecolóxico, xa que conta coa carne certificada polo Craega e está pendente de certificacións de máis produtos. Ademais, é un lugar onde se dan cita diversos artistas da cultura galega.

O pazo dispón de dúas habitacións de aluguer

No medio da natureza, entrar neste pazo do interior de Galicia é un luxo. Cadros, artigos únicos, libros referentes en Galicia e moita historia recollen as pedras do recinto. O espazo, na actualidade, conta con dous cuartos de alugamento. A forma de poder pasar unha noite entre cultura e natureza é por chamada directa ou a través de Booking, onde teñen unha boa puntuación e moi bos comentarios. “Sempre hai quen non sabe a onde vén; hai pouco, unha señora comentou que estaba todo xenial, pero que non tiñamos televisión e claro, non temos porque aquí vense a gozar do que hai e deste entorno”, explica o xerente do espazo.

RECUPERAR O PASADO COA AGRICULTURA ECOLÓXICA

Pertencen á Granxa Familiar da USC

Figueiroa conta que decidiron meterse na agricultura ecolóxica porque “é unha maneira de conservar o pasado. A min estes produtos recórdanme a cando eu era neno e, de feito, sufrimos as mesas consecuencias; un tomate da casa vendido ao prezo máis barato dos que hai no mercado, a nós sáenos rendible, pero non é así”. Todo o que producen é en ecolóxico, pero de momento só contan coa carne de vaca certificada polo Craega, aínda que no futuro confían en poder obter o selo do Consello en máis produtos. Dentro da agricultura ecolóxica pertencen á Granxa Familiar da Universidade de Santiago de Compostela, un proxecto coordinado por Carlos Ferrás. “Grazas a isto, eu agora conto con clientela de Zaragoza, Sevilla, Eibar, Barcelona, País Vasco… e son compradores que viron os produtos a través desta canle e a día de hoxe seguen mercando”, puntualiza.

Contan coa carne de vaca certificada polo Craega

No almorzo que lles ofrecen aos hóspedes poñen ata 17 pratos distintos. “Agora, polo coronavirus, poñemos menos cantidade porque o que sobra hai que tiralo, pero a xente pode repetir todas as veces que queiran”, explica Figueiroa. Entre eses pratos ofrecen froita, pan de Antas de Ulla, aceite, café, biscoito, un prato con xamón, chourizo e salchichón, manteiga, filloas con fariña de millo ou trigo, leite, crema de moras ou sabugueiro, queixo… “Servimos do que temos nós, do que nos dá alguén ou do que collemos a algunha empresa da zona, pero sempre en ecolóxico, por exemplo a manteiga é de Arqueixal, porque a min, cando a probei, me lembrou á que comía cando era pequeno, cunha calidade extraordinaria. Hai algo evidente, todo o que recorde ao de antes é bo, porque a xente das aldeas comía moi ben”. Engade que os turistas que visitan o espazo van “na procura de produtos de calidade; por exemplo, ás veces poñemos un ovo frito e sorpréndense do sabor único que teñen os ovos da casa”.

UN RECUNCHO DE CULTURA E SABORES GALEGOS 

Este recinto conta cunha sala habilitada para exposicións. Ao longo do ano organizan mostras de pintura ou artesanía, presentan libros ou cancións de autores da terra. “A idea é achegar a cultura galega a todo o mundo. Non nos interesa que veñan as grandes elites, senón a xente que está empezando ou que é da zona e quere visibilidade”, explica Xosé Figueiroa. “Non somos unha galería, o artista vende directamente”. No espazo hai pezas de artistas como Miguel Anxo Macía, Artiaga, Moxom, Luis Seoane ou Beatriz Palomero, entre outros moitos.  

En canto á música, o obxectivo é darlle promoción a todo tipo (pop, folk ou rock). E tamén lles dan visibilidade a poetas de antes como aos de agora. A partir de xuño, empezarase a rodar no pazo unha película sobre Rosalía de Castro. “A min interésame moito promover iso, que o público vexa que nas aldeas hai cultura, quitar a mala imaxe de que os que traballan con vacas non saben de máis cousas, por iso me gusta que a xente se interese por vir presentar os seus proxectos ou que o queiran utilizar para o que sexa”, destaca.

Durante as exposicións, ofrecen degustacións de produtos elaborados da casa como requeixo con marmelada, biscoito, froita, chourizo ou xamón. “Isto leva a que ao final do ano haxa xente na aldea e que teña vida; o turismo en Galicia debería estar pensado para que os visitantes chegasen a un país producindo, non en ruínas”, indica.

Nas paredes pendura a arte de antes e de agora

 

UN REFUXIO DURANTE A REPRESIÓN

Zona de entrada ao Pazo de Sabadelle

Este lugar está cheo de historia. Segundo teñen constancia, no pazo de Sabadelle naceu o bispo Agustín Lorenzo, que exerceu en Salamanca e está enterrado aló. “El mandou construír a actual igrexa que temos na aldea porque a que había, lle parecía pequena. O cariño que tiña por isto fixo que quixese que o seu corazón fose enterrado aquí, segundo contan, e de feito hai unha placa na entrada do templo que así o pon”, indica.

Este pazo acolle relatos fermosos e tráxicos. “Miña nai dicía que antes da Guerra Civil, meu tío a levaba sentada no arado e ía asubiando, despois dela nunca máis volveu asubiar”, lembra Figueiroa. “Aquí escondeuse moita xente cando foi a represión, os netos desa xente non saben que estiveron aquí, e para nós iso é unha honra”, conta.

Con maio chega o momento de transplantar os cultivos de verán

Maio é un dos meses de máis actividade nas hortas familiares. Sementeiras, transplantes, primeiros tratamentos… sempre que o clima acompañe para a realización destas tarefas, xa que a inestabilidade propia da primavera se deixa ver en terras galegas. Aínda así, empezan a asomarse días agradables e de sol, que xa empeza a quentar, pero nesta zona aínda hai posibilidades de xeadas.

Neste mes xa chega o momento de transplantar no exterior os grandes cultivos de verán: tomates, pementos, leitugas, acelgas ou remolacha de mesa, entre outros.  Tamén xa se poden sementar tanto as cenorias como feixóns, cabazas, melóns, sandías… Por outra banda, séguense plantando cebolas e porros.

Nesta época do ano, en Galicia, os prados xa están preparados para a sementeira de millo. Co ensilado de herba xa moi avanzado, os agricultores preparan as terras para sementar. Neste caso, sementar millo doce pode ser unha alternativa, xa que é un cereal que se dá ben nesta zona.

Coa calor e a humidade é posible que aparezan diferentes fungos, sobre todo cando suban as temperaturas. Para combatelo é recomendable facer algún tipo de tratamento. Na agricultura ecolóxica hai diferentes armas para facerlle fronte a estas pragas, aínda que neste tipo de produción convén establecer unha previsión máis que unha curación, empregando axentes que eviten a entrada de enfermidades. A cera das abellas, xelatina, proteínas hidrolizadas ou a lecitina son algúns dos elementos que se usan para combater algunhas das pragas que afectan ás plantacións.

FROITAS DESTE MES

Cada vez queda menos para gozar das froitas frescas e doces do verán como son os melóns ou sandías de momento, é o tempo das nésperas, un dos primeiros árbores que frutifica nesta tempada. Ademais, xa se empezan a saborear os amorodos das hortas e tamén xa se ven algunhas cereixas.

 

A Rede Rural Nacional ten en marcha un ciclo de encontros entre emprendedores rurais por España

O Ciclo de Encontros entre Emprendedores Rurais, organizado pola Rede Rural Nacional a través do programa de Antenas Rexionais chega á súa recta final e as últimas xornadas terán lugar na vindeira semana.

Trátase dun ciclo de 17 xornadas de intercambios de experiencias entre emprendedores e persoas con inquietudes empresariais do medio rural de cada unha das comunidades autónomas españolas.

Cabe destacar que estes eventos son online, gratuítos e abertos para todas as persoas interesadas na temática de dinamización e emprendimento no medio rural. O obxectivo é tratar de dar a coñecer as problemáticas concretas que xorden á hora de pór en marcha un novo negocio, así como as súas posibles solucións, e mostrar os diversos sectores nos que se pode emprender no medio rural. Para iso, estas xornadas dividíronse en dúas mesas redondas: unha, de proxectos emprendedores máis incipientes, e outra, de proxectos de emprendimiento máis asentados.

INTERCAMBIOS DE EXPERIENCIAS EN GALICIA

No caso da comunidade galega os encontros tiveron lugar esta semana. Na primeira mesa de experiencias, “Comezando a emprender no medio rural: problemas, dúbidas e solucións” participaron Gemma de la Montaña, da Asociación de Integración Social A-02 Velas, Asociación Náutica, Social, Ecolóxica e Sustentable, ecoturismo inclusivo (Ares, A Coruña); Cristina Bañobre Lomba, de Horta Daterra, agricultura e formación ecolóxica, aulas gastronómicas (Miño, A Coruña); Adriana Rodríguez Millán, de María Manuela Enoturismo (Boqueixón, A Coruña) e Alberto Uría, “O País do Abeyeiro” ecomuseo, apicultura (Pena de Nogueira, Lugo). A segunda parte centrouse en “Emprendedores no medio rural, unha aventura que merece ser contada”. Nela estiveron Guillermo Martínez, de Creación de Granxa Escola, dixitalización de Casa Grande de Xanceda, granxa ecolóxica (Mesía, A Coruña); Rosendo Luís Estévez Parada, de Trasdeza Natur, agricultura ecolóxica (Silleda, Pontevedra) e Patricia Mouro, de Naturmaz, parque de aventura, aeródromo (Mazaricos, A Coruña).

As sesións celebradas pódense ver na súa canle de Youtube

Información sobre as xornadas que quedan por celebrarse, así como os enlaces de inscrición para cada unha delas

O Congreso Ecolóxico Europeo 2021 celébrase online do 16 ao 18 de xuño

A 15ª edición do Congreso Ecolóxico Europeo será online, en vivo desde Lisboa, do 16 ao 18 de xuño de 2021 das 10:00 ás 15:30 horas. O evento, organizado por IFOAM Organics Europe e o seu socio portugués Agrobio, profundará no sector ecolóxico, as súas estruturas e o seu impulso político-lexislativo na UE.
A cita deste ano ten como obxectivo inspirar aos participantes ensinando iniciativas de representantes e expertos do sector ecolóxico. O evento reunirá oradores de alto nivel e moderadores de toda Europa para falar sobre os desenvolvementos de políticas en alimentos e agricultura ecolóxicos en seis sesións.

O PROGRAMA

16 de xuño:A nova PAC e o Pacto Verde Europeo” e “A agricultura ecolóxica en Portugal”

Despois da apertura do Congreso, a primeira sesión avaliará se a nova PAC e as ambicións nacionais, a través dos plans estratéxicos propostos, están en liña cos obxectivos da UE do Pacto Verde, en particular co obxectivo de alcanzar o 25% de terra ecolóxica para 2030. Despois da pausa para o xantar, discutirase a situación actual da Agricultura Ecolóxica en Portugal, profundando no traballo que se realiza sobre o terreo, vinculando a agricultura ecolóxica coa saúde e a biodiversidade.

17 de xuño: “Secuestro climático na agricultura” e “Sistemas alimentarios máis sustentables”

O segundo día comezará cun panel de discusión sobre se a «neutralidade climática» é un obxectivo realista para o sector agrícola e mesmo se é un obxectivo desexable, dado o enfoque actual na eficiencia e os riscos de compensacións con obxectivos de biodiversidade. Despois desta sesión, discutirase a transición cara a sistemas alimentarios máis sostibles. As iniciativas como o Plan de Acción para a Agricultura Ecolóxica, a contratación pública sustentable e outras iniciativas relacionadas coa estratexia “Da granxa á mesa” serán o tema central da sesión.

18 de xuño:O Novo Regulamento Ecolóxico da UE” e “O desenvolvemento rural”

O último día comezará cun panel de discusión sobre como se implementará o novo Regulamento Ecolóxico (UE) 2018/848 e de que maneira eses cambios técnicos axudarían a alcanzar os obxectivos da UE do 25% en terras en cultivo ecolóxico para 2030. Para finalizar o congreso, e antes do acto de clausura, terá lugar unha sesión sobre como iniciativas como os distritos ecolóxicos (ou biodistritos), os laboratorios vivos e as demostracións agrícolas poden contribuír ao desenvolvemento das zonas rurais e ao éxito do Plan de Acción para a Agricultura Ecolóxica.

Información e inscrición

Fonte da noticia

O Craega implícase por segundo ano consecutivo na campaña Come Local

A Consellería do Medio Rural, a través da Axencia Galega da Calidade Alimentaria (Agacal), lanza a segunda edición da campaña Come Local nos comedores escolares no marco da canle Mercaproximidade. A iniciativa será posta en marcha por Slow Food Compostela co obxectivo de impulsar o consumo dos produtos agroalimentarios galegos con indicativo de calidade: as DOP (Denominación de Orixe Protexida), IXP (Indicación Xeográfica Protexida) e a agricultura ecolóxica de proximidade. Esta última será levada ás mesas dos comedores escolares participantes grazas á colaboración do Craega, que achegará diversos alimentos certificados, como carne de polo e hortalizas, entre outros.

Esta campaña, que tivo unha grande acollida na súa primeira edición,  desenvolverase ata o 31 de outubro. Nesta ocasión contará con formación e asesoramento aos responsables dos comedores adherido, polo que non só serán degustacións de menús, senón tamén actividades formativas, tanto das características nutricionais dos alimentos como do impacto que supón o consumo de alimentos certificados na consecución dos Obxectos de Desenvolvemento Sostible da ONU.

ACTIVIDADES DA CAMPAÑA

  • Achegar aos comedores seleccionados, de forma totalmente gratuíta, produtos galegos con certificado de calidade. Darase a oportunidade de que nenos e nenas usuarios do comedor poidan degustar varios produtos dunha excelente calidade con orixe Galicia e cunha trazabilidade garantida.
  • Realizar un escandallo semanal para dotar os comedores dunha ferramenta que facilite o cálculo do gasto que lles permita planificar mellor a súa conta de gastos.
  • Enviar un vídeo aos estudantes sobre educación alimentaria, que ten como fío condutor o papel da biodiversidade agrícola e o que xogan os produtos certificados á hora de conservala, así coma a importancia de comer de xeito local.
  • Formación a través de Zoom aos cociñeiros/as dos comedores e caterings.

PARTICIPANTES

Ademais dos catro Comedores Escolares KM 0 que xa participaron na primeira campaña: CEIP Xacinto Amigo Lera (Portomouro), CEIP Os Muíños (Muxía), CEIP Vicente Otero Valcárcel (Carral) e CEIP López Ferreiro (Compostela) súmanse Divino Maestro e Colexio La Milagrosa de Santiago de Compostela; Colexio Alca de Ames, CEIP Santa Baia de Boiro; CPI Dr. López Suárez de Friol; CEIP San Cosme de Barreiros; CEIP Juan Rey de Lourenzá; CEIP Manuel Mato Vizoso de Vilalba; CEIP Rosalía de Castro de Bóveda; IES Lagoa de Antela de Xinzo de Limia; CEIP Joaquina Gallego Jorreto de A Merca; CEIP Carlos Cid Arregui de Rairiz de Vega; Colexio Salesianos-A Mercé de Cambados; CEIP Xoaquín Loriga de Prado (Lalín); CEIP A Lomba de Vilagarcía de Arousa e CEIP A Paz de Coruxo (Vigo).

O Estudo EFSA 2019 revela que case a metade dos 96.000 produtos analizados contén residuos

Máis da metade dos alimentos do mercado europeo non contén praguicidas e só un 4 % se sitúa fóra da lei. Aínda así, atopáronse trazas de praguicidas nun de cada catro alimentos analizados no Estudo EFSA 2019, no que se avalían os controis efectuados nese ano. Na análise recóllense os datos de todos os países membros, así como de Islandia e Noruega.

En 2019 analizáronse máis de 96.000 produtos, dos cales o 96,1 % están dentro a lei. A pesar diso, case a metade contén residuos que logo pasan a formar parte das nosas dietas. A responsable de Greenpeace Italia, Federica Ferrario, alerta de que “máis de 25.000 dos produtos analizados conteñen á vez residuos de dous ou máis praguicidas que, analizados de forma independente, están dentro dos límites”. Engade que “o problema tamén é que a nivel europeo séguese facendo a autorización de novas substancias para o principio activo illado, aínda que logo se vendan e utilicen formulacións que conteñen outros compostos”.

PAUTAS A SEGUIR 

Apostar pola produción ecolóxica en Europa é a solución. Desta forma, lograrase ter menos residuos nos alimentos. Tamén deberá ir ligado a un cambio na produción de alimentos e o consumo, tratando de reducir a porcentaxe de alimentos de orixe animal na dieta e substituíndo estes produtos por alternativas de orixe vexetal obtidas con métodos de produción sostibles.

Fonte da información 

 

O FiBL lanza un novo informe cos conceptos clave e os principios básicos da produción ecolóxica

O Instituto de Investigación de Agricultura Orgánica (FiBL) presenta Organic farming. Basic principles and Good practices, un dossier no que explica os novos conceptos básicos da produción ecolóxica e mostra como se aplican na práctica. Trátase dunha valiosa fonte de información para agricultores interesados na conversión á agricultura ecolóxica, que tamén sirva para outras partes interesadas en facer que a produción de alimentos en Europa sexa máis sostible.

Cabe destacar que nos últimos 20 anos o mercado ecolóxico medrou a nivel mundial con taxas anuais dun a dous díxitos. Unha proba é que o mercado europeo creceu case un 8 % en 2018, superando os 40 billóns de euros de facturación. De feito, segundo este estudo, o sector ecolóxico europeo ten un gran potencial para seguir crecendo.

PRINCIPIOS BÁSICOS

A agricultura ecolóxica esfórzase en lograr unha alimentación saudable que aforre recursos, respecte o medio ambiente e os animais e sexa social e xusta. Por iso, o agricultor ecolóxico busca utilizar principios e procesos naturais para lograr rendementos óptimos mentres protexe o medio ambiente.

COIDADO DO SOLO, CLAVE

A agricultura ecolóxica preséntase como unha solución para que moitos países europeos revitalicen as terras agrícolas con prácticas sostibles e logren mellores rendementos e prezos. O que non se concibe sen un chan e ben nutrido. Conséguese mediante procesos biolóxicos, libres de fertilizantes químicos ou sintetizados, de calidade e con impactos mínimos na flora, a fauna e atmosfera.

A rotación de cultivos persegue, ademais, obxectivos a corto prazo para manter a produtividade e a saúde do chan. Por exemplo, as sementes ou mesturas leguminosas puras en cultivos principais ou de sementeira poden proporcionar grandes cantidades de nitróxeno para cultivos posteriores. Isto é esencial, non só para o crecemento das plantas, senón tamén para os organismos do chan e, polo tanto, para a actividade biolóxica deste en xeral.

CERTIFICACIÓNS E REGULACIÓNS

A produción ecolóxica está regulada legalmente con certificados de garantía que definen os requisitos mínimos legais para a cualificación e alimentos ecolóxicos. Todas estas regulacións (estatais ou privadas) protexen os conceptos “bio” e “eco” en todas as linguaxes posibles.

Información extraída de BioEcoActual.