Arquivos da etiqueta: alimento ecológico

O CFEA Sergude organiza unha sesión demostrativa para a produción forraxeira ecolóxica

CFEA de Sergude, da Axencia Galega da Calidade Alimentaria (Agacal), organiza mañá, venres 9, unha xornada demostrativa. A sesión está coordinada coa SAT La Sobreira e céntrase na identificación de oportunidades no control de herbas adventicias na produción forraxeira ecolóxica. Celebrarase en Pazo (Boimorto, A Coruña) de 11:00 a 14:00 horas e de 16:00 a 20:00 horas. Para máis información pódese solicitar no correo cursos.agacal.sergude@xunta.gal.

A alimentación saudable e o deporte, unidos grazas ao Convenio de colaboración entre o Craega e a Fegatri

Gonzalo Triunfo e Francisco L. Valladares, presidentes da Fegatri e do Craega repectivamente, tras a firma do convenio

O presidente do Craega, Francisco López Valladares, e mais o presidente da Federación Galega de Tríatlon e Pentatlón Moderno (Fegatri), Gonzalo Mario Triunfo, asinaron esta tarde na sede da Federación en Lugo un convenio de colaboración entre ambas as entidades co fin de impulsar e apoiar as actividades deportivas e fomentar o consumo de produtos amparados polo Consello Regulador e o coñecemento da produción ecolóxica por parte dos deportistas e consumidores en xeral.

Deste xeito, no ámbito de celebración das probas deportivas, os deportistas da Federación lucirán a imaxe e os logos do Craega, co obxectivo de visibilizar a importancia dunha alimentación saudable e respectuosa co medio ambiente, así como a práctica do deporte.

 

CALENDARIO DE PROBAS 

O calendario de probas previstas no circuíto galego de Tríatlon 2021 é o seguinte:

  • Sábado 26 de xuño: X Tríatlon Concello de Poio, praia de Lourido (Poio, Pontevedra). Cancelada
  • Domingo 11 de xullo: XXXII Tríatlon do Miño, Área Recreativa Los Robles (Lugo). Celebrada
  • *Sábado 24 de xullo: Campionato Galego Supersprint en Narón e Trishark Narón´21. Celebrada
  • Domingo 8 de agosto: XX Tríatlon Cidade de Ferrol, Porto Deportivo de Ferrol. Cancelada
  • Sábado 21 de agosto: XX Tríatlon Cidade de Pontevedra. Campionato Xunta de Galicia Absoluto de Tríatlon e Paratríatlon, Paseo do Lérez (Pontevedra)

Fóra de circuíto

Sábado 12 de xuño: III Mar de Muros Tríatlon-Trofeo Iván Raña, Porto de Muros. Celebrada

*Debido a cancelación da proba de Poio, que formaba parte do Circuíto Craega de Triatlón 2021, acordaron incluír o patrocinio no próximo Campionato Galego Supersprint para cadetes, xuvenís e júnior, que se celebrará en Narón o sábado 24 de xullo. Trátase dunha proba clasificatoria para o Campionato Nacional da categoría. O coorganizador da proba (A.D. Náutico de Narón) tamén organiza ese día un triatlón popular en distancia sprint, Trishark Narón´21, no que contará coa imaxe de Craega na promoción desa proba  popular.

O Congreso Ecolóxico Europeo 2021 celébrase online do 16 ao 18 de xuño

A 15ª edición do Congreso Ecolóxico Europeo será online, en vivo desde Lisboa, do 16 ao 18 de xuño de 2021 das 10:00 ás 15:30 horas. O evento, organizado por IFOAM Organics Europe e o seu socio portugués Agrobio, profundará no sector ecolóxico, as súas estruturas e o seu impulso político-lexislativo na UE.
A cita deste ano ten como obxectivo inspirar aos participantes ensinando iniciativas de representantes e expertos do sector ecolóxico. O evento reunirá oradores de alto nivel e moderadores de toda Europa para falar sobre os desenvolvementos de políticas en alimentos e agricultura ecolóxicos en seis sesións.

O PROGRAMA

16 de xuño:A nova PAC e o Pacto Verde Europeo” e “A agricultura ecolóxica en Portugal”

Despois da apertura do Congreso, a primeira sesión avaliará se a nova PAC e as ambicións nacionais, a través dos plans estratéxicos propostos, están en liña cos obxectivos da UE do Pacto Verde, en particular co obxectivo de alcanzar o 25% de terra ecolóxica para 2030. Despois da pausa para o xantar, discutirase a situación actual da Agricultura Ecolóxica en Portugal, profundando no traballo que se realiza sobre o terreo, vinculando a agricultura ecolóxica coa saúde e a biodiversidade.

17 de xuño: “Secuestro climático na agricultura” e “Sistemas alimentarios máis sustentables”

O segundo día comezará cun panel de discusión sobre se a «neutralidade climática» é un obxectivo realista para o sector agrícola e mesmo se é un obxectivo desexable, dado o enfoque actual na eficiencia e os riscos de compensacións con obxectivos de biodiversidade. Despois desta sesión, discutirase a transición cara a sistemas alimentarios máis sostibles. As iniciativas como o Plan de Acción para a Agricultura Ecolóxica, a contratación pública sustentable e outras iniciativas relacionadas coa estratexia “Da granxa á mesa” serán o tema central da sesión.

18 de xuño:O Novo Regulamento Ecolóxico da UE” e “O desenvolvemento rural”

O último día comezará cun panel de discusión sobre como se implementará o novo Regulamento Ecolóxico (UE) 2018/848 e de que maneira eses cambios técnicos axudarían a alcanzar os obxectivos da UE do 25% en terras en cultivo ecolóxico para 2030. Para finalizar o congreso, e antes do acto de clausura, terá lugar unha sesión sobre como iniciativas como os distritos ecolóxicos (ou biodistritos), os laboratorios vivos e as demostracións agrícolas poden contribuír ao desenvolvemento das zonas rurais e ao éxito do Plan de Acción para a Agricultura Ecolóxica.

Información e inscrición

Fonte da noticia

O Craega implícase por segundo ano consecutivo na campaña Come Local

A Consellería do Medio Rural, a través da Axencia Galega da Calidade Alimentaria (Agacal), lanza a segunda edición da campaña Come Local nos comedores escolares no marco da canle Mercaproximidade. A iniciativa será posta en marcha por Slow Food Compostela co obxectivo de impulsar o consumo dos produtos agroalimentarios galegos con indicativo de calidade: as DOP (Denominación de Orixe Protexida), IXP (Indicación Xeográfica Protexida) e a agricultura ecolóxica de proximidade. Esta última será levada ás mesas dos comedores escolares participantes grazas á colaboración do Craega, que achegará diversos alimentos certificados, como carne de polo e hortalizas, entre outros.

Esta campaña, que tivo unha grande acollida na súa primeira edición,  desenvolverase ata o 31 de outubro. Nesta ocasión contará con formación e asesoramento aos responsables dos comedores adherido, polo que non só serán degustacións de menús, senón tamén actividades formativas, tanto das características nutricionais dos alimentos como do impacto que supón o consumo de alimentos certificados na consecución dos Obxectos de Desenvolvemento Sostible da ONU.

ACTIVIDADES DA CAMPAÑA

  • Achegar aos comedores seleccionados, de forma totalmente gratuíta, produtos galegos con certificado de calidade. Darase a oportunidade de que nenos e nenas usuarios do comedor poidan degustar varios produtos dunha excelente calidade con orixe Galicia e cunha trazabilidade garantida.
  • Realizar un escandallo semanal para dotar os comedores dunha ferramenta que facilite o cálculo do gasto que lles permita planificar mellor a súa conta de gastos.
  • Enviar un vídeo aos estudantes sobre educación alimentaria, que ten como fío condutor o papel da biodiversidade agrícola e o que xogan os produtos certificados á hora de conservala, así coma a importancia de comer de xeito local.
  • Formación a través de Zoom aos cociñeiros/as dos comedores e caterings.

PARTICIPANTES

Ademais dos catro Comedores Escolares KM 0 que xa participaron na primeira campaña: CEIP Xacinto Amigo Lera (Portomouro), CEIP Os Muíños (Muxía), CEIP Vicente Otero Valcárcel (Carral) e CEIP López Ferreiro (Compostela) súmanse Divino Maestro e Colexio La Milagrosa de Santiago de Compostela; Colexio Alca de Ames, CEIP Santa Baia de Boiro; CPI Dr. López Suárez de Friol; CEIP San Cosme de Barreiros; CEIP Juan Rey de Lourenzá; CEIP Manuel Mato Vizoso de Vilalba; CEIP Rosalía de Castro de Bóveda; IES Lagoa de Antela de Xinzo de Limia; CEIP Joaquina Gallego Jorreto de A Merca; CEIP Carlos Cid Arregui de Rairiz de Vega; Colexio Salesianos-A Mercé de Cambados; CEIP Xoaquín Loriga de Prado (Lalín); CEIP A Lomba de Vilagarcía de Arousa e CEIP A Paz de Coruxo (Vigo).

Que sementar na primavera?

Xa ben entrada a estación, é o momento de comezar a preparar o terreo para as colleitas de verán e, por suposto, colleitas ecolóxicas. Chega o mes de abril, pero aínda así non hai que confiarse coas temperaturas unha vez superado o inverno, xa que a primavera pode ser inestable e traer consigo xeadas que poden botar a perder as plantacións.

Hai que tratar de protexer as novas plantas de cultivo para evitar que se danen coas baixas temperaturas. Para empezar, é un bo momento para preparar o terreo, eliminando as malas herbas e planificando o deseño da horta, é dicir, determinando onde irá cada cultivo.

Se en marzo houbo sementeiras, é posible que xa haxa algunhas plantas para trasladar á horta. Neste mes hai que plantar todas aquelas que se queiran cultivar durante o verán. Algunhas poden ser para todo o ano, aínda que prefiran a primavera, e outras son específicas para estes meses.

Algunhas das plantas que hai que poñer na horta son as seguintes: tomate, leituga, espinaca, pemento, cenoria, remolacha, cabaciña, porro, cogombro, feixón, cabaza, melón, sandía ou amorodo. Este último xa comeza a xermolar a súa flor e, se todo vai ben, nos inicios do verán xa poderemos recoller os primeiros froitos.

Lembrámosvos que no buscador da nosa páxina web podedes atopar os operadores que traballan esta froita, así como outros produtos tanto de orixe vexetal como animal.

Granxa Maruxa + Milhulloa = Muuhlloa, cosmética galega, ecolóxica e colaborativa

De izquierda a derecha: María Álvarez, Carmela Valiño, Marta Álvarez, Chusa Expósito e Anxos Orgueira.

Na comarca da Ulloa aséntanse dúas marcas de produtos ecolóxicos do Craega con máis de vinte anos de historia. Por un lado, Granxa Maruxa que está rexentada por Marta Álvarez e, desde hai uns sete anos, axúdalle súa irmá María. Ambas traballan para obter o mellor leite ecolóxico que sae da súa granxa situada en Monterroso. Por outro lado, en Palas de Rei está Milhulloa, unha empresa que se centra no cultivo ecolóxico de plantas medicinais e hortalizas. Esta cooperativa está rexentada pola farmacéutica Chusa Expósito e a bióloga Carmela Valiño, xunto con Anxos Orgueira. O baixo pago dos produtos das cinco levounas a ter que innovar, pero sempre mantendo a súa filosofía de traballo e produción. Así é como naceu Muuhlloa, unha firma de produtos cosméticos galegos e ecolóxicos.

Este ano recibiron o premio Son Muller da Asociación de Mulleres Empresarias de Lugo, no apartado Empresaria Rural, pola calidade dos seus produtos e pola súa firmeza ao apostar polo ecolóxico, o rural e desde o feminino. Un premio que para estas cinco mulleres significa moito, máis ao ser económico “algo que precisamos moito para seguir traballando, investigando e innovando”.

O produto que saíu á luz para dar a coñecer a marca foi un leite corporal feito con leite e milfollas. Como a propia María relata, “fixemos o evidente: un leite corporal con leite, algo que até o de agora non hai”. Os comezos foron bos, xa que ambas as firmas que as preceden son uns referentes en Galicia, en canto a produtos ecolóxicos. Pero tamén fixeron un labor de dalo a coñecer en diferentes feiras. Actualmente, contan con tres produtos á venda, aínda que en breve lanzarán outros como un xampú e un labial. Os produtos que sacan contan co selo de bio.inspecta e ECOPlus de Bio Vida Sana.

Describen Muuhlloa como unha entidade colaborativa, xa que, para cada produto que sacan, contan con outra entidade da zona que traballa coa mesma filosofía que estas cinco emprendedoras. “As dúas primeiras empresas fomos nós, pero por exemplo, para a crema da cara contamos con mazá de Ribela, leituga de mar de Mar de Ardora e cera de abella de Polemel”, explica María. Para os produtos que sairán entrarán novas empresas, tamén ecolóxicas e que buscan o mesmo obxectivo. Esta forma de traballo permítelles a outras empresas medrar e tamén así, conseguen que Muuhlloa chegue máis lonxe e medre.

“Todos os que somos pequenos, estamos máis unidos e facémonos publicidade”

Como xurdiu a idea?

Marta: Pois do mal que nos pagan o leite. Un día de inverno achegueime ata Milhulloa queixándome diso e elas tamén se lamentaban polos prezos dos seus produtos. Ao final, nós vemos que temos boas materias primas. Temos a mesma filosofía de traballo e somos contrarias ás grandes superficies. O primeiro que pensamos foi facer un leite corporal co leite da granxa e as súas plantas. A partir de aí, dixemos que podía ir para diante e seguimos.

Chusa: Nós desde o principio traballabamos con algún balneario para facerlle uns aceites. Entón isto foi como o xermolo da cosmética, que era a nosa ilusión. Ademais, ao xuntarnos cunha persoa coma Marta, que é unha bomba, tiñamos que tirar para adiante. Non pensamos en ningún momento en non levalo a cabo. Esa idea sempre a tivemos e cando ela nos falou do leite pareceunos marabilloso.

Como foi o proceso de elaboración?

María: Chusa e Carmela son farmacéutica e bióloga. Elas pensaron cales serían as plantas que se axustaban a cada produto. A milfollas, ou herba dos carpinteiros, é moi cicatrizante, calmante e encima e haina por todas partes. Chusa dixo que mesturándoo daba un bo resultado e probamos. Nós tiñamos claro que tiña que levar unha boa parte de leite, e leva un 40 %. Logo elas recolleron a milfollas, maceraron os pétalos e fan o hidrolato. O día que se ten que levar todo a Iuvenor Lab (O Carballiño) prepárase. O laboratorio é o que lle dá un rexistro sanitario, fai as análises e certifica que é unha crema estable no tempo e que non contamina. Ademais, para nós é un aforro, porque senón teríamos que facer obra e sería máis custoso. Nós levámoslle as materias primas bastante elaboradas e logo eles fan a emulsión e empaquetado.

Por que a milfollas para o leite corporal?

Carmela: É a que predomina nesta finca e no estudo que fixemos vímoslle moitas propiedades. No tema de pel é cicatrizante. De feito, chámanlle a herba dos carpinteiros porque ten a capacidade rexeneradora. É calmante. Cada día vémoslle novas propiedades. Os compoñentes que teñen e os principios activos teñen esas capacidades.

O leite está claro en cada produto, pero como facedes a escolla das herbas para cada produto?

Carmela: Das que temos aquí vemos as propiedades que teñen e que queremos meter a cada crema. A facial ten por obxectivo darlle elasticidade á pel para prever o envellecemento, pois poñemos plantas que teñen a capacidade antioxidante. Todo iso xunto cos estratos que buscamos doutros produtores que integramos.

Chusa: Desde o século XIX, que houbo a revolución da química moderna, está todo estudado, e a partir de aí imos mirando. O importante é que sexa unha mestura boa para que melloren as propiedades. Ademais, encántanos o sistema de facer unha cosmética colaborativa. Cada vez que sacamos algo novo, miramos a que colegas produtores podemos sacarlle algo novo para o produto. Ao final, todos os que somos pequenos estamos máis unidos e facémonos publicidade entre nós.

Marta: Son os tres que temos agora mesmo, pero depende das épocas. Estamos moi contentas nese aspecto porque o mundo da cosmética non é un mundo fácil, nin moito menos, pero a xente que proba apunta que ten unha boa calidade.

Cal diriades que é o produto estrela?

Marta: Son os tres que temos agora mesmo, pero depende das épocas. Estamos moi contentas nese aspecto porque o mundo da cosmética non é un mundo fácil, nin moito menos, pero a xente que proba apunta que ten unha boa calidade.

Agora están pendentes novos produtos…

Chusa: Si. Un labial do que xa temos todo feito, pero fannos falta cartos. Para todo isto, para o proceso de estudo e todo… Nós non temos maquinaria. Para que cumpra a función do produto, necesita un plan de estudo e maquinaria para iso. Agora mesmo temos liquidada a fórmula do xel e labial.

Carmela: Temos pendente outra colaboración con outra científica de aquí, e estamos aí para seguir co tema de novas especies para a cosmética.

Cales diriades que son as razóns para mercar estes produtos?

María: O primeiro, por suposto, é que son produtos ecolóxicos. Son bos. E despois tamén a xente se decata de que somos cinco mulleres cunha empresa moi pequena e que estamos tratando de facer algo ben feito e desde a solidariedade. Entón isto tamén os incita a mercar para colaborar. Sempre falamos da xente que colaboramos, e poñémolo nas etiquetas.

Marta: É unha innovación grandísima. Empezou nunha granxa que fai cosmética.

En canto aos consumidores, de onde é a clientela?

Marta: Empezamos en Madrid e estamos moi estendidas alí a verdade. Grazas a un programa no que saímos. En Cataluña e no País Vasco tamén temos boas vendas. O que nos falta fóra de Galicia son tendas físicas; temos en sitios puntuais.

GRANXA MARUXA


Neste momento contan cunhas 62 vacas, das que moxen unhas 28. En canto a produtos agrarios só teñen horta para autoconsumo, pero foi unha das ideas que tamén se lle pasou pola cabeza a esta emprendedora. “Vino moi complicado e preferín centrarme no leite”. Granxa Maruxa conta con máis de vinte anos como tal, pero a súa historia remóntase a cincuenta anos atrás cando o pai de María e Marta iniciou o proxecto. Cando Marta estaba a piques de rematar os seus estudos de Empresariais, chegou a casa e “escaparan as vacas, tróuxenas e pareceume sinxelo”. A partir de aí comezou a súa andaina. Tivo que aprender todo de cero, xa que non contou con moita axuda, “non confiaban”. Tras aprender todo o relacionado con isto, visitou a granxa Casa Codesal con seu pai “e el mesmo se decatou que era posible o ecolóxico”. Contando co selo do Craega, empezou coa súa produción de leite. Actualmente está a punto de saír a Cooperativa As Vacas da Ulloa, un proxecto que nace xunto con Ganados A Cernada e co que farán todos os produtos derivados do leite. Desde hai sete anos conta coa axuda de súa irmá María que pechou o estudo fotográfico para irse vivir para o rural: “Estou encantada, non me cambiaría por nada”.

Na carballeira que hai ao redor da súa vivenda e da granxa tamén acollen o Festival Agrocuir. Unha idea que naceu para darlle máis vida ao rural. Ademais deste, que xa ten historia, tamén se celebrou o Monterrosón ou o de Arte no Rural, que xa se mostra no exterior da granxa e vivenda.

MILHULLOA


No inverno a cámara de secado estaba baleira, polo que decidiron buscar unha alternativa. Empezaron co excedente de produción da espinaca, pero volveron á súa filosofía de produtos autóctonos e probaron co grelo. Tras as probas, viron que quedaba ben e foi unha salvación para darlle uso ao secadoiro nese período.

O proxecto de Milhulloa tamén conta con máis de vinte anos de vida. Ao finalizar as carreiras de Chusa e Carmela decidiron meterse nun máster de creación de empresas. A idea que iniciaron xa comprendía as plantas medicinais.

O seu proxecto foi escollido e, tras finalizar o ano de estudos, decidiron que tiñan que seguir adiante. A idea que lles propuñan era que empresas de fóra lles mercasen os produtos, “pero non pagaban nin a colleita”. Desde o inicio, decidiron contar con selo do Craega para o seu proxecto pioneiro. “Empezar con plantas medicinais non foi vantaxoso, porque daquelas non se consumían tantas infusións”, explican. Pero pouco a pouco foron calando e a entidade foi medrando.

Actualmente contan cunhas 65 variedades, incluíndo as mesturas. E a forma de traballar é tratar con xente que está en ecolóxico e ten plantacións de grelos. Ademais, sécanlle diferentes produtos a variadas empresas. Realízanlle un pequeno estudo para saber como vai quedar e logo xa traballan coas diferentes marcas. Milhulloa conta cunhas 10 hectáreas de cultivo das plantas, aínda que ata a primavera non hai nada.

A pandemia neste sector semella non ter pasado. “Quizais porque a tendencia foi ir máis ao pequeno comercio e aí é onde estamos nós”, apuntan. Aproveitaron esta época tan atípica para facer un etiquetado diferente, “unha homenaxe para os avós e padriños, que ao final son os que sempre nos consenten e os que máis se están vendo afectados pola pandemia”.

 

Varios eurodeputados solicítanlle á comisaria de Sanidade da UE a regulación do uso do termo ‘natural’ na etiquetaxe dos alimentos

Un total de 31 eurodeputados, a maioría membros do Grupo dos Verdes, fixeron chegar unha carta á comisaria de Sanidade da UE, Stella Kyriakides, na que lle solicitan á Comisión Europea que as leis europeas “establezan unha definición clara do termo ‘natural’ aplicado aos alimentos, que indiquen en que casos se pode usar na etiquetaxe para garantir a información dos consumidores, e que os produtos etiquetados como ‘naturais’ non conteñan nin transxénicos, nin substancias sintéticas e que sexan 100 % biodegradables”.

Ademais, os eurodeputados piden que nas etiquetas “a información sobre a orixe dos ingredientes e a composición real dos produtos sexa facilmente recoñecible polos consumidores”.

Na misiva, os parlamentarios lembran que “actualmente, a UE carece dunha definición legal do termo ‘natural’ para produtos alimenticios. En consecuencia, os fabricantes adoitan utilizalo para promover características dos alimentos que difiren case sempre da composición do produto final”.

A pesar desta falta de lexislación, as normas europeas sobre as declaracións de propiedades nutricionais e saudables dos alimentos si que mencionan explicitamente que os criterios de etiquetaxe de alimentos deben “ter como obxectivo evitar que as declaracións de propiedades nutricionais dun produto contribúan a esconder as súas auténticas características nutricional e poidan inducir a erro aos consumidores no momento de elixir opcións para unha dieta equilibrada”.

Para os eurodeputados asinantes, o uso libre que a industria alimentaria pode facer agora mesmo nos seus envases deste concepto estaría en contra deste principio básico que debe rexer a etiquetaxe de calquera produto á venda na UE.

Os europarlamentarios invocan un informe publicado recentemente por Safe Food Advocacy Europe que establece que, en xeral, os consumidores asocian o termo `natural´ con algo positivo, relacionado coa orixe, o mínimo procesado e a ausencia de aditivos. Posto que se pode usar este concepto libremente a pesar de que o produto conteña aditivos e sexa un ultraprocesado, o informe concluía que os consumidores que compran estes alimentos basean as súas eleccións en supostos incorrectos.

Información completa

Fonte: La Vanguardia | autor: Albert Molins

 

 

O MAPA promove os alimentos ecolóxicos españois na 1ª feira virtual de Biofach

O Craega participou en Biofach 2020 co lema “Somos Semente” 

O Ministerio de Agricultura, Pesca e Alimentación (MAPA) participa de novo na 32.ª edición da Feira Biofach (17-19 de febreiro), considerada coma o principal encontro mundial dos alimentos ecolóxicos, onde promoverá estes días a calidade e variedade dos Alimentos de España, a través das campañas Spain Food Nation e #alimentosdespaña. 

BIOFACH SÚMASE AO FORMATO EN LIÑA

A Feira Biofach ofrece unha panorámica completa da actividade ecolóxica, desde a produción até a súa transformación, comercialización e investigación. Debido á pandemia, Biofach non puido celebrarse este ano na cidade alemá de Nürenberg como en edicións anteriores, senón que se está a desenvolver de maneira virtual, do 17 ao 19 de febreiro, de maneira conxunta con Vivaness, a feira internacional de coidado persoal natural e orgánico.

No acceso que ten o ministerio como expositor nesta edición virtual, porase a disposición dos visitantes documentos e vídeos con contidos relativos ao sector ecolóxico de España. Así mesmo, antes do inicio dos diversos relatorios, encontros e mesas redondas organizadas por Biofach, emitirase un vídeo con información sobre a produción ecolóxica española.

 ESPAÑA, LÍDER DA UE NO SECTOR ECO

Con esta participación, o MAPA apoia un sector en constante crecemento e de grande importancia económica, social e ambiental para o noso país. España é líder da Unión Europea e cuarto país do mundo en superficie de produción ecolóxica, cunha oferta de gran calidade e variedade, froito da diversidade de climas, chans e prácticas culturais, así como dunha industria transformadora en constante evolución e crecemento, que integra innovación e tradición.

A crecente demanda de produtos ecolóxicos por parte dos consumidores europeos, así como a afluencia a Biofach de operadores comerciais de todo o mundo, constitúen unha excelente oportunidade para os produtos orgánicos españois.

CIFRAS DA FEIRA EN 2020

Na última edición, un total de 3.792 expositores procedentes de 110 países mostráronlles os seus produtos aos máis de 47.000 visitantes profesionais de 136 países, que acudiron a esta feira a coñecer os novos desenvolvementos, tendencias e innovacións que alí se presentaron.

Máis información: www.biofach.de/en

O mercado bio en Alemaña aumenta as súas vendas durante a pandemia

 

Segundo se publicou en diversos medios, un recente informe do Ministerio de Agricultura de Alemaña asegura que “os consumidores deron, durante a pandemia, máis importancia aos produtos locais e a produción ecolóxica”. Ao comprar carne, en particular, os consumidores recorren cada vez máis a estes últimos. Así o corroboran as últimas cifras do ecobarómetro encargado polo Ministerio Federal de Alimentación e Agricultura (BMEL), que presentou, recentemente, a ministra federal Julia Klöckner. En 2020, o mercado alemán ha superado unha cifra de negocio de 14 mil millóns de euros.

A enquisa é moi clara nas tendencias de consumo. Podemos extraer diversas conclusións. A máis importante é que o sector ecolóxico alemán vai seguir crecendo. Os ovos ecolóxicos levan a palma en Alemaña. Case todos os consumidores prefírenos. Tamén en carne e en embutidos unha ampla maioría de consumidores busca os produtos orgánicos.

CONCLUSIÓNS DO ESTUDO

  • Á hora de comprar alimentos ecolóxicos, os supermercados seguen a ser decisivos: nove de cada dez enquisados compran aquí, seguidos das tendas de desconto (68 %).
  • Case o 90 % afirma que quere usar a variante ecolóxica polo menos ocasionalmente no futuro.
  • Cando se trata de ovos ecolóxicos, a proporción de enquisados que din que compran estes produtos “exclusivamente” ou “a miúdo” aumenta ao 74 %; en 2019, foi do 66 %.
  • O 37 % dos enquisados afirmou que compra regularmente produtos ecolóxicos.
  • No caso dos produtos de carne e embutidos orgánicos, o 50 % dos enquisados afirma que os compra polo menos con frecuencia; en 2019, só foron o 42 %.
  • A pandemia da covid-19 provocou unha maior preocupación dos consumidores alemáns en temas de saúde. Son cada vez máis os que queren ter unha dieta sa para protexer a súa saúde e o seu organismo ante agresións de virus, etc.
  • Información completa
  • Fonte: El Ecomensajero Digital | Vida Sana.org

Craega asistirá á primeira feira dixital de Biocultura

O Craega participará na 1.ª edición en liña da feira ecolóxica Biocultura On, organizada por Vida Sana, que terá lugar os vindeiros días 21, 22 e 23 de xaneiro, e farao da man de Intereco, xunto co resto dos consellos reguladores das distintas comunidades autónomas. Ao longo dos tres días, ademais do expositor común, ofreceranse diversas actividades, entre as que haberá obradoiros ecogastronómicos e charlas para informar os asistentes sobre a certificación pública.

ENTRADAS Á VENDA

Esta feira pretende ser unha experiencia dixital na que se presente o último do universo eco de modo online e en directo. Se queredes participar, como público ou como profesionais, podedes facelo clicando nesta ligazón.