Arquivos da etiqueta: produto ecolóxico

Carlos Spuch: “O importante dos produtos eco é o que non teñen”

Carlos Spuch
Carlos Spuch, neurocientífico do Instituto de Investigación Sanitaria Galicia Sur e coordinador da Rede Galega de Investigación en Demencias, é un gran defensor do produto ecolóxico

Romper o ciclo natural das cousas ten un prezo. E a ciencia corrobórao pouco a pouco. Demostrado está que pesticidas como o DDT –xa prohibido– inciden no alzhéimer e que hai outros que se relacionan co párkinson. Existen ademais “evidencias” de que estas e outras enfermidades como a depresión poderían ter a súa orixe no intestino. Por iso, levar unha alimentación saudable, a base de produto ecolóxico e sen procesados, é tan importante para previr determinadas doenzas. É o que defende Carlos Spuch, neurocientífico do Instituto de Investigación Sanitaria Galicia Sur e coordinador da Rede Galega de Investigación en Demencias. Agora ten entre mans un proxecto piloto que intenta probar que a dieta ecolóxica é quen de diminuír a actividade inflamatoria no intestino.

Somos o que comemos?
Estamos formados por un montón de substancias. Desde que nacemos ata que morremos, o que incorporamos ao noso organismo chega a través da respiración, da alimentación ou do que nos poida picar o médico. Nada máis. Na respiración inflúen factores externos como a contaminación, pero o demais depende da nutrición. Cando es neno, se inxires un tipo de graxa determinado, hidratos de carbono en exceso e ademais hai déficit de proteínas, modifícase o neurodesenvolvemento e iso vai ter consecuencias na idade adulta.

Entón non hai alimentos nin bos, nin malos. Todo é unha cuestión de equilibrio…
O difícil é estar equilibrado. Salvo que haxa unha patoloxía que o impida, a mellor dieta é aquela na que comes de todo e variado. As graxas non se deben eliminar nunca por completo. Son moi importantes para o sistema nervioso. O 70% do cerebro está composto de graxa e as nosas neuronas necesítana para funcionar. Que sucede entón cando consomes unha dieta alta en hidratos e baixa en graxa? Que o desenvolvemento do cerebro non é bo. Hai estudos que demostran que os nenos que consumiron poucas graxas teñen un desenvolvemento cognitivo un pouco máis lento. Son normais, pero lévalles máis tempo resolver problemas ou reaccionar fronte a certas cousas. En resumo, cómpre comer de todo e variado.

Convén logo incluír as graxas na dieta?
Pois claro. O que hai é que escoller o tipo de graxa e atopar o equilibrio. En Galicia temos dous dos alimentos con mellor composición de ácidos graxos que existen no mundo: o peixe azul e o leite. O que non sabe a xente, en termos xerais, é que os ácidos malos son necesarios para a correcta absorción dos bos. O de que algo é bo ou malo é moi relativo. A natureza mesma é así e todo ten as súas funcións.

Estamos a envelenarnos coa alimentación de hoxe en día?
Envelenar é un pouco forte, pero si que estamos a modificar os nosos patróns alimentarios. O prexudicial é tomar sempre produtos procesados. Por outra banda, é positivo que xurdan tendencias bio. Pouco a pouco, a ciencia demostra que a dieta dos nosos avós era mellor que a de hoxe. Pero volvendo ao veleno, quizais habería que dicir que si, polo excesivo uso de pesticidas que se rexistra na actualidade. Cada vez saen máis estudos que verifican que certos praguicidas cunha alta concentración en alimentos provocan problemas crónicos no noso corpo. Por iso, son un defensor do produto ecolóxico: o máis importante non é o que teñen, senón o que non teñen.

Como poden intervir os alimentos en enfermidades como o alzhéimer ou o párkinson?
Cada vez saen máis evidencias do que todo o mundo sabe. Xa entre a década dos 80 e 90, un estudo demostrou que había pacientes de alzhéimer cun elevedo nivel de DDT no cerebro. A raíz das presións do Goberno sueco, acabouse prohibindo (permítese o seu uso nalgún caso). Tamén hai evidencias de que certos praguicidas constitúen un factor de risco para o párkinson. Basta con facer a proba cunha rata: se inxectas o composto en cuestión no seu cerebro, matas as súas neuronas. Ese é o modelo do párkinson. A maior parte dos pesticidas empréganse para controlar pragas e malas herbas, pero moitos teñen efectos neurotóxicos. Acumúlanse en niveis moi elevados en froitas e verduras que nós despois inxerimos e, polo tanto, pasan ao noso organismo.

Tamén di vostede que no intestino se pode atopar a orixe de moitas doenzas…
Hoxe en día un dos grandes focos de atención é a microbiota intestinal (as bacterias e outros mi- croorganismos que residen no intestino). Todos os alimentos teñen que pasar pola flora bacteriana para que poidamos absorbelos. Sospéitase que certas poblacións de bacterias están orixinando a depresión, determinada manifestación do alzhéimer, o autismo… E quen modifica a flora bacteriana? Os alimentos. A flora bacteriana é un reflexo do que comes. Por exemplo, a serotonina é un neurotransmisor asociado á depresión. O 90 % está no intestino. Cando a microbiota está alterada, a parede intestinal inflámase e a produción de serotonina trastórnase. Se a investigación logra demostrar que a orixe destas enfermidades está no intestino, poderemos controlar a depresión regulando a flora bacteriana.

É máis san consumir ecolóxico?
Si. Porque o produto ecolóxico non ten ningún tipo de químico. E ademais adoita ser un produto de proximidade: madura de forma natural na horta durante o tempo que precisa e chega máis rápido aos puntos de venda. Eses antioxidantes tan beneficiosos para a saúde dos que tanto se fala, son compostos que producen as froitas e verduras para loitar contra a exposición solar ou contra o ataque de bacterias e fungos. E iso que significa? Que non é o mesmo comer unha froita que madurase ao sol que outra que o fixese dentro dunha cámara. Na medida posible, hai que consumir produtos da túa rexión e de tempada. Cómpre asumir que non se poden comer amorodos todo o ano porque non se producen. Cada alimento ten a súa época. Só con iso, sería suficiente para provocar o boom económico dunha determinada zona.

Vostede está intentando probalo…
O noso grupo ten entre mans un proxecto piloto con pacientes con enfermidade inflamatoria intestinal. Ademais de analizar os niveis de inflamación no intestino, tamén recollemos datos sobre a presenza de certos pesticidas nos ouriños. Despois mudamos os seus hábitos alimenticios e poñémoslles unha dieta ecolóxica. Aos 15 días volvemos a avalialos. Esperamos que a dieta ecolóxica diminúa a actividade inflamatoria no intestino e que mellore o seu estado de saúde xeral.

Éxito do CRAEGA en Biocultura Barcelona 2019

O CRAEGA participou na 26ª edición de Biocultura Barcelona cun stand de 66 m2

O sector eco galego regresa satisfeito da 26ª edición de Biocultura Barcelona. As trece empresas que acudiron á feira baixo o paraugas do CRAEGA coinciden en sinalar o éxito de ventas dunha convocatoria que medra ano tras ano. Celebrada entre o 9 e o 12 de maio, pechou cunha cifra superior aos 74.000 visitantes, segundo o balance da organización.

Dirixido a consumidor e profesionais, a que acolle o Palau Sant Jordi constitúe un escaparate excepcional para introducir o produto ecolóxico galego na franxa mediterránea. No stand agrupado do Consello -66 m²- compartiron espazo Toca (Mieles Anta), Sovoral, Paporroibo, Biowak, Casa Castelao, Galician Brew, Terra de Baronceli, Pecado de Outono, Orballo, Producto de Aldea, Cervexa Celebridade Galega, Green Mixology e Galuriña. O CRAEGA participou na feira por terceiro ano consecutivo e, a tenor da boa impresión dos operadores, de seguro que non será a última.

ÉXITO DE TUTTO FOOD. Tamén a principios de maio, entre os días seis e nove, o eco galego viaxou ata Milán para sumarse a Tutto Food 2019. Cunha participación récord de 82.551 operadores, a última edición vén confirmar que xa é unha plataforma clave para a industria alimentaria de Italia.

Cun espazo propio no posto que habilitou a Consellería do Mar, o CRAEGA contou alí cun representante que viaxou cos produtos de oito operadores inscritos: HQSeawed, Jamones González, Casa Castelao, El Molino de Isabel, Gudi Eco Foods (Eco Bracan), Palacio de Oriente, Mieles Anta e Porto-Muíños.

GALERÍA DE BIOCULTURA BARCELONA 2019

O CRAEGA reclama a presenza de alimentos ecolóxicos nos comedores escolares

Manuel Corredoira López (director xeral de Educación), esquerda, Francisco López Valladares (presidente do CRAEGA), José González (conselleiro do Medio Rural), Mª Pilar Tobar Quintanar (directora do IES Xelmírez II) e Manuel Rodríguez, director da Axencia Galega da Calidade Alimentaria (Agacal). Foto: Xoán Crespo/Xunta

O Consello Regulador da Agricultura Ecolóxica de Galicia (CRAEGA) reclama a presenza dos alimentos ecolóxicos nos comedores escolares. “O produto que certifica o CRAEGA é deficitario tanto nas escolas como nos eventos públicos”, advertiu hoxe en Santiago o presidente da entidade, Francisco López Valladares. Neste senso, brindou a súa colaboración á Xunta para que, en vindeiras licitacións do servizo de comedores, puntúe tamén positivamente o ecolóxico e non só o alimento de tempada e de proximidade. “Os nenos de agora son os adultos do mañá e a súa saúde debe ser unha prioridade para o conxunto da sociedade”, engadiu. “O CRAEGA quere chegar ao prato de todos: da xente nova e da que non é tan nova. Porque só así lograremos espertar definitivamente ao noso rural e alimentarnos mellor”, sinalou.

López Valladares fixo esta demanda coincidindo co acto de apertura da segunda edición de Faite Eco do Lóxico no IES Xelmírez II. En presenza do conselleiro de Medio Rural, José González, do director da Axencia Galega da Calidade Alimentaria (Agacal), Manuel Rodríguez, e do director xeral de Educación, Manuel Corredoira, o presidente do CRAEGA lembrou que este programa serve para achegar a agricultura ecolóxica a 46 centros de infantil, primaria e secundaria de toda a comunidade. “A Galicia despoboada ten un aliado neste sector, estratéxico á hora de dinamizar o rural sen destruír a súa esencia. Sostible e respectuosa co medio ambiente, é unha opción de vida para o produtor, pero tamén para o consumidor”, recalcou. “É fundamental que as novas xeracións dediquen unha parte do seu programa educativo a este sector cada vez máis relevante. A concienciación é un traballo de todos. Da familia, da escola e das institucións públicas”, engadiu.

O conselleiro do Medio Rural animou aos preto de 80 mozos participantes na charla a confiar na produción ecolóxica. “Os mellores produtos do mundo son os de Galicia e, en concreto, os ecolóxicos, produtos 100% naturais sen ningún tipo de engadido químico”, declarou.

Para González, a agricultura ecolóxica é “o futuro que vén do pasado” e proba diso é que cada vez máis xente aposta por mercar este tipo de alimentos. De feito, nos últimos anos a agricultura ecolóxica en Galicia está a rexistrar un crecemento destacado cun aumento do 33% no volume de ventas certificadas, que pasou de 59 millóns de euros en 2017 a 78,7 millóns o pasado ano.

Pola súa banda, o director xeral de Educación, Formación Profesional e Innovación Educativa, Manuel Corredoira, salientou a importancia do Plan Proxecta -no que se enmarca este programa- como paraugas coordinador de todas as iniciativas impulsadas desde diferentes consellerías e organismos para fomentar diversos valores de forma transversal a través do ensino. Neste caso concreto, Faite Eco do Lóxico (integrado na liña Aliméntate Ben) contribúe a concienciar aos máis novos dos beneficios para o medio ambiente e para a saúde dos produtos ecolóxicos, promovendo hábitos de vida saudables.

SEGUNDA EDICIÓN. O CRAEGA participa por segundo ano consecutivo no Plan Proxecta, unha iniciativa da Consellería de Educación que tende pontes entre a comunidade educativa e diferentes entidades sectoriais como este Consello. Dirixido a primaria, ESO, bacharelato e FP, no curso 2018-2019 fixouse un límite de 30 centros. A demanda superou todas as expectativas e acadou as 46 solicitudes. Nas charlas -como a que acolleu hoxe o IES Xelmírez II- inscribíronse 29 centros das catro provincias. Os escolares tamén están a recibir degustacións de produtos ecolóxicos e xogos no marco desta convocatoria. Como colofón, o CRAEGA convoca un concurso con tres categorías (infantil, primaria e secundaria) para premiar os mellores traballos sobre agricultura ecolóxica desenvolvidos durante o curso. En cada modalidade outorgarase un galardón único consistente nunha cesta de produtos ecolóxicos. O fallo darase a coñecer a principios de xuño.

Faite Eco do Lóxico é unha acción promovida polo CRAEGA con axuda do Ministerio de Agricultura, Pesca e Alimentación, o Fondo Europeo Agrario de Desenvolvemento Rural (FEADER)-Europa Inviste no Rural e a Xunta.

Axudas para fomentar o uso de maquinaria agrícola en réxime asociativo

O luns 13 de maio de 2019 foi publicado no DOG (núm. 90 – Consellería do Medio Rural) a orde do 30 de abril de 2019 pola que se establecen as bases reguladoras das axudas para o fomento da utilización de maquinaria agrícola en réxime asociativo en Galicia, cofinanciados co Fondo Europeo Agrícola de Desenvolvemento Rural (Feader) no marco do (PDR) de Galicia 2014-2020, e convócanse para o ano 2019 (código de procedemento MR351A). Pode consultar o anuncio neste enlace

Esta orde  ten por obxecto establecer as bases reguladoras das axudas en réxime de concorrencia competitiva para o fomento da utilización de maquinaria agrícola en réxime asociativo en Galicia, cofinanciadas co Fondo Europeo Agrícola de Desenvolvemento Rural (Feader) no marco do PDR de Galicia 2014-2020, dentro da medida 4 (investimentos en activos físicos), submedida 4.11 (apoio aos investimentos nas explotacións agrícolas), procedemento MR351A, así como convocalas para o ano 2019.

Poderán ser beneficiarias destas axudas as cooperativas agrarias, as cooperativas de utilización de maquinaria agrícola (CUMA), as cooperativas de explotación comunitaria da terra ou as sociedades agrarias de transformación. Para iso, serán subvencionables os seguintes investimentos:

  • Maquinaria agrícola.
  • Estudos técnico-económicos de viabilidade.

 Non se subvencionarán:

  • A mera reposición ou adquisición de maquinaria de segunda man ou usada.
  • Non se considerarán subvencionables o IVE e outros impostos.
  • Os investimentos e maquinaria ou equipamentos relacionados coa transformación e comercialización de produtos agrarios ou forestais nin as máquinas de pequena significación para os efectos do conxunto dos socios da agrupación.
  • A maquinaria e os equipamentos de carácter forestal.
  • Colleitadoras de forraxes cun uso previsto menor de 500 horas anuais.
  • Maquinaria de aplicación de xurros mediante sistema de prato, abano ou canóns.

O prazo para a presentación da solicitudes é dun mes desde o día seguinte ao da súa publicación no Diario Oficial de Galicia.

O sector eco galego viaxa a feiras en Milán, Barcelona e Madrid

Imaxe de arquivo da feira Biocultura Barcelona

Trece empresas ecolóxicas certificadas participan na 26ª edición de Biocultura Barcelona. A celebrar entre o 9 e o 12 de maio no Palau Sant Jordi, o Consello Regulador da Agricultura Ecolóxica de Galicia (CRAEGA) súmase por terceiro ano consecutivo á que está considerada a feira orgánica máis importante do Estado español. Organizada pola Asociación Vida Sana para profesionais e público xeral, prevé reunir a máis de 700 expositores. A programación inclúe máis de 400 actividades entre showcooking, eco-foodtrucks, obradoiros e concertos.

O CRAEGA contará de novo cun stand agrupado de 66 m² no que compartirán espazo as trece firmas inscritas: Toca (Mieles Anta), Sovoral, Paporroibo, Biowak, Casa Castelao, Galician Brew, Terra de Baronceli, Pecado de Outono, Orballo, Producto de Aldea, Cervexa Celebridade Galega, Green Mixology e Galuriña. Durante catro días, no Palau Sant Jordi será posible atopar produtos ecolóxicos certificados polo Consello como mel, infusións, aceites vexetais, embutidos, cervexas, marmeladas, viño, destilados e ata empanadas.

ORGANIC FOOD IBERIA. En xuño, o sector ecolóxico galego sae de novo de viaxe para para sumarse á primeira edición da feira internacional Organic Food Iberia. A cita terá lugar desta vez en Ifema (Madrid) entre os días 6 e 7. Dirixida ao público profesional, aspira a converterse en punto de encontro entre os principais representantes do sector agroalimentario, as bebidas e os viños ecolóxicos.

No stand do CRAEGA -78 m²- compartirán espazo nove empresas certificadas: Toca (Mieles Anta), Porto-Muíños, Eco González (Jamones González), The Bio Factory (A Factoría Ecolóxica), Coraçai, Casa Grande de Xanceda, Gudi Eco Foods (Eco Bracan S.L.), Galician Brew e Orballo. No recinto daranse cita centos de expositores, destacados relatores, formadores de opinión e grupos de debate. En paralelo, terá lugar Eco Living Iberia, outra convocatoria internacional enfocada neste caso aos sectores da cosmética, produtos do fogar e moda ecolóxica natural certificada.

TUTTO FOOD 2019, EN MILÁN. O eco galego tamén terá presenza en Tutto Food 2019, unha feira internacional B2B de alimentos e bebidas que cada dous anos organiza Fiera Milano. Desta vez terá lugar entre o seis e o nove de maio. O CRAEGA disporá dun espazo propio no posto que habilitará a Consellería do Mar. Ata alí desprazarase un representante do Consello cos produtos dos oito operadores inscritos: HQSeawed, Jamones González, Casa Castelao, El Molino de Isabel, Gudi Eco Foods (Eco Bracan), Palacio de Oriente, Mieles Anta e Porto-Muíños.

DE ALEMAÑA A REINO UNIDO. Con estas tres feiras, o CRAEGA pecha un intenso primeiro semestre de actividade que levou o produto ecolóxico certificado ata Núremberg (Alemaña) e Londres (Reino Unido). O Consello xa é un veterano participante en Biofach, a feira orgánica máis importante do mundo. O pasado febreiro achegáronse ata o país xermano trece empresas certificadas, a cifra máis elevada desde que este organismo aterrara por primeira vez no encontro en 2000.

Cinco das firmas participantes volveron a saír o pasado abril ao exterior para exhibir os seus produtos no stand que o CRAEGA montou no Excel London no marco da Natural & Organic Products Europe.

CASE 80 MILLÓNS DE EUROS EN VENDAS. O CRAEGA medra ano tras ano. En 2018, as vendas de produto ecolóxico certificado disparáronse un 33,2% e acadaron os 78,7 millóns de euros. Arredor da metade do produto certificado véndese fóra de Galicia. Desta porcentaxe, entre o 20% e o 30% comercialízase no mercado exterior.

O leite UHT e a carne avícola, por esta orde, son os produtos estrela. Cunha facturación superior aos 26 millóns de euros e un crecemento de case 41 puntos, o lácteo é con diferenza o que máis ingresos xera. Galicia certifica o 65% do leite que se consome en España.

A superficie certificada polo Consello tamén anota datos positivos. Con 33.736,44 ha certificadas, o crecemento durante o curso pasado ronda os seis puntos. A provincia con máis terreo en ecolóxico é Lugo, xa que suma 16.507 ha (o 49% do total).

En canto ao número de operadores, o CRAEGA rexistra neste caso unha suba de case oito puntos e computa 1.152 inscritos ao peche de 2018 (un 125,8% máis que en 2008). Cun 37,6%, a vexetal consolídase como a produción maioritaria no conxunto da comunidade.

A memoria do 2018, o premio Aresa e a entrevista a Carlos Spuch, na revista de primavera do Craega

O Craega suma e segue e pecha 2018 con datos positivos en todas as variables: superficie, operadores e facturación. Este último capítulo é precisamente o que anota mellores resultados. As vendas de produto certificado disparáronse un 33,2% e acadaron os 78,7 millóns de euros. Este é un dos temas centrais da revista n.º 49 do Consello.

Nesta edición tamén se inclúe unha ampla reportaxe gráfica co acto de recollida do premio Aresa. Convocado pola empresa do mesmo nome e a Universidade de Santiago, o Craega doará o galardón a diversas entidades de interese social.

A entrevista a Carlos Spuch, neurocientífico do Instituto de Investigación Santiaria Galicia Sur (IISGS) e coordinador da Rede Galega de Investigación en Demencias, é outro dos temas estrela deste número. Defensor do produto ecolóxico, o experto fala sobre os danos dos praguicidas nos alimentos e a importancia de levar unha alimentación saudable.

Para pechar o sumario, conversamos co CEIP Plurilingüe de Lousada (Guntín). O centro lucense resultou o curso pasado gañador da primeira edición de Fai Eco do Lóxico, o programa que desenvolve o Craega no marco do Plan Proxecta. Iniciativa da Consellería de Educación, na modalidade promovida polo Consello inscribíronse este ano case medio cento de colexios de toda Galicia.

Podes consultar a revista completa aquí.

NOPE de Londres: o sector eco galego bota raíces no exterior

Empresas participantes no stand que montou o Craega na NOPE 2019

O sector ecolóxico galego bota raíces no mercado internacional. Despois de dous intensos días na Natural & Organic Products Europe (NOPE), o produto que certifica o Craega amplía as súas oportunidades de negocio no exterior. Ata o stand que o Consello habilitou no Excel London entre o 7 e o 8 de abril achegáronse moitos profesionais interesados en comercializar o produto dos expositores. Todos os participantes na feira –Toca Honey (Mieles Anta), Pazo de Lusío, Producto de Aldea e Galletas Daveiga – aproveitaron para reforzar as súas relacións internacionais e establecer novos contactos comerciais, cuxos froitos se verán materializados probablemente ao longo dos vindeiros meses. O espazo –de 24 m²- tamén contou con visitas institucionais de representantes do Ministerio de Agricultura, Pesca e Alimentación no Reino Unido e do ICEX.

É a segunda vez que o Craega se suma á NOPE, unha das feiras ecolóxicas máis importantes na axenda británica. Parte das empresas desenvolveron esta acción co apoio do Igape, a Xunta, a UE e a marca turística de Galicia. Segundo a organización, no encontro inscribíronse 700 expositores de ata 48 países. A previsión era pechar cun balance de 10.500 visitantes.

PRÓXIMAS CITAS. O eco galego ten a súa vindeira cita en Milán. Baixo o paraguas da Consellería do Mar, o Craega levará o produto de ocho operadores certificados a Tuttofood 2019, unha feira internacional B2B de alimentos e bebidas que cada dous anos organiza Fiera Milano. A celebrar entre o seis e o nove de maio, en Italia estarán HQSeawed, Jamones González, Casa Castelao, El Molino de Isabel, Gudi Eco Foods (Eco Bracan), Palacio de Oriente, Mieles Anta e Porto-Muíños.

O Craega muda o logotipo e modifica o etiquetado de produto eco

Os produtos ecolóxicos elaborados e certificados en Galicia aparecen agora identificados nos puntos de venda coa marca Craega. A finais de 2018 entrou en vigor a orde da Consellería do Medio Rural que muda o logotipo e obriga os elaboradores certificados a incluílo na etiquetaxe. Aos consumidores non lles custará moito recoñecelo porque o deseño (símbolos, formas, cores e tipografía) é case igual. O único que varía é o vocábulo situado no extremo inferior: en lugar de “Galicia” pon “Craega”.

1. QUE SIGNIFICA O SELO?

Á hora de encher a cesta da compra, é importante fixarse no selo. É a única garantía oficial de que un produto procede dunha leira ou industria sometida ás inspeccións e controis ditados desde a Unión Europea (UE). En España ocúpase do seu cumprimento o Ministerio de Agricultura, Pesca e Alimentación, na maior parte dos casos a través dos consellos ou comités autorizados polas diferentes administracións autonómicas.

2. QUEN OUTORGA O SELO EN GALICIA?

Baixo o paraugas da Consellería do Medio Rural, en 1997 fundouse o Consello Regulador de Agricultura Ecolóxica de Galicia (Craega). É a única autoridade de control deste modo de produción na comunidade. O seu equipo técnico encárgase de inspeccionar as empresas e tomar as mostras necesarias en cada fase do produto. Cando se cumpren todos os requisitos que esixe a normativa vixente, outorga o selo.

3. QUE GARANTÍAS TEÑEN OS PRODUTOS CON SELO?

Nin caseiro, nin da horta, nin natural. O único apelativo que avala un produto ecolóxico certificado é o selo, unha garantía de que ese produto superou os controles pertinentes e cumpre coa normativa europea. Co vaivén de termos que hai hoxe no mercado, a marca identificativa do Consello eríxese como a única garantía oficial de que un alimento é 100%  ecolóxico certificado.

4. QUE É UN PRODUTO ECOLÓXICO?

En resumo, é o que se obtén a través de técnicas agrarias ou gandeiras respectuosas co medio ambiente e co benestar animal. Non está permitido o uso de químicos de síntese como fertilizantes, pesticidas, antibióticos, etc. Do que se trata é de preservar o medio, manter ou aumentar a fertilidade do solo e tamén de proporcionar alimentos con todas as súas propiedades naturais.

5. QUE SELOS SE PODEN ATOPAR NUN PRODUTO ECOLÓXICO?

Ademais da marca obrigatoria que expide cada comunidade autónoma, os alimentos ecolóxicos certificados tamén deben incluír o logo europeo. Este último exclúese en certos casos, porque os produtos non se atopan no ámbito da lexislación medioambiental da UE (caza de animais salvaxes ou pesca extractiva).

6. POR QUE SE CAMBIA O SELO?

Para visibilizar o nome do Craega, marca única oficial da agricultura ecolóxica de Galicia, e adaptar o logo ás directrices esixidas desde o Ministerio de Agricultura, Pesca e Alimentación a todas as autoridades de control públicas do conxunto do Estado.

7. EXISTE UN PERÍODO DE CONVIVENCIA ENTRE O VELLO E O NOVO SELO?

Si. Durante certo tempo, nos puntos de venda atoparanse produtos cos dous logotipos. Para aproveitar as etiquetas almacenadas antes da entrada en vigor da nova normativa, os operadores autorizados poden seguir empregando o antigo selo ata o 1 de xaneiro de 2021, data na que ten que estar imposta obrigatoriamente a nova marca do Craega.

8. HAI ALGÚN OUTRO CAMBIO NAS ETIQUETAS DO CRAEGA?

A orde do Medio Rural afecta tamén ao regulamento do Craega e ao xeito de etiquetar os alimentos ecolóxicos. A numeración outorgada polo Consello que acompaña o selo deixa de ser obrigatoria. De tal modo, o logotipo acredita por si só que un produto reúne os requisitos legais para levar o selo.

O CRAEGA dispara as vendas un 33% e roza os 80 millóns de euros

Manuel Rodríguez, esquerda, José González, Francisco López Valladares e Javier García Lozano

O Consello Regulador da Agricultura Ecolóxica de Galicia (CRAEGA) segue a medrar ano tras ano. En 2018, as vendas de produto certificado disparáronse un 33,2% e chegaron aos 78,7 millóns de euros. Así o avanzou hoxe en Boqueixón o presidente do Consello, Francisco López Valladares, que estivo acompañado polo conselleiro do Medio Rural, José González, e o director da Axencia Galega da Calidade Alimentaria (Agacal), Manuel Rodríguez.

“2018 volve a ser un ano excelente para a agricultura ecolóxica. Medran todas as variables: a superficie certificada, a suma de operadores e o volume de vendas”, destacou Valladares. “Estamos convencidos de que isto non vai quedar así e que as cifras van manter a tendencia ascendente nos vindeiros anos. Porque a agricultura ecolóxica chegou para quedar con nós”, celebrou o presidente do CRAEGA. De feito, xa conseguiu consolidarse como o terceiro selo de calidade en Galicia, por detrás de Tenreira Galega e a D.O. Rías Baixas.

Na mesma liña se pronunciou o conselleiro. “Xa non é unha moda pasaxeira, nin minoritaria, senón unha actividade cun importante nicho de mercado que cada vez cobra máis forza”, recalcou José González. O titular de Medio Rural fixo fincapé na necesidade de apoiar a vertebración e organización do sector e avanzou que se vai crear unha mesa de produción ecolóxica. A previsión que se convoque “este trimestre”.

PRODUTOS ESTRELA. O leite UHT e a carne avícola, por esta orde, son os produtos certificados estrela, tal e como explicou o secretario do Consello, Javier García Lozano. Cunha facturación superior aos 26 millóns de euros e un crecemento de case 41 puntos, o lácteo é con diferenza o produto que máis ingresos xera. “En Galicia, certificamos o 65% do leite que se consome en España”, apuntou.

Por sectores, a produción animal é a que máis factura (44,3 millóns de euros), pero a do mar é a que máis medra en termos porcentuais (39,53%).

A superficie certificada polo CRAEGA tamén pecha o exercicio en positivo. Con 33.736,44 hectáreas certificadas, o crecemento en 2018 ronda os seis puntos. A provincia con máis terreo en ecolóxico é Lugo, xa que suma 16.507 ha (o 49% do total).

En canto ao número de operadores, o Consello anota neste caso unha suba de case oito puntos e computa 1.152 inscritos ao peche de 2018 (un 125,8% máis que en 2008). Cun 37,6%, a vexetal consolídase como a produción maioritaria no conxunto da comunidade.

García Lozano puxo o acento no peso que van cobrando no conxunto do Consello os elaboradores (industrias e comercializadores). En 2001 apenas representaban o 12% e hoxe xa rozan o 25%. O seu papel é fundamental para que o produto certificado chegue ao consumidor final.

DESCARGA DO RESUMO DE 2018

Catro empresas do CRAEGA participan na NOPE de Londres

NOPE LONDON-CRAEGA
O pasado ano achegáronse ata a NOPE de Londres 10.500 visitantes (Foto: NOPE)

O sector eco galego saca músculo unha vez máis no mercado exterior e esta mesma fin de semana súmase a unha das feiras verdes máis importantes do Reino Unido. Por segundo ano consecutivo, o CRAEGA participa na Natural & Organic Products Europe (NOPE). A celebrar entre o 7 e o 8 de abril no Excel London, desta vez estará representado por cinco empresas: Mieles Anta (coa súa marca Toca Honey), Pazo de Lusío, Producto de Aldea Galletas Daveiga. Compartirán un stand de 24 metros cadrados. Parte das empresas desenvolven esta acción co apoio do Igape, a Xunta, a UE e a marca turística de Galicia.

De carácter profesional, a NOPE serve de punto de encontro a tendas independentes, maioristas e distribuidores de produtos saudables, supermercados e compradores de todo o mundo. Segundo as previsións da organización, ata o recinto achegaranse 700 expositores de ata 48 países. O ano pasado pechou cun balance de 10.500 visitantes.

O CRAEGA despediu 2018 cunha facturación récord de 78,7 millóns de euros, un 33,2% máis que o exercicio anterior. Arredor da metade do produto certificado véndese fóra de Galicia. Desta porcentaxe, entre o 20% e o 30% comercialízase no mercado internacional.