Todolos artigos de: CRAEGA

Axudas á nova participación de agricultores en réximes de calidade

Os agricultores que se adican á produción vexetal poden beneficiarse deste paquete de axudas

O venres 15 de febreiro de 2019 foi publicado no DOG (núm. 33 – Axencia Galega da Calidade Alimentaria) a resolución do 28 de xaneiro de 2019 pola que se establecen as bases reguladoras das axudas á nova participación de agricultores en réximes de calidade, cofinanciados co Fondo Europeo Agrícola de Desenvolvemento Rural (Feader) no marco do Programa de desenvolvemento rural (PDR) de Galicia 2014-2020, e convócanse para o ano 2019 (código de procedemento MR362/A). A orde pódese consultar neste enlace

Esta resolución ten por obxecto establecer as bases reguladoras das axudas á nova participación de agricultores en réximes de calidade no marco do Programa de desenvolvemento rural de Galicia 2014-2020, así como proceder a súa convocatoria, en réxime de concorrencia competitiva, para o ano 2019. Segundo especifica a orde, a alta no réxime de calidade ten que ser posterior ao 18 de novembro de 2015.

Artigo 4. Gastos subvencionables e contía das axudas:
1.- Serán subvencionables os custos fixos ocasionados pola inscrición nun réxime de calidade e a cota anual de participación no dito réxime, incluídos de ser o caso, os custos dos controis necesarios para comprobar o cumprimento do prego de condicións do réxime.

2.- A contía das axudas será do 100% dos gastos subvencionables realizados, sen superar os 3.000 € anuais por explotación, durante un período máximo de cinco anos.

3.- Non se tramitaran expedientes cuxa contía non supere os 50 €.

O prazo para a presentación das solicitudes comenzará o 16 de febreiro e rematará o 15 de maio de 2019Para a convocatoria de 2019, serán atendibles os gastos imputados á campaña que comprende o período que vai do 1 de maio 2018 ata o 30 de abril de 2019.

Xornada en Lugo para mellorar a produción do leite ecolóxico

Mellora da produción do leite ecolóxico en Galicia é o título da xornada gratuíta que terá lugar o venres 22 de febreiro en Lugo. Dirixida a gandeiros de vacún do Craega (ou en proceso de certificación), a actividade está organizada por Agronovo en colaboración co Consello. Na sesión abordaranse cuestións como os aspectos a ter en conta para garantir o benestar animal, así como os novos requisitos normativos. Neste sentido, haberá intervencións vencelladas á PAC e ás esixencias que entrarán en vigor o 1 de xaneiro de 2021. Tamén se falará sobre as vantaxes que o asociacionismo ten para os produtores de leite ecolóxico.

O programa arranca ás 10.30 h. no recinto feiral de Lugo coa acreditación dos participantes. O primeiro relatorio (11.15 h.) correrá a cargo de Isabel Blanco Penedo, da Swedish University of Agricultural Sciences (Suecia). Virá despois (12 h.) a quenda de Manuel Cancio Álvarez, director técnico do Craega. Disertará sobre a situación actual e os próximos cambios normativos do leite. O último relatorio (13 h.) será o de Xisela Fernández e Javier Villanueva, técnicos de Agronovo. Leva o título de Vantaxes dunha agrupación de produtores de leite ecolóxico.

O Craega mantén en 2018 a liña ascendente e, segundo os datos provisionais, pechará o exercicio cunha facturación superior aos 80 millóns de euros. A subida apóiase no incremento da superficie certificada (15%) e dos operadores (13%). A maior parte dos novos inscritos localízase na provincia de Lugo.

A inscrición é gratuíta. Basta con enviar un e-mail a info@agronovo.es ou ben chamar aos teléfonos 982246762 ou 678645549. Para descargar o programa completo, premer aquí.

Cocido reinventado e viños ecolóxicos do Craega en Xantar 2019

Craega - Xantar 2019
Diego Diéguez (Cume do Avia), esquerda, Natalia Rodríguez (Adegas Corisca), Javier García Lozano, secretario do Craega, e o chef Martín Mantilla

O Craega vén de poñer sabor ecolóxico a Xantar 2019. Os asistentes á cata de viño organizada o mércores 6 de febreiro na Aula Medio Rural tiveron a oportunidade de degustar un albariño eco da D.O. Rías Baixas mentres escoitaban as explicacións de Natalia Rodríguez, xerente de Adegas Corisca. Os participantes tamén puideron probar outra variedade certificada polo Consello, neste caso da D.O. Ribeiro. De contar os seus matices ocupouse Diego Diéguez, que está á fronte de Cume do Avia.

Para acompañar os caldos, o chef monfortino Martín Mantilla presentou na cidade das Burgas un cocido reinventado tanto no seu formato como nos ingredientes empregados. Elaborado a base de produtos ecolóxicos, de primeiro serviu un milfollas de lacón de porco celta con crema de queixo e pemento. Con cachucha, chourizo e garabanzos montou bombas de verdura sobre unha cama de puré de pataca. Para rematar, engadiu unha salsa con aceite de oliva e pemento. Tamén típico destas datas, o postre era unha filloa rechea de crema pasteleira.

Durante o transcurso do acto, Javier García Lozano, secretario do Craega, lembrou que o sector ecolóxico galego goza dunha excelente saúde. O Consello pechará o exercicio 2018 cunha facturación récord por riba dos 80 millóns de euros. Cuns ingresos de entre 20 e 25 millóns de euros, o lácteo é o subsector con máis peso. Certo é –recalcou- que o porco certificado, protagonista dos pratos de Entroido, é un produto novidoso que está a incrementar as vendas de forma importante nos últimos tempos.

A feira internacional de turismo gastronómico Xantar celebra este ano a súa vixésima edición. Permanecerá aberta ata o domingo 10 de febreiro. De periodicidade anual, conta coa cooperación de diferentes administración públicas e empresas privadas. O seu obxectivo é poñer en valor os produtos agroalimentarios a través de representantes do sector e chefs de renome.

O Craega leva o viño ecolóxico a Xantar 2019

Martín Montilla Rodríguez
O chef monfortino Martín Montilla Rodríguez

O Craega estará de novo en Xantar 2019, a feira internacional de turismo gastronómico que se celebra en Expourense do 6 ao 10 de febreiro. O viño será desta vez o protagonista da sesión dirixida por Javier García Lozano, secretario do Consello. Prevista para o mércores 6 (12.15 h., Aula Medio Rural), de impartir a degustación ocuparase o chef monfortino Martín Mantilla. Haberá caldos ecolóxicos da D.O. Rías Baixas (Acio de ouro nas Catas de Galicia 2018) e da D.O. Ribeiro. 

No programa da xornada de apertura, tamén se inclúen outras actividades promovidas pola Consellería de Medio Rural. Sonia Otero, membro do panel de cata das Augardentes de Galicia, conducirá unha degustación (12 h., Aula de Cata) do produto premiado nas Catas de Galicia 2018.

A quenda do mel chega pola tarde. Manuel Garea, membro do panel de cata dos Meles de Galicia, explicará as características do mel recoñecido na Cata de Galicia 2018 (19 h., Aula de Cata). Para pechar a sesión, haberá outra degustación dos viños tintos galardoados cos Acios de ouro en 2018. Impartida pola Estación de Viticultura e Enoloxía de Galicia (Evega) terá lugar na Aula de Cata (20 h.).

Baixo o paraugas de Medio Rural, haberá outras actividades espalladas en diferentes días de Xantar 2019. Queixos, meles, viños, augardentes e licores serán os ingredientes estrela de varias degustacións ata o sábado 9.

A feira Xantar celebra este ano a súa vixésima edición. De periodicidade anual, conta coa cooperación de diferentes administracións públicas e empresas privadas. O seu obxectivo é poñer en valor os produtos agroalimentarios a través de representantes do sector e de chefs de renome.

Conta atrás para despegar cara Biofach 2019

O stand do Craega na anterior edición de Biofach (Foto: Craega)

O Craega ata os últimos flocos para emprender rumbo a Núremberg (Alemaña). O 13 de febreiro levanta o pano Biofach 2019, a maior feira de produción ecolóxica do mundo. Trece operadores de diferentes sectores preparan a súa participación na que de seguro será unha cita clave para o seu afianzamento no mercado exterior.

Cara ao país xermano partirán dentro duns días Connorsa, Conservas Orbe, El Nogal, Jamones González, Galletas Daveiga, Mieles Anta, Pazo de LusíoOrballo Innov. Forestales, Porto-Muíños, Producto de Aldea, Green MixologyThe Bio Factory (A Factoría Ecolóxica) e Coraçai. Estarán alí catro xornadas. Esta acción lévase a cabo co apoio da Xunta e da UE. Pola súa banda, o Igape subvenciona as viaxes e o aloxamento de parte dos expositores.

Biofach botou a andar en 1990 coa aspiración de converterse nun referente para os profesionais do sector. Na última edición sumou 2.500 expositores e 44.000 visitantes de 129 países. Para as trece empresas galegas representa unha ocasión excepcional á hora de tecer redes internacionais.

Subvencións para contratar seguros agrarios

Viñedos na Ribeira Sacra

O xoves 24 de xaneiro de 2019 foi publicado no DOG (núm.17 – Consellería do Medio Rural) a orde do 26 de decembro de 2018 pola que se establecen as bases reguladoras das axudas para o fomento da contratación dos seguros agrarios na comunidade autónoma de Galicia. Convócanse para o ano 2019. A orde completa pode consultarse neste enlace.

As liñas de actuación están orientadas á consecuención dos obxectivos seguintes:

  • Avanzar no desenvolvemento do sistema de seguros agrarios para proporcionar aos produtores agrarios unha ferramenta de xestión de riscos a un custo asequible.
  • Establecer os criterios de asignación de subvencións, optimizando os recursos e facilitando a súa aplicación, xestión e control.
  • Fomentar o deseño de liñas de seguro renovables para mellorar a implantación do seguro e a súa universalización.

Esta orde entrou en vigor ao día seguinte da súa publicación no Diario Oficial de Galicia.

O novo logo, Hifas da Terra e os ecocomedores de Betanzos, na revista de inverno do Craega

Os produtos ecolóxicos elaborados e certificados en Galicia aparecen agora identificados nos puntos de venda coa marca Craega. É unha das novidades do regulamento do Consello, que entrou en vigor a finais de 2018. Aos consumidores non lles custará moito recoñecelo porque o deseño (símbolos, formas, cores e tipografía) é case igual. O único que varía é o vocábulo situado no extremo inferior: en lugar de ‘Galicia’ pon ‘Craega’. A revista nº 48 do Craega profunda neste asunto e debulla punto por punto os cambios que implica a recente normativa.

A concesión do XIX Premio Aresa ao Consello é outro dos temas centrais da última edición. Está convocado pola empresa do mesmo nome e a Universidade de Santiago. O galardón recoñece a traxectoria dunha entidade que convertiu un modo de produción en motor de desenvolvemento rural.

A entrevista a Catalina Fernández de Ana, fundadora e directora xeral de Hifas da Terra, e a reportaxe sobre os ecocomedores da asociación Mariñas-Betanzos son outros dos asuntos estrela da publicación.

Axudas para explotacións bovinas, ovinas e cabrúas

As axudas están dirixidas a explotacións de gando bovino, ovino e cabrún

O mércores 23 de xaneiro foi publicado no DOG (núm. 16 – Consellería do Medio Rural) a orde do 21 de decembro de 2018 pola que se establecen as bases reguladoras para a concesión de axudas de compensacións complementarias e axudas para a reposición dos animais en explotacións de gando bovino, ovino e cabrún, como consecuencia do sacrificio obrigatorio de gando en execución de programas oficiais de erradicación de enfermidades. Convócanse para o ano 2019. A orde íntegra pódese consultar neste enlace.

O obxecto desta orde é establecer as bases reguladoras e convocar para o ano 2019: “1. As axudas de compensación complementarias por lucro cesante nos casos de inactividade nas explotacións de gando bovino e de gando ovino e cabrún rexistradas en Galicia, con motivo da vixilancia, loita, control ou erradicación de enfermidades destas especies, levados a cabo no marco de programas ou actuacións sanitarias oficiais”.

O prazo para a presentación das solicitudes e, se é o caso, da correspondente documentación complementaria, será desde o día seguinte a data de publicación desta orde no Diario Oficial de Galicia ata o día 29 de novembro de 2019, incluídas ambas datas no cómputo do prazo.

O Craega sortea 25 xogos de acuicultura ecolóxica

De eco a eco e tiro porque é un alimento completo. De Craega a Craega e que certifica a produción ecolóxica galega. O xogo da acuicultura ecolóxica do Consello é un xeito ameno de achegar aos máis pequenos conceptos como a reciclaxe, a reconversión, a marea vermella ou o logo europeo de produción ecolóxica. Os recadros do taboleiro son moi semellantes aos da oca tradicional. A única salvedade é que os motivos están inspirados no mar.

Pensado para dous ou máis xogadores, inclúe taboleiro, un dado e unha ficha para cada participante. A dinámica é moi sinxela. Comeza a xogar o que obteña a maior puntuación co dado. O obxectivo é chegar á posición central dos logos de produción ecolóxica certificada.

O Consello sortea 25 xogos a través das redes sociais. Para participar na promoción  que leva o nome de #PropósitoEcolóxico2019, só hai que dar clic en ‘Me gusta’ na publicación e respostar a unha pregunta moi sinxela incluíndo este hashtag. Os que desexen probar sorte só teñen que entrar nos perfís oficiais de Facebook e Instagram do Craega e seguir os pasos indicados. O prazo pecharase o 15 de febreiro. Consultar as bases aquí.

O Craega, gañador do premio Aresa 2018

De esquerda a dereita, Montserrat Valcárcel, Álvaro Rodríguez, Antonio López, José Manuel Silva e Carlota López, tralo fallo do XIX Premio Aresa

O Consello Regulador de Agricultura Ecolóxica de Galicia (Craega) é o gañador do premio Aresa 2018, convocado pola empresa lucense do mesmo nome en colaboración coa Universidade de Santiago (USC). O xurado recoñece así a traxectoria dunha entidade que convertiu un modo de produción agraria e gandeira nun motor de desenvolvemento rural, tanto na comunidade como no conxunto de Europa.

Na elección da candidatura tíveronse en conta a súa capacidade para xerar postos de traballo de calidade no rural e a posta en valor de produtos da terra. Neste sentido, especial relevancia se lle deu ao papel do Craega na recuperación de subsectores agrícolas e gandeiros tradicionais con potencial para innovar.

O xurado do XIX Premio Aresa estivo integrado polo reitor da USC, Antonio López Díaz; a vicerreitora de Coordinación do Campus de Lugo, Montserrat Valcárcel Armesto; o exdirector xeral de Agricultura da Comisión Europea, José Manuel Silva Rodríguez; o director xeral de Capsa Food, José Armando Tellado Nogueira; e o presidente de Aresa, Álvaro Rodríguez Eiras.

Con recoñecido prestixio no sector, en anteriores edicións resultaron galardoados o profesor da USC Javier Guitián, a Aula de Produtos Lácteos ou a Facultade de Veterinaria (Campus de Lugo). Tamén recibiron o premio IXP Ternera Gallega, o programa de TVG O Agro-Labranza ou a D.O. Ribeira Sacra, entre outros.

O 8 de marzo celebrarase unha gala na Facultade de Veterinaria (Campus de Lugo) na que se lle fará entrega do premio -10.000 euros- ao Craega.