Arquivos da etiqueta: #agriculturaeco

O Craega anima as entidades galegas a participar na iniciativa da Ifoam ao redor do Día da Agricultura Eco da UE

En 2021 a Comisión Europea estableceu o 23 de setembro como o Día da Agricultura Ecolóxica da UE, como parte do Pacto Verde Europeo. Dende o Craega aplaudimos esta acción, pois o feito de marcar no calendario un día dedicado á agricultura ecolóxica permitirá visibilizar a vital importancia do consumo dos productos ecolóxicos, nomeadamente na situación socioeconómica na que nos atopamos.

Cando falta algo máis dun mes para a súa celebración, a IFOAM Organics Europe está a convocar as entidades e organizacións para preparar iniciativas e eventos ao redor desta data sinalada. A entidade  europea recollerá todos estes proxectosdaralles visibilidade a través da súa páxina web e as súas redes sociais. Algunhas das primeiras actividades xa se poden consultar nun mapa interactivo.

‘FALEMOS DO ECOLÓXICO’

Co fin de inspirar á formulación de actividades, IFOAM Organics Europe organizou unha sesión exclusiva para membros. Baixo o título «Falemos do ecolóxico: Día da Agricultura Ecolóxica da UE», o evento levarase a cabo o 10 de agosto de 14:00 a 15:00 horas (baixo inscrición previa).

Información completa en Bioeco Actual

A UE organiza a primeira edición de premios ecolóxicos

O Plan de Acción para o Desenvolvemento da Produción Ecolóxica inclúe a concesión duns premios anuais que recoñezan a excelencia na cadea de valor ecolóxica. O seu propósito é recompensar os mellores e máis innovadores actores ecolóxicos, que contribúan á redución do impacto da agricultura no medio ambiente e o clima. Estes premios concederanse por primeira vez en 2022.

Os premios ecolóxicos da UE comprenden sete categorías e oito premios. Expresan o recoñecemento a diferentes actores da cadea de valor ecolóxica que desenvolvesen un proxecto de excelencia, innovador, sustentable e inspirador, que xere un valor engadido real para a produción e o consumo ecolóxicos.

  • Mellor agricultora ecolóxica e mellor agricultor ecolóxico
  • Mellor rexión ecolóxica
  • Mellor cidade ecolóxica
  • Mellor biodistrito ecolóxico
  • Mellor peme ecolóxica
  • Mellor comerciante polo miúdo de alimentos ecolóxicos
  • Mellor restaurante ecolóxico

COMO PRESENTAR AS CANDIDATURAS

Pode presentar a súa candidatura calquera operador, institución ou establecemento da cadea de valor ecolóxica cun proxecto notable que contribúa a que os produtos ecolóxicos da UE sexan máis alcanzables ou accesibles. Os promotores dos proxectos deben estar establecidos ou ser residentes na UE.

As candidaturas deben presentarse do 25 de marzo ao 8 de xuño de 2022. Ademais, o proxecto presentado debe desenvolverse na UE e pertencer claramente a unha das sete categorías e a un dos oito premios de 2022. Un mesmo proxecto non pode presentarse para varias categorías ou para varios premios. Cada candidato só pode presentar unha candidatura para un premio.

O proxecto debe executarse xa na súa totalidade ou atoparse nun estado suficientemente maduro para que o xurado poida avalialo, é dicir, a execución física debe estar o suficientemente avanzada como para demostrar que se conseguiron os obxectivos.

Máis información

EFA Fonteboa gaña o XXII Premio Aresa

Na xornada de onte, o xurado do XXII Premio Aresa reuniuse para dar a coñecer o nome do galardoado. Antonio López, reitor da USC; Montserrat Valcárcel, vicerreitora de Coordinación do Campus Lugo; María Cruz Díaz, presidenta da Asociación Nacional de Enxeñeiros Agrónomos; Carme Pampín, CEO de GalChimia, e Álvaro Rodríguez Eiras, presidente de Aresa, foron os encargados de xulgar esta edición.

O reitor da USC valorou a diversidade das candidaturas: “Contamos con moita variedade nos proxectos, desde formativos ata de investigación, gandeiros ou agrícolas… Todas elas, iso si, con moito valor” e anunciou que “tras estudalas a fondo, acordamos por unanimidade que a vencedora desta vixésimo segunda edición do Premio Aresa fose a presentada polo Centro de Promoción Rural-EFA Fonteboa, de Coristanco”.

López Díaz expuxo que xa fora finalista en anteriores edicións do Premio e “queremos destacar así, nesta ocasión, a importancia que a formación de profesionais ten para o desenvolvemento presente e futuro do sector primario, dos sectores agrícola e gandeiro de Galicia”. Así mesmo, resaltou que para estar á altura dos retos que veñen, é necesario contar con persoal formado e cualificado e “a EFA Fonteboa ten unha longa traxectoria na formación do ámbito rural”.

AS CANDIDATURAS

Cabe destacar que entre a listaxe de candidaturas presentadas a esta edición do Premio Aresa atopábanse tres entidades que contan coa certificación do Craega: Muuhlloa, Carabuñas e Traloagro. Ademais, presentáronse Federación de Razas Autóctonas de Galicia (Boaga); Cooperativa Tres Fuciños; Timbersoul; Amarelante; DOP O Cebreiro; Estratexia de loita ecolóxica fronte á praga da rata topo; Ganadería María Dolores Vázquez Carballés; Belacolmea, e Comunidade de Montes Veciñais en Mancomunidade de Couso.

ENTREGA DO PREMIO

En canto á entrega do galardón, López Díaz anunciou que será o próximo 11 de marzo no auditorio da Facultade de Veterinaria do Campus de Lugo no formato tradicional, sempre que as condicións sanitarias derivadas da pandemia o permitan. O Premio Aresa está dotado con 10.000 euros e unha placa conmemorativa.

González: “En Galicia sabemos facer produtos eco saudables e de calidade. Se van co selo do Craega, temos esa garantía”

De esq. a dta, José Luis Cabarcos (director xeral do Agacal); José González, conselleiro do Medio Rural; Francisco L. Valladares e  Javier García, presidente e secretario do Craega respectivamente

  • O presidente do Craega resaltou un dos datos da enquisa: “Por primeira vez a porcentaxe de consumidores supera a de non consumidores”
  • Cabarcos manifestou que a produción ecolóxica é unha “oportunidade para medrar en cultivos e fomentar a biodiversidade”

O presidente do Craega, Francisco López Valladares, presentou hoxe no Hotel Cardenal de Monforte de Lemos o Barómetro 2020 sobre percepción e consumo de alimentos ecolóxicos en Galicia. Estivo acompañado polo secretario, Javier García; o presidente da Axencia Galega de Calidade Alimentaria (Agacal), José Luis Cabarcos, e o conselleiro do Medio Rural, José González.

Os resultados do Barómetro foron obtidos a raíz dunha enquisa telefónica, realizada á poboación galega maior de 18 anos  e con responsabilidade a través do sistema CATI. A mostra dos 900 enquisados foi feita no último trimestre do pasado ano.

O presidente do Craega foi o encargado de abrir a sesión e detallou algúns dos datos máis relevantes da enquisa, como é o lugar de compra, que segue sendo o supermercado. “O dato máis salientable da enquisa foi que por primeira vez a porcentaxe de consumidores supera a de non consumidores”, indicou López Valladares. Outro dos temas que tocou foi que case a terceira parte os enquisados recoñecen algún tipo de certificación vencellado á alimentación eco, “non obstante, só unha pequena parte é quen de identificar concretamente o selo do Craega; nese aspecto temos que traballar máis”, resaltou durante a presentación. Neste eido, sinalou que “cada vez se esixen máis selos para os produtos, e isto supón que o consumidor non saiba que está comprando; creo que hai que acortar en certificacións”.

O seguinte en intervir foi o conselleiro do Medio Rural. Empezou resaltando os resultados do Barómetro xa que “nos inflúe a nós na toma de decisións”. Ademais, engadiu que “hai moitos selos, pero o do Craega é o máis importante, é o selo do ecolóxico o que liga a orixe natural dos produtos, polo que é relevante ter en conta esta orixe, a base territorial”. Explicou a súa importancia, xa que “en Galicia sabemos como facer produtos ecolóxicos saudables e de calidade. Se van co selo do Craega temos esa garantía”.

“Falamos de produtos que respectan o medio ambiente e que respectan o noso territorio e para nós iso é importante”, explicou. “Temos que dicir todos con orgullo, moito grazas ao traballo do Consello Regulador, que o consumo de produtos eco non é unha moda senón unha tendencia”, engadiu. Ademais, resaltou que Galicia é líder en denominacións de orixe, “pero temos que seguir traballando”, e nesta liña incidiu en que actualizarán a Lei de Calidade Alimentaria e traballarán na Lei da Recuperación da Terra Agraria de Galicia. “É importante ter máis hectáreas e se é de eco, mellor, e con esta lei podemos conseguilo”. Outra das áreas que salientou foi que “contamos con tres aldeas en funcionamento e pronto teremos oito, ás que se poden presentar proxectos ligados a produción ecolóxica”. Para rematar a súa intervención felicitou ao Craega polo traballo a “prol do ecolóxico”.

José Luis Cabarcos puxo de manifesto a importancia dos traballos que realizan desde a Xunta de Galicia. “O Craega, neste sentido, é estratéxico porque pon en valor varios aspectos aliñados cos nosos obxectivos”. Engadiu que todo o que se fala a nivel internacional, Pacto Verde ou Cambio Climático, “todos eles encaixan cos valores do Craega”. Indicou que é estratéxico para os produtores “que están defendendo este modo de traballar máis enfocado ao extensivo” e concluíu lembrando “que hai que medrar nos cultivos extensivos e fomentar a biodiversidade”.

O secretario do Craega foi o encargado de pechar o evento mostrando polo miúdo os datos que se obtiveron na enquisa realizada e que deron lugar ao Craega_barometro2020.

 

A CE pídelle a España máis implicación en materia eco para acadar o obxectivo do 25 % en 2030

O pasado xoves 15 de abril asistimos á conferencia virtual na que se incluíu a presentación do Plan de acción ecolóxico europeo, retransmitida dende a web da Asociación Española de Elaboradores y Comercializadores Ecológicos Asobio coa colaboración de Vida Sana, SEAE e Intereco.

O evento, que concentrou máis de mil persoas, estivo coordinado por Joan Picazos, presidente da citada asociación, e nel interviñeron José Miguel Herrero Velasco, director xeral da Industria Alimentaria, MAPA; Diego Canga, conselleiro principal da Dirección Xeral de Agricultura e Desenvolvemento Rural na Comisión Europea, quen previamente ofreceu unha conferencia de prensa; Aina Calafat, técnica de SEAE Ecoregión Mallorca, quen presentou o modelo de biodistrito que se está a levar a cabo nas Baleares; e Marijo Imaz, técnica do concello de Orduña (Biscaia), quen deu a coñecer o sistema de compra pública de produto ecolóxico que se puxo en marcha no seu municipio. Ao final, Picazos trasladoulles aos participantes a rolda de preguntas presentadas polos asistentes.

A REVOLUCIÓN VERDE

Na apertura da xornada, Joan Picazos mostrouse convencido de que este plan vai constituír “unha revolución” e pensa que é “un antes e un despois no sistema agroalimentario e un impulso decidido cara a un sistema máis xusto, máis saudable e máis sostible”.” A execución deste plan parece que pode ser unha contribución ao crecemento económico, máis necesario que nunca, dirixido dende unhas liñas de máis sentido común e, máis concretamente, implica o desenvolvemento da axenda comunitaria no que se refire á produción ecolóxica en relación á estratexia ‘Da granxa á mesa’ co obxectivo coñecido por todos, tan ambicioso e tan importante, de alcanzar en 2030 o 25 % de superficie agraria en produción ecolóxica”, recordou. Entre os datos que destacou en concreto en materia de agricultura ecolóxica en España salientan os seguintes:

  • España gasta 2.400 millóns de euros en consumo eco, é dicir, algo más 50 euros per cápita.
  • O número de operadores aumenta de ano en ano: 50.000 empresas vinculadas profesionalmente ao sector eco na actualidade.
  • Con máis de 2,3 millóns de hectáreas, é o principal produtor europeo, pero a superficie ecolóxica tan só representa o 9,3 % do total e demostra o reto que se ten por diante ata chegar ao 25 % proposto en 2030.

 LIÑAS DE ACTUACIÓN PÚBLICAS

Tras a súa exposición, deulle paso á primeira intervención, a cargo de Herrero Velasco, quen puxo ao día sobre a estratexia nacional en agricultura ecolóxica. Presentou as liñas de actuación da Dirección Xeral de Agricultura Alimentaria, máis concretamente da subdirección específica en materia de agricultura eco, que está a elaborar unha folla de ruta para conseguir os obxectivos que marca a Unión Europea (UE). Entre outras iniciativas, citou a participación activa nos foros na UE, así como coas autoridades de control, impulsando o desenvolvemento e a transformación da agricultura convencional a eco. Así mesmo, fixo fincapé nos datos da evolución da agricultura eco e apuntou que “é difícil atopar nestes momentos un sector que medra a dous díxitos; por iso, o sector eco é unha illa: estase creando emprego, apostando pola gandería e agricultura eco, e as cifras se van incrementando, isto non é ao azar, senón que detrás hai persoas que loitan por esta ‘transformación verde”.

“OBXECTIVO: CHEGAR AO 25 % DE SUPERFICIE ECOLÓXICA NUNHA DÉCADA”

Tras salientar a importancia do plan, cedeulle a palabra a un dos creadores e impulsores deste documento, Diego Canga, quen explicou, paso por paso e lembrando que se inclúe no chamado Pacto Verde”, as estratexias fundamentais “Da granxa á mesa” e “Biodiversidade”. Ademais, remarcou o obxectivo posto en 2030: conseguir que o 25 % do solo agrícola da UE sexa destinado á agricultura ecolóxica e que aumente significativamente a acuicultura ecolóxica, tendo en conta que hoxe estamos no 8 %. Como conseguir eses 10 puntos máis é a base fundamental deste plan e sobre esta se centrou Canga na súa charla.

Entre os principais parámetros nos que se estrutura o plan, citou os seguintes:

  • Efectos positivos para o medio ambiente, clima, biodiversidade, benestar animal etc.
  • Efectos multiplicadores: incrementar a agricultura ecolóxica ten inmediatas repercusións positivas noutros obxectivos de ambas as estratexias arriba citadas.
  • Ata un 10 % máis do que se conseguiría extrapolando a partir das tendencias actuais.
  • Puntos de partida moi diferentes entre os Estados membros (dende un 0,5 % ata un 25 % de terras agrícolas destinadas a este tipo de agricultura): España sitúase nun 9 % da superficie, Bulgaria no 2 % e Austria xa está no 25 %.

Tamén fixo referencia ás recomendacións da PAC en materia de agricultura ecolóxica para España, como o reforzo das superficies, réximes adecuados de reconversión, o mantemento e a incentivación da crecente demanda dos produtos ecolóxicos na cadea alimentaria e na organización dos mercados. Neste sentido, apuntou que vai recibir case 20 millóns de euros para o programa de distribución de froitas, hortalizas e leite nos centros escolares e espera que unha cantidade se destine á agricultura ecolóxica, malia que é unha decisión que lles corresponde ás autoridades españolas.

Canga apuntou que España vai recibir case 20 millóns de euros para o programa de distribución de froitas, hortalizas e leite nos centros escolares e espera que unha cantidade se destine á agricultura ecolóxica

Entre as vantaxes do Plan, o representante europeo citou tres piares básicos: a estabilidade xurídica, fundamental para os agricultores que se plantean a conversión; substanciais incentivos financeiros (a PAC, Horizonte Europa, política de promoción agrícola) e a confianza pública nos produtos eco a través do recoñecemento público do logotipo ecolóxico.

Entre os inconvenientes, citou os diferentes puntos de partida entre os Estados membros e o feito de que “sempre hai risco de fraude”, polo que a confianza dos consumidores é decisiva.

A continuación describiu punto por punto as 23 accións que se inclúen neste proxecto, entre as que se poden salientar o seguimento da aplicación a nivel nacional dos plans para que se traduza nunha realidade, o reforzo da organización do propio sector, a implicación e a colaboración do sector privado en materia ecolóxica ou o apoio á investigación específica para que esta agricultura mellore e avance.

QUE É UNHA ECORREXIÓN?

Tras a presentación do plan, Picazos deu paso á exposición de Aina Calafat, técnica de SEAE Ecorregión Mallorca, quen contou que dende esta entidade están desenvolvendo o caso concreto da Ecorrexión en Mallorca. Tras explicar o concepto de `ecorrexión´, apuntou que hoxe existen 48 rexións en Europa co acordo firmado e 10 más en desenvolvemento. Despois, centrouse no exemplo de Mallorca no seu proceso de ecorrexión, que se plantea como unha grande oportunidade ante a situación socio-económica actual.

COMPRA PÚBLICA VERDE: O EXEMPLO DE ORDUÑA

A última en intervir foi Marijo Imaz, técnica do municipio vasco de Orduña (Biscaia), quen deu a coñecer a súa experiencia concreta na compra pública de produto ecolóxico, un proxecto que arrancou en 2000, nun municipio en crise naquel momento, e con moita destrución de postos de traballo, que apostou polo sector primario e pola transición ecolóxica ata a creación en 2006 do Servizo de Dinamización Local Agroecolóxico. Este servizo, entre outras cousas, puxo en marcha o reforzo de consumo-comercialización en circuíto curto, así como o proxecto “cociña municipal e compra pública verde”, a compra pública de alimentos ecolóxicos, de temporada e de proximidade, para xerar oportunidades entre os pequenos produtores e chegar aos consumidores. O tempo deulle a razón a esta estratexia e na actualidade as cifras a avalan tanto no aumento de superficie agraria en ecolóxico, como no que respecta aos produtores e aos consumidores en ecolóxico así como no investimento en alimentación ecolóxica nos comedores escolares. Picazos definiu o proxecto como “emocionante e espectacular” e cre que debe servir como exemplo á hora de traballar no futuro en materia de agricultura ecolóxica.

Vídeo íntegro da conferencia e máis documentación de interese

Documento íntegro do Plan