Arquivos da etiqueta: emprego rural

Cambio de data: o Craega recolle o premio Aresa o 29 de marzo

Francisco López Valladares
Francisco López Valladares, presidente do Craega

O acto de entrega do premio Aresa cambia de data e terá lugar o 29 de marzo. Aínda que estaba previsto para o venres 8, a organización preferiu retrasalo debido á coincidencia do evento co Día da Muller Traballadora. Tal e como estaba contemplado desde un principio, será na Facultade de Veterinaria de Lugo ás 20 horas.

No transcurso da cerimonia, o presidente do Craega, Francisco López Valladares, recollerá o galardón que anualmente conceden o grupo empresarial Aresa e a Universidade de Santiago (USC). O premio recoñece a traxectoria dunha entidade que convertiu un modo de produción agraria e gandeira nun motor de desenvolvemento rural.

Durante o acto, o exdirector xeral de Agricultura da Comisión Europea, José Manuel Silva Rodríguez, impartirá a conferencia A produción ecolóxica. Dun mercado testemuñal a unha tendencia irreversible. Para rematar, haberá unha degustación con produto ecolóxico.

Todos os operadores do Craega están convidados á cerimonia. A invitación pódese descargar neste enlace. Para asistir, prégase confirmar asistencia antes do 27 de marzo a través do teléfono 982 222 400.

O Craega, gañador do premio Aresa 2018

De esquerda a dereita, Montserrat Valcárcel, Álvaro Rodríguez, Antonio López, José Manuel Silva e Carlota López, tralo fallo do XIX Premio Aresa

O Consello Regulador de Agricultura Ecolóxica de Galicia (Craega) é o gañador do premio Aresa 2018, convocado pola empresa lucense do mesmo nome en colaboración coa Universidade de Santiago (USC). O xurado recoñece así a traxectoria dunha entidade que convertiu un modo de produción agraria e gandeira nun motor de desenvolvemento rural, tanto na comunidade como no conxunto de Europa.

Na elección da candidatura tíveronse en conta a súa capacidade para xerar postos de traballo de calidade no rural e a posta en valor de produtos da terra. Neste sentido, especial relevancia se lle deu ao papel do Craega na recuperación de subsectores agrícolas e gandeiros tradicionais con potencial para innovar.

O xurado do XIX Premio Aresa estivo integrado polo reitor da USC, Antonio López Díaz; a vicerreitora de Coordinación do Campus de Lugo, Montserrat Valcárcel Armesto; o exdirector xeral de Agricultura da Comisión Europea, José Manuel Silva Rodríguez; o director xeral de Capsa Food, José Armando Tellado Nogueira; e o presidente de Aresa, Álvaro Rodríguez Eiras.

Con recoñecido prestixio no sector, en anteriores edicións resultaron galardoados o profesor da USC Javier Guitián, a Aula de Produtos Lácteos ou a Facultade de Veterinaria (Campus de Lugo). Tamén recibiron o premio IXP Ternera Gallega, o programa de TVG O Agro-Labranza ou a D.O. Ribeira Sacra, entre outros.

O 8 de marzo celebrarase unha gala na Facultade de Veterinaria (Campus de Lugo) na que se lle fará entrega do premio -10.000 euros- ao Craega.