Arquivos da etiqueta: agricultura ecologica

O FiBL lanza un novo informe cos conceptos clave e os principios básicos da produción ecolóxica

O Instituto de Investigación de Agricultura Orgánica (FiBL) presenta Organic farming. Basic principles and Good practices, un dossier no que explica os novos conceptos básicos da produción ecolóxica e mostra como se aplican na práctica. Trátase dunha valiosa fonte de información para agricultores interesados na conversión á agricultura ecolóxica, que tamén sirva para outras partes interesadas en facer que a produción de alimentos en Europa sexa máis sostible.

Cabe destacar que nos últimos 20 anos o mercado ecolóxico medrou a nivel mundial con taxas anuais dun a dous díxitos. Unha proba é que o mercado europeo creceu case un 8 % en 2018, superando os 40 billóns de euros de facturación. De feito, segundo este estudo, o sector ecolóxico europeo ten un gran potencial para seguir crecendo.

PRINCIPIOS BÁSICOS

A agricultura ecolóxica esfórzase en lograr unha alimentación saudable que aforre recursos, respecte o medio ambiente e os animais e sexa social e xusta. Por iso, o agricultor ecolóxico busca utilizar principios e procesos naturais para lograr rendementos óptimos mentres protexe o medio ambiente.

COIDADO DO SOLO, CLAVE

A agricultura ecolóxica preséntase como unha solución para que moitos países europeos revitalicen as terras agrícolas con prácticas sostibles e logren mellores rendementos e prezos. O que non se concibe sen un chan e ben nutrido. Conséguese mediante procesos biolóxicos, libres de fertilizantes químicos ou sintetizados, de calidade e con impactos mínimos na flora, a fauna e atmosfera.

A rotación de cultivos persegue, ademais, obxectivos a corto prazo para manter a produtividade e a saúde do chan. Por exemplo, as sementes ou mesturas leguminosas puras en cultivos principais ou de sementeira poden proporcionar grandes cantidades de nitróxeno para cultivos posteriores. Isto é esencial, non só para o crecemento das plantas, senón tamén para os organismos do chan e, polo tanto, para a actividade biolóxica deste en xeral.

CERTIFICACIÓNS E REGULACIÓNS

A produción ecolóxica está regulada legalmente con certificados de garantía que definen os requisitos mínimos legais para a cualificación e alimentos ecolóxicos. Todas estas regulacións (estatais ou privadas) protexen os conceptos “bio” e “eco” en todas as linguaxes posibles.

Información extraída de BioEcoActual.

O 9 de abril finaliza o prazo de presentación para os Premios Alimentos de España 2020

No teu desenvolvemento profesional dentro da produción ecolóxica prestas especial atención á biodiversidade, ó desenvolvemento rural, ós recursos locais ou á innovación? Pois tes a opción de participar nos Premios Alimentos de España 2020 para a produción ecolóxica ou outras modalidades, enviando a túa solicitude antes do 9 de abril. Os participantes, xa sexan empresas, entidades ou persoas físicas ou xurídicas de natureza pública ou privada, deberán cumprir cos requisitos das bases reguladoras da concesión dos devanditos premios. A documentación presentarase a través do rexistro electrónico do Ministerio de Agricultura, Pesca e Alimentación.

Estes premios convócanse anualmente desde 1987 en recoñecemento aos profesionais ou entidades que contribúen a impulsar o sector tan importante na economía española. Os galardoados son elixidos por un xurado formado por persoas de recoñecido prestixio.

Documentación

Para poder participar será necesario cumprimentar e achegar a seguinte información:

  • Anexos I e II da convocatoria debidamente cumprimentados, dispoñibles na sede electrónica do MAPA
  • Unha memoria coas actuacións máis destacadas polas que se desexa optar ao premio (cun máximo de 10 páxinas, escritas con letra Arial, tamaño 12, e interlineado sinxelo de acordo co especificado no anexo IV da convocatoria)
  • A documentación complementaria que se estime oportuna, (ver o especificado no anexo IV da convocatoria)

Tanto a Memoria como a Documentación complementaria irán en formato dixital. As persoas físicas que opten por cumprimentar e presentar os Anexos I e II en papel, tamén presentarán, en formato dixital, a memoria e a documentación complementaria.

Modalidades

Establécense as seguintes modalidades:

  • Premio Alimentos de España á Industria Alimentaria
  • Accésit á Iniciativa Emprendedora
  • Premio Alimentos de España á Produción Ecolóxica
  • Premio Alimentos de España á Internacionalización Alimentaria
  • Premio Alimentos de España Produción da Pesca e da Acuicultura
  • Premio Alimentos de España de Comunicación
  • Premio Alimentos de España á Restauración
  • Premio Extraordinario Alimentos de España

Toda a información 

Que sementar na primavera?

Xa ben entrada a estación, é o momento de comezar a preparar o terreo para as colleitas de verán e, por suposto, colleitas ecolóxicas. Chega o mes de abril, pero aínda así non hai que confiarse coas temperaturas unha vez superado o inverno, xa que a primavera pode ser inestable e traer consigo xeadas que poden botar a perder as plantacións.

Hai que tratar de protexer as novas plantas de cultivo para evitar que se danen coas baixas temperaturas. Para empezar, é un bo momento para preparar o terreo, eliminando as malas herbas e planificando o deseño da horta, é dicir, determinando onde irá cada cultivo.

Se en marzo houbo sementeiras, é posible que xa haxa algunhas plantas para trasladar á horta. Neste mes hai que plantar todas aquelas que se queiran cultivar durante o verán. Algunhas poden ser para todo o ano, aínda que prefiran a primavera, e outras son específicas para estes meses.

Algunhas das plantas que hai que poñer na horta son as seguintes: tomate, leituga, espinaca, pemento, cenoria, remolacha, cabaciña, porro, cogombro, feixón, cabaza, melón, sandía ou amorodo. Este último xa comeza a xermolar a súa flor e, se todo vai ben, nos inicios do verán xa poderemos recoller os primeiros froitos.

Lembrámosvos que no buscador da nosa páxina web podedes atopar os operadores que traballan esta froita, así como outros produtos tanto de orixe vexetal como animal.

A Comisión presenta medidas para impulsar a produción ecolóxica dentro do Pacto Verde Europeo

A Comisión presentou un Plan de Acción  para o desenvolvemento da produción ecolóxica. O seu obxectivo xeral é impulsar a produción e o consumo de produtos ecolóxicos, alcanzar o 25 % das terras agrícolas dedicadas á agricultura ecolóxica de aquí a 2030 e aumentar considerablemente a acuicultura ecolóxica.

Entre os obxectivos do plan de aquí a 2030 é aumentar considerablemente a acuicultura ecolóxica 

A produción ecolóxica presenta varias vantaxes importantes. Por exemplo, os campos ecolóxicos teñen ao redor dun 30 % máis de biodiversidade, os animais criados de maneira ecolóxica gozan dun maior grao de benestar e reciben menos antibióticos, os agricultores ecolóxicos teñen maiores ingresos e son máis resilientes, e os consumidores saben exactamente o que reciben grazas ao logotipo ecolóxico da UE. O Plan de Acción axústase ao Pacto Verde Europeo e as estratexias “Da Granxa á Mesa” e sobre biodiversidade.

O Plan de Acción está pensado para achegar ao sector da agricultura ecolóxica, que experimenta un rápido crecemento, as ferramentas adecuadas para alcanzar o obxectivo do 25 %. Presenta 23 accións estruturadas ao redor de tres eixes (impulsar o consumo, aumentar a produción e mellorar a sostibilidade do sector) para velar polo seu crecemento equilibrado.

A Comisión anima os Estados membros a formular plans de acción ecolóxicos nacionais para incrementar a porcentaxe nacional da agricultura ecolóxica. Existen grandes diferenzas entre os Estados membros en canto á proporción de terras agrícolas que actualmente se dedican á agricultura ecolóxica, que oscilan entre o 0,5 % e máis do 25 %. Os plans de acción nacionais de agricultura ecolóxica complementarán os plans estratéxicos nacionais da PAC mediante o establecemento de medidas que vaian máis aló da agricultura e do que se ofrece no marco da PAC.

PROMOCIÓN DO CONSUMO

O aumento do consumo de produtos ecolóxicos será crucial para animar os agricultores a adoptar a agricultura ecolóxica e aumentar así a súa rendibilidade e resiliencia. Para tal fin, o Plan de Acción propón varias medidas concretas destinadas a impulsar a demanda, manter a confianza dos consumidores e achegarlle os alimentos ecolóxicos á cidadanía. Entre elas figuran as seguintes: 

    • Informar e comunicar sobre a produción ecolóxica
    • Promover o consumo de produtos ecolóxicos
    • Estimular un maior uso da agricultura ecolóxica nos comedores públicos a través da contratación pública 
    • Aumentar a distribución de produtos ecolóxicos no marco do programa escolar da UE

As medidas tamén teñen por obxecto, por exemplo, previr a fraude, aumentar a confianza dos consumidores e mellorar a trazabilidade dos produtos ecolóxicos. O sector privado tamén pode desempeñar un papel importante, por exemplo, recompensando aos traballadores con “ecocheques” que poidan empregar para adquirir alimentos ecolóxicos.

AUMENTO DA PRODUCIÓN

Unha das principais medidas é aumentar a distribución de produtos eco no marco do programa escola da UE; na foto, menú escolar ecolóxico do CEIP Os Muíños (Muxía)

Na actualidade, ao redor do 8,5 % da superficie agrícola da UE dedícase a cultivos ecolóxicos e as tendencias indican que, coa taxa de crecemento actual, a UE alcanzará o 15-18 % de aquí a 2030. Este Plan de Acción achega unha serie de ferramentas para dar un novo impulso e alcanzar o 25 %. Aínda que o Plan de Acción se centra en gran medida no “efecto chamada” da demanda, a política agrícola común seguirá sendo un instrumento clave para apoiar a reconversión á agricultura ecolóxica. 

Na actualidade, ao redor do 1,8 % (7 500 millóns de euros) da PAC destínase a apoiar a agricultura ecolóxica. A futura PAC terá en conta réximes ecolóxicos apoiados por un orzamento de entre 38.000 e 58.000 millóns de euros para o período 2023-2027, en función do resultado das negociacións da PAC. Os réximes ecolóxicos poden servir para impulsar a agricultura ecolóxica.

Máis información 

A Cooperativa A Carqueixa gaña o XXI Premio Aresa de Desenvolvemento Rural

José Antonio Díaz mostra o galardón acompañado de membros do xurado.
José Antonio Díaz mostra o galardón acompañado de membros do xurado

O presidente da sociedade, José Antonio Díaz, recolleu o galardón, dotado de 10.000 euros. Desde o xurado destacaron do gañador “o traballo feito ao longo destes anos, así como o salto á venda online

O auditorio da Casa do Saber (Lugo) acolleu a cerimonia do XXI Premio Aresa de Desenvolvemento Rural que estivo presidida polo reitor da Universidade de Santiago de Compostela (USC), Antonio López Díaz, e o presidente de Aresa, Álvaro Rodríguez Eiras, acompañados pola vicerreitora de Coordinación do Campus de Lugo, Monsterrat Valcárcel Armesto. Os tres formaban parte do xurado xunto con Manuel Gómez-Franqueira, presidente do Grupo Coren, e María José Alonso Fernández, catedrática de Farmacia e Tecnoloxía Farmacéutica da USC.

A vicerreitora foi a encargada de ler a resolución do xurado que lle outorgou o premio á Cooperativa A Carqueixa. O reitor da USC e o presidente de Aresa fixeron entrega da placa conmemorativa e os 10.000 euros, cos que está dotado o premio, ao presidente da cooperativa, José Antonio Díaz. López destacou do gañador “o traballo feito ao longo destes anos, así como o salto á venda online coa marca Sabor dos Ancares para adaptarse á nova realidade que vivimos tras esta pandemia”.

A Carqueixa está inscrita no Craega como produtor agrícola para a produción de froitos secos e cogomelos. Ten a súa orixe en 1994, ano no que se fundou para comercializar de forma conxunta os xatos e a compra de insumos, adquirir máis dimensión e conseguir que os produtores de carne de Cervantes fosen un sector máis forte e  unido.

CAMPAÑA AUDIOVISUAL ‘GANDERÍA HEROICA’

Dáse a circunstancia de que este premio lle chega á cooperativa cando o seu presidente e o cineasta Oliver Laxe, autor do aclamado filme O que arde, están a levar a cabo a presentación de nova campaña audiovisual para promover e difundir a que denominaron a “Gandería Heroica” dos Ancares. O proxecto darase a coñecer nas redes de O sabor dos Ancares, unha iniciativa de comercialización directa de tenreira galega suprema da cooperativa, situada na zona.

Trasdeza Natur recibe un dos premios finalistas do programa TalentA 2021

A firma silledense (Pontevedra) Trasdeza Natur continúa cultivando premios. O proxecto de María José Tallón obtivo un dos dous premios finalistas do programa TalentA 2021 ao emprendemento rural. O premio está organizado, por segundo ano, por Corteva Agrisciencie e a Federación de Asociacións de Mulleres Rurais en España (Fademur).

Tallón foi pioneira na técnica de deshidratado solar de froitas e verduras procedentes da súa horta de cultivo ecolóxico, xa que emprega como fonte a enerxía solar. Trátase dunha nova forma de almacenamento que brinda unha durabilidade máis longa coa garantía de ter froitas ou verduras con todas as súas propiedades, ademais adáptanse aos novos tempos e retos culinarios.

A horta ecolóxica foi impulsada por Tallón na súa  casa materna que, xunto coas leiras, estaba en desuso e risco de deterioración progresiva. Este proxecto situado na parroquia de Cortegada tamén está entre o oito proxectos que selecciona a Rede Rural Nacional para os Premios de Inspiración Rural 2021 que convoca a Rede Europea de Desenvolvemento Rural.

A emprendedora silledense suma máis premios. Máis información.

Intereco convoca a 10.ª edición do curso “Formación de la Producción Ecológica conforme a la Normativa Europea”

A asociación Intereco, que agrupa como socios ás autoridades públicas de control de agricultura ecolóxica, é dicir, aos comités e consellos de agricultura ecolóxica das distintas comunidades autónomas entre as que se atopa o Craega, vén de facer pública a convocatoria da décima edición do curso Formación de la Producción Ecológica conforme a la Normativa Europea, cuxa inscrición está aberta ata o 6 de abril para o módulo 1 e o curso completo; posteriormente abrirán a matrícula para o resto dos módulos se se opta por facelos soltos.

O curso (apertura Aula Virtual) comezará o martes 13 de abril e dende ese día e ata o mes de xuño desenvolverase en formato on line e estará accesible 24/7, en total serán 85 horas.

Esta actividade ten como obxectivo coñecer as obrigas que deben cumprir os operadores baixo a normativa da produción ecolóxica europea e adquirir os coñecementos sobre os requisitos para poder realizar o control destas explotacións.

Os webinarios que conforman este curso serán impartidos por directores técnicos das autoridades de Control da Produción Ecolóxica socias de Intereco profesionais expertos na materia que se desenvolve.

Información completa

 

O director xeral da Industria Alimentaria pon en valor o incremento dun 7,7 % no consumo de alimentos ecolóxicos

O director xeral da Industria Alimentaria, José Miguel Herrero, deu a coñecer os datos do estudo realizado polo Ministerio de Agricultura, Pesca e Alimentación (MAPA): “Non é nada fácil que todos sexan positivos, pero é así porque se está traballando intensamente no sector desde hai moitos anos”, indicou.

Herrero recalcou a importancia do momento: “Encontrámonos nunha década histórica na que nos puxemos o obxectivo en Europa de que o 25 % da superficie agraria útil se dedique a produción ecolóxica; camiñamos cara a un modelo sostible responsable e comprometido co medio ambiente”. Ademais, anunciou para despois do verán “a campaña máis importante” de promoción da produción ecolóxica, co chef José Andrés e a creatividade publicitaria da acción de promoción lanzada polo ministerio baixo o lema ‘El país más rico del mundo’.

O informe Análisis de la caracterización y proyección de la producción ecológica española en 2019 mostra como o sector da agricultura continúa co seu intenso proceso de crecemento e configúrase como un importante ámbito alimentario diferenciado dentro do conxunto do sistema alimentario español. O documento sinala que o valor estimado na orixe da produción ecolóxica superou en 2019 os 2.310 millóns de euros, un 8,32 % máis que o ano anterior. O 77,72 % deste valor corresponde á produción ecolóxica de orixe vexetal e o restante á de orixe animal.

Algúns dos datos recollidos no estudo en referencia ao ano 2019:

  • Gasto dos españois en produtos ecolóxicos: 2.363 millóns de euros (+8,4 %).
  • O consumo por habitante ao ano é de 50,22 euros (+7,7 %).
  • Nas vendas, España ocupa a décima posición no mercado mundial de produtos ecolóxicos.
  • As exportacións alcanzaron os 995 millóns de euros (+5,1 %) e as importacións supuxeron 1.070 millóns de euros (+1,9 %).
  • No tocante a produtores, había 41.840 (+6 %); deles, 36.700 ligados á agricultura, 1.820 á gandería e 3.320 a ambas. A maioría están en Andalucía, Castela-A Mancha, Cataluña e Murcia.
  • Os produtos vexetais ecolóxicos máis consumidos foron as froitas frescas (un 15,5 % na cesta), e as hortalizas frescas (un 13,9 %).
  • Os produtos de orixe animal máis consumidos foron as carnes e derivados cárnicos, co 15 % e a leite e derivados lácteos (7,5 %).

 

 

Granxa Maruxa + Milhulloa = Muuhlloa, cosmética galega, ecolóxica e colaborativa

De izquierda a derecha: María Álvarez, Carmela Valiño, Marta Álvarez, Chusa Expósito e Anxos Orgueira.

Na comarca da Ulloa aséntanse dúas marcas de produtos ecolóxicos do Craega con máis de vinte anos de historia. Por un lado, Granxa Maruxa que está rexentada por Marta Álvarez e, desde hai uns sete anos, axúdalle súa irmá María. Ambas traballan para obter o mellor leite ecolóxico que sae da súa granxa situada en Monterroso. Por outro lado, en Palas de Rei está Milhulloa, unha empresa que se centra no cultivo ecolóxico de plantas medicinais e hortalizas. Esta cooperativa está rexentada pola farmacéutica Chusa Expósito e a bióloga Carmela Valiño, xunto con Anxos Orgueira. O baixo pago dos produtos das cinco levounas a ter que innovar, pero sempre mantendo a súa filosofía de traballo e produción. Así é como naceu Muuhlloa, unha firma de produtos cosméticos galegos e ecolóxicos.

Este ano recibiron o premio Son Muller da Asociación de Mulleres Empresarias de Lugo, no apartado Empresaria Rural, pola calidade dos seus produtos e pola súa firmeza ao apostar polo ecolóxico, o rural e desde o feminino. Un premio que para estas cinco mulleres significa moito, máis ao ser económico “algo que precisamos moito para seguir traballando, investigando e innovando”.

O produto que saíu á luz para dar a coñecer a marca foi un leite corporal feito con leite e milfollas. Como a propia María relata, “fixemos o evidente: un leite corporal con leite, algo que até o de agora non hai”. Os comezos foron bos, xa que ambas as firmas que as preceden son uns referentes en Galicia, en canto a produtos ecolóxicos. Pero tamén fixeron un labor de dalo a coñecer en diferentes feiras. Actualmente, contan con tres produtos á venda, aínda que en breve lanzarán outros como un xampú e un labial. Os produtos que sacan contan co selo de bio.inspecta e ECOPlus de Bio Vida Sana.

Describen Muuhlloa como unha entidade colaborativa, xa que, para cada produto que sacan, contan con outra entidade da zona que traballa coa mesma filosofía que estas cinco emprendedoras. “As dúas primeiras empresas fomos nós, pero por exemplo, para a crema da cara contamos con mazá de Ribela, leituga de mar de Mar de Ardora e cera de abella de Polemel”, explica María. Para os produtos que sairán entrarán novas empresas, tamén ecolóxicas e que buscan o mesmo obxectivo. Esta forma de traballo permítelles a outras empresas medrar e tamén así, conseguen que Muuhlloa chegue máis lonxe e medre.

“Todos os que somos pequenos, estamos máis unidos e facémonos publicidade”

Como xurdiu a idea?

Marta: Pois do mal que nos pagan o leite. Un día de inverno achegueime ata Milhulloa queixándome diso e elas tamén se lamentaban polos prezos dos seus produtos. Ao final, nós vemos que temos boas materias primas. Temos a mesma filosofía de traballo e somos contrarias ás grandes superficies. O primeiro que pensamos foi facer un leite corporal co leite da granxa e as súas plantas. A partir de aí, dixemos que podía ir para diante e seguimos.

Chusa: Nós desde o principio traballabamos con algún balneario para facerlle uns aceites. Entón isto foi como o xermolo da cosmética, que era a nosa ilusión. Ademais, ao xuntarnos cunha persoa coma Marta, que é unha bomba, tiñamos que tirar para adiante. Non pensamos en ningún momento en non levalo a cabo. Esa idea sempre a tivemos e cando ela nos falou do leite pareceunos marabilloso.

Como foi o proceso de elaboración?

María: Chusa e Carmela son farmacéutica e bióloga. Elas pensaron cales serían as plantas que se axustaban a cada produto. A milfollas, ou herba dos carpinteiros, é moi cicatrizante, calmante e encima e haina por todas partes. Chusa dixo que mesturándoo daba un bo resultado e probamos. Nós tiñamos claro que tiña que levar unha boa parte de leite, e leva un 40 %. Logo elas recolleron a milfollas, maceraron os pétalos e fan o hidrolato. O día que se ten que levar todo a Iuvenor Lab (O Carballiño) prepárase. O laboratorio é o que lle dá un rexistro sanitario, fai as análises e certifica que é unha crema estable no tempo e que non contamina. Ademais, para nós é un aforro, porque senón teríamos que facer obra e sería máis custoso. Nós levámoslle as materias primas bastante elaboradas e logo eles fan a emulsión e empaquetado.

Por que a milfollas para o leite corporal?

Carmela: É a que predomina nesta finca e no estudo que fixemos vímoslle moitas propiedades. No tema de pel é cicatrizante. De feito, chámanlle a herba dos carpinteiros porque ten a capacidade rexeneradora. É calmante. Cada día vémoslle novas propiedades. Os compoñentes que teñen e os principios activos teñen esas capacidades.

O leite está claro en cada produto, pero como facedes a escolla das herbas para cada produto?

Carmela: Das que temos aquí vemos as propiedades que teñen e que queremos meter a cada crema. A facial ten por obxectivo darlle elasticidade á pel para prever o envellecemento, pois poñemos plantas que teñen a capacidade antioxidante. Todo iso xunto cos estratos que buscamos doutros produtores que integramos.

Chusa: Desde o século XIX, que houbo a revolución da química moderna, está todo estudado, e a partir de aí imos mirando. O importante é que sexa unha mestura boa para que melloren as propiedades. Ademais, encántanos o sistema de facer unha cosmética colaborativa. Cada vez que sacamos algo novo, miramos a que colegas produtores podemos sacarlle algo novo para o produto. Ao final, todos os que somos pequenos estamos máis unidos e facémonos publicidade entre nós.

Marta: Son os tres que temos agora mesmo, pero depende das épocas. Estamos moi contentas nese aspecto porque o mundo da cosmética non é un mundo fácil, nin moito menos, pero a xente que proba apunta que ten unha boa calidade.

Cal diriades que é o produto estrela?

Marta: Son os tres que temos agora mesmo, pero depende das épocas. Estamos moi contentas nese aspecto porque o mundo da cosmética non é un mundo fácil, nin moito menos, pero a xente que proba apunta que ten unha boa calidade.

Agora están pendentes novos produtos…

Chusa: Si. Un labial do que xa temos todo feito, pero fannos falta cartos. Para todo isto, para o proceso de estudo e todo… Nós non temos maquinaria. Para que cumpra a función do produto, necesita un plan de estudo e maquinaria para iso. Agora mesmo temos liquidada a fórmula do xel e labial.

Carmela: Temos pendente outra colaboración con outra científica de aquí, e estamos aí para seguir co tema de novas especies para a cosmética.

Cales diriades que son as razóns para mercar estes produtos?

María: O primeiro, por suposto, é que son produtos ecolóxicos. Son bos. E despois tamén a xente se decata de que somos cinco mulleres cunha empresa moi pequena e que estamos tratando de facer algo ben feito e desde a solidariedade. Entón isto tamén os incita a mercar para colaborar. Sempre falamos da xente que colaboramos, e poñémolo nas etiquetas.

Marta: É unha innovación grandísima. Empezou nunha granxa que fai cosmética.

En canto aos consumidores, de onde é a clientela?

Marta: Empezamos en Madrid e estamos moi estendidas alí a verdade. Grazas a un programa no que saímos. En Cataluña e no País Vasco tamén temos boas vendas. O que nos falta fóra de Galicia son tendas físicas; temos en sitios puntuais.

GRANXA MARUXA


Neste momento contan cunhas 62 vacas, das que moxen unhas 28. En canto a produtos agrarios só teñen horta para autoconsumo, pero foi unha das ideas que tamén se lle pasou pola cabeza a esta emprendedora. “Vino moi complicado e preferín centrarme no leite”. Granxa Maruxa conta con máis de vinte anos como tal, pero a súa historia remóntase a cincuenta anos atrás cando o pai de María e Marta iniciou o proxecto. Cando Marta estaba a piques de rematar os seus estudos de Empresariais, chegou a casa e “escaparan as vacas, tróuxenas e pareceume sinxelo”. A partir de aí comezou a súa andaina. Tivo que aprender todo de cero, xa que non contou con moita axuda, “non confiaban”. Tras aprender todo o relacionado con isto, visitou a granxa Casa Codesal con seu pai “e el mesmo se decatou que era posible o ecolóxico”. Contando co selo do Craega, empezou coa súa produción de leite. Actualmente está a punto de saír a Cooperativa As Vacas da Ulloa, un proxecto que nace xunto con Ganados A Cernada e co que farán todos os produtos derivados do leite. Desde hai sete anos conta coa axuda de súa irmá María que pechou o estudo fotográfico para irse vivir para o rural: “Estou encantada, non me cambiaría por nada”.

Na carballeira que hai ao redor da súa vivenda e da granxa tamén acollen o Festival Agrocuir. Unha idea que naceu para darlle máis vida ao rural. Ademais deste, que xa ten historia, tamén se celebrou o Monterrosón ou o de Arte no Rural, que xa se mostra no exterior da granxa e vivenda.

MILHULLOA


No inverno a cámara de secado estaba baleira, polo que decidiron buscar unha alternativa. Empezaron co excedente de produción da espinaca, pero volveron á súa filosofía de produtos autóctonos e probaron co grelo. Tras as probas, viron que quedaba ben e foi unha salvación para darlle uso ao secadoiro nese período.

O proxecto de Milhulloa tamén conta con máis de vinte anos de vida. Ao finalizar as carreiras de Chusa e Carmela decidiron meterse nun máster de creación de empresas. A idea que iniciaron xa comprendía as plantas medicinais.

O seu proxecto foi escollido e, tras finalizar o ano de estudos, decidiron que tiñan que seguir adiante. A idea que lles propuñan era que empresas de fóra lles mercasen os produtos, “pero non pagaban nin a colleita”. Desde o inicio, decidiron contar con selo do Craega para o seu proxecto pioneiro. “Empezar con plantas medicinais non foi vantaxoso, porque daquelas non se consumían tantas infusións”, explican. Pero pouco a pouco foron calando e a entidade foi medrando.

Actualmente contan cunhas 65 variedades, incluíndo as mesturas. E a forma de traballar é tratar con xente que está en ecolóxico e ten plantacións de grelos. Ademais, sécanlle diferentes produtos a variadas empresas. Realízanlle un pequeno estudo para saber como vai quedar e logo xa traballan coas diferentes marcas. Milhulloa conta cunhas 10 hectáreas de cultivo das plantas, aínda que ata a primavera non hai nada.

A pandemia neste sector semella non ter pasado. “Quizais porque a tendencia foi ir máis ao pequeno comercio e aí é onde estamos nós”, apuntan. Aproveitaron esta época tan atípica para facer un etiquetado diferente, “unha homenaxe para os avós e padriños, que ao final son os que sempre nos consenten e os que máis se están vendo afectados pola pandemia”.

 

Crecemento imparable da agricultura ecolóxica a nivel mundial

Os últimos datos sobre agricultura ecolóxica en todo o mundo foron presentados polo Instituto de Investigación de Agricultura Orgánica FiBL e IFOAM-Organics International en BIOFACH, a feira líder mundial de alimentos ecolóxicos, espazo onde se publicou o anuario estatístico The World of Organic Agriculture o mércores 17 de febreiro de 2021 na edición dixital deste ano de BIOFACH especial 2021.

Entre outros datos destacables que se recollen no último informe de FiBL sobre agricultura ecolóxica en todo o mundo cabe destacar que as terras agrícolas dedicadas á produción ecolóxica aumentaron en 1,1 millóns de hectáreas e as vendas comerciantes polo miúdo de alimentos ecolóxicos continuaron crecendo até chegar aos 106.000 millóns de euros, como o mostran os datos de 187 países (datos a finais de 2019).

Fonte: FiBL

Esta enquisa anual sobre agricultura ecolóxica en todo o mundo conta co apoio da Secretaría de Estado de Asuntos Económicos de Suíza (SECO), o Centro de Comercio Internacional (ITC), o Fondo de Sustentabilidade de Coop Suíza e NürnbergMesse, os organizadores da feira Biofach.

ler a reportaxe completa

Fonte: Revista dixital Bio Eco Actual