Arquivos da etiqueta: produción ecolóxica

A saúde, o sabor e o medio ambiente, principais razóns para comprar alimentos eco

Aínda que hai outras moitas razóns, e co paso do tempo van mudando, a saúde, o sabor ou o medio ambiente son os principais motivos que se valoran no momento de escoller produtos ecolóxicos.

  • En canto á saúde, as persoas que levan unha vida fisicamente máis activa e a coidan están máis inclinadas a incluír alimentos ecolóxicos na súa dieta.
  • O sabor vincúlase, moitas veces, aos alimentos locais que as persoas maiores comían na súa infancia, un factor que inflúe principalmente nas persoas de avanzada idade. Ademais, adoita ter máis peso nas persoas que son menos activas e non dan tanta importancia á saúde.
  • En canto ao medio ambiente, é un motivo que pesa máis en ecoloxistas e colectivos conscientes dos danos ambientais que supoñen as prácticas de agricultura intensiva.
  • Outros dos factores que poden influír son os seguintes: a preocupación pola seguridade alimentaria e o desexo de evitar infeccións tóxicas, a preocupación polo benestar animal e desexo de apoiar as producións locais ou que sexan produtos de moda que lles poden reportar recoñecemento e status social.

PERFIL DO CONSUMIDOR

Os pais e nais, especialmente de bebés ou nenos pequenos, son algúns dos principais consumidores de alimentos ecolóxicos. O obxectivo fundamental é evitar a acumulación de pesticidas no organismo durante o desenvolvemento dos seus fillos. Isto empeza xa no embarazo e logo trasládase ao consumo dos primeiros alimentos da crianza. Outros dos consumidores son as persoas que seguen dietas vexetarianas ou veganas.  Ademais destes grupos, nas enquisas saen outros perfís como persoas que teñen mascota ou as que practican deporte regularmente, que adoitan ser tamén consumidores destes produtos.

CALES SON OS PRINCIPAIS OBSTÁCULOS?

Entre un 40 e un 70 % da poboación móstrase positiva cara a este tipo de alimentos, pero tan só entre un 5 e un 10 % deles os compra regularmente. O prezo aparece como a barreira máis importante á hora de aumentar a porcentaxe de alimentos ecolóxicos na cesta da compra. Outro dos factores é a dificultade para atopalos nas tendas habituais, aínda que esta tendencia está a cambiar.

Máis información

A Cooperativa A Carqueixa gaña o XXI Premio Aresa de Desenvolvemento Rural

José Antonio Díaz mostra o galardón acompañado de membros do xurado.
José Antonio Díaz mostra o galardón acompañado de membros do xurado

O presidente da sociedade, José Antonio Díaz, recolleu o galardón, dotado de 10.000 euros. Desde o xurado destacaron do gañador “o traballo feito ao longo destes anos, así como o salto á venda online

O auditorio da Casa do Saber (Lugo) acolleu a cerimonia do XXI Premio Aresa de Desenvolvemento Rural que estivo presidida polo reitor da Universidade de Santiago de Compostela (USC), Antonio López Díaz, e o presidente de Aresa, Álvaro Rodríguez Eiras, acompañados pola vicerreitora de Coordinación do Campus de Lugo, Monsterrat Valcárcel Armesto. Os tres formaban parte do xurado xunto con Manuel Gómez-Franqueira, presidente do Grupo Coren, e María José Alonso Fernández, catedrática de Farmacia e Tecnoloxía Farmacéutica da USC.

A vicerreitora foi a encargada de ler a resolución do xurado que lle outorgou o premio á Cooperativa A Carqueixa. O reitor da USC e o presidente de Aresa fixeron entrega da placa conmemorativa e os 10.000 euros, cos que está dotado o premio, ao presidente da cooperativa, José Antonio Díaz. López destacou do gañador “o traballo feito ao longo destes anos, así como o salto á venda online coa marca Sabor dos Ancares para adaptarse á nova realidade que vivimos tras esta pandemia”.

A Carqueixa está inscrita no Craega como produtor agrícola para a produción de froitos secos e cogomelos. Ten a súa orixe en 1994, ano no que se fundou para comercializar de forma conxunta os xatos e a compra de insumos, adquirir máis dimensión e conseguir que os produtores de carne de Cervantes fosen un sector máis forte e  unido.

CAMPAÑA AUDIOVISUAL ‘GANDERÍA HEROICA’

Dáse a circunstancia de que este premio lle chega á cooperativa cando o seu presidente e o cineasta Oliver Laxe, autor do aclamado filme O que arde, están a levar a cabo a presentación de nova campaña audiovisual para promover e difundir a que denominaron a “Gandería Heroica” dos Ancares. O proxecto darase a coñecer nas redes de O sabor dos Ancares, unha iniciativa de comercialización directa de tenreira galega suprema da cooperativa, situada na zona.

Trasdeza Natur recibe un dos premios finalistas do programa TalentA 2021

A firma silledense (Pontevedra) Trasdeza Natur continúa cultivando premios. O proxecto de María José Tallón obtivo un dos dous premios finalistas do programa TalentA 2021 ao emprendemento rural. O premio está organizado, por segundo ano, por Corteva Agrisciencie e a Federación de Asociacións de Mulleres Rurais en España (Fademur).

Tallón foi pioneira na técnica de deshidratado solar de froitas e verduras procedentes da súa horta de cultivo ecolóxico, xa que emprega como fonte a enerxía solar. Trátase dunha nova forma de almacenamento que brinda unha durabilidade máis longa coa garantía de ter froitas ou verduras con todas as súas propiedades, ademais adáptanse aos novos tempos e retos culinarios.

A horta ecolóxica foi impulsada por Tallón na súa  casa materna que, xunto coas leiras, estaba en desuso e risco de deterioración progresiva. Este proxecto situado na parroquia de Cortegada tamén está entre o oito proxectos que selecciona a Rede Rural Nacional para os Premios de Inspiración Rural 2021 que convoca a Rede Europea de Desenvolvemento Rural.

A emprendedora silledense suma máis premios. Máis información.

Granxa Maruxa + Milhulloa = Muuhlloa, cosmética galega, ecolóxica e colaborativa

De izquierda a derecha: María Álvarez, Carmela Valiño, Marta Álvarez, Chusa Expósito e Anxos Orgueira.

Na comarca da Ulloa aséntanse dúas marcas de produtos ecolóxicos do Craega con máis de vinte anos de historia. Por un lado, Granxa Maruxa que está rexentada por Marta Álvarez e, desde hai uns sete anos, axúdalle súa irmá María. Ambas traballan para obter o mellor leite ecolóxico que sae da súa granxa situada en Monterroso. Por outro lado, en Palas de Rei está Milhulloa, unha empresa que se centra no cultivo ecolóxico de plantas medicinais e hortalizas. Esta cooperativa está rexentada pola farmacéutica Chusa Expósito e a bióloga Carmela Valiño, xunto con Anxos Orgueira. O baixo pago dos produtos das cinco levounas a ter que innovar, pero sempre mantendo a súa filosofía de traballo e produción. Así é como naceu Muuhlloa, unha firma de produtos cosméticos galegos e ecolóxicos.

Este ano recibiron o premio Son Muller da Asociación de Mulleres Empresarias de Lugo, no apartado Empresaria Rural, pola calidade dos seus produtos e pola súa firmeza ao apostar polo ecolóxico, o rural e desde o feminino. Un premio que para estas cinco mulleres significa moito, máis ao ser económico “algo que precisamos moito para seguir traballando, investigando e innovando”.

O produto que saíu á luz para dar a coñecer a marca foi un leite corporal feito con leite e milfollas. Como a propia María relata, “fixemos o evidente: un leite corporal con leite, algo que até o de agora non hai”. Os comezos foron bos, xa que ambas as firmas que as preceden son uns referentes en Galicia, en canto a produtos ecolóxicos. Pero tamén fixeron un labor de dalo a coñecer en diferentes feiras. Actualmente, contan con tres produtos á venda, aínda que en breve lanzarán outros como un xampú e un labial. Os produtos que sacan contan co selo de bio.inspecta e ECOPlus de Bio Vida Sana.

Describen Muuhlloa como unha entidade colaborativa, xa que, para cada produto que sacan, contan con outra entidade da zona que traballa coa mesma filosofía que estas cinco emprendedoras. “As dúas primeiras empresas fomos nós, pero por exemplo, para a crema da cara contamos con mazá de Ribela, leituga de mar de Mar de Ardora e cera de abella de Polemel”, explica María. Para os produtos que sairán entrarán novas empresas, tamén ecolóxicas e que buscan o mesmo obxectivo. Esta forma de traballo permítelles a outras empresas medrar e tamén así, conseguen que Muuhlloa chegue máis lonxe e medre.

“Todos os que somos pequenos, estamos máis unidos e facémonos publicidade”

Como xurdiu a idea?

Marta: Pois do mal que nos pagan o leite. Un día de inverno achegueime ata Milhulloa queixándome diso e elas tamén se lamentaban polos prezos dos seus produtos. Ao final, nós vemos que temos boas materias primas. Temos a mesma filosofía de traballo e somos contrarias ás grandes superficies. O primeiro que pensamos foi facer un leite corporal co leite da granxa e as súas plantas. A partir de aí, dixemos que podía ir para diante e seguimos.

Chusa: Nós desde o principio traballabamos con algún balneario para facerlle uns aceites. Entón isto foi como o xermolo da cosmética, que era a nosa ilusión. Ademais, ao xuntarnos cunha persoa coma Marta, que é unha bomba, tiñamos que tirar para adiante. Non pensamos en ningún momento en non levalo a cabo. Esa idea sempre a tivemos e cando ela nos falou do leite pareceunos marabilloso.

Como foi o proceso de elaboración?

María: Chusa e Carmela son farmacéutica e bióloga. Elas pensaron cales serían as plantas que se axustaban a cada produto. A milfollas, ou herba dos carpinteiros, é moi cicatrizante, calmante e encima e haina por todas partes. Chusa dixo que mesturándoo daba un bo resultado e probamos. Nós tiñamos claro que tiña que levar unha boa parte de leite, e leva un 40 %. Logo elas recolleron a milfollas, maceraron os pétalos e fan o hidrolato. O día que se ten que levar todo a Iuvenor Lab (O Carballiño) prepárase. O laboratorio é o que lle dá un rexistro sanitario, fai as análises e certifica que é unha crema estable no tempo e que non contamina. Ademais, para nós é un aforro, porque senón teríamos que facer obra e sería máis custoso. Nós levámoslle as materias primas bastante elaboradas e logo eles fan a emulsión e empaquetado.

Por que a milfollas para o leite corporal?

Carmela: É a que predomina nesta finca e no estudo que fixemos vímoslle moitas propiedades. No tema de pel é cicatrizante. De feito, chámanlle a herba dos carpinteiros porque ten a capacidade rexeneradora. É calmante. Cada día vémoslle novas propiedades. Os compoñentes que teñen e os principios activos teñen esas capacidades.

O leite está claro en cada produto, pero como facedes a escolla das herbas para cada produto?

Carmela: Das que temos aquí vemos as propiedades que teñen e que queremos meter a cada crema. A facial ten por obxectivo darlle elasticidade á pel para prever o envellecemento, pois poñemos plantas que teñen a capacidade antioxidante. Todo iso xunto cos estratos que buscamos doutros produtores que integramos.

Chusa: Desde o século XIX, que houbo a revolución da química moderna, está todo estudado, e a partir de aí imos mirando. O importante é que sexa unha mestura boa para que melloren as propiedades. Ademais, encántanos o sistema de facer unha cosmética colaborativa. Cada vez que sacamos algo novo, miramos a que colegas produtores podemos sacarlle algo novo para o produto. Ao final, todos os que somos pequenos estamos máis unidos e facémonos publicidade entre nós.

Marta: Son os tres que temos agora mesmo, pero depende das épocas. Estamos moi contentas nese aspecto porque o mundo da cosmética non é un mundo fácil, nin moito menos, pero a xente que proba apunta que ten unha boa calidade.

Cal diriades que é o produto estrela?

Marta: Son os tres que temos agora mesmo, pero depende das épocas. Estamos moi contentas nese aspecto porque o mundo da cosmética non é un mundo fácil, nin moito menos, pero a xente que proba apunta que ten unha boa calidade.

Agora están pendentes novos produtos…

Chusa: Si. Un labial do que xa temos todo feito, pero fannos falta cartos. Para todo isto, para o proceso de estudo e todo… Nós non temos maquinaria. Para que cumpra a función do produto, necesita un plan de estudo e maquinaria para iso. Agora mesmo temos liquidada a fórmula do xel e labial.

Carmela: Temos pendente outra colaboración con outra científica de aquí, e estamos aí para seguir co tema de novas especies para a cosmética.

Cales diriades que son as razóns para mercar estes produtos?

María: O primeiro, por suposto, é que son produtos ecolóxicos. Son bos. E despois tamén a xente se decata de que somos cinco mulleres cunha empresa moi pequena e que estamos tratando de facer algo ben feito e desde a solidariedade. Entón isto tamén os incita a mercar para colaborar. Sempre falamos da xente que colaboramos, e poñémolo nas etiquetas.

Marta: É unha innovación grandísima. Empezou nunha granxa que fai cosmética.

En canto aos consumidores, de onde é a clientela?

Marta: Empezamos en Madrid e estamos moi estendidas alí a verdade. Grazas a un programa no que saímos. En Cataluña e no País Vasco tamén temos boas vendas. O que nos falta fóra de Galicia son tendas físicas; temos en sitios puntuais.

GRANXA MARUXA


Neste momento contan cunhas 62 vacas, das que moxen unhas 28. En canto a produtos agrarios só teñen horta para autoconsumo, pero foi unha das ideas que tamén se lle pasou pola cabeza a esta emprendedora. “Vino moi complicado e preferín centrarme no leite”. Granxa Maruxa conta con máis de vinte anos como tal, pero a súa historia remóntase a cincuenta anos atrás cando o pai de María e Marta iniciou o proxecto. Cando Marta estaba a piques de rematar os seus estudos de Empresariais, chegou a casa e “escaparan as vacas, tróuxenas e pareceume sinxelo”. A partir de aí comezou a súa andaina. Tivo que aprender todo de cero, xa que non contou con moita axuda, “non confiaban”. Tras aprender todo o relacionado con isto, visitou a granxa Casa Codesal con seu pai “e el mesmo se decatou que era posible o ecolóxico”. Contando co selo do Craega, empezou coa súa produción de leite. Actualmente está a punto de saír a Cooperativa As Vacas da Ulloa, un proxecto que nace xunto con Ganados A Cernada e co que farán todos os produtos derivados do leite. Desde hai sete anos conta coa axuda de súa irmá María que pechou o estudo fotográfico para irse vivir para o rural: “Estou encantada, non me cambiaría por nada”.

Na carballeira que hai ao redor da súa vivenda e da granxa tamén acollen o Festival Agrocuir. Unha idea que naceu para darlle máis vida ao rural. Ademais deste, que xa ten historia, tamén se celebrou o Monterrosón ou o de Arte no Rural, que xa se mostra no exterior da granxa e vivenda.

MILHULLOA


No inverno a cámara de secado estaba baleira, polo que decidiron buscar unha alternativa. Empezaron co excedente de produción da espinaca, pero volveron á súa filosofía de produtos autóctonos e probaron co grelo. Tras as probas, viron que quedaba ben e foi unha salvación para darlle uso ao secadoiro nese período.

O proxecto de Milhulloa tamén conta con máis de vinte anos de vida. Ao finalizar as carreiras de Chusa e Carmela decidiron meterse nun máster de creación de empresas. A idea que iniciaron xa comprendía as plantas medicinais.

O seu proxecto foi escollido e, tras finalizar o ano de estudos, decidiron que tiñan que seguir adiante. A idea que lles propuñan era que empresas de fóra lles mercasen os produtos, “pero non pagaban nin a colleita”. Desde o inicio, decidiron contar con selo do Craega para o seu proxecto pioneiro. “Empezar con plantas medicinais non foi vantaxoso, porque daquelas non se consumían tantas infusións”, explican. Pero pouco a pouco foron calando e a entidade foi medrando.

Actualmente contan cunhas 65 variedades, incluíndo as mesturas. E a forma de traballar é tratar con xente que está en ecolóxico e ten plantacións de grelos. Ademais, sécanlle diferentes produtos a variadas empresas. Realízanlle un pequeno estudo para saber como vai quedar e logo xa traballan coas diferentes marcas. Milhulloa conta cunhas 10 hectáreas de cultivo das plantas, aínda que ata a primavera non hai nada.

A pandemia neste sector semella non ter pasado. “Quizais porque a tendencia foi ir máis ao pequeno comercio e aí é onde estamos nós”, apuntan. Aproveitaron esta época tan atípica para facer un etiquetado diferente, “unha homenaxe para os avós e padriños, que ao final son os que sempre nos consenten e os que máis se están vendo afectados pola pandemia”.

 

Inscricións abiertas para os Premios Ecovino 2021 que incluirán, ademais de viños e vermús, mostos e vinagres

A XII edición dos Premios Ecovino, o maior concurso de viños con sede na Rioxa e o máis amplo dos concursos de viños ecolóxicos de España por número de mostras presentadas, premiará os mellores viños certificados en ecolóxico nunha cata cega dirixida polo profesor Antonio T. Palacios, que terá lugar do 13 ao 15 de abril na Sala de Análise Sensorial do Complexo Científico-Tecnolóxico de la Universidade  da Rioxa (UR).

O XII Concurso Internacional Premios Ecovino está organizado pola asociación Cultura Permanente, co apoio da Universidade da Rioxa, do Consejo Regulador de la Producción Agraria Ecológica de la Rioja (CPAER), Consejo Regulador D O Cualificada Rioja, Laffort, Rivercap, Laboratorios Excell Ibérica, Corchos M. A. Silva & Garzón, Kupsa, Riojadhesivos e Verallia.

Presentación dos XII Premios Ecovino no Reitorado da UR

Esta iniciativa enolóxica e permacultural ten por obxecto promover os viños, vermús e mostos ecolóxicos (este ano tamén vinagres), a súa calidade e as prácticas agrarias respectuosas co medio ambiente.

As adegas interesadas en participar deberán inscribirse a través do formulario en liña  que estará dispoñible desde o 1 de febreiro en www.premiosecovino.com  e enviar as súas mostras ao Complexo Científico-Tecnolóxico da Universidade da Rioxa entre o 1 e o 19 de marzo de 2021.

Poderán concursar viños ecolóxicos debidamente certificados e procedentes de calquera rexión do mundo, dentro dalgunha das seguintes categorías: brancos sen contacto con madeira, brancos anellos, rosados, tintos novos, tintos anellos, espumosos, doces, xenerosos, vermús e, ademais, mostos. Tamén se engade este ano, como novidade, unha categoría para vinagres ecolóxicos.

Optarán, en cada unha das categorías, aos galardóns ‘Gran Ecovino de Ouro’, ‘Ecovino de Ouro’ e ‘Ecovino de Prata’; e, no seu caso, ‘EcoMosto’ de Ouro ou Prata e ‘EcoVinagre’ de Ouro ou Prata. Ademais, outorgaranse dous galardóns extraordinarios ao ‘Mellor Ecovino sen Sulfitos Engadidos (Premio Especial “Laffort”)’ e ao ‘Mellor EcoDeseño (Premio Especial “Rivercap”)’, e outro máis á ‘Excelencia Ambiental’ (patrocinado por Laboratorios Excell Ibérica), que será entregado á persoa, empresa ou institución que o amerite polo seu compromiso co coidado da Natureza. As candidaturas poderán tamén presentarse a través da web oficial do concurso.

As bases completas xa poden consultarse aquí.

Os viños serán avaliados do 13 ao 15 de abril nunha cata a cegas por un xurado presidido polo profesor de Análise Sensorial da UR Antonio Palacios e composto por expertos catadores de recoñecido prestixio. A resolución do xurado darase a coñecer o 19 de abril, a través do sitio web oficial do certame e dos medios de comunicación. A cerimonia de entrega de premios terá lugar no mes de maio.

Se as circunstancias sanitarias o permiten, celebrarase unha cata popular no mes de xuño, para dar a coñecer os viños, vermús, mostos e vinagres premiados. Tamén se realizarán diversos eventos vinícolas en Logroño e noutras cidades españolas, como Madrid, San Sebastián e Bilbao, onde se presentarán os viños que obteñan un destacado recoñecemento por parte do xurado, ante prescriptores, catadores da rede HORECA, distribuidores e prensa especializada.

Nas últimas cinco edicións concorreron un total de 1128 candidaturas a concurso procedentes de ao redor de 40 rexións vitícolas diferentes, o cal supón case o triplo de mostras concursantes que no quiquenio 2010-2014, no que participaron 384.

Máis información

Iñigo Crespo

Secretaría Xeral Premios Ecovino

Tel.: 609 521 991

sg@premiosecovino.com
www.premiosecovino.com 

 

 

Bruxelas quere aprazar un ano a estrea da nova normativa de agricultura ecolóxica

A Comisión Europea (CE) propón aprazar un ano a entrada en vigor do novo regulamento de produción ecolóxica. Se a prórroga se aproba, a estrea da normativa retrasaría ata xaneiro de 2022, é decir, un ano despois do inicialmente previsto.

O novo regulamento prevé a adopción de numerosos actos delegados e medidas de execución para especificar as normas técnicas vinculadas (produción ecolóxica, certificación en grupo ou sistema de control ecolóxico).

En paralelo, a CE vén de poñer en marcha unha consulta pública (ata o 27 de novembro) sobre o futuro Plan de Acción para a agricultura ecolóxica. Enmarcado no Pacto Verde Europeo, un dos seus obxectivos prioritarios é acadar que o 25% da superficie agraria total da UE sexa orgánica.

O Craega organiza unhas xornadas online sobre gandería ecolóxica

O Consello Regulador da Agricultura Ecolóxica de Galicia (Craega) pecha agosto cunhas xornadas online sobre gandería ecolóxica. Entre o luns 24 e o venres 28, cinco expertos disertarán arredor de diferentes cuestións técnicas que atinxen ao subsector con máis peso económico no seo do organismo. Todas as intervencións se poderán seguir en directo no perfil de Facebook da entidade  a partir das 13 h. Ademais, os usuarios terán ocasión de formular as súas dúbidas a través do chat. A dirección do Craega opta por primeira vez por este formato para garantir o cumprimento das medidas de seguridade sanitaria e evitar o avance da pandemia.

Jesús Cantalapiedra Álvarez, da Consellería do Medio Rural, abrirá as xornadas o luns 24 cunha charla sobre o o futuro da agricultura e a gandería ecolóxicas no marco europeo e o seu impacto na produción ecolóxica. O martes 25 será a quenda de Daniel Franco Ruiz, investigador do Centro Tecnolóxico da Carne (Ceteca). Falará do consumo da carne certificada. Joaquim Lima Cerqueira, profesor da Escola Agraria Superior de Ponte de Lima (Portugal), centrarase en benestar animal, en concreto nas condicións que deben respectar os gandeiros que se dedican á cría de vacún de leite ecolóxico (mércores 26).

Nas instalacións de gando ecolóxico e as súas peculiaridades (xoves 27) profundizará Elena Fernández Rodríguez, profesora da Escola Politécnica Superior de Enxeñaría Agrícola da Universidade de Santiago. De poñer o punto e final ás sesións (venres 28) ocuparase Ramón Lamelo Otero, da Consellería do Medio Rural. Afondará na comunicación ambiental e no proxecto Click On T.

Aínda que se retransmirán en directo, os vídeos coas intervencións poderanse ver posteriormente tanto no Facebook do Craega como na súa canle de Youtube.

PRODUCIÓN ANIMAL. Cun 56,5 M€ en concepto de vendas certificadas en 2019, animal mantense como a liña de produción que máis ingresos xera no Consello. Piar deste subsector, os produtos máis importantes en volume de negocio son o leite (32,9 M€), as carnes (15,7 M€) e os ovos (6,3 M€).

En número de operadores, vexetal leva vantaxe e suma 435 inscritos fronte aos 395 de animal.

DESCARGAR NOTA DE PRENSA

DESCARGAR RESUMO DA MEMORIA 2019

Aberta a admisión nos ciclos formativos de produción ecolóxica

Xa está aberto o prazo de admisión no ciclo de grao medio en produción agroecolóxica que se imparte no CIFP A Granxa (Ponteareas) e no CFEA Sergude (Boqueixón), ambos xestionados pola Xunta. Os interesados terán que tramitar a súa solicitude entre o 25 de xuño e o 8 de xullo -período ordinario- ou, se quedan vacantes, do 2 ao 18 de setembro -período extraordinario-.

Con dúas mil horas de duración, o ciclo inclúe módulos para achegarse a conceptos xerais do sector agropecuario (Fundamentos Agronómicos, Principios de Sanidade Vexetal, Infraestruturas e Instalacións Agrícolas, etc) e outros de carácter máis específico como Produción Gandeira Ecolóxica e Produción Vexetal Ecolóxica.

Para acceder ao ciclo, é necesario posuír o título de ESO ou titulacións equivalentes, contar co título profesional básico ou os módulos obrigatorios dos Programas de Cualificación Profesional Inicial (PCPI) do curso 2011-2012, ou ben dispor do certificado de superación das probas de acceso a ciclos.

Para obter o título de Técnico en Produción Agroecolóxica, existen dúas modalidades: ordinaria (CIFP A Granxa) e para persoas adultas (CFEA Sergude).

Prazos: https://bit.ly/381BY0o
Folleto informativo: https://bit.ly/2Nz3d8N
Máis información: https://bit.ly/2YxpA55

Ampliado ata agosto o prazo para solicitar axudas en réximes de calidade

Os agricultores interesados en incorporarse a réximes de calidade terán ata o 18 de agosto (incluído) para solicitar axudas. A Axencia Galega da Calidade Alimentaria (Agacal) prorroga dous meses máis o prazo para realizar o trámite, suspendido a causa do estado de alarma decretado pola COVID-19.

Cofinanciadas co Fondo Europeo Agrícola de Desenvolvemento Rural (Feader), das subvencións poderán beneficiarse as persoas físicas ou xurídicas, titulares de explotacións agrarias que cumpran a condición de atoparse en activo.

No caso da produción ecolóxica, tamén se considerará nova participación aquela que se refira a agricultores que, tendo actividade previa no programa de calidade, inicien o seu labor no sector con destino ao mercado en relación a algunha nova orientación produtiva. En todo caso, esta nova orientación debe ter unha dimensión económica suficiente para superar a consideración de actividade de autoconsumo.

A contía da axuda será do 100% dos gastos subvencionables realizados, sen superar os 3.000 euros anuais por explotación, durante un período máximo de cinco anos. Non se tramitarán expedientes cunha contía inferior a 50 €.

ENLACE AXUDA: https://www.xunta.gal/dog/Publicados/2020/20200213/AnuncioG0528-161219-0001_gl.html

PRAZO: 18/08/2020

Axudas á nova participación de agricultores en réximes de calidade

A Consellería do Medio Rural, a través da Axencia Galega da Calidade Alimentaria (Agacal), vén de convocar unha nova liña de axudas para fomentar a calidade alimentaria entre os agricultores. Cofinanciadas co Fondo Europeo Agrícola de Desenvolvemento Rural (Feader), das subvencións poderán beneficiarse as persoas físicas ou xurídicas, titulares de explotacións agrarias que cumpran a condición de atoparse en activo. 

No caso da produción ecolóxica, tamén se considerará nova participación aquela que se refira a agricultores que, tendo actividade previa no programa de calidade, inicien o seu labor no sector con destino ao mercado en relación a algunha nova orientación produtiva. En todo caso, esta nova orientación debe ter unha dimensión económica suficiente para superar a consideración de actividade de autoconsumo.  

A contía da axuda será do 100% dos gastos subvencionables realizados, sen superar os 3.000 euros anuais por explotación, durante un período máximo de cinco anos. Non se tramitarán expedientes cunha contía inferior a 50 €. 

ENLACE AXUDA: https://www.xunta.gal/dog/Publicados/2020/20200213/AnuncioG0528-161219-0001_gl.html

PRAZO: 15/05/2020