Arquivos da etiqueta: craega

O Craega pecha o calendario de feiras de 2019 en Biocultura Madrid coa cifra récord de 23 empresas

‘Stand’ do Craega en Biocultura Madrid 2018

O Consello Regulador da Agricultura Ecolóxica de Galicia (Craega) pecha esta fin de semana o calendario feiral de 2019 en Biocultura Madrid. 23 empresas certificadas amosarán o músculo eco galego a partir do xoves 7 de novembro –e ata o domingo 10- no que está considerado o encontro sectorial máis importante do Estado. Ademais de servir de escaparate para os operadores, o produto con selo tamén se poderá degustar en dous show cookings programados polo Craega.

A 35ª edición de Biocultura Madrid, a feira con maior número de participantes do Consello, é tamén o escenario elixido para estrear nova imaxe. Concibida para canles dixitais, a campaña Somos Semente sae por primeira vez da Rede para vestir o stand do Craega. Os 132 m2 reservados pola entidade que controla e certifica a produción ecolóxica en Galicia terán como fío condutor o novo claim.

Das 23 empresas que expoñen baixo o paraugas do Craega, as vencelladas coa cervexa teñen especial protagonismo. Catro firmas –Bubelá Artesá, Toupiña, Celebridade Galega e Galician Brew- desprazaranse a Madrid para dar a coñecer ao mercado unha bebida que cada vez gaña máis adeptos na liña eco. O mel é outro dos produtos con máis representación no stand agrupado. Mieles Anta, Baronceli e Sovoral volven á feira coas últimas novidades en apicultura orgánica.

O abano de expositores do Consello complétase con postos de xeados, algas, pratos preparados, viño, embutidos, conservas, queixos e outros derivados lácteos, algas ou infusións.

PONTEVEDRA, A PROVINCIA CON MÁIS PESO. Case a metade dos expositores proceden de Pontevedra, precisamente a provincia con máis peso na transformación e comercialización de produto ecolóxico. 11 empresas teñen o seu domicilio social establecido nesta zona: Bioalacena, Producto de Aldea, Dona Cobiña, Biowak Natural Oils, Mirabel do Rosal / Alén do Val, Cervexa Toupiña, Galician Brew, Bodega Luz de Estrelas, Palacio de Oriente, Paporroibo Tés e Infusiones e Algas La Patrona.

En segundo lugar, atópase a provincia de Lugo. Desde aí chegan outras seis firmas: Celtaverde, Arqueixal, Mieles Anta, Jamones González, Bubela Artesá e Milhulloa. Con menor representación nesta feira figuran Ourense (Baronceli Agricultura Orgánica, Camoco Foods by Belgosuc , Sovoral Apicultura Orgánica e Cerveza Celebridade Galega Eco) e A Coruña (A Factoría Ecolóxica e Galuriña Empanadas de Algas).

DOUS ‘SHOW COOKINGS’. O chef monfortino Martín Mantilla será o encargado de conducir as dúas sesións de cociña en directo que organiza o Craega con motivo de Biocultura Madrid. O primeiro terá lugar o xoves 7 (15 h) na sala Show Cooking 1. Os asistentes poderán degustar castañas guisadas con chourizo e touciño entrefebrado de porco celta; arroz cremoso de vaca galega con aceite de Quiroga e mousse de queixo cocida con marmelo. Cun aforo de 60 persoas, a actividade está aberta a todos os públicos.

Para o venres 8 (16 h), Mantilla ten previsto preparar ceviche de vaca galega, arroz de grelos con mexillóns en escabeche e flan líquido de castañas. Terá lugar no mesmo espazo e as condicións de acceso son semellantes ás do primeiro día.

Reputado chef galego, formado nos fogóns da escola de hostalería da Fundación Belarmino Fernández Iglesias (Sober), Martín Mantilla foi xefe de cociña do restaurante O Grelo (Monforte de Lemos). Forte defensor da agricultura ecolóxica, está a preparar a apertura do seu propio establecemento en pleno corazón da Ribeira Sacra, no Concello de Sober.

35ª EDICIÓN DE BIOCULTURA MADRID. A que comeza mañá en Madrid é a feira de produtos ecolóxicos e consumo responsable máis importante do conxunto do Estado. De periodicidade anual, prevé a participación de case 800 expositores e 74.500 visitantes. En paralelo, acolle un completo programa de 400 actividades para todos os públicos.

A 35ª edición de Biocultura Madrid é a sexta feira sectorial á que acode o Craega en 2019. O calendario deste exercicio abriuse o pasado febreiro en Biofach (Alemaña). Tamén no eido internacional, posteriormente tivo presenza en Natural & Organic Products Europe (Reino Unido) e en Tutto Food (Italia). Xa en territorio nacional, o Consello asistiu despois a Biocultura Barcelona e Organic Food Iberia.

A castaña eco, o sabor do outono galego

É o froito por excelencia desta estación en Galicia. As rúas das vilas e das cidades recenden a castaña asada e son numerosos os puntos da comunidade onde celebran a colleita acompañada do viño novo nos populares magostos. Con todo, a castaña de produción ecolóxica, en progresiva expansión tanto en superficie coma en volume de negocio dende os comezos da existencia do Craega, ten un importante valor engadido respecto da convencional: en todo o proceso, dende que se planta a árbore ata a súa recolección, está prohibido empregar herbicidas ou outro tipo de produtos químicos non autorizados pola normativa de produción ecolóxica, polo que, ademais de saboroso e nutritivo, consumiremos un alimento máis san e máis respectuoso co medio ambiente.

CASTANEA SATIVA, A ORIXE. Castanea sativa é o nome científico deste froito, un alimento presente nas mesas galegas dende tempos inmemoriais, cuxo maior desenvolvemento e implantación en España tivo lugar durante a presenza dos romanos. Nesa época as castañas consumíanse asadas, crúas, secas ou en fariña e formaban parte da dieta durante todo o ano. A súa proliferación na nosa terra débese ao clima, temperado e húmido, propicio para o desenvolvemento do castiñeiro (Castanea sativa Mill.), como se reficte no feito de que a maioría dos soutos do Estado se localizan na zona noroeste e nomeadamente na nosa comunidade.

A partir do século XVI, coa incorporación da pataca e do millo chegados de América e co desenvolvemento de enfermidades do castiñeiro, a castaña quedou relegada co paso dos anos a un alimento para clases sociais máis humildes e os seus animais domésticos.

Andando o tempo, a súa consideración mudou ata adquirir unha imaxe máis sofisticada e a súa demanda foi protagonista dun auxe procedente da revalorización dos produtos artesáns, así como a súa utilización na alta cociña, ata chegar a compartir mesa coas máis altas selectas exquisiteces e a internarse nos principais mercados internacionais de moi diversas formas: fresca, moi apreciada para a elaboración do marrón glacé; deshidratada; fariña; sopa; crema ou conservas (natural e en almibre), por citar só algunhas opcións.

SABOROSA E SAUDABLE. Asada, cocida en caldo ou con leite, a castaña representa un dos alimentos esenciais da gastronomía galega e consómese soa ou combinada con pratos de caza, verduras, carne… ademais de constituír unha excelente base para elaborar exquisitas sobremesas.

Actualmente ninguén dúbida das súas calidades nutritivas e da súa baixa achega calórica, pois o seu compoñente maioritario son os hidratos de carbono (almidón, sacarosa e fibra soluble).

Ten un baixo contido de proteínas, aínda que de valor biolóxico máis importante que o doutros vexetais, é dicir, de mellor calidade. A cantidade de graxa presente nelas tamén é moi baixa, bastante similar á dos cereais e, por tanto, moi inferior á dos froitos secos. É, ademais, unha boa fonte de vitaminas C, E e B e minerais (K, P, Mg, Ca e Fe). O seu baixo contido en glute está a espertar interese para a súa utilización en alimentos aptos para celíacos e tamén para dietas baixas en sodio.

En definitiva, a castaña é un alimento moi nutritivo, ademais de saboroso, moi recomendable para incluír nunha boa alimentación.

UN FROITO QUE NON DEIXA DE MEDRAR. Os datos recompilados no último exercicio do Craega falan por si sós. Dende que o Consello botou a andar, o ascenso da produción da castaña ecolóxica, nomeadamente nos últimos anos, é imparable, como reflicten as gráficas que amosamos a continuación.

“Ser líderes no mercado implica apostar pola excelencia na calidade”

Jesús Quintá, xerente de Alibós
Alibós dedícase dende hai máis de 50 anos á manipulación e á venda de castañas cun amplo nicho de mercado no eido internacional. A colleita procedente de solo galego está certificada pola IXP Castaña de Galicia e parte da súa produción está certificada en ecolóxico polo Craega. Charlamos con Jesús Quintá, xerente desta veterana firma e presidente da IXP Castaña de Galicia.Ler máis

“Se os castiñeiros aguantan, nós estaremos con eles”

Anabel Dacosta, da empresa Pecado de Outono
Anabel Dacosta e José Feijóo son os responsables desta empresa situada no concello ourensán de Riós. Tras máis de 15 anos dedicados á recolección de castaña, dende hai seis deron o salto á súa transformación e á comercialización de castaña fresca, deshidratada e tamén fariña, produtos todos eles que saen á rúa coa garantía do selo do Craega.Ler máis

“Ser líderes no mercado implica apostar pola excelencia na calidade”

Jesús Quintá, xerente de Alibós

Alibós dedícase dende hai máis de cincuenta anos á manipulación e á venda de castañas cun amplo nicho de mercado no mercado internacional. A colleita procedente de solo galego está certificada pola IXP Castaña de Galicia e parte da súa produción está certificada en ecolóxico polo Craega. Charlamos con Jesús Quintá, xerente desta veterana firma e presidente da IXP Castaña de Galicia.

Como se prevé a colleita de castañas deste ano?
Irregular. Algúns concellos galegos foron máis afectados pola avespa do castiñeiro e contamos que a súa produción se vexa minguada. A calidade do froito diminuíu debido ás altas temperaturas que tivemos no inicio do outono, pero agardamos que as variedades algo máis tardías teñan mellor calidade.

Que porcentaxe se produce en ecolóxico en Alibós?
Preto dun 10 % das castañas comercializadas en Alibós proceden de soutos certificados en ecolóxico, que non sofren ningún tipo de tratamento con fitosanitarios nin fertilizantes non autorizados e nos que se realizan os traballos agrícolas e recolección de maneira sostible e respectuosa coa fertilidade do solo.

Cando deciden a súa conversión en ecolóxico e por que?
Somos unha das empresas máis antigas certificadas polo Craega, desde a súa creación en 1997. Naquel momento vimos a potencialidade do mercado ecolóxico da castaña no resto de Europa e aproveitamos a posibilidade. A nosa posición de líderes na comercialización de castaña pelada para industria obríganos a ofertarlles aos nosos clientes toda a gama de calidades e certificacións posibles e desta forma fidelizalos.

Cales son os seus principais provedores?
Unha gran parte da castaña ecolóxica procede de zonas de Galicia de cultivo tradicional onde hai agricultores certificados e o resto procede das fincas que xestiona Alibós con contratos directos cos propietarios dos soutos. Tamén temos provedores doutras comunidades e de Portugal.

Que propiedades se teñen que dar no solo para que o souto produza castaña de calidade?
Os mellores solos son os de máis de 1 m de espesor, que garanten a alimentación hídrica e de nutrientes, así como areentos para favorecer unha boa drenaxe. O castiñeiro prefire chans con pH ácido, cun contido equilibrado en nitróxeno e materia orgánica.

Cales son as súas principais liñas de produción?
Nós retiramos as dúas peles da castaña mediante tecnoloxía específica e conxelámola para que poida utilizarse durante un longo período de tempo por outras industrias que procesan produtos derivados ou para ser consumida directamente nos lineais de conxelado dos mercados máis gourmet.

Cal é o principal mercado de Alibós?
Vendemos en 17 países, entre eles, Francia, Suíza, Xapón, EE. UU., Reino Unido, Alemaña, Bélxica…

Que é o Proxecto Soutos?
Iniciouse aló por 2010 e consiste na realización de novas plantacións, tanto propias como de terceiros cun sistema de cultivo adaptado á produción de froita de calidade, mediante a selección de variedades de alto rendemento que demanda o mercado.

Onde está a clave do seu éxito?
Ser líderes no mercado implica apostar pola excelencia na calidade, tanto do produto coma do servizo que o acompaña, investir en I+D, incorporar as últimas innovacións no proceso produtivo e no produto e actualizar continuamente a maquinaria e as instalacións. Deste xeito podemos ser competitivos e, ademais, dispoñer dun amplo coñecemento dun mercado no que levamos 50 anos traballando.

Dende o inicio do Craega tivo lugar un aumento considerable tanto na superficie dedicada á produción eco coma no volume de negocio. A que cre que se debe este incremento?
O consumidor cada vez está máis concienciado. Estamos vivindo nos últimos meses diversas iniciativas e protestas a favor da urxencia da protección medioambiental e a agricultura ecolóxica é o xeito produtivo que ten que acompañar esta tendencia. Coido que o consumo aínda ten marxe para incrementarse nos próximos anos, sobre todo no mercado interno, que acostuma a ir un pouco detrás doutros países europeos neste tipo de tendencias de consumo.

A castaña eco, o sabor do outono galego

Anabel Dacosta (Pecado de Outono): “Se os castiñeiros aguantan, nós estaremos con eles”

“Se os castiñeiros aguantan, nós estaremos con eles”

Anabel Dacosta, da empresa Pecado de Outono

Anabel Dacosta e José Feijóo son os responsables desta empresa, situada no concello ourensán de Riós. Tras máis de quince anos dedicados á recolección de castaña, dende hai seis deron o salto á súa transformación e á comercialización da castaña fresca, deshidratada e fariña, produtos que saen á rúa coa garantía do selo do Craega.

Pecado de Outono nace da necesidade de crear un medio de vida no rural. Hai seis anos víronse na tesitura de ter que decidir: marchar á cidade na procura de traballo ou emprender unha empresa no rural. E elixiron a aldea.

Malia ter xa algúns castiñeiros herdados da familia, resultaban insuficientes para abastecer o obradoiro. “As plantacións novas non producen dun xeito considerable ata os vinte anos, de modo que a alternativa eran árbores grandes abandonadas que puidesen poñerse en plena produción en tres ou catro anos”. Recoñecen que, a pesar de ser un traballo extremadamente duro, o resultado paga a pena: “Quitar xestas do tamaño de árbores, eliminar silvas e máis silvas… todo a man, e podar en altura, pero só con miralas vémonos reconfortados… Son árbores máxicas, maxestosas e agradecidas”.

“Nestes anos a súa evolución, tras limpalas, podalas, vacinalas e coidalas ano tras ano, foi impresionante, de xeito que cada ano temos máis produción. Isto permítenos ter que mercarlles menos cada campaña a outros produtores ecolóxicos, que, ademais, non hai na nosa contorna”, cóntanos Anabel. Na actualidade, malia que algunhas son novas e a súa produción aínda non é representativa, contan xa con máis de 200 árbores froiteiras moi variadas.

A colleita deste outono prevese incerta, porque a pesar de ser un ano climatoloxicamente bo, grazas a chuvia caída de forma constante ao longo destes últimos meses, sobrevoa a ameaza da avespa do castiñeiro, moi acusado na súa zona; de feito, “hai variedades, como a famosa, que está tremendamente afectada, de modo que hai árbores pletóricas e hai árbores sen nada”, asegura.

A produción con máis saída é a castaña fresca, pero só a hai en temporada, e non chega aos dous meses, pero tamén se está dando ben durante todo o ano a fariña e o froito deshidratado. Tras estes seis anos, afirman ter xa un nicho de mercado estable –subministran a tendas ecolóxicas, incluídas ás de venda a granel, así como a feiras e supermercados eco–, pois a súa pretensión nunca foi a de ser grandes e seguen pensando así: “Só queremos ser sostibles en todos os sentidos”, afirma.

O proxecto de Pecado complétase coas visitas guiadas á súa propiedade, á que asisten grupos de colexios, grupos de adultos, asociacións… e participan activamente todos os anos cos campamentos que organizan dedicados ás castañas e aos soutos.

A pesar da incerteza ante o futuro, debido ás ameazas para o sector (a avespa do castiñeiro e o cambio climático, así como o longo ciclo da produción da castaña), seguen a manter a ilusión no seu traballo: “Se os castiñeiros aguantan, nós estaremos con eles”.

A castaña eco, o sabor do outono galego

Jesús Quintá (Alibós): “Ser líderes no mercado implica apostar pola excelencia na calidade”

O Craega lanza ‘Somos semente’ para impulsar o consumo de produto ecolóxico en Galicia

O Consello Regulador da Agricultura Ecolóxica de Galicia (Craega) acaba de poñer en marcha Somos semente, a súa primeira campaña de publicidade online. Concebido como un relato audiovisual de tres capítulos, o primeiro spot publicouse en Internet o pasado luns e hoxe mesmo sae á luz o segundo. O seu leitmotiv é grabar a marca Craega na mente do consumidor galego. Para iso, e por primeira vez desde que botou a andar en 1997, o organismo que controla e certifica a agricultura ecolóxica na comunidade aposta por un novo formato promocional con difusión exclusiva en redes sociais. 

“O noso gran reto segue a ser o mercado galego. Estudos propios demostran que o selo non se coñece. Apostamos por unha fórmula revolucionaria para crear un movemento arredor da agricultura ecolóxica que perdure no tempo”, explica Francisco López Valladares, presidente do Consello. Cun forte compoñente emocional, a campaña afonda nos valores do Craega (respecto polo medio ambiente, benestar animal, desenvolvemento rural, etc) e nas vantaxes que ten tanto para a saúde como para o tecido económico consumir alimentos certificados. 

Somos semente arranca en outubro co lanzamento dos tres vídeos nos perfís dixitais corporativos (Facebook, Twitter, Instagram e Youtube). Dispoñibles en www.somossemente.com, os contidos audiovisuais levarán en paralelo publicidade online que ten como cometido posicionar na Rede a marca Craega e os seus valores. A través dun relato coherente que irá saíndo á luz ao longo de todo o mes, as tres pezas audiovisuais servirán para debullar os piares básicos da agricultura ecolóxica. 

Ademais de explicar que é o selo e que significa a certificación, a campaña quere espertar a conciencia do consumidor galego e lograr que se comprometa co sector.  

En paralelo, desde o seo do Consello impulsaranse diferentes accións que van máis alá do soporte dixital. Nos vindeiros meses, as principais cidades galegas amosarán a nova imaxe do Craega en localizacións estratéxicas e no transporte urbano. Asemade, levaranse a cabo diversas actividades a pé de rúa para dar visibilidade aos produtos bio. 

Todas estas actividades difundiranse progresivamente na web www.craega.es, os perfís de Facebook, Twitter, Instagram e Youtube, o grupo de WhatsApp e tamén na revista corporativa do Consello. Con este conxunto de accións, a campaña procura visibilizar a marca Craega e un estilo de vida saudable a través do consumo de produtos ecolóxicos. 

MÁIS DE MIL OPERADORES. O Craega botaba a andar en 1997 con só 11 operadores e 13,35 hectáreas de superficie certificada. Hoxe hai máis de mil inscritos e máis de 33.000 ha dedicadas ao cultivo ecolóxico. Os balances económicos soben ano tras ano e poñen de relevo o músculo dun sector que cada vez cobra máis peso dentro e fóra de Galicia. 

Co lácteo como eixo estratéxico, 2018 pechaba cun volume de vendas certificadas de 78,7 millóns de euros. “O ecolóxico non é unha moda. O consumidor está cada vez máis concienciado e sabe que cada compra ten unha consecuencia: co medio ambiente, co rural, coa economía local e coa súa saúde”, recalca Valladares. 

Neste contexto de eclosión da ecoloxía, é importante –insiste o presidente do Consello- asegurarse de que se cumpren as regras. “Cómpre buscar sempre o noso selo, única garantía oficial de que un produto se axusta á normativa europea”, sinala. “O distintivo serve para protexer ao produtor fronte ao fraude, pero sobre todo ao consumidor”, insiste.

 

Máis de 20 empresas eco apúntanse a Biocultura Madrid 2019

Biocultura Madrid 2018. Stand Craega
Stand do Craega en Biocultura Madrid 2018

Por cuarto ano consecutivo, o Craega estará en Biocultura Madrid. Considerada unha das feiras máis importantes do Estado, terá lugar entre o 7 e o 11 de novembro en Ifema. Con enorme interese para o sector, desta vez inscribíronse máis de 20 empresas certificadas.

Dirixida a profesionais e consumidores, a Asociación Vida Sana prevé a participación de 800 expositores e 74.500 visitantes. En paralelo, a organización preparou un intenso programa con máis de 400 actividades para que a 35ª edición de Biocultura Madrid sexa un éxito. O Craega promove dúas sesións de cociña en directo con produto ecolóxico certificado a cargo do chef monfortino Martín Mantilla. A primeira terá lugar o xoves 7 (15 h.) e a segunda o venres 8 (16 h.). Ámbalas dúas sesións se celebrarán na sala Show Cooking 1. 

O pavillón 10 de Ifema está reservado para máis de 18.000 referencias de produtos de alimentación ecolóxica. No recinto tamén haberá oco para produtos de hixiene e cosmética con ingredientes certificados. A moda sostible e todo o relacionado coa vivenda estará no pavillón 8.

No stand do Craega -o número 16- compartirán espazo 23 empresas: Biowak, Tés Paporroibo, Bodega Luz de Estrelas (Manuel Céspedes Rodríguez), Mieles Anta, Celtaverde, Algas La Patrona, Baronceli Agricultura Ecolóxica (Conservas do Támega), Cerveza Celebridade Galega (Cervexa Monte Rei), Jamones González, Producto de Aldea, Galician Brew, Galuriña, empanadas de algas, Gudi Eco Foods, BioAlacena (Mule System), Mirabel do Rosal / Alén do Val, The Bio Factory (A Factoría Ecolóxica), Sovoral Apicultura Orgánica, Camoco Foods By Belgosuc, Bubela Artesá, Cervexa Toupiña (Kalinka Lagazós), Palacio de Oriente (Conservas Antonio Alonso SA), Milhulloa, Dona Cobiña (Cobideza Sociedade Cooperativa) e Arqueixal.

Tres centros escolares de Trabada, O Bolo e Santiago gañan o concurso ‘Faite Eco do Lóxico’

Capturas dos vídeos do CEIP do Bolo (arriba) e do IES Xelmírez II (abaixo, esquerda) e imaxe da horta do Currás, o traballo dos escolares do CEIP Celso Currás.

A segunda edición do concurso Faite Eco do Lóxico xa ten gañadores. Convocado polo Consello Regulador de Agricultura Ecolóxica de Galicia (CRAEGA), os premios recaen desta vez no CEIP Celso Currás (Trabada, Lugo), o CEIP O Bolo (O Bolo, Ourense) e o IES Xelmírez II (Santiago, A Coruña). Baixo o título Por que elixir produtos ecolóxicos?, o certame nace co obxectivo de recoñecer o esforzo da comunidade educativa á hora de achegarse a este sector.

Na categoría de Infantil, o traballo elixido é o presentado polo CEIP Celso Currás. O xurado valora a minuciosidade da proposta do centro de Trabada, xa que os nenos elaboraron unha maqueta que reproduce un horto con plastilina e material de refugallo. Co lema Se san queres estar, os nosos produtos ecolóxicos debes probar, os cativos fixeron unha plantación con leitugas, tomates, cabazas e cenoria, entre outros.

O máximo galardón na categoría de Primaria foi parar ao CEIP O Bolo. Aos integrantes do comité de selección chamoulles a atención neste caso a orixinalidade do traballo, un vídeo no que os estudantes interpretan un rap para defender as vantaxes do produto ecolóxico fronte ao convencional. No transcurso da peza, o alumnado do colexio ourensán amosa o arco da vella saudable (con pratos equilibrados incluídos) e o horto do centro.

Xa por último, o galardón na categoría de Secundaria é para o IES Xelmírez II. Co título Consome ecolóxico, os alumnos do instituto compostelán relatan nun vídeo as características deste tipo de produto e o seu sistema de produción.

Os centros premiados recibirán unha cesta de produtos ecolóxicos certificados polo CRAEGA antes de que remate o período lectivo. O curso pasado o gañador foi o CEIP Plurilingüe de Lousada (Guntín, Lugo). 

CHARLAS EN CENTROS DE TODA GALICIA. O certame escolar pon o punto e final ao programa Faite Eco do Lóxico, un programa impulsado polo CRAEGA no marco do Plan Proxecta, iniciativa esta última que parte desde a Consellería de Educación. Dirixido a primaria, ESO, bacharelato e FP, na convocatoria do Consello inscribíronse 46 centros de toda Galicia. Para achegar a agricultura ecolóxica aos máis novos, impartíronse charlas, organízaronse degustacións e enviáronse xogos á maior parte dos centros participantes.

Faite Eco do Lóxico é unha acción promovida polo CRAEGA con axuda do Ministerio de Agricultura, Pesca e Alimentación, o Fondo Europeo Agrario de Desenvolvemento Rural (FEADER)-Europa inviste no rural e a Xunta.

TRABALLOS PREMIADOS:

1. CEIP Celso Currás (Trabada, Lugo). Ver traballo

2. CEIP O Bolo (O Bolo, Ourense). Ver traballo

3. IES Xelmírez II (Santiago, A Coruña). Ver traballo

O Craega desembarca en Organic Food Iberia con nove firmas eco

O eco galego pecha o calendario feiral do primeiro semestre coa súa participación en Organic Food Iberia. A celebrar en Ifema (Madrid) entre os días 6 e 7 de xuño, a convocatoria nace co obxectivo de converterse na referencia do sector en España e Portugal. Esta primeira edición é unha cita ineludible para as industrias especializadas en produtos agroalimentarios, bebidas e viños ecolóxicos.

No stand C614 -78 m²- estarán as nove empresas que se suman ao evento baixo o paraugas do CRAEGA: Toca (Mieles Anta), Porto-Muíños, Eco González (Jamones González), The Bio Factory (A Factoría Ecolóxica), Coraçai, Casa Grande de Xanceda, Gudi Eco Foods (Eco Bracan S.L.), Galician Brew e Orballo. Ademais, dous representantes do Consello ocuparanse de informar aos visitantes tanto sobre a actividade da propia entidade como do que atinxe operadores inscritos.

De carácter internacional e dirixida exclusivamente ao público profesional, a organización prevé reunir a máis de 500 expositores entre Organic Food Iberia e o salón de cosmética e moda Eco Living Iberia. Coa que se celebra en Madrid a principos de xuño, o CRAEGA culmina un intenso primeiro semestre que levou o eco galego ata Alemaña (Biofach), Londres (NOPE), Milán (Tutto Food) e máis recentemente Barcelona (Biocultura).

ACTIVIDADES INTERECO. Durante os dous días de feira, Intereco (asociación sen ánimo de lucro da que forma parte o CRAEGA) organiza diferentes accións promocionais, de divulgación e formativas. Entre as máis destacadas atópanse as seguintes:

  • Mesa redonda sobre harmonización internacional de normas da produción ecolóxica. Desenvolverase o xoves 6 de xuño (sala 14.5, 16.30-18 h.). É recomendable reservar praza neste enlace.
  • Entrega de premios da Organic Food Iberia (xoves 6, de 19 a 20 h.).
  • Obradoiro técnico-práctico de etiquetado profesional. Organizado xunto coa Asociación Vida Sana e coa colaboración do Comité de Agricultura Ecolóxica de Comunidade de Madrid, terá lugar o venres 7 (Organic Theatre, de 15.25 a 16.15 h.).
  • Degustacións e charlas. Durante as dúas xornadas terán lugar diferentes actividades para catar os produtos no stand de Intereco (F700S).

Carlos Spuch: “O importante dos produtos eco é o que non teñen”

Carlos Spuch
Carlos Spuch, neurocientífico do Instituto de Investigación Sanitaria Galicia Sur e coordinador da Rede Galega de Investigación en Demencias, é un gran defensor do produto ecolóxico

Romper o ciclo natural das cousas ten un prezo. E a ciencia corrobórao pouco a pouco. Demostrado está que pesticidas como o DDT –xa prohibido– inciden no alzhéimer e que hai outros que se relacionan co párkinson. Existen ademais “evidencias” de que estas e outras enfermidades como a depresión poderían ter a súa orixe no intestino. Por iso, levar unha alimentación saudable, a base de produto ecolóxico e sen procesados, é tan importante para previr determinadas doenzas. É o que defende Carlos Spuch, neurocientífico do Instituto de Investigación Sanitaria Galicia Sur e coordinador da Rede Galega de Investigación en Demencias. Agora ten entre mans un proxecto piloto que intenta probar que a dieta ecolóxica é quen de diminuír a actividade inflamatoria no intestino.

Somos o que comemos?
Estamos formados por un montón de substancias. Desde que nacemos ata que morremos, o que incorporamos ao noso organismo chega a través da respiración, da alimentación ou do que nos poida picar o médico. Nada máis. Na respiración inflúen factores externos como a contaminación, pero o demais depende da nutrición. Cando es neno, se inxires un tipo de graxa determinado, hidratos de carbono en exceso e ademais hai déficit de proteínas, modifícase o neurodesenvolvemento e iso vai ter consecuencias na idade adulta.

Entón non hai alimentos nin bos, nin malos. Todo é unha cuestión de equilibrio…
O difícil é estar equilibrado. Salvo que haxa unha patoloxía que o impida, a mellor dieta é aquela na que comes de todo e variado. As graxas non se deben eliminar nunca por completo. Son moi importantes para o sistema nervioso. O 70% do cerebro está composto de graxa e as nosas neuronas necesítana para funcionar. Que sucede entón cando consomes unha dieta alta en hidratos e baixa en graxa? Que o desenvolvemento do cerebro non é bo. Hai estudos que demostran que os nenos que consumiron poucas graxas teñen un desenvolvemento cognitivo un pouco máis lento. Son normais, pero lévalles máis tempo resolver problemas ou reaccionar fronte a certas cousas. En resumo, cómpre comer de todo e variado.

Convén logo incluír as graxas na dieta?
Pois claro. O que hai é que escoller o tipo de graxa e atopar o equilibrio. En Galicia temos dous dos alimentos con mellor composición de ácidos graxos que existen no mundo: o peixe azul e o leite. O que non sabe a xente, en termos xerais, é que os ácidos malos son necesarios para a correcta absorción dos bos. O de que algo é bo ou malo é moi relativo. A natureza mesma é así e todo ten as súas funcións.

Estamos a envelenarnos coa alimentación de hoxe en día?
Envelenar é un pouco forte, pero si que estamos a modificar os nosos patróns alimentarios. O prexudicial é tomar sempre produtos procesados. Por outra banda, é positivo que xurdan tendencias bio. Pouco a pouco, a ciencia demostra que a dieta dos nosos avós era mellor que a de hoxe. Pero volvendo ao veleno, quizais habería que dicir que si, polo excesivo uso de pesticidas que se rexistra na actualidade. Cada vez saen máis estudos que verifican que certos praguicidas cunha alta concentración en alimentos provocan problemas crónicos no noso corpo. Por iso, son un defensor do produto ecolóxico: o máis importante non é o que teñen, senón o que non teñen.

Como poden intervir os alimentos en enfermidades como o alzhéimer ou o párkinson?
Cada vez saen máis evidencias do que todo o mundo sabe. Xa entre a década dos 80 e 90, un estudo demostrou que había pacientes de alzhéimer cun elevedo nivel de DDT no cerebro. A raíz das presións do Goberno sueco, acabouse prohibindo (permítese o seu uso nalgún caso). Tamén hai evidencias de que certos praguicidas constitúen un factor de risco para o párkinson. Basta con facer a proba cunha rata: se inxectas o composto en cuestión no seu cerebro, matas as súas neuronas. Ese é o modelo do párkinson. A maior parte dos pesticidas empréganse para controlar pragas e malas herbas, pero moitos teñen efectos neurotóxicos. Acumúlanse en niveis moi elevados en froitas e verduras que nós despois inxerimos e, polo tanto, pasan ao noso organismo.

Tamén di vostede que no intestino se pode atopar a orixe de moitas doenzas…
Hoxe en día un dos grandes focos de atención é a microbiota intestinal (as bacterias e outros mi- croorganismos que residen no intestino). Todos os alimentos teñen que pasar pola flora bacteriana para que poidamos absorbelos. Sospéitase que certas poblacións de bacterias están orixinando a depresión, determinada manifestación do alzhéimer, o autismo… E quen modifica a flora bacteriana? Os alimentos. A flora bacteriana é un reflexo do que comes. Por exemplo, a serotonina é un neurotransmisor asociado á depresión. O 90 % está no intestino. Cando a microbiota está alterada, a parede intestinal inflámase e a produción de serotonina trastórnase. Se a investigación logra demostrar que a orixe destas enfermidades está no intestino, poderemos controlar a depresión regulando a flora bacteriana.

É máis san consumir ecolóxico?
Si. Porque o produto ecolóxico non ten ningún tipo de químico. E ademais adoita ser un produto de proximidade: madura de forma natural na horta durante o tempo que precisa e chega máis rápido aos puntos de venda. Eses antioxidantes tan beneficiosos para a saúde dos que tanto se fala, son compostos que producen as froitas e verduras para loitar contra a exposición solar ou contra o ataque de bacterias e fungos. E iso que significa? Que non é o mesmo comer unha froita que madurase ao sol que outra que o fixese dentro dunha cámara. Na medida posible, hai que consumir produtos da túa rexión e de tempada. Cómpre asumir que non se poden comer amorodos todo o ano porque non se producen. Cada alimento ten a súa época. Só con iso, sería suficiente para provocar o boom económico dunha determinada zona.

Vostede está intentando probalo…
O noso grupo ten entre mans un proxecto piloto con pacientes con enfermidade inflamatoria intestinal. Ademais de analizar os niveis de inflamación no intestino, tamén recollemos datos sobre a presenza de certos pesticidas nos ouriños. Despois mudamos os seus hábitos alimenticios e poñémoslles unha dieta ecolóxica. Aos 15 días volvemos a avalialos. Esperamos que a dieta ecolóxica diminúa a actividade inflamatoria no intestino e que mellore o seu estado de saúde xeral.

O CRAEGA dispara as vendas un 33% e roza os 80 millóns de euros

Manuel Rodríguez, esquerda, José González, Francisco López Valladares e Javier García Lozano

O Consello Regulador da Agricultura Ecolóxica de Galicia (CRAEGA) segue a medrar ano tras ano. En 2018, as vendas de produto certificado disparáronse un 33,2% e chegaron aos 78,7 millóns de euros. Así o avanzou hoxe en Boqueixón o presidente do Consello, Francisco López Valladares, que estivo acompañado polo conselleiro do Medio Rural, José González, e o director da Axencia Galega da Calidade Alimentaria (Agacal), Manuel Rodríguez.

“2018 volve a ser un ano excelente para a agricultura ecolóxica. Medran todas as variables: a superficie certificada, a suma de operadores e o volume de vendas”, destacou Valladares. “Estamos convencidos de que isto non vai quedar así e que as cifras van manter a tendencia ascendente nos vindeiros anos. Porque a agricultura ecolóxica chegou para quedar con nós”, celebrou o presidente do CRAEGA. De feito, xa conseguiu consolidarse como o terceiro selo de calidade en Galicia, por detrás de Tenreira Galega e a D.O. Rías Baixas.

Na mesma liña se pronunciou o conselleiro. “Xa non é unha moda pasaxeira, nin minoritaria, senón unha actividade cun importante nicho de mercado que cada vez cobra máis forza”, recalcou José González. O titular de Medio Rural fixo fincapé na necesidade de apoiar a vertebración e organización do sector e avanzou que se vai crear unha mesa de produción ecolóxica. A previsión que se convoque “este trimestre”.

PRODUTOS ESTRELA. O leite UHT e a carne avícola, por esta orde, son os produtos certificados estrela, tal e como explicou o secretario do Consello, Javier García Lozano. Cunha facturación superior aos 26 millóns de euros e un crecemento de case 41 puntos, o lácteo é con diferenza o produto que máis ingresos xera. “En Galicia, certificamos o 65% do leite que se consome en España”, apuntou.

Por sectores, a produción animal é a que máis factura (44,3 millóns de euros), pero a do mar é a que máis medra en termos porcentuais (39,53%).

A superficie certificada polo CRAEGA tamén pecha o exercicio en positivo. Con 33.736,44 hectáreas certificadas, o crecemento en 2018 ronda os seis puntos. A provincia con máis terreo en ecolóxico é Lugo, xa que suma 16.507 ha (o 49% do total).

En canto ao número de operadores, o Consello anota neste caso unha suba de case oito puntos e computa 1.152 inscritos ao peche de 2018 (un 125,8% máis que en 2008). Cun 37,6%, a vexetal consolídase como a produción maioritaria no conxunto da comunidade.

García Lozano puxo o acento no peso que van cobrando no conxunto do Consello os elaboradores (industrias e comercializadores). En 2001 apenas representaban o 12% e hoxe xa rozan o 25%. O seu papel é fundamental para que o produto certificado chegue ao consumidor final.

DESCARGA DO RESUMO DE 2018