Arquivo da categoría: Balance de actividade

As vendas de ecolóxico soben un 17,8% e achéganse aos 93 M€

De esquerda a dereita, Javier García Lozano, secretario do Craega; José Gonzalez, conselleiro do Medio Rural; Francisco López Valladares, presidente do Consello; e Manuel Rodríguez, director da Agacal. Foto: Craega

O sector ecolóxico segue medrando en 2019. A demanda cada vez maior de produtos certificados dispara as vendas en taxas de dous díxitos (17,88%) e a facturación roza os 93 M€. Ao abrigo do interese que o bio esperta en mercados nacionais e internacionais, tamén crecen a superficie (2,9%) e os operadores (2,6%). Así se desprende do informe anual de actividade do Consello Regulador da Agricultura Ecolóxica de Galicia (Craega), que hoxe presentou no pazo de Quián (Boqueixón) o presidente da entidade, Francisco López Valladares. Estivo acompañado polo conselleiro en funcións do Medio Rural, José González, e o director da Axencia Galega da Calidade Alimentaria (Agacal), Manuel Rodríguez.

“As cifras avalan o labor deste Consello ano tras ano. A demanda, cada vez maior, de produtos ecolóxicos disparou as vendas en taxas de dous díxitos e o volume acada xa os 92,7 millóns de euros. Aínda que en menor medida, medran tamén outras variables: a superficie e os operadores”, destacou Valladares.

Sen abundar máis na análise dos datos, o presidente do Craega aproveitou a intervención para comentar os resultados dunha sondaxe interna sobre os efectos da covid-19 no sector. “Aínda que houbo excepcións, case o 54% dos enquisados diminuíron a súa facturación por mor da pandemia. As vendas caeron de forma significativa: catro de cada dez reduciron as súas transaccións á metade ou incluso máis”, sinalou.

O informe tamén deixa claro que a crise do coronavirus deu o empurrón definitivo á venda online no sector ecolóxico. O 89% dos enquisados non dispoñía deste servizo antes da pandemia, pero un 12,3% púxoo en marcha durante o estado de alarma. Agora, á vista do escenario actual, tres de cada dez teñen previsto activar a venda online a curto-medio prazo.

En canto á recuperación, a metade dos operadores ecolóxicos confía en que o seu negocio se repoña en 2021 e un 37,5% adianta a superación da crise ao segundo semestre do ano.

Valladares avanzou que, a principios de agosto, o Consello lanzará unha nova campaña publicitaria para dar a coñecer a marca Craega entre os consumidores. A partir da semana próxima e ata o mes de setembro, varios autobuses rotulados percorrerán as sete grandes cidades galegas con imaxes de diferentes produtos certificados e o lema ‘Somos Semente’.

Ademais de celebrar os datos, o conselleiro do Medio Rural manifestou a vontade da Xunta en “colaborar nesta liña que vai moi ligada á sustentabilidade medioambiental que propugna a UE”. Neste sentido, destacou que se vai pechar “un acordo co Craega para que a produción agraria e gandeira de todas as aldeas modelo de Galicia sexa certificada en ecolóxico”, o que demostra o “compromiso firme” do Goberno galego por este eido.

Ademais, a xuízo de José González, os datos demostran que a agricultura ecolóxica non só é unha “actividade que xera riqueza e emprego no noso agro”, senón tamén unha “aposta por unha produción sustentable e respectuosa co medio ambiente, que encaixa perfectamente cos principios reitores da futura PAC”.

SUPERFICIE, +2,9%. Cunha suba anual de un 2,9%, a superficie certificada chegou en 2019 ás 34.378,12 ha. Na última década a extensión dedicada ao ecolóxico aumentou en Galicia un 143,9%. Ourense é a provincia que máis avanza en termos absolutos ata acadar as 8.631,52 ha, e A Coruña en porcentaxe, 9,91%. Lugo lidera a táboa con 16.702,49 ha e absorbe o 48% do terreo cultivado en toda a comunidade. Tamén se localiza neste territorio a maior superficie (1.002,4 ha) en proceso de conversión. Pola súa banda, Ourense concentra case a metade do solo en primeiro ano de prácticas (543,12 ha).

Por tipo de cultivo, os pastos permanentes (praderías e pastos pobres) inscriben o progreso máis importante. Cun ascenso anual dun 7,69%, representan o 79% da superficie certificada. Facer fincapé en que catro de cada dez ha dedicadas a cultivos permanentes destínanse á castaña. Case toda a súa produción (93,7%) se concentra na provincia de Lugo.

OPERADORES, +2,6%. 2019 pechouse con 30 operadores máis que o ano anterior (o total ascende a 1.182): 17 elaboradores e comercializadores e 13 produtores. Aínda que é este último segmento o que continúa levando o peso do Craega (supón o 74,2%), son as industrias as que máis empurran o crecemento do Consello. Na última década case se cuadriplicaron e hoxe representan xa o 25,7% dos inscritos grazas sobre todo ao tirón das empresas que se dedican a vender produto ecolóxico. Sen ir máis lonxe as comercializadoras medraron no exercicio precedente preto dun 35%.

Ademais do aumento exponencial doutras actividades, as estatísticas poñen de relevo que Galicia é un territorio produtor de ecolóxico. Vexetal (435 operadores) e animal (outros 395) mantéñense como cabeza tractora, pero desde 2012 veñen empurrando con forza outros subsectores vencellados ao mar. Con 13 inscritos, a recolleita sostible de algas anota unha suba dun 18% con respecto ao curso anterior.

A análise por distribución xeográfica deixa patente os dous polos económicos da comunidade: nas provincias de Lugo e Ourense localízanse o 57% dos produtores, mentres que nas atlánticas se atopan o 58,5% dos comercializadores e elaboradores.

VENDAS CERTIFICADAS, +17,88%. Coa produción manténdose en niveis de crecemento sostido e as industrias e comercializadoras en plena expansión, as vendas certificadas marcaron en 2019 un novo máximo histórico. A facturación chegou ata os 92,7 M€, cifra que supón un incremento anual dun 17,88%.

Por subsectores, os que máis ingresos xeran son, por esta orde, animal (56,5 M€); vexetal (21,6 M€) e acuicultura (14,4 M€). Piar da primeira liña, os produtos máis importantes en volume de negocio son o leite (32,9 M€), as carnes (15,7 M€) -en particular a de ave-, e os ovos (6,3 M€). Por detrás dos frutais (84,2%), estes últimos figuran como os que máis empurran a facturación en termos porcentuais (59,9%). Cabe destacar tamén o avance de elaborados (39,5%), é decir, salteados de algas e vexetais ou preparados de tartas, variedades que saen das industrias para satisfacer a demanda cada vez máis elevada deste tipo de produtos.

No extremo contrario da táboa sitúanse os cereais, produto con maior caída en vendas certificadas (-96,59%) debido a que en 2019 non se rexistrou importación de terceiros países. Tampouco foi un bo ano para a castaña. Integrada no concepto ‘bosque e recolleita’, a súa facturación minguou ata un 43,08% por mor da escaseza de choivas.

DESCARGAR RESUMO DA MEMORIA

DESCARGAR NOTA DE PRENSA

VER VÍDEO

A produción acuícola ecolóxica case se cuadruplica nun lustro e supera os 16 millóns de euros

Batea ecolóxica certificada polo Craega na ría de Arousa
Embarcación extraendo mexillón ecolóxico dunha batea certificada polo Craega na ría de Arousa. Foto: Craega

A acuicultura ecolóxica galega case cuadruplicou a súa facturación no último lustro. 2018 pechouse cun volume de vendas superior aos 16,9 millóns de euros -case 12 millóns de euros máis que en 2013- grazas sobre todo ao tirón dos produtores de mexillón e á extracción sostible de algas. O que vén do mar adquire cada vez máis peso no seo do Consello Regulador de Agricultura Ecolóxica de Galicia (Craega) e a día de hoxe representa xa o 21,4% do monto total da súa facturación (78,7 millóns). Para satisfacer a demanda dun sector con grandes perspectivas de crecemento, a entidade pública estreará nos vindeiros meses unha segunda sede en Boqueixón. Así o anunciou hoxe en Vilanova de Arousa o presidente do organismo, Francisco López Valladares, no transcurso dun percorrido pola ría para coñecer de primeira man este tipo de produción. Ademáis de integrantes do pleno do Consello e de autoridades locais, estivo acompañado pola directora xeral de Pesca, Acuicultura e Innovación Tecnolóxica, Mercedes Rodríguez Moreda; e polo director da Axencia Galega da Calidade Alimentaria (Agacal), Manuel Rodríguez Vázquez.

“Galicia é pioneira en produción de mexillón ecolóxico en Europa. Desde que en 2010 saíron as primeiras 12 toneladas da ría de Arousa, o sector non deixou de medrar. O consumidor valora cada vez máis o ecolóxico, tanto por cuestións de saúde como de respecto ao medio ambiente”, argumentou López Valladares. O presidente do Craega fixo fincapé en que o crecemento do sector foi paulatino e constante desde aquela. Superado o período de conversión obrigatorio que estipula a normativa para as bateas (tres meses), a primeira gran eclosión rexistrouse en 2013. Entón computáronse 66 plataformas flotantes. A súa xestión estaba repartida entre 34 empresarios.

O éxito do primeiro mexillón ecolóxico no mercado, en particular nos circuítos internacionais, seguiu empurrando pouco a pouco a un segmento que hoxe suma 208 bateas. Este sector facturou en 2018 máis de 4,1 millóns de euros, case 38 veces máis que cinco anos antes. O 97% atópanse en Arousa e o resto un pouco máis ao sur, en Cangas do Morrazo. O negocio distribúese entre 42 operadores, o 70% agrupados baixo o paraugas da Asociación de Mexilloeiros Illa de Arousa.

Valladares explicou que máis da metade do bivalvo con selo se destina ao mercado exterior. Alemaña, Reino Unido e Austria, por esta orde, son os principais importadores. O molusco galego tamén chega ata Dinamarca, Países Baixos e Italia.

ALGAS E PRODUTOS INDUSTRIAIS. Concentrada tamén nas provincias atlánticas, a produción acuícola ecolóxica atopou outro nicho de mercado na recolleita sostible de algas. O volume de vendas certificadas do curso pasado acadou os 959.720 euros, practicamente dúas veces máis que en 2013. As súas propiedades nutritivas e o protagonismo que vai adquirindo na nova cociña están a converter este produto nunha delicatessen moi apreciada, en particular fóra das nosas fronteiras.

Algas e mexillón son a base doutra actividade que contribúe a incrementar de forma exponencial as vendas. Cun resultado de 11,8 millóns de euros en 2018, as industrias absorben o 69,8% da facturación acuícola con selo do Craega. As conservas de peixe (9.813.582 €) son o produto estrela. Aínda que con menor peso nas contas (dous millóns de euros), van abríndose paso os preparados alimenticios (salsas, ensaladas envasadas, patés, etc). Neste caso o domicilio social das empresas vai máis alá das provincias atlánticas e aparecen tamén firmas con sede en Lugo e Ourense.

SEGUNDA SEDE EN BOQUEIXÓN. Para dar visibilidade ao peso que vén adquirindo a acuicultura ecolóxica nos últimos anos, o Craega celebrou este venres o seu primeiro pleno á beira do mar, no pazo de Vista Real. Foi despois de realizar o percorrido en catamarán pola ría e de xantar coa conselleira do ramo, Rosa Quintana, na localidade arousá.

O encontrou serviu para aprobar a posta en marcha da segunda sede do Consello en Boqueixón. Extensión das oficinas que desde 1997 funcionan en Monforte de Lemos, a estrea neste punto estratéxico (á beira de Santiago e na liña do corredor A Coruña-Vigo) ten como obxectivo satisfacer a demanda acuícola e, ao mesmo tempo, deslocalizar a xestión do Craega para achegarse ás provincias atlánticas.

As novas dependencias estarán nas instalacións que a Xunta lle cede á entidade no pazo de Sergude, edificio no que xa comparten teito outros consellos reguladores. Para abrir o novo servizo, o Consello contratará a dous técnicos que centrarán a súa actividade nas provincias atlánticas.

A segunda sede pretende ademais paliar os problemas de espazo que agora mesmo atravesa o organismo que controla e certifica a produción ecolóxica en Galicia. Na actualidade ocupa varias salas do inmoble Multiusos de Monforte, en virtude dun acordo co Concello que está a piques de expirar. Nesta liña, o equipo de goberno reiterou o seu interese de chegar a un acordo coa Deputación de Lugo para mudarse ao Pazo de Tor.

Consultar a normativa de acuicultura ecolóxica completa.

Táboas cos balances de acuicultura ecolóxica 2013-2018.

O CRAEGA dispara as vendas un 33% e roza os 80 millóns de euros

Manuel Rodríguez, esquerda, José González, Francisco López Valladares e Javier García Lozano

O Consello Regulador da Agricultura Ecolóxica de Galicia (CRAEGA) segue a medrar ano tras ano. En 2018, as vendas de produto certificado disparáronse un 33,2% e chegaron aos 78,7 millóns de euros. Así o avanzou hoxe en Boqueixón o presidente do Consello, Francisco López Valladares, que estivo acompañado polo conselleiro do Medio Rural, José González, e o director da Axencia Galega da Calidade Alimentaria (Agacal), Manuel Rodríguez.

“2018 volve a ser un ano excelente para a agricultura ecolóxica. Medran todas as variables: a superficie certificada, a suma de operadores e o volume de vendas”, destacou Valladares. “Estamos convencidos de que isto non vai quedar así e que as cifras van manter a tendencia ascendente nos vindeiros anos. Porque a agricultura ecolóxica chegou para quedar con nós”, celebrou o presidente do CRAEGA. De feito, xa conseguiu consolidarse como o terceiro selo de calidade en Galicia, por detrás de Tenreira Galega e a D.O. Rías Baixas.

Na mesma liña se pronunciou o conselleiro. “Xa non é unha moda pasaxeira, nin minoritaria, senón unha actividade cun importante nicho de mercado que cada vez cobra máis forza”, recalcou José González. O titular de Medio Rural fixo fincapé na necesidade de apoiar a vertebración e organización do sector e avanzou que se vai crear unha mesa de produción ecolóxica. A previsión que se convoque “este trimestre”.

PRODUTOS ESTRELA. O leite UHT e a carne avícola, por esta orde, son os produtos certificados estrela, tal e como explicou o secretario do Consello, Javier García Lozano. Cunha facturación superior aos 26 millóns de euros e un crecemento de case 41 puntos, o lácteo é con diferenza o produto que máis ingresos xera. “En Galicia, certificamos o 65% do leite que se consome en España”, apuntou.

Por sectores, a produción animal é a que máis factura (44,3 millóns de euros), pero a do mar é a que máis medra en termos porcentuais (39,53%).

A superficie certificada polo CRAEGA tamén pecha o exercicio en positivo. Con 33.736,44 hectáreas certificadas, o crecemento en 2018 ronda os seis puntos. A provincia con máis terreo en ecolóxico é Lugo, xa que suma 16.507 ha (o 49% do total).

En canto ao número de operadores, o Consello anota neste caso unha suba de case oito puntos e computa 1.152 inscritos ao peche de 2018 (un 125,8% máis que en 2008). Cun 37,6%, a vexetal consolídase como a produción maioritaria no conxunto da comunidade.

García Lozano puxo o acento no peso que van cobrando no conxunto do Consello os elaboradores (industrias e comercializadores). En 2001 apenas representaban o 12% e hoxe xa rozan o 25%. O seu papel é fundamental para que o produto certificado chegue ao consumidor final.

DESCARGA DO RESUMO DE 2018