Arquivo da categoría: Feiras

O Craega darase cita na Feira Biofach

A Feira Internacional de Produtos Orgánicos Biofach celebra este ano a XXXIII edición, combinada con Vivaness, a Feira Internacional do Coidado Persoal Natural e Orgánico. Trátase do tándem feiral de Núremberg recibido con grande entusiasmo polo mundo ecolóxico, como demostran os datos da última edición (2020), que convocou  3.738 expositores.

A cita será entre o 26 e o 29 de xullo no Exhibition Centre Nuremberg e, por terceiro ano consecutivo, será a Federación Española de Industrias de Alimentación e Bebidas (FIAB), co apoio do Ministerio de Agricultura, Pesca e Alimentación (MAPA), a que organizará o pavillón español. Nel estarán presentes varios operadores galegos certificados polo Craega: Refix, Conservas del Noroeste (Connorsa), Avilugo, Lacto Baltar, Camemorcol, Mieles Anta, Conservas Ortiz e Porto-Muiños

Tras o encontro virtual por mor da pandemia, a feira alemá regresa cun completo programa de actividades: seminarios, workshops e conferencias sobre diversos temas de actualidade. O Congreso, que terá lugar paralelamente, é desde hai un tempo un foro importante para o sector biolóxico, entre outras cousas porque é onde se amosan as cifras e os feitos máis actuais acerca do seu desenvolvemento.

Todos os detalles da feira, nesta ligazón.

Produtos eco por terra e por mar, na Feira Salimat 2022

A 44.ª Feira Internacional Abanca Semana Verde de Galicia celebrarase do 2 ao 5 de xuño e acollerá, un ano máis, a Feira Salimat, na que o Craega formará parte do programa de actividades, a través das “experiencias de calidade da Agacal,  e da Consellería do Mar, co obxectivo de darlles cabida aos produtos certificados eco procedentes do mar e da terra. 

EXPERIENCIAS CULINARIAS CON PRODUTOS ECO

O xoves, 2 de xuño, ás 18:30 horas, terá lugar unha cata-degustación de Castaña de Galicia,  na que participa o Consello; o menú será elaborado por Criselda Iglesias, da Tapería Lecer (Cangas do Morrazo, Pontevedra). 

O sábado, 4 de xuño, entre as 13:45 e as 14:30 h poderase asistir a outra “experiencia de calidade” na que estará presente o Craega: a Masterclass Ternera Gallega-Buey Gallego, de novo a cargo da chef Criselda Iglesias, na que, ademais do noso, estarán outros selos distintivos de calidade alimentaria galega. 

O domingo, 5 de xuño, a etiqueta ecolóxica visibilizarase en dúas experiencias: a primeira, ás 11:30 h, con “produtos da terra”, e ás 15:00 h terá lugar a segunda: unha degustación de produtos de agricultura ecolóxica, da man de José Manuel Mallón, chef de Remollo Espazo Gastronómico (Ames, A Coruña), na que, ademais, haberá unha charla divulgativa sobre o labor que realiza a nosa entidade.

GALICIA SABE A MAR: ECOLÓXICOS A MARES

O selo de certificación eco tamén está incluído no programa de actividades da Consellería do Mar, que asistirá á feira con expositor propio, no que promoverá a campaña “Galicia sabe amar”, En concreto, o Craega colaborará o xoves 2 de xuño, de 18:00 a 19:00 h, xunto ao restaurador José Manuel Mallón, quen preparará unha cata baixo o lema “Galicia sabe amar: ecolóxicos a mares”, acompañada de sidras de produción ecolóxica. 

Podedes consultar todas as actividades do evento aquí.

Os produtos ecolóxicos certificados polo Craega conquistan BioCultura Barcelona

Foto: BioCultura

O Palau Sant Jordi celebrou a 28ª edición da BioCultura Barcelona do 5 ao 8 de maio. O sector deuse cita na feira de produtos ecolóxicos e consumo responsable, que recibiu unhas 50.000 persoas. 

Co xa habitual slogan “Bos para a natureza, bos para ti”, o Craega tamén puxo o seu gran de area neste evento, ao que asistiron, baixo o seu paraugas, varios produtores certificados: Bubela Artesá, Capitán Alga, Celebridade Galega, Porto-Muíños, Terra de Baronceli, Los Sabores del Camino, Algas La Patrona, Sovoral e Galuriña, ademais de Orballo e Algamar, que contaron con expositor independente.

Entre as actividades, a novidade do ano era “O Manicomio”, unha sala coordinada polo equipo de The Ecologist que concentrou as propostas culturais desta edición: debates, presentacións de libros, concertos, sesións de relaxación á hora da sesta e ata pases de películas de ecoloxía profunda e inmersiva.

UN SECTOR CON FUTURO

O sector ecolóxico demostrou que é o presente e tamén o futuro e nesta nova edición de BioCultura Barcelona corroborouse que é máis resistente e perdurable. Ángeles Parra, directora da feira e presidenta de Vida Sana, afirmou que “tiñamos moitas ganas de volver a unha feira alegre tras a pandemia. Foi un pracer que expositores, profesionais e consumidores se coñecesen de forma presencial, in situ“. Así mesmo, sinalou a grande aposta por unha alimentación ecolóxica, local, o máis artesá posible:  “É a mellor alimentación para os nosos organismos e para o planeta, pero tamén é a mellor para a nosa economía”.

Para Parra esta edición “certificou que este sector é o futuro, pero tamén o rabioso presente, xa que ten un público fiel e asiduo e resistimos mellor as crises que outros sectores que contan co apoio institucional”.

Máis información  en Bio Eco Actual

O Craega estará presente en BioCultura Barcelona         

Produtores do Craega na anterior edición

BioCultura Barcelona quenta motores para abrir as súas portas o vindeiro xoves, 5 de maio. A 28.ª edición, que durará ata o domingo 8 de maio, chega ao Palau Sant Jordi con moitas novidades.

O evento reunirá uns 300 expositores dedicados aos sectores da alimentación bío, cosmética ecolóxica, moda sustentable, casa sa, turismo responsable, enerxías renovables, mobilidade sustentable, artesanías e ONG. Entre os expositores estará presente o Consello Regulador da Produción Ecolóxica de Galicia (Craega), así como operadores certificados, que ofrecerán os seus produtos estrela e darán a coñecer a calidade de Galicia.

A Feira de Produtos Ecolóxicos e Consumo Responsable ten o propósito de seguir sorprendendo os visitantes coas últimas novidades do sector ecolóxico. As propostas son variadas, polo que facilitan adoptar uns hábitos saudables e a consumir de forma máis responsable.

Toda a información do evento nesta ligazón.

 

Galicia presume de produtores certificados en ecolóxico en Alimentaria Barcelona

As feiras volven á normalidade e así se percibiu en Alimentaria Barcelona e Hostelco, que se celebrou desde o luns 4 de abril ata o xoves 7. Segundo informa Fira de Barcelona, conseguíronse uns 100.000 visitantes, o que demostra que o sector está de volta. En Alimentaria destacaron iniciativas que fomentan a sustentabilidade, mentres que en Hostelco tamén se mostrou a incipiente robotización dos hoteis, entre outras tendencias. O impacto económico do evento que xunta ambas as feiras é de 180 millóns de euros.

“A intensa dinámica vivida durante esta edición reforza o carácter do evento como aliado estratéxico do sector no seu imparable proceso de internacionalización”, valorou o director de Alimentaria, Toni Valls. Máis de 3.000 empresas procedentes de 52 países distintos reuníronse no recinto situado en l’Hospitalet de Llobregat. O 23 % dos visitantes foron internacionais, provenientes de 149 países. “Destaca a calidade dos compradores que nos visitaron, que contribuirá a impulsar as vendas da industria alimentaria no exterior”, agregou Valls.

ÉXITO NA PARTICIPACIÓN DE PRODUTOS CON CERTIFICACIÓN DO CRAEGA

O director da Axencia Galega da Calidade Alimentaria (Agacal), José Luis Cabarcos, estivo presente na inauguración do evento, que contou coa presenza de produtos amparados por indicacións como Pataca de Galicia, Lacón Galego, Castaña de Galicia, Torta de Santiago e Mel de Galicia, ademais de produtos certificados polo Consello Regulador da Agricultura Ecolóxica de Galicia (Craega).

Os produtores e comercializadores do Consello que asistiron baixo o paraugas do MAPA foron os seguintes: Galuriña, Bioalacena, Traloagro SL, Jamones González SLU, Sovoral, A Factoría Ecolóxica SL, Algas La Patrona, Capitán Alga, Bágoas na Ría, Orballo, Sangría Republic, Avieco, Porto Muíños, Pasteurizados Cíes e Sensus Green Mixology SL.

O Craega promove os produtos do mar en AquaFuture Spain 2022

O I Salón Internacional da Industria Acuícula, AquaFuture Spain’22, celebrouse os días 23, 24 e 25 de marzo no recinto Feira Internacional de Galicia Abanca de Silleda (Pontevedra).

Os visitantes puideron coñecer os produtos e proxectos das 152 empresas e entidades presentes na súa área expositiva, procedentes de 23 países tanto de Europa como de Asia, Latinoamérica, Norteamérica ou Sudáfrica. Entre as entidades atopábanse compañías de subministracións industriais, alimentación, procesamento, equipamento profesional, criadeiros, tecnoloxía e desenvolvemento, software e informatización, produtores, asociacións, institucións públicas, publicacións ou formación. O programa incluía mesas redondas, presentacións e dúas showcookings con produtos acuícolas.

INAUGURACIÓN

A conselleira do Mar, Rosa Quintana, foi a encargada de inaugurar este evento e manifestou a aposta de Galicia polo cultivo de produtos do mar para “dar resposta aos desafíos das novas formas de alimentación sen perder de vista a protección dos recursos naturais”.

Así mesmo, reivindicou que a Unión Europea debe favorecer o desenvolvemento sustentable deste sector como parte dunha estratexia xeral que garanta a seguridade alimentaria no marco do Pacto Verde Europeo. Ademais, deu conta do peso fundamental que ten a actividade acuícola, na que se inclúe o mexillón, na economía galega e destacou o seu valor na xeración de emprego pois nela traballan máis de 5.600 persoas e tamén en termos de crecemento sustentable, innovación tecnolóxica e seguridade alimentaria.

CASETA DA CONSELLERÍA

Quintana destacou o apoio do Executivo galego a este salón e a súa presenza no certame, no que conta cun posto de máis de 200 m2 que alberga a 10 expositores e no que se presentaron diferentes iniciativas, como o Foroacui, e celebrouse unha charla sobre innovación aberta aplicada á industria: casos de éxito, da man de Inxenia.

Entre os expositores atopábase o Craega con mostras de Conservas do Noroeste SL, empresa que ten unha variedade de produtos do mar ecolóxicos (Conservas Cabo de Peñas). Con expositor propio, dentro da mesma caseta, estiveron presentes Algas La Patrona e HQ Seaweed (Capitán Alga), dedicadas a algas ecolóxicas.

Durante as xornadas, no posto recibíronse varias visitas como a de Ramón Fernández Conchas, vogal do Craega (Servizo de Mercados da Consellería do Mar); a de Miriam González (Servizo de Mercados da Consellería); e a de Loli Paz e Juan Carlos Juncal, de Dimesalnés SL, tamén vogal do Consello (empresas importadoras e/ou comercializadoras), que estiveron acompañados de Agustín Pose e Marisa, dous bateeiros de Pontevedra.

AquaFuture Spain 2022 estréase en Silleda do 23 ao 25 de marzo

AquaFuture Spain’22 nace pensado como un punto de referencia para os profesionais do sector acuícola internacional, no que se poden actualizar sobre as últimas innovacións tecnolóxicas e estratexias do mercado, sempre baixo o enfoque da xestión sostible dos recursos. Trátase dun espazo no que poder compartir experiencias e coñecemento, onde aprender e ensinar, e onde explorar a posibilidade de abrir novos mercados.

Desde a Consellería do Mar convidaron o Craega a participar nesta primeira edición da Feira Aqua Future 2022, que terá lugar do 23 ao 25 de marzo no Recinto FIG Silleda. O Consello terá un posto compartido no stand común da Consellería, no que se exporán produtos daqueles operadores que así o desexen, vinculados á produción ecolóxica de alimentos procedentes do mar (algas e mexillóns).

Co obxectivo de promover a innovación e o coñecemento entre os axentes de interese, ofrecen un programa de xornadas técnicas orientadas a temáticas que actualmente marcan as tendencias do sector acuícola, en canto a innovacións do mercado. O itinerario está composto de tres grupos con diferentes actividades adaptadas aos intereses dos expositores e visitantes, entre as que se atopan diversas mesas redondas, presentacións de empresas expositoras e degustacións culinarias de produtos acuícolas.

Biocultura Galicia 2022, tres días de sinerxias ecolóxicas

Ofrecemos un percorrido polo que foi a terceira edición desta gran feira en Galicia, que por fin puido volver ao seu formato presencial. Organizada pola Asociación Vida Sana e celebrada no pavillón de ExpoCoruña, os días 4, 5 e 6 de marzo xuntáronse na cidade herculina preto de 200 expositores e 11.000 visitantes, cifras semellantes ao ano 2020, xusto antes da pandemia, as cales reafirman a boa saúde do sector.

Neste sentido, os nosos produtores amosáronse moi satisfeitos con esta experiencia por varias razóns: pola visibilidade, polo contacto co público e con outra xente do sector, “o que fai que se avance, se aprenda e se procure mellorar” e, por suposto, pola oportunidade de vender de xeito directo os seus produtos.

Foron un total de 18 empresas galegas certificadas en ecolóxico as que asistiron baixo o paraugas do Craega, que conviviron con cinco postos máis con stand propio, todos eles situados na zona azul, cor que representaba o sector da alimentación. Os visitantes puideron descubrir, e en moitos casos saborear, un sinfín de produtos con selo ecolóxico: conservas vexetais ou de peixe, produtos lácteos ou cárnicos, mel, cervexas, galletas, cafés, infusións, especias, doces, xeados, empanadas…

 

 

INAUGURACIÓN OFICIAL

A feira quedou inaugurada oficialmente o venres 4 ás 12:30 no espazo denominado “Zona Reserva da Biosfera”. Participaron no evento Pilar López, directora de Eventos de ExpoCoruña; Manuel Heredia, presidente do Consello de Dirección desta entidade (Dirección Xeral de Comercio); Ángeles Parra, presidenta da Asociación Vida Sana, organizadora da feira e directora de Biocultura; José Antonio Santiso, presidente da Reserva da Biosfera Mariñas Coruñesas; Cesáreo Pardal, presidente do Clúster de Turismo; José Luis Cabarcos, director xeral da Axencia Galega de Calidade Alimentaria (Agacal, Consellería do Medio Rural); Juan Ignacio Borrego, primeiro tenente de alcaldesa e concelleiro de Relacións Institucionais, Turismo e Seguridade Cidadá; José Ramón Rioboo, alcalde de Culleredo e deputado da Deputación da Coruña, Comisión de Transición Ecolóxica, Emprego e Territorio Sostible, e Xosé Luis Raposo, deputado da Área de Medio Ambiente da Deputación Provincial de Lugo.

Entre as diversas intervencións, destacamos a de José Luis Cabarcos, quen celebrou o forte crecemento que ten experimentado o sector ecolóxico nos últimos anos. Neste sentido, manifestou que estes datos “reflicten que a produción ecolóxica é unha actividade que xera riqueza e emprego no agro” e incidiu en que “a Xunta seguirá apostando por ela, tanto desde o punto de vista ambiental como desde a perspectiva económica”. Pechou a súa exposición lembrando que os produtores “son os verdadeiros protagonistas da feira”. > Máis información

  RONDA DE VISITAS EN APOIO DO SECTOR

Tras o acto de inauguración, o grupo de autoridades e organizadores da feira achegáronse aos diferentes postos para darlles apoio aos expositores e ás accións de promoción e divulgación programadas.

Pola súa banda, o equipo do programa da TVG Labranza tamén quixo facerse eco deste encontro e visibilizar o traballo do sector, polo que realizou unha ronda de visitas por todos os expositores co selo do Craega, incluíndo o noso propio stand, onde entrevistaron a Francisco L. Valladares, o noso presidente, quen, entre outros aspectos, lembrou a importancia do apoio do Consello ao sector para facer posible a asistencia dos produtores a este tipo de eventos.

Así mesmo, un grupo de influencers asistiu á feira co propósito de realizar tamén promoción dalgúns dos produtos ecolóxicos galegos: @silviafooding, @rogeliosantosqueiruga, @slowlife_slowtime, @engaliciamorate, @enxebreword e @lolaframbuesa.

Rocío Freire, vicepresidenta do Craega, posa co grupo de influencers asistentes á feira

A NOSA PEGADA NO PROGRAMA DE ACTIVIDADES

Ademais dos preto de 200 expositores que amosaron os seus produtos nesta feira (téxtil, cosmética, alimentación, bebidas…), Biocultura programou durante os tres días un amplísimo programa de actividades: música, degustacións de cociña ecolóxica, catas de viños e cervexas, charlas e mesas redondas. No pavillón de ExpoCoruña foron moitas e moi variadas as visitas das persoas interesadas en percorrer os expositores e apuntarse ás diferentes ofertas. O Craega tamén quixo poñer o seu gran de area coa programación de varias actividades.

A continuación, podedes ver algunhas instantáneas dos diferentes eventos nos que participamos:

  • Degustacións

Cata sensorial de viños, cervexas e outros licores ecolóxicos

Javier García, secretario do Consello, participou nesta cata, dirixida por David Pascual, presidente da Asociación Galega de Enólogos. No acto o secretario explicoulles os asistentes cales son os requisitos para poder certificar as viñas en ecolóxico.

Os produtos ecolóxicos galegos son tendencia

Foron tres degustacións conformadas por un menú composto dun produto de mar, outro de terra e unha sobremesa. Na primeira, cociñou Alf Mota (responsable do recetario do proxecto Menudatierra e das degustacións organizadas por Biocultura) e as dúas seguintes estiveron a cargo de Martín Mantilla (restaurante Berso, Sober).

Nos tres casos asistiu Javier García, quen ofreceu unha introdución na que resumiu brevemente en que consiste a certificación do Consello, cales son as características dos produtos ecolóxicos de terra e de mar e resaltou algúns dos seus beneficios, así como as diferenzas existentes respecto da alimentación convencional.

  • Charlas e mesas redondas

Taller de etiquetaxe de produtos ecolóxicos e Taller de consultas, novo regulamento europeo foron dos obradoiros, dirixidos por Manuel María Cancio, director técnico do Craega, e Ana Saiz, directora de Intereco. No segundo obradoiro participou tamén o cociñeiro Alf Mota.

Como aumentar o consumo de produtos ecolóxicos? A introdución dos produtos ecolóxicos nas compras públicas verdes

Nesta mesa redonda participaron Ramón J. Lamelo, responsable do Departamento de Promoción e Calidade Agroalimentaria de Agacal; Belén Rodríguez, coordinadora da Asociación Labregos Ecolóxicos de Galicia; Beatriz Ferreira, directora da Escola Infantil Municipal A Caracola e coordinadora do proxecto Ecocomedores, conxuntamente co GDR de Mariñas Betanzos; Iria Suárez, técnica Asoc. Desenvolvemento Rural Mariñas Betanzos, responsable do proxecto de Ecocomedores da Reserva de Biosfera de Mariñas Coruñesas e Terras do Mandeo. Moderou a mesa Diego Roig (Vida Sana).

Na súa intervención, Lamelo presentou as campañas orientadas a aumentar a presenza da alimentación ecolóxica en diversos espazos, como Come Local, destinada aos máis cativos, ou nas residencias de maiores; así mesmo, fixo referencia á nova Lei de calidade alimentaria e presentou o proxecto de invernadoiros para produción eco nos colexios rurais agrupados.

Mulleres ecoemprendedoras

A produción ecolóxica e a importancia da actividade das mulleres no medio rural galego como motor para evitar a despoboación foron os eixes principais desta mesa redonda, na que participaron Concepción Blanco, vogal do Craega (copropietaria de Casa Bértolo SC), María José Tallón (Trasdeza Natur), Lucía Afonso (Sovoral), Carmen Sánchez (Galuriña), María Isabel González (Traloagro) e Concepción Docampo (explotación agrícola), as cales expuxeron cadanseu proxecto rural e contrastaron as súas experiencias como empresarias no sector.

DESPEDIDA ATA A SEGUINTE EDICIÓN

O Craega dille adeus a esta feira ata a vindeira edición, prevista para marzo de 2023, e despídese orgulloso e satisfeito de formar parte deste evento, cuxo obxectivo primordial é o de darlles apoio e difusión aos seus operadores.

BioCultura A Coruña quenta motores

Asistencia á BioCultura de Madrid

Xa queda menos para o grande evento ecolóxico na nosa comunidade. Será do 4 ao 6 de marzo, na ExpoCoruña cando teña lugar a celebración de BioCultura, a feira de produtos ecolóxicos, consumo responsable e turismo sustentable. Co obxectivo de potenciar outro sector, ademais do ecolóxico, nesta edición galega o ecoturismo será o gran protagonista.

ACTIVIDADES

Nas actividades principais da feira porase o acento nesta dobre temática e centraranse na simbiose entre o mundo ecolóxico e o ecoturismo. Nese sentido, os showcooking servirán para achegar propostas de gastronomía ecolóxica vinculadas ao territorio e á oferta turística e, ademais, levarán a cabo catas de produtos de zonas para visitar en Galicia. Tamén contarán con charlas relacionadas con diferentes aspectos do coidado do medio ambiente e a sustentabilidade.

Haberá seccións dedicadas ao sector ecolóxico e os seus mundos, degustacións de produtos da zona, así como receitas tradicionais e tamén se presentarán actuacións de grupos emerxentes de folk, conferencias sobre ámbitos patrimoniais e territoriais e debates sobre agricultura e gandería ecolóxica, extensiva e local, vinculadas á tradición cultural de cada zona. Así mesmo, contarán cunha ampla gama de expositores, desde casas rurais con certificado, ata produtores de alimentos como algas ou xeados, entre outros. En definitiva, terá de todo, pero sempre relacionado co mundo eco.

PRESENZA DO CRAEGA

O Craega contará con stand propio dentro da cita, onde dará a coñecer o traballo que realiza diariamente para poder certificar e avalar os diferentes produtos de Galicia que se producen en ecolóxico. Ademais, acollerá a unha vintena de empresas certificadas.

PROGRAMA COMPLETO

O Craega asistirá a BioCultura da Coruña o vindeiro mes de marzo

Craega participa habitualmente neste grande encontro de produción ecolóxica

BioCultura da Coruña celebrarase do 4 ao 6 de marzo na ExpoCoruña. No evento estarán presentes unha vintena de empresas que contan coa certificación do Craega. A cita estará marcada polas condicións sanitarias derivadas da pandemia.

Trátase da primeira feira de ecoturismo dentro de BioCultura, que xa ten un percorrido de éxito. Por iso, as administracións galegas reaccionaron de forma positiva e a feira conta co apoio da Xunta de Galicia, o Craega, a Deputación da Coruña, o Concello, Turismo Coruña e o Clúster de Turismo de Galicia, entre outros que seguro que se sumarán. Esta é unha oportunidade para Galicia que aposta por un turismo de calidade.

A directora, Ángeles Parra, afirma que esta nova edición ampliará a gama de posibilidades que lle ofrece ao público e será unha aposta polo ecoturismo. A cita cambia algunhas das súas dinámicas e, segundo Parra, o obxectivo é chegar á mesma xente de toda a vida, pero tamén sumar novos públicos. “O visitante poderá atopar o ámbito “biocultureiro” de sempre máis unha notable aposta polo sector do ecoturismo, no que Galicia é clave”.

En canto ás actividades, haberá seccións dedicadas ao sector “eco” e os seus mundos e toda unha serie de propostas centradas principalmente no ecoturismo. Haberá degustacións de produtos da zona, así como de receitas tradicionais e tamén se presentarán actuacións de grupos emerxentes de folk, conferencias sobre ámbitos patrimoniais e territoriais e debates sobre agricultura e gandería ecolóxica, extensiva e local vinculadas á tradición cultural de cada zona.

En canto á gama que ofrecerán, Parra afirma que é unha “paleta de posibilidades moi ampla. Imos ter expositores que serán casas rurais con certificado e hoteis urbanos nos que se cumpren todos os requisitos ambientais, ademais de ofrecer produtos ecolóxicos na súa carta…”. En definitiva, a directora afirma que haberá de todo, pero sempre en ecolóxico.

Información de VidaSana