Arquivos da etiqueta: compostaje

Preto dun cento de persoas participan nos cursos de compostaxe organizados polo Craega

Asistentes ao curso de compostaxe celebrado o 23 de outubro no pazo de Quián (Boqueixón). Foto: Craega

Cerca dun cento de persoas, entre operadores e público externo, asistiu aos cursos sobre compostaxe doméstica que vén de celebrar o Craega en colaboración coa Sociedade Galega do Medio Ambiente (Sogama). Impartido por persoal da entidade pública, os participantes tiveron ocasión de achegarse en dúas sesións presenciais ao proceso que permite transformar a materia orgánica xerada nos fogares en compost. En realidade, trátase dunha práctica natural de gran tradición, agora modernizada co emprego de recipientes específicos, os composteiros.

A primeira das charlas tivo lugar na sede que o Consello posúe en Monforte de Lemos o 16 de outubro. A segunda desenvolveuse o 23 do mesmo mes en Boqueixón, no novo domicilio do Craega. As xornadas formativas serviron para aclarar cuestións como a localización do compostador (debe estar en contacto coa terra para facilitar a entrada dos microorganismos descompoñedores), así como aspectos vencellados ao control de parámetros como o osíxeno, a temperatura e a humidade.

Despois de seguir atentamente as explicacións técnicas, os asistentes levaron para a súa casa os colectores a fin de poñer en práctica os coñecementos adquiridos. De 390 litros de capacidade e fabricados con materiais reciclados e reciclables, os 100 composteiros foron cedidos pola Consellería de Medio Ambiente (a través de Sogama) ao Consello. Con esta actividade formativa, o Craega culmina a súa adhesión ao Programa de Compostaxe Doméstica promovido pola Xunta.

Cursos gratuítos de compostaxe en Monforte e Boqueixón

O Consello Regulador da Agricultura Ecolóxica (Craega) organiza en outubro dous cursos gratuítos de compostaxe. Impartido por persoal da Sociedade Galega do Medio Ambiente (Sogama), a convocatoria dirixiuse principalmente aos operadores certificados e agora, coas prazas vacantes, ábrese unha segunda quenda para o público en xeral. 

A primeira sesión terá lugar o mércores 16 (de 18 a 19 h.) na sede que o Craega posúe en Monforte de Lemos. A segunda celebrarase o mércores 23, co mesmo horario, no domicilio que o Consello acaba de estrear en Boqueixón. Con 50 prazas cada un, o criterio de admisión será por estrita orde de chegada. Os asistentes terán ocasión de participar no sorteo dun lote de composteiros. O colector entregarase sen ensamblar para facilitar o transporte.

Para participar, os operadores deben pinchar aquí e cubrir o formulario concretando as súas preferencias. Os que non estean inscritos no Craega teñen que seguir as indicacións deste enlace.

  • Monforte de Lemos (Edificio Multiusos), 16 de outubro. 18 a 19 h. Google Maps
  • Boqueixón – Sergude (pazo de Quián), 23 de outubro. 18 a 19 h. Google Maps

A compostaxe conta cun papel esencial na agricultura ecolóxica. Este proceso permite o peche dos ciclos de nutrientes na propia finca e, cando se aplica o produto resultante aos solos agrícolas, prodúcese un aumento dos niveis de materia orgánica e da calidade e diversidade de vida no terreo.

ACORDO CON SOGAMA. Estos cursos son froito da nova vía de colaboración que se acaba de abrir entre o Craega e Sogama. Semanas atrás o Consello formalizaba a súa adhesión ao programa de compostaxe doméstica que xestiona a Xunta a través da Sociedade Galega do Medio Ambiente. En virtude deste acordo, a entidade recibirá un cento de composteiros, de 390 litros de capacidade e fabricados con materiais reciclados e reciclables.

Con case medio millar de operadores, a produción vexetal –principal beneficiaria deste programa- representa un tercio da actividade do Craega. A maioría repártense entre Lugo e Pontevedra. Asemade, as vendas deste segmento acadan os 20,3 millóns de euros e acaparan a cuarta parte da facturación do organismo, tal e como e desprende do seu balance de 2018.