Arquivos da etiqueta: produto ecolóxico

O consumo, o punto débil da produción ecolóxica

Europa fai unha aposta pola agricultura ecolóxica e mostra diso son o Pacto Verde, o novo marco legal e a futura Política Agrícola Común (PAC). España é o país europeo con máis superficie ecolóxica, 2,44 millóns de hectáreas no 2020, da UE e o terceiro a nivel mundial. A pesar diso, a día de hoxe só o 10 % da superficie agrícola española se dedica a producir alimentos orgánicos.

O obxectivo fixado pola Comisión Europea está no 25 % de superficie sustentable para 2030, con todo, o “punto débil” do sector ecolóxico é o consumo e así o afirma o conselleiro principal da Dirección Xeral de Agricultura e Desenvolvemento Rural da CE, Diego Canga. A media comunitaria sitúase en 84 € per cápita, pero en España está en 53,41 €, segundo datos de 2020.

O sector ecolóxico español non se mostra conforme con todos os cambios que se estableceron en Bruxelas e en Madrid para o futuro da súa actividade. En liñas xerais, é prudente sobre que se poida conseguir en Europa o Modelo Agroalimentario Ecolóxico no horizonte 2030 se non vai acompañado de máis fondos públicos tanto para a produción como para o transvasamento de agricultores convencionais ás prácticas ecolóxicas certificadas ou o impulso do consumo de alimentos bio.

O Ministerio de Agricultura, Pesca e Alimentación (MAPA) publicou o pasado mes de decembro a proxección dun “escenario sectorial” no suposto de cumprirse que o 25 % da superficie agraria útil (SAU) do España estivese baixo o modelo de produción ecolóxica. Cabe destacar que ao longo do presente ano, o MAPA terá en marcha a nova “folla de ruta nacional” para a agricultura ecolóxica, con medidas prioritarias, como o incremento da promoción para fortalecer o consumo interior e a elaboración de informes e estatísticas para a toma de decisións dos operadores.

Montserrat Escutia, secretaria de Vida Sana, recoñeceu que agora é un “momento histórico” para cambiar o modelo de alimentación europeo da man das estratexias “Da granxa á mesa” e “Biodiversidade do Pacto Verde”. “Sobre o papel, todos saben na UE que o modelo sobre consumo de proximidade e de tempada, desperdicio, envases e produción ecolóxica ten que cambiar, pero, cando chegamos a España, chocamos cun muro”, sentenciou. Así mesmo, mencionou a importancia da agricultura ecolóxica para a fixación da poboación nova e de mulleres no medio rural, xa que a idade media nesta actividade é moito menor que na agricultura convencional.

Reportaxe completa: “Somos Agro”,  La Voz de Galicia

Os produtores eco confirman o bo momento e o mellor futuro para o sector

Esta é a conclusión que podemos extraer das intervencións de seis dos relatores convidados ás Xornadas de Promoción e Comercialización de Producións Cárnica e Silvícola, que tiveron lugar os días 27 e 28 de decembro, emitidas en directo na nosa canle de Youtube, e que tedes xa á vosa disposición nestas ligazóns:

Foron dúas xornadas abertas en liña que xa suman centos de visualizacións e onde varios produtores e expertos contaron as súas experiencias nos seus sectores para logo ir resolvendo dúbidas dos participantes no chat aberto na canle de Youtube do Craega. Promovida polo Craega, os seis invitados abarcaron todos os aspectos de interese: lexislación europea, consultoría agroalimentaria, distribución e experiencias de traballo en cooperativas e empresas. “España é o país líder en superficie ecolóxica da UE, písannos os talóns o franceses, pero non todo vai perfecto”.

DÍA 27 DE NADAL

As Xornadas arrancaron coa presentación de Rocío Freire, vicepresidenta do Consello, quen deu paso a José Luis Cabarcos, director xeral da Axencia Galega de Calidade Alimentaria (Agacal), o cal destacou que os produtos ecolóxicos, ao contribuír a protexer o medio natural, son cada vez máis demandados polos consumidores a nivel internacional e apostou por que o mel, a castaña e a carne -acollidos a indicacións xeográficas protexidas en Galicia- avoguen por este tipo de produción máis respectuosa coa contorna para lograr ao mesmo tempo vantaxes na competitividade. 

Un gran coñecedor das institucións europeas nas que traballa desde principios dos anos 90, Diego Canga, foi o primeiro dos relatores en intervir analizando o Plan de Acción para a Producción Ecolóxica e a “Estratexia da Granxa á Mesa (Farm to Fork en inglés), que quere ampliar a superficie ecolóxica de aquí a 2030. O conselleiro principal da Comisión Europea na Dirección Xeral de Agricultura e Medio Rural lembrou que os mercados máis importantes son o alemán e despois o francés. “Pero o punto débil de España é o consumo per cápita, está moi por baixo da media europea, é a gran lagoa: como facer que a xente consuma máis produtos ecolóxicos?”. Tamén sinalou que as grandes superficies agrarias están no Mediterráneo e que as do Cantábrico están por baixo da media, como pasa na produción convencional. “Sei perfectamente que a agricultura no norte é completamente diferente, pero unha das cousas que máis me preocupa é que atopo moitos agricultores e gandeiros con producións moi sostibles pero que lles custa dar o paso á conversión en ecolóxico”, xa que consideran que a súa produción xa é sostible. “Pero nós poñemos moito diñeiro encima da mesa para quen xa son ecolóxicos, aínda que o logo non cho regalan, o logo certifica que cumpres uns estándares europeos”. E continuou afirmando que “para os que sodes produtores ecolóxicos só teño boas noticias. Acaba de entrar en vigor o novo regulamento sobre agricultura ecolóxica e non o imos tocar en varios anos, non podemos marear os produtores. Vai haber estabilidade legal. En 2022 gastarémonos 50 millóns en promoción de produtos ecolóxicos e imos crear premios europeos á mellor cidade, peme e rexión ecolóxica, farémolo público en semanas, un boom tremendo de publicidade”.

Jon Garai, coordinador da Asociación navarra Ekoalde, explicou na súa intervención posterior que na agrupación de produtores ecolóxicos os seus asociados obteñen un prezo xusto pola venda aos clientes, aos que chegan coa distribución e loxística que se fai desde Noáin. “Proxectos como o noso serven para estruturar o sector e xera novas oportunidades”, comentaba na xornada do 27 de decembro. “Aprobouse un convenio de 100.000 euros co Goberno navarro para profesionalizar o noso sistema e poder exportalo, desde a humildade. Cremos que se pode avanzar, falamos dunha oportunidade para dar un salto de escala”. Ekoalde foi creadada polos produtores como asociación sen ánimo de lucro, elemento importante no desenvolvemento. Non é unha cooperativa senón que permitiu un traballo directo co goberno de Navarra para participar das axudas no campo. “Somos 69 operadores e moi diversos, pero hoxe participamos en proxectos que no Estado créanse como o noso desde a súa realidade diferencial. Cremos que Ekoalde é fito porque conseguimos promocionar e facer unha distribución conxunta cun proxecto loxístico adecuado para iso. E vendendo a prezos xustos, non negociamos os prezos senón que representamos os intereses da parte produtora”. 

A última intervención do día 27 foi a da xerente de Traloagro, Isabel Gómez Rodríguez. Unha empresaria recentemente premiada cos Premios de Excelencia á Innovación para Mulleres Rurais que outorga o Ministerio de Agricultura e que narrou a súa experiencia nesta empresa empresa familiar que xestiona co seu irmán e a súa cuñada. Produce carne de vacún e pito en ecoló gico e venden desde a sala de despezamento e tenda-supermercado de Friol, ademais da Praza de Abastos en Lugo. “Somos fillos de emigrantes retornados de Bélxica e o meu irmán e eu queriamos emprender no rural pero non tiñamos claro a que dedicarnos ao comezo”. Tras estudalo e dada a experiencia hostaleira que traían decidiron con ilusión levar adiante un proxecto de gandería bovina e avícola cun plan de mellora e coa conversión de terreos na casa, mantendo a biodiversidade. “Respectando os arboledos que xa existían porque o que queriamos era unha produción sostible”. Cando o decidiron non tiñan garantida a comercialización de ecolóxico, “isto foi no 2010 e estivemos dous anos coa reconversión de terreos. Pero nese tempo xurdiu a oportunidade de que o pito fose certificado en ecolóxico, unha empresa nese momento iniciou a comercialización”. Pero non pasaba igual co bovino, só contaban cun intermediario que non tiña interese por vender en ecolóxico así que estiveron a producir en ecolóxico e vendendo convencional. “Pero sabiamos que chegaría o momento en que que comercializariamos a carne. En 2019 decidimos iniciar cun posto na Praza de Abastos en Lugo, e mentres construímos o biocentro cárnico, unha salda de despezamento para todo tipo de carnes onde facemos almacenamento, transformación e elaboración de produtos” que inclúen entre outros nuggets e hamburguesas para achegarse tamén a un público novo e familiar que crece día a día.

DÍA 28 DE NADAL

A segunda xornada, a do 28 de decembro, foi inagurada por Jean Luc Bellat, que falou do funcionamento do mercado da castaña francés, escaso en canto a produción pero cunha venda dinámica e de gran volume. É a zona sur do país a principal. “Non somos moi produtores, temos a quinta praza de Europa detrás de Portugal, Italia, España e Grecia”. Francia produce unhas 8.000 toneladas anuais, aínda que como explica o Consultor en JLB Consulting e xerente en Decorin Sárl, “é un pouco irregular porque tivemos problemas coa avispilla do castiñeiro, problema que ten case toda Europa”. O experto cre que “a tendencia nestes últimos anos tende cara a un equilibrio porque nalgúns sitios instaláronse sistemas de rega e cultívase con maquinaria que permite axilizar a tarefa”. De toda a produción francesa o 62 % é ecolóxica, decenas de miles de hectáreas están en conversión xa porque é un tipo cultivo que foi desenvolto nas rexións de nova produción polo interese que espertou. “É natural, parécenos a todos como de sempre, non hai tratamentos, é un traballo de campo de regar, arar e podar as árbores. É moi sostible”. E lembrou que en Francia precisamente son as datas navideñes cando aumenta o seu consumo, “como as uvas en España, é tradicional nas comidas de Nadal e fin de Ano, comer castañas” xerando unha facturación de 160 millóns de euros. A produción e venda repártese entre as maioritarias 13.000 toneladas en crema e puré de castaña, despois a conserva de castaña pelada e cocida que permite o seu uso nun prato combinado con carnes diferentes como unha pataca en guarnición e finalmente en formas como o marrón confeitado e glasé. 

“Estamos no alto da montaña lucense desde 1999. Unha pequena empresa que nace polo agarimo polas cousas ben feitas”. Así comezou a súa intervención Rubén Fernández, conselleiro delegado da empresa familiar fonsagradina Casa Castelao.

Fundada en 1999 e especializada na produción de porco celta e ecolóxico, carnes e derivados foron crecendo aos poucos “ampliando instalacións pero sen esquecer apostar pola calidade, a diferenciación”. Introduciron cada vez máis porco celta “unha produción de calidade que non se fai con carácter industrial senón a base pequenas explotacións. Pero custábanos conseguir un porco de 100 quilos porque ten moita menos graxa, e falamos cos produtores para chegar a un consenso. En 2017 demos cunha raza un 50 % duroc e dar coa tecla, porque ofrece un pouco mais de touciño e infiltración que fai que a carne sexa máis melosa ao padal e axuda a depurar o produto en xamón e embutidos”. Isto axudoulles a meterse no mercado e en 2018 fixeron probas a un nivel mais amplo. “Criamos que co porco ecolóxico tiñamos que apostar pola canle completa, e non centrarnos só en facer o produto senón chourizos, lacóns, xamóns, touciño entrefebrado… para chegar a un mercado maioritario”. Ao traballar certificados polo Craega están condicionados a un marco, “pero conseguimos un produto moi ben feito e chegamos a un consumidor diferente. O produto foi difícil posicionalo porque ten un prezo máis elevado, hai que enfocalo pola calidade”, pero nestes anos Casa Castelao conseguiu crecer nas súas tres liñas: porco tradicional, celta e ecolóxico “e seguiremos sumando mais cousas, porque pola primavera teremos novidades en marcha”. 

O pintor Peteiro e a relación co fundador de Meles Anta, David Corral, marcou os acenos de identidade desta firma apícola. Maite Bruzos Simón, é a responsable de Calidade en Pazo de Lusio, a marca que acolle o mel ecolóxico desta empresa familiar con orixe en Samos. Ela explicou como última relatora convidada nestas dúas xornadas como foron mudando colmeas a loecológico, a reconversión. Traballan con apis melifera, unha abella ibérica moi dura e que dá boa produción. “Temos 4700 ecolóxicas fixas e tamén trashumantes. Os panales están no Courel e Ancares cunha vexetación impresionante en zonas de difícil acceso, con transportes acomodados para poder entrar”, explica. Modernizaron o envasado e venden tanto a nivel nacional como fóra con dúas marcas como ecolóxico: Pazo de Lusío e Toca. “Pazo vendémola nas grandes superficies a nivel estatal e Toca, que é máis gourmet, para Francia, Reino Unido, Estados Unidos, Alemaña, China… o mercado ecolóxico está a ser bastante demandando e queremos seguir crecendo, xa o fixemos a niveis impresionantes nos últimos anos”, recoñece Maite Bruzos. “Non pensabamos que o mel ecolóxico ía ter esa saída. Pero cada vez que imos a unha feira os clientes pídennos moito produto ecolóxico. E vémolo tamén na nosa tenda en liña, a demanda vai en crecemento. Vemos a gran diferenza que hai coas dúas producións”. 

III Eco Experiencia do Craega: Lugo, ruta por terras sacras e ecolóxicas

A fin de semana do 9-10 de outubro outro equipo capitaneado por Slow Food Compostela realizou a terceira viaxe para gozar dunha nova ruta co fin de dar a coñecer de preto e poñer en valor os produtores e elaboradores certificados en ecolóxico, desta vez ao longo da provincia de Lugo.

Os operadores visitados foron NAICIÑAAbadía Da Cova-Adegas Moure, Ecoagroturismo Arqueixal, Maeloc Way e Adega Diego de Lemos.

Como nas anteriores rutas, o equipo participante estivo formado por un grupo de influencers profesionais; nesta ocasión foron Alvientooo, Escapalandia, Caminante del Planeta, Galicia Mola, Antonautas na Iagosfera, Lucía Velasco, Lourdes López, Bloghedonista e Magdalenas de Chocolate, os que lle  deron  visibilidade a esta iniciativa toda a fin de semana a través das súas redes sociais.

Os deportistas convidados desta volta foron Antón Ruanova e Amador Pena, triatleta profesional dobre subcampión de España (2010 e 2013) e campión do Brasil e Sudamérica (2016), e Amador Pena, director deportivo e atleta da recentemente creada sección de atletismo da SD Compostela.

Os restaurantes onde degustaron produtos ecolóxicos da zona foron Berso-restaurante, en Sober, cun menú composto de entrecot de tenreira ecolóxica de Traloagro maridado co mencía premiado de Abadía da Cova, e tamén flan de castañas ecolóxicas, procedentes de Naiciña.

O domingo o xantar preparouse en A Parada das Bestas, en Pidre (Palas de Rei), e os provedores foron Milhulloa, Sen Máis, Arqueixal, Casa Ribeira, Esencia da Terra, Avega, Traloagro, Algas La Patrona, Abadía da Cova, Bodegas Corisca, Bubela e Bacelos de Biobra, todos eles certificados en ecolóxico.

SORTEO ECO ENTRE OS ASISTENTES

Houbo dous bodegóns de produtos con selo do Craega: un no Restaurante Berso e outro no Pazo do Piñeiro. Os dous sorteáronse entre os asistentes e os gañadores foron Alexia Gómez (Asturias) e Silvia Viqueira (Antonautas na Iagosfera).

Alexia Gómez (Asturias)

Silvia Viqueira (Antonautas na Iagosfera)

Ruta completa

O grupo convidado, ao completo

BioCultura Barcelona pecha a feira con máis de 14.000 asistentes

Algas La Patrona, Terra de Baroncelli e Muuhlloa compartiron stand na cita

BioCultura Barcelona, a feira de produtos ecolóxicos e consumo responsable, pechou a súa 27ª edición no Palau Sant Jordi. Unhas 14.000 persoas se achegaron ao recinto para coñecer  máis de cerca o sector ecolóxico, no que estiveron presentes varios operadores do galegos.

Ángeles Parra, directora da cita, afirma que “estaba claro que non ía a ser como a BioCultura á que estamos acostumados, pero o feito de que finalmente se puidese celebrar de forma presencial xa era unha gran noticia para todos”. Engade que “os expositores puideron presentar as súas novidades, que era o que querían. E a mensaxe da necesidade dun cambio cara o ecolóxico volveu chegar aos medios. Á espera de mellores tempos para a lírica, nós, como organizadores, tamén estamos moi contentos. Levamos xa case dous anos moi raros e empezamos a romper o maleficio”.

As actividades online tamén funcionaron ben. Ante a demanda de querer seguir gozando da programación deseñada para os catro días da feira, a organización decidiu deixar a plataforma ata finais de xullo para poder conectarse en calquera momento do día través do link. Para ver as actividades na canle, só tes que entrar na compra de entradas e elixir actividades online e a cantidade 1. Ao comprar as entradas, enches os teus datos, terminas a compra e descargas a entrada, que che aporta un código. Esa clave será a que precises para entrar na canle.

Optimismo na organización

Organizadores e expositores mostraron satisfacción en liñas xerais por como foi a feira. Parra indica que “este pequeno triunfo de BioCultura e do sector, nun marco tan excepcional e delicad

o, puido ser lido como unha sinal de esperanza”. E subliña que “cada vez máis, a cidadanía ten na alimentación a clave cara a un mundo máis sostible, san, saboroso, belo e xusto. E os subsectores afíns, como a cosmética certificada ou o téxtil sostible, están a punto de estoupar”.

Presenza galega

Na cita participaron varias empresas galegas en busca de saír, tras máis dun ano sen case citas presenciais, e co obxectivo de atraer a nova clientela para as súas marcas. As firmas que participaron foron: Muuhlloa (Granxa Maruxa e Milhulloa), Celtaverde (dentro da Gale Truck), Terra de Baroncelli e Sovoral Apicultura Orgánica, ademais de catro empresas dedicadas á acuicultura en ecolóxico: Portomuíños, Algamar, Algas La Patrona e Capitán Alga.

O CFEA Sergude organiza unha sesión demostrativa para a produción forraxeira ecolóxica

CFEA de Sergude, da Axencia Galega da Calidade Alimentaria (Agacal), organiza mañá, venres 9, unha xornada demostrativa. A sesión está coordinada coa SAT La Sobreira e céntrase na identificación de oportunidades no control de herbas adventicias na produción forraxeira ecolóxica. Celebrarase en Pazo (Boimorto, A Coruña) de 11:00 a 14:00 horas e de 16:00 a 20:00 horas. Para máis información pódese solicitar no correo cursos.agacal.sergude@xunta.gal.

Varios operadores representarán a agricultura eco galega en Biocultura Barcelona

BioCultura chega á súa 27 edición, que terá lugar no Palau Sant Jordi de Barcelona, desde mañá ata o domingo, día 11. Con ela tamén chega o auxe da produción, vendas e consumo ecolóxico. Como todas as edicións, ten o firme propósito de seguir sorprendendo aos visitantes coas últimas novidades do sector ecolóxico con propostas cada vez máis variadas que nos facilitan adoptar uns hábitos saudables e a consumir de forma máis responsable.

BioCultura é a feira de produtos ecolóxicos e consumo responsable máis grande do Estado e reunirá este ano, de forma excepcional, uns 350 expositores dedicados aos sectores de alimentación bio, cosmética ecolóxica, moda sustentable, casa sa, turismo responsable, artesanías e ONG. Paralelamente á exposición celebraranse máis de 400 actividades (presenciais e on line) e espéranse uns 20.000 visitantes para cumprir coas normas de aforamento obrigadas por Covid.

Na cita participan varias empresas galegas: Muuhlloa (Granxa Maruxa e Milhulloa), Celtaverde (dentro dunha food truck) e Sovoral Apicultura Orgánica, ademais de catro empresas dedicadas á acuicultura en ecolóxico: Portomuíños, Algamar, Algas La Patrona e Capitán Alga.

Milenrama, un local onde te coidan con produtos eco

En Chantada atopamos a herboristería Milenrama, que xa conta con máis de 17 anos de vida. Está rexentada por Pilar Vázquez Capón, quen colleu a mesma herboristería, pero situada noutro punto da vila. “Cando a empecei, estaba facendo auxiliar de Farmacia e sempre lle dicía a dona que cando se xubilase quería tela”. Dous anos despois mudouse a onde está agora. Esta tenda de proximidade viu incrementados os seus ingresos no período forte da pandemia, “pero agora xa volvemos á clientela de sempre, que non me podo queixar xa que funciona moi ben”. 

Cando empezou non contaba nin coa metade dos produtos que ten agora, só eran herbas e algo de alimentación. “Púxenme ao día no tema e fun medrando, tamén porque a demanda aumentou”. A alimentación segue sendo o punto forte, aínda así agora conta con variados produtos, chegando incluso a cosmética “que cada vez ten máis éxito”, indica Vázquez. 

En canto á clientela, ao longo dos anos foi variando. Nun principio era máis xente maior, agora de mediana idade. “Hai persoas que veñen porque queren produtos ecolóxicos que só os atopa aquí e outra que lle dá un pouco igual o tema eco, pero interésalles algún en concreto”, explica. Engade que “cada vez búscanse produtos que sexan o máis naturais posibles, a xente está máis concienciada, quere coidarse máis…”. Ademais, apunta que as redes sociais serven para promover produtos “que moitas veces non sabemos se son eficaces; aquí chega moita xente preguntando se hai un en concreto que viu na rede”, comenta. 

Na tenda conta con máis dunha decena de produtos que teñen o selo do Craega, logo tamén ten moitos de Galicia que aínda están sen certificar. Traballan con múltiples marcas que contan co selo, entre elas: Milhulloa, Orballo, Chorizo Calabizo ou Euro Andean Superalimentos, e outras moitas máis. “Os certificados danlle seguridade a moita xente, hai persoas que xa buscan que teñan algún selo e outros, simplemente  miran que non estean testados en animais”.

Malia que o prezo poida ser un dos puntos negativos que teñen os produtos ecolóxicos, “ hai que pensar que se paga pola calidade; eu entendo que si son máis caros, pero tamén son alimentos saudables e distintos”, recalca. Outro punto en contra que teñen as herboristerías é que “cada vez máis, este tipo de produtos xa se poden atopar nos supermercados ou na internet, xa non temos a exclusividade como antes, que se querías algo disto, só podías telo aquí”, comenta Vázquez. Aínda así, estes locais ofrecen un servizo máis de preto, “nós xa coñecemos á xente, podemos explicarlle as vantaxes e desvantaxes de cada produto, é moi diferente o trato”. 

ASESORAMENTO NUTRICIONAL

Dende hai unha década conta con servizo de nutricionista. “Empecei con rapazas que buscaban montar algo e pareceume boa idea, logo ían marchando porque atopaban algo noutro sitio; tamén contei con nutricionistas dalgunha marca que vendía os seus produtos e desde hai dous anos teño a persona que está agora”, explica. Engade que a profesional, Tamara Rivas, ten as citas varios días á semana co obxectivo de ofrecerlles ás pacientes unha vida máis saudable. 

A campaña ‘Come Local 2021’ conta con páxina web propia e un mapa interactivo

A Xunta, a través da Axencia Galega da Calidade Alimentaria (Agacal), impulsa por segundo ano consecutivo a campaña “Come Local” nos comedores escolares galegos no marco da canle #Mercaproximidade. Slow Food Compostela é a encargada de promover os produtos dentro das DOP, IXP e da agricultura ecolóxica de proximidade, nos que se inclúen alimentos proporcionados polo Craega, para seguir na súa liña de transparencia e fomentar o produto galego de pequenos produtores. Este cometido estase a levar a cabo en 20 centros escolares repartidos polas catro provincias galegas, entre eles, os Comedores Escolares distinguidos como km 0.

Agora acaba de ver a luz a súa propia páxina web, na que recollen toda a información do desenvolvemento desta campaña, ademais dun mapa interactivo no que se poden ver os centros que participan por provincias, que menú puideron degustar e quen foi o encargado de facelo. Segundo vaian participando os centros, o mapa irase actualizando.

Ata o vindeiro 31 de outubro, Agacal impartiralles formación e asesoramento aos responsables de comedor. Non só se trata de degustacións de menús especiais elaborados con produtos de proximidade galegos senón que tamén se desenvolverán actividades formativas, tanto sobre as características nutricionais dos propios produtos como o impacto que supón o consumo de produtos certificados na consecución dos Obxectivos de Desenvolvemento Sostible da ONU (ODS).

Nesta campaña elixíronse centros con proximidade a posibles provedores de produtos con denominación de orixe, indicación xeográfica protexida ou ecolóxicos para poder acceder a recoñecementos como o de “Comedores km 0”. Outro criterio para a elección dos centros foi a de considerar os distintos sistemas de xestión tanto educativa como do comedor e, así, na campaña participan centros escolares públicos, concertados, comedores xestionados por ANPAS ou os servizos de catering.

Visita o mapa interactivo

A Xunta convoca a quinta edición dos premios Exceleite

Imaxe da entrega de premios na pasada edición

A Xunta de Galicia convoca os premios á excelencia da calidade hixiénico-sanitaria de produtores galegos de leite cru de vaca, coñecidos como premios Exceleite. É a quinta edición destes galardóns que tratan de recoñecer os gandeiros máis comprometidos co seu traballo e, por tanto, coa calidade do leite que producen.

Os premios distinguen as granxas en tres categorías en función do seu tamaño (pequenas, medianas e grandes) e, á súa vez, cada unha delas se subdivide en tres grupos, segundo o seu sistema de produción (intensivo, semiextensivo ou extensivo). Por outra banda, tamén hai un recoñecemento para as mellores explotacións ecolóxicas.

Optarán a estes galardóns as explotacións leiteiras de gando vacún de Galicia que realicen os autocontrois de calidade no Laboratorio Interprofesional Galego de Análise do Leite (Ligal). As explotacións deberán estar de alta no Rexistro de Explotacións Leiteiras de Calidade Diferenciada (Recaldi) e, no caso das ecolóxicas, deberán estar inscritas no Consello Regulador da Agricultura Ecolóxica de Galicia (Craega), entre outras características técnicas.

Premiaranse aquelas dúas explotacións, cos premios Exceleite de ouro e Exceleite de prata respectivamente, sen incidencias na visita do comité de avaliación, aplicando rigorosamente a súa posición na puntuación lineal obtida. A mesma metodoloxía empregarase coas dúas primeiras explotacións ecolóxicas da puntuación lineal.

PREMIOS 2020

Na edición celebrada o ano pasado, na categoría das explotacións ecolóxicas, as galardoadas foran Granxa Casa Codesal (Friol) e Granxa Ecolóxica Figueiroa SC (Arzúa), ambas certificadas polo Craega. As dúas poden presumir de producir os mellores leites bio de Galicia, pero cabe destacar que en todas as edicións deste certame Casa Codesal sempre conseguiu un dos premios.

Máis información

A nosa revista de primavera estrea cabeceira

Xa tedes á vosa disposición a edición dixital do número 56 da nosa revista, que ve a luz cun novo formato, e faino co balance do Barómetro de consumo ecolóxico 2020, cuxa presentación tivo lugar en Monforte, onde aproveitamos para conversar con José Luis Carbarcos, o director xeral da Agacal, quen nos falou do traballo que están a levar a cabo para potenciar a agricultura eco. Tamén recollemos unha completa reportaxe do que foi a conferencia sobre o Plan de acción ecolóxico europeo, que se retransmitiu desde a web da Asociación Española de Elaboración y Comercializadores Ecológicos (Asobio).

A reportaxe deste número está dedicada a cinco mulleres emprendedoras da Ulloa que crearon a marca de cosmética ecolóxica Muuhlloa a partir de dúas empresas certificadas polo Craega, Granxa Maruxa e Milhulloa.

Martín Mantilla, restaurador de Berso e colaborador habitual do Consello, é o protagonista da entrevista desta edición, na que nos relata, entre outras moitas cousas, como foron os comezos en pandemia e cal é o truco do seu éxito.

Na nosa sección de cociña eco podedes atopar nos fogóns á editora de La Cocina de mi Abuelo, Rocío Garrido, quen nos ensina a preparar un menú completo e delicioso e moi sinxelo!

E, coma sempre, recompilamos varias novas breves do sector dos últimos meses, así como os eventos que están próximos a celebrarse e novas convocatorias de premios.

A revista completa está dispoñible en formato dixital, preme nesta ligazón.