Arquivos da etiqueta: agricultura ecolóxica

Fitur coñece a campaña “Galicia etiqueta calidade”

A Xunta de Galicia presentou a pasada semana na Feira Internacional de Turismo (Fitur 2022) de Madrid a nova campaña “Galicia etiqueta calidade”, impulsada pola Consellería do Medio Rural para divulgar o bo facer da xente do mar e do campo. Ademais, promoveu as 36 certificacións agroalimentarias de calidade que hai na comunidade galega, entre as que se atopa a agricultura ecolóxica.

O director da Axencia Galega da Calidade Alimentaria (Agacal), José Luis Cabarcos, foi o encargado de dar a coñecer a iniciativa que vai da man das estratexias sectoriais que ten en marcha a Xunta. Durante a súa exposición, Cabarcos puxo en valor os produtos de calidade galegos, os cales fan de Galicia un destino turístico e gastronómico por excelencia. Tamén lembrou que a marca Galicia Calidade contará cunha sección chamada “Galicia Calidade Alimentaria”. Este distintivo agrupará produtos con denominacións de orixe e indicacións xeográficas protexidas do campo e do mar, marcas de garantía como Galega 100%, as producións derivadas das razas autóctonas e o selo pescadeRías.

O director de Agacal deu a coñecer o mercado dixital oficial no que os produtores poderán vender estas producións establecendo contacto eles mesmos co consumidor. Trátase dun mercado online no que se poderán comercializar os produtos de excelencia de Galicia cun só clic.

Coñece máis sobre as 36 Experiencias de Calidade

Os produtores eco confirman o bo momento e o mellor futuro para o sector

Esta é a conclusión que podemos extraer das intervencións de seis dos relatores convidados ás Xornadas de Promoción e Comercialización de Producións Cárnica e Silvícola, que tiveron lugar os días 27 e 28 de decembro, emitidas en directo na nosa canle de Youtube, e que tedes xa á vosa disposición nestas ligazóns:

Foron dúas xornadas abertas en liña que xa suman centos de visualizacións e onde varios produtores e expertos contaron as súas experiencias nos seus sectores para logo ir resolvendo dúbidas dos participantes no chat aberto na canle de Youtube do Craega. Promovida polo Craega, os seis invitados abarcaron todos os aspectos de interese: lexislación europea, consultoría agroalimentaria, distribución e experiencias de traballo en cooperativas e empresas. “España é o país líder en superficie ecolóxica da UE, písannos os talóns o franceses, pero non todo vai perfecto”.

DÍA 27 DE NADAL

As Xornadas arrancaron coa presentación de Rocío Freire, vicepresidenta do Consello, quen deu paso a José Luis Cabarcos, director xeral da Axencia Galega de Calidade Alimentaria (Agacal), o cal destacou que os produtos ecolóxicos, ao contribuír a protexer o medio natural, son cada vez máis demandados polos consumidores a nivel internacional e apostou por que o mel, a castaña e a carne -acollidos a indicacións xeográficas protexidas en Galicia- avoguen por este tipo de produción máis respectuosa coa contorna para lograr ao mesmo tempo vantaxes na competitividade. 

Un gran coñecedor das institucións europeas nas que traballa desde principios dos anos 90, Diego Canga, foi o primeiro dos relatores en intervir analizando o Plan de Acción para a Producción Ecolóxica e a “Estratexia da Granxa á Mesa (Farm to Fork en inglés), que quere ampliar a superficie ecolóxica de aquí a 2030. O conselleiro principal da Comisión Europea na Dirección Xeral de Agricultura e Medio Rural lembrou que os mercados máis importantes son o alemán e despois o francés. “Pero o punto débil de España é o consumo per cápita, está moi por baixo da media europea, é a gran lagoa: como facer que a xente consuma máis produtos ecolóxicos?”. Tamén sinalou que as grandes superficies agrarias están no Mediterráneo e que as do Cantábrico están por baixo da media, como pasa na produción convencional. “Sei perfectamente que a agricultura no norte é completamente diferente, pero unha das cousas que máis me preocupa é que atopo moitos agricultores e gandeiros con producións moi sostibles pero que lles custa dar o paso á conversión en ecolóxico”, xa que consideran que a súa produción xa é sostible. “Pero nós poñemos moito diñeiro encima da mesa para quen xa son ecolóxicos, aínda que o logo non cho regalan, o logo certifica que cumpres uns estándares europeos”. E continuou afirmando que “para os que sodes produtores ecolóxicos só teño boas noticias. Acaba de entrar en vigor o novo regulamento sobre agricultura ecolóxica e non o imos tocar en varios anos, non podemos marear os produtores. Vai haber estabilidade legal. En 2022 gastarémonos 50 millóns en promoción de produtos ecolóxicos e imos crear premios europeos á mellor cidade, peme e rexión ecolóxica, farémolo público en semanas, un boom tremendo de publicidade”.

Jon Garai, coordinador da Asociación navarra Ekoalde, explicou na súa intervención posterior que na agrupación de produtores ecolóxicos os seus asociados obteñen un prezo xusto pola venda aos clientes, aos que chegan coa distribución e loxística que se fai desde Noáin. “Proxectos como o noso serven para estruturar o sector e xera novas oportunidades”, comentaba na xornada do 27 de decembro. “Aprobouse un convenio de 100.000 euros co Goberno navarro para profesionalizar o noso sistema e poder exportalo, desde a humildade. Cremos que se pode avanzar, falamos dunha oportunidade para dar un salto de escala”. Ekoalde foi creadada polos produtores como asociación sen ánimo de lucro, elemento importante no desenvolvemento. Non é unha cooperativa senón que permitiu un traballo directo co goberno de Navarra para participar das axudas no campo. “Somos 69 operadores e moi diversos, pero hoxe participamos en proxectos que no Estado créanse como o noso desde a súa realidade diferencial. Cremos que Ekoalde é fito porque conseguimos promocionar e facer unha distribución conxunta cun proxecto loxístico adecuado para iso. E vendendo a prezos xustos, non negociamos os prezos senón que representamos os intereses da parte produtora”. 

A última intervención do día 27 foi a da xerente de Traloagro, Isabel Gómez Rodríguez. Unha empresaria recentemente premiada cos Premios de Excelencia á Innovación para Mulleres Rurais que outorga o Ministerio de Agricultura e que narrou a súa experiencia nesta empresa empresa familiar que xestiona co seu irmán e a súa cuñada. Produce carne de vacún e pito en ecoló gico e venden desde a sala de despezamento e tenda-supermercado de Friol, ademais da Praza de Abastos en Lugo. “Somos fillos de emigrantes retornados de Bélxica e o meu irmán e eu queriamos emprender no rural pero non tiñamos claro a que dedicarnos ao comezo”. Tras estudalo e dada a experiencia hostaleira que traían decidiron con ilusión levar adiante un proxecto de gandería bovina e avícola cun plan de mellora e coa conversión de terreos na casa, mantendo a biodiversidade. “Respectando os arboledos que xa existían porque o que queriamos era unha produción sostible”. Cando o decidiron non tiñan garantida a comercialización de ecolóxico, “isto foi no 2010 e estivemos dous anos coa reconversión de terreos. Pero nese tempo xurdiu a oportunidade de que o pito fose certificado en ecolóxico, unha empresa nese momento iniciou a comercialización”. Pero non pasaba igual co bovino, só contaban cun intermediario que non tiña interese por vender en ecolóxico así que estiveron a producir en ecolóxico e vendendo convencional. “Pero sabiamos que chegaría o momento en que que comercializariamos a carne. En 2019 decidimos iniciar cun posto na Praza de Abastos en Lugo, e mentres construímos o biocentro cárnico, unha salda de despezamento para todo tipo de carnes onde facemos almacenamento, transformación e elaboración de produtos” que inclúen entre outros nuggets e hamburguesas para achegarse tamén a un público novo e familiar que crece día a día.

DÍA 28 DE NADAL

A segunda xornada, a do 28 de decembro, foi inagurada por Jean Luc Bellat, que falou do funcionamento do mercado da castaña francés, escaso en canto a produción pero cunha venda dinámica e de gran volume. É a zona sur do país a principal. “Non somos moi produtores, temos a quinta praza de Europa detrás de Portugal, Italia, España e Grecia”. Francia produce unhas 8.000 toneladas anuais, aínda que como explica o Consultor en JLB Consulting e xerente en Decorin Sárl, “é un pouco irregular porque tivemos problemas coa avispilla do castiñeiro, problema que ten case toda Europa”. O experto cre que “a tendencia nestes últimos anos tende cara a un equilibrio porque nalgúns sitios instaláronse sistemas de rega e cultívase con maquinaria que permite axilizar a tarefa”. De toda a produción francesa o 62 % é ecolóxica, decenas de miles de hectáreas están en conversión xa porque é un tipo cultivo que foi desenvolto nas rexións de nova produción polo interese que espertou. “É natural, parécenos a todos como de sempre, non hai tratamentos, é un traballo de campo de regar, arar e podar as árbores. É moi sostible”. E lembrou que en Francia precisamente son as datas navideñes cando aumenta o seu consumo, “como as uvas en España, é tradicional nas comidas de Nadal e fin de Ano, comer castañas” xerando unha facturación de 160 millóns de euros. A produción e venda repártese entre as maioritarias 13.000 toneladas en crema e puré de castaña, despois a conserva de castaña pelada e cocida que permite o seu uso nun prato combinado con carnes diferentes como unha pataca en guarnición e finalmente en formas como o marrón confeitado e glasé. 

“Estamos no alto da montaña lucense desde 1999. Unha pequena empresa que nace polo agarimo polas cousas ben feitas”. Así comezou a súa intervención Rubén Fernández, conselleiro delegado da empresa familiar fonsagradina Casa Castelao.

Fundada en 1999 e especializada na produción de porco celta e ecolóxico, carnes e derivados foron crecendo aos poucos “ampliando instalacións pero sen esquecer apostar pola calidade, a diferenciación”. Introduciron cada vez máis porco celta “unha produción de calidade que non se fai con carácter industrial senón a base pequenas explotacións. Pero custábanos conseguir un porco de 100 quilos porque ten moita menos graxa, e falamos cos produtores para chegar a un consenso. En 2017 demos cunha raza un 50 % duroc e dar coa tecla, porque ofrece un pouco mais de touciño e infiltración que fai que a carne sexa máis melosa ao padal e axuda a depurar o produto en xamón e embutidos”. Isto axudoulles a meterse no mercado e en 2018 fixeron probas a un nivel mais amplo. “Criamos que co porco ecolóxico tiñamos que apostar pola canle completa, e non centrarnos só en facer o produto senón chourizos, lacóns, xamóns, touciño entrefebrado… para chegar a un mercado maioritario”. Ao traballar certificados polo Craega están condicionados a un marco, “pero conseguimos un produto moi ben feito e chegamos a un consumidor diferente. O produto foi difícil posicionalo porque ten un prezo máis elevado, hai que enfocalo pola calidade”, pero nestes anos Casa Castelao conseguiu crecer nas súas tres liñas: porco tradicional, celta e ecolóxico “e seguiremos sumando mais cousas, porque pola primavera teremos novidades en marcha”. 

O pintor Peteiro e a relación co fundador de Meles Anta, David Corral, marcou os acenos de identidade desta firma apícola. Maite Bruzos Simón, é a responsable de Calidade en Pazo de Lusio, a marca que acolle o mel ecolóxico desta empresa familiar con orixe en Samos. Ela explicou como última relatora convidada nestas dúas xornadas como foron mudando colmeas a loecológico, a reconversión. Traballan con apis melifera, unha abella ibérica moi dura e que dá boa produción. “Temos 4700 ecolóxicas fixas e tamén trashumantes. Os panales están no Courel e Ancares cunha vexetación impresionante en zonas de difícil acceso, con transportes acomodados para poder entrar”, explica. Modernizaron o envasado e venden tanto a nivel nacional como fóra con dúas marcas como ecolóxico: Pazo de Lusío e Toca. “Pazo vendémola nas grandes superficies a nivel estatal e Toca, que é máis gourmet, para Francia, Reino Unido, Estados Unidos, Alemaña, China… o mercado ecolóxico está a ser bastante demandando e queremos seguir crecendo, xa o fixemos a niveis impresionantes nos últimos anos”, recoñece Maite Bruzos. “Non pensabamos que o mel ecolóxico ía ter esa saída. Pero cada vez que imos a unha feira os clientes pídennos moito produto ecolóxico. E vémolo tamén na nosa tenda en liña, a demanda vai en crecemento. Vemos a gran diferenza que hai coas dúas producións”. 

A Xunta organiza dous cursos sobre a certificación ecolóxica

A Consellería do Medio Rural, a través da Axencia Galega da Calidade Alimentaria (Agacal), organiza dous cursos sobre a certificación ecolóxica, que teñen por obxectivo proporcionar nocións básicas para afrontar os retos da produción eco e facilitar unha guía para a transición das granxas interesadas.

Cada unha das xornadas ten unha duración de cinco horas, nas que se abordarán a normativa e os obxectivos da certificación ecolóxica, a inscrición ao Consello Regulador da Agricultura Ecolóxica de Galicia (Craega) e as axudas para este tipo de produción.

Os cursos serán o sábado 27 de novembro, no salón de actos da Casa da Cultura de San Sadurniño, e o martes 30 de novembro, no local social de San Paio, no Concello de Coristanco. Ambas xornadas serán en horario de mañá, de 9:00 a 14:00 horas.

Todos as persoas interesadas poden anotarse cubrindo a solicitude e enviándoa ao correo electrónico agacal.certificacion@xunta.gal.

Planas presenta a campaña de Alimentos de España “Somos eco-lóxicos”

Este mércores preséntase a nova campaña de Alimentos de España “Somos eco-lóxicos”, para apoiar a produción ecolóxica. O acto terá lugar na Estación de Chamartín (Madrid) ás 10:00 horas e estará presidido polo ministro de Agricultura, Pesca e Alimentación, Luis Planas, e será unicamente de forma presencial.

Durante o evento haberá un faladoiro sobre a situación da agricultura ecolóxica e o seu futuro, moderada pola catedrática da Universidade Politécnica de Valencia Dolores Raigón e na que participarán o presidente de Ecovalia, Álvaro Barrera; a presidenta da Asociación Vida Sana, Ángeles Parra; o vicepresidente de Intereco, David Samper, entidade da que somos socios;  a presidenta da Sociedad Española de Agricultura Ecológica/Agroecología (SEAE), Concepción Fabeiro, e o presidente da Asociación Española de Elaboradores y Comercializadores Ecológicos (ASOBIO), Joan Picazos.

Os produtos eco galegos regresan de BioCultura Madrid, á que asistiron case 35.000 persoas

BioCultura Madrid pechou este domingo catro xornadas de feira cun grande éxito. A pandemia aínda permite unha volta á presencialidade tímida, pero o sector ecolóxico reuniu máis de 34.500 persoas nos corredores de Ifema. Ángeles Parra, directora de BioCultura, sinalou que “todos tiñamos ganas de volver atoparnos tras o impasse da pandemia. E o público respondeu moi satisfactoriamente a esta necesidade de escapar dun anunciado futuro distópico. Hai que actuar e hai que facelo xa”. Ademais, indicou que todo é unha mostra de que o público quería volver reencontrarse e tamén de que “cada vez máis persoas saben que o consumo é unha forma de loita e dunha clara aposta pola rexeneración. Dime que consomes e direiche a que mundo aspiras”.

A grande acollida desta cita abre a campaña que o Goberno español inicia esta mesma semana para promover o consumo de alimentos ecolóxicos e mostrarlle á cidadanía as súas múltiples virtudes.

Os profesionais do sector non deron abasto para participar nas actividades e acudir ás casetas e ás salas onde se presentaban novos lanzamentos. Parra resaltou que “o sector ecolóxico é moi dinámico, moi novo e moi feminino. Somos xa o presente e somos o futuro dunha verdadeira economía”.

O CRAEGA, PRESENTE NESTA CITA

Neste encontro de referencia internacional estiveron presentes varios operadores do Craega que agrupou nunha caseta común varios deles: The Bio Factory, Galuriña, Terra de Baronceli, Cervezas Celebridade Galega, Sovoral Galicia, Algas La Patrona, Capitán Alga, Los Sabores del Camino, Zumiño, Celtaverde, Bubela Artesá e Mieles Anta. Así mesmo,  Orballo, Porto-Muiños e Algamar, firmas que tamén contan coa certificación ecolóxica, asistiron a este evento con posto propio.

O Craega e Agacal ofrecen cursos formativos para pasarse á produción ecolóxica

 

O Craega e a Agacal organizan unha nova actividade formativa para o mes de outubro. Nesta ocasión trátase de cursos para informar a todas aquelas persoas que están interesadas en pasarse á produción en ecolóxico, polo que se tratarán temas como os prazos de axudas, nova normativa, requisitos, sistemas de produción e novas estratexias produtivas.

O primeiro  dos cursos terá lugar en Lugo, o vindeiro luns 25 de outubro, no Edificio Administrativo Multiusos, en horario de 9-14 horas

Máis información:

635 013 323 | beealia@gmail.com

Formulario de inscrición nesta ligazón. Ao final desta ligazón hai un despregable no que se poden ver os lugares e as datas previstos ata o momento. Lembrade que para o desenvolvemento destes cursos precísanse xuntar un mínimo de 10 alumnos/as.

Outros cursos confirmados:

  • 27/10 na Casa da Cultura de Ordes (A Coruña)
  • 28/10 en Becerreá (Lugo)
  • 29/10 no Salón de Actos dos Chaos (A Fonsagrada)
  • 02/11, Centro de promoción económica de Allariz
  • 03/11 Castelo de Castro Caldelas
  • 04/11 Casa da Cultura de Viana do Bolo
  • 05/11 Liga Santaballesa de Vilalba
  • 06/11 Casa da Cultura de Castro Ribeiras de Lea
  • 22/11 Casa da Cultura de Verín

III Eco Experiencia do Craega: Lugo, ruta por terras sacras e ecolóxicas

A fin de semana do 9-10 de outubro outro equipo capitaneado por Slow Food Compostela realizou a terceira viaxe para gozar dunha nova ruta co fin de dar a coñecer de preto e poñer en valor os produtores e elaboradores certificados en ecolóxico, desta vez ao longo da provincia de Lugo.

Os operadores visitados foron NAICIÑAAbadía Da Cova-Adegas Moure, Ecoagroturismo Arqueixal, Maeloc Way e Adega Diego de Lemos.

Como nas anteriores rutas, o equipo participante estivo formado por un grupo de influencers profesionais; nesta ocasión foron Alvientooo, Escapalandia, Caminante del Planeta, Galicia Mola, Antonautas na Iagosfera, Lucía Velasco, Lourdes López, Bloghedonista e Magdalenas de Chocolate, os que lle  deron  visibilidade a esta iniciativa toda a fin de semana a través das súas redes sociais.

Os deportistas convidados desta volta foron Antón Ruanova e Amador Pena, triatleta profesional dobre subcampión de España (2010 e 2013) e campión do Brasil e Sudamérica (2016), e Amador Pena, director deportivo e atleta da recentemente creada sección de atletismo da SD Compostela.

Os restaurantes onde degustaron produtos ecolóxicos da zona foron Berso-restaurante, en Sober, cun menú composto de entrecot de tenreira ecolóxica de Traloagro maridado co mencía premiado de Abadía da Cova, e tamén flan de castañas ecolóxicas, procedentes de Naiciña.

O domingo o xantar preparouse en A Parada das Bestas, en Pidre (Palas de Rei), e os provedores foron Milhulloa, Sen Máis, Arqueixal, Casa Ribeira, Esencia da Terra, Avega, Traloagro, Algas La Patrona, Abadía da Cova, Bodegas Corisca, Bubela e Bacelos de Biobra, todos eles certificados en ecolóxico.

SORTEO ECO ENTRE OS ASISTENTES

Houbo dous bodegóns de produtos con selo do Craega: un no Restaurante Berso e outro no Pazo do Piñeiro. Os dous sorteáronse entre os asistentes e os gañadores foron Alexia Gómez (Asturias) e Silvia Viqueira (Antonautas na Iagosfera).

Alexia Gómez (Asturias)

Silvia Viqueira (Antonautas na Iagosfera)

Ruta completa

O grupo convidado, ao completo

Curso sobre o novo regulamento en ovino-caprino ecolóxico en Guntín

 

O Consello Regulador da Agricultura Ecolóxica de Galicia (Craega) e a Axencia Galega da Calidade Alimentaria (Agacal) organizan un novo curso sobre o novo Regulamento de produción ecolóxica (UE) 2018/848, aplicable a partir de xaneiro de 2022; desta volta está centrado na produción en ovino-caprino e desenvolverase na Casa da Cultura de Guntín (Lugo) o día 13 de outubro.

Coma o resto dos cursos previstos, terá lugar en xornada única, cun total de 7 horas de duración, con contido teórico en sesión de mañá (10:00-14:00 horas) e contido práctico en sesión de tarde (15:30-18:30 horas), con visita a unha explotación.

Lembrade que estas actividades son totalmente gratuítas e están abertas a calquera persoa interesada.  Tedes toda a información e inscricións en Agronovo.

Información sobre outros cursos

Curso en Chantada dirixido á produción porcina ecolóxica

Curso de comercialización de mazá ecolóxica na Estrada

A Consellería do Medio Rural, a través da Agacal, en colaboración co Craega, organiza un novo curso de produción ecolóxica. Desta volta a formación está dedicada á comercialización de mazá ecolóxica, que terá lugar o 28 de setembro no Museo do Moble da Estrada (MOME) da Estrada (Pontevedra)

Coma no resto dos cursos, a xornada estenderase todo o día: pola mañá, a partir das 9:00 horas, trataranse temas como a situación do mercado da mazá ecolóxica, o novo regulamento e a comunicación ambiental de produtos ecolóxicos; a sesión matutina finalizará cun coloquio para todos os asistentes.  Pola tarde, a partir das 16:00 horas, levarase a cabo unha visita práctica.

As solicitudes poden enviarse a clientes@sinerxia.es.

A Aula Cemit de Chantada acollerá un curso sobre comercialización da castaña eco

A Consellería do Medio Rural, a través da Agacal, en colaboración co Craega, organiza un novo curso de produción ecolóxica. Nesta ocasión a formación estará dedicada á “comercialización da castaña ecolóxica”, e desenvolverase o 6 de setembro na Aula Cemit de Chantada (Lugo). 

Como os outros dous cursos previstos (viticultura ecolóxica e pataca ecolóxica), a xornada comezará a partir das 9:00 horas; tras a presentación do curso, terá lugar unha charla sobre a situación do mercado da castaña ecolóxica, o novo regulamento e a comunicación ambiental de produtos ecolóxicos; a sesión matutina rematará cun coloquio para todos os asistentes.  Pola tarde, a partir das 16:00 horas, levarase a cabo unha visita práctica na empresa Miguel Areán e Hijos, situada no Polígono Industrial de Chantada. 

As solicitudes poden enviarse a clientes@sinerxia.es