Todolos artigos de: CRAEGA

Convocada a IV edición dos premios “EcoeLabora-SEAE”

A Sociedad Española de Agricultura Ecológica/Agroecología (SEAE)  publicou as bases da IV edición dos premio EcoeLabora á xeración e xestión do coñecemento e a innovación en agroecoloxía e produción ecolóxica.

Con estes premios, quérese recoñecer a aquelas persoas ou entidades ( elaboradores, agricultores, comercializadores, promotores do consumo, técnicos asesores, investigadores, e autoridades competentes ou de control) que contribúen a desenvolver este modelo Agroecológico e de xestión dos agrosistemas que reúne a produción de alimentos de calidade e a conservación de recursos naturais, considerando a agricultura e a gandería ecolóxica como motor esencial para enfrontar os retos que ten expostos o sector tales como: a conservación e mellora da biodiversidade, a mitigación/adaptación do cambio climático, a soberanía alimentaria, a escaseza de auga e o desenvolvemento rural sustentable e a paisaxe.

A entrega de premios realizarase o 15 de novembro, durante o XIII Congreso de Agricultura Ecológica de SEAE.

Para máis información podes consultar a convocatoria na web da SEAE Convocatoria premios Ecoelabora 2018

 

Os alimentos ecolóxicos, percibidos como máis seguros e de mellor calidade que os convencionais

Tan só o 14% dos consumidores españois recoñece o logo de agricultura ecolóxica. Este e outros datos e opinións da cidadanía europea e española ao redor da agricultura, e á agricultura ecolóxica, foron recollidas pola Comisión Europea no Eurobarómetro especial “Europeos, Agricultura e PAC”. En Europa, o coñecemento do logo sitúase no 27%, e creceu en 5 puntos desde 2015, data do anterior Eurobarómetro, mentres que en España só o fixo nun punto.

A gran maioría das persoas enquisadas coincide en considerar os alimentos ecolóxicos máis caros que os convencionais, algo que opina o 90% dos europeos e o 91% dos españois. Tamén está moi xeneralizada a opinión de que son máis seguros, apoiada polo 70% dos europeos e o 75% dos españois, e de mellor calidade, segundo un 72% dos europeos e un 77% dos españois enquisados. En canto ao seu proceso de produción, o 79% dos europeos e o 76% dos españois afirma que están obtidos facendo un uso moi restrinxido de pesticidas, antibióticos ou fertilizantes. Ademais, percíbese que na súa produción utilizáronse mellores prácticas ambientais (78% dos europeos e 75% dos españois), e cuns maiores niveis de respecto polo benestar animal (76% de europeos e 73% de españois).

A sensación de ter ou non un fácil acceso aos produtos ecolóxicos varía de forma importante entre os distintos países europeos. Así, un 68% dos españois enquisados afirma que son difíciles de atopar nos supermercados, tendas e mercados da zona na que vive, unha porcentaxe só superada por Romanía, onde un 70% dos enquisados percibe esa dificultade. Fronte a eses datos, en Dinamarca tan só o 13% considera difícil atopar alimentos ecolóxicos nos seus puntos de venda próximos, mentres que en Francia e Holanda a cifra sitúase no 18%.

O eurobarómetro preguntou tamén ás persoas enquisadas sobre a responsabilidade social dos agricultores. Prover alimentos seguros, saudables e de alta calidade é a súa principal responsabilidade para un 55% dos europeos e un 50% dos españois. Asegurar o benestar dos animais é máis importante para os europeos que para os españois: un 28% de europeos sitúaa entre as principais responsabilidades dos agricultores, fronte a un 18% de españois, que dan maior importancia ao labor dos agricultores para protexer o medio ambiente e combater o cambio climático (31% dos españois fronte a 25% dos europeos) e á súa contribución para crear emprego e crecemento nas zonas rurais (32% da españois fronte ao 18% dos europeos).

Outro dos aspectos abordados polo Eurobarómetro son as opinións da cidadanía sobre as prioridades de investigación e innovación no sector agroalimentario. Para un 26% dos europeos e un 21% dos españois, unha das prioridades é apoiar enfoques ecolóxicos en agricultura.

Máis da metade dos españois compra alimentos ecolóxicos.

O mercado de produtos ecolóxicos continúa crecendo en España a bo ritmo, segundo o informe de IRI sobre consumo ecolóxico en 2017, que apunta a un crecemento das vendas superior ao 20% tanto en volume (22%) como en valor (24%). A pesar diso, o informe matiza que o mercado segue sendo pequeno, e sitúa o seu volume de vendas en 230 millóns de euros.

Segundo os datos recolleitos neste traballo, o 52% dos españois compra produtos ecolóxicos, unha cifra moi próxima á europea, onde a porcentaxe é do 53%. Con respecto aos anos anteriores, os compradores españois han aumentado o consumo de produtos ecolóxicos en menor medida que os europeos (23% fronte a un 34%), pero presentan un maior crecemento da intención de compra de produtos ecolóxicos para os próximos meses (29% fronte ao 21% do conxunto de Europa).

Hipermercados e supermercados representan a principal canle de compra, e a eles acoden o 72% dos consumidores. Séguenlles as tendas ecolóxicas (30%), tendas ecolóxicas na internet (9%), farmacias (5%), mercadillos (5%), granxas (5%) e outro tipo de tendas (4%).

Por familias de produtos, o informe (que non inclúe o dato relativo a froitas e verduras) sinala que o 43% das vendas totais de produtos ecolóxicos corresponde a ovos; o 26% a lácteos, derivados e queixos; o 14% a alimentación seca; o 14% a bebidas ecolóxicas, e o 3% a conservas ecolóxicas.

Fonte: La Fertilidad de la Tierra

XORNADAS FORMATIVAS ORIENTADAS Á PRODUCIÓN ECOLÓXICA

O vindeiro mes de setembro impartiranse as xornadas de “Mellora das superficies extensivas para a produción ecolóxica mediante o uso da metodoloxía de liña clave e técnicas de permacultura”

Horario: 25-26 setembro, 09:30 a 19:00

Lugar: Centro de Formación e Experimentación Agroforestal de Monforte de Lemos.

Descargar a folla de inscrición

Aprender as ferramentas de rexeneración do solo permite comprender a importancia do deseño para a captación, almacenamento e xestión óptima das augas pluviais, manexo do gando e vixilancia das parcelas para asegurar a súa viabilidade e a produtividade destas terras, e así lograr unha base de soporte humano que vaia máis aló da sustentabilidade. Sendo a auga o elemento máis importante dentro de todo proxecto agronómico e de calquera desenvolvemento humano, o estudo detallado da xestión hidrolóxica dun terreo é indispensable para desenvolver unha agricultura ou gandería permanente a longo prazo.

No curso explicaranse as condicións indispensables para rexenerar o solo,“ler” a topografía natural da paisaxe e utilizar a súa forma e contorno para determinar o deseño e posición de represas, gabias de infiltración, desaugadoiros, áreas de irrigación, camiños, valos, cortellos, currais, casas e liñas de árbores. Analizarase a utilidade das curvas de nivel e as curvas a desnivel e aprenderase a marcalas no terreo a través dunha práctica de campo.

Durante o curso realizaranse prácticas de campo co uso de instrumentos de precisión topográfica como o nivel láser (para o deseño de propiedades a gran escala), así como o uso de instrumentos tan sinxelos como o nivel de mangueira (para propiedades a pequena escala).

Ademais, demostrarase o uso do apeiro Yeomans (se fose posible), co que se poderán ilustrar os patróns “Keyline” de cultivo, así como os beneficios deste tipo de apeiro, co cal é posible cultivar a terra sen volteala, descompactala, eliminar malas herbas, inxectar microorganismos directamente á terra, sementar e aplicar compost, todo cunha soa pasada do tractor.

O apeiro Yeomans ara a terra en profundidade rompendo a compactación, pero sen voltear a terra na superficie: esta é a clave para restaurar solos degradados e incrementar a profundidade do solo fértil, que é capaz de fixar grandes cantidades de carbono estable.

Os participantes neste curso adquirirán unha visión ampliada do que significa a agricultura rexenerativa, isto é, a produción de alimentos sans para todos; de forma que se incremente a soberanía alimentaria e a rendibilidade para os produtores. Tamén adquirirán as ferramentas para analizar a topografía dun espazo, definir puntos e liñas clave, así como deseñar espazos fermosos que poidan reter auga, construír un solo fértil, capturar carbono, reducir gastos e multiplicar producións.

O patrón de plantación marcará a diferenza entre un espazo que perde solo fértil coa escorrentía cada vez que chove e outro que aproveita cada pinga para aumentar a súa fertilidade e polo tanto a súa produtividade.

Curso dirixido a agricultores, gandeiros, silvicultores, técnicos agrícolas e, en xeral, a xestores de terreos públicos ou privados, asesores e técnicos da Administración.

O curso será impartido por Jesús Ruíz, experto en deseño de parcelas con liña clave con manexo hidrolóxico, ademais de ser topógrafo e formador en agroecoloxía.

Programa

Martes e mércores, 25 e 26 de setembro 2018

Horario: 9.30 h – 19.00

Sesión 1. Introdución. O solo como organismo vivo. O problema da erosión e o estrés hídrico.

Sesión 2. Introdución á topografía.

Sesión 3. Prácticas de campo. Introdución aos tipos de niveis: nivel de man, bunyipou mangueira, láser.

Trazado de curvas a nivel con nivel de mangueira. Trazado con nivel láser. Equidistancias entre curvas de nivel.

Como crear un mapa cun GPS de man ou Smartphone e un nivel láser ou de mangueira.

Sesión 4. Práctica de campo. Introdución á liña clave, curvas a desnivel.

Sesión 5. Introdución ao Keyline, a escala de permanencia.

Sesión 6. Maquinaria para a rexeneración de solos. Exemplos de deseños en España e Portugal

Sesión 7. Práctica de deseño, estudo de planos topográficos. Práctica de deseño, decodificación de terreos e determinación de liñas clave. Deseño de terreos, asignación de áreas de captación con madeirables, infiltración con froiteiras, rega con cultivos anuais e aproveitamento con autóctonas. Deseño de viñedos e outras leñosas.

Sesión 8. Entrega de deseños, preguntas e respostas.

Inscricións no teléfono 982 40 53 00, no fax 982 41 60 30 ou no correo electrónico craega@craega.es antes do día 21/09/2018, debendo xuntar o formulario que se achega. No caso de inscrición telefónica, debe presentar o formulario orixinal asinado o día da xornada.

Presentación oficial das feiras Ágora Verde en Lugo

Onte celebrouse o acto de presentación oficial das feiras Ágora Verde na deputación de Lugo.

O Craega deu a coñecer os datos económicos da provincia e confirmou as vindeiras feiras deste Verán ( Monforte de Lemos, Viveiro e Lugo).

Na mesa estiveron presentes o presidente do Consello, Francisco López Valladares; o seu secretario, Javier García; o vicepresidente da Deputación, Argelio Fernández; a alcaldesa, Lara Méndez López; o alcalde de Monforte, José Tomé, e o concelleiro viveirense Jesús Fernández.

 

Voltan as feiras ecolóxicas Ágora Verde

As feiras ecolóxicas de Galicia Ágora Verde xa teñen data este verán. A iniciativa que chega á súa terceira edición, busca informar, concienciar e achegar á poboación o produto ecolóxico, dando a coñecer os seus beneficios para o medio ambiente e para as persoas. Ademais, fomenta a comercialización directa, achegando os produtores e elaboradores bio de toda Galicia ao consumidor.

Ao longo das feiras poderanse degustar unha gran variedade de produtos certificados como marmeladas, froitas, hortalizas, plantas aromáticas, carne, viños e licores, conservas de peixe, mel, lácteos, entre outras cousas.

Tamén haberá talleres infantís e degustacións de produto para todas as idades.

A programación de feiras é a seguinte:

Feria ecológica Ágora Verde

 

XXX Catas de Viños e Augardentes de Galicia 2018, inaugurase a categoría de viños ecolóxicos

Onte celebrouse no parador de Santo Estevo de Ribas do Sil, Ourense,  a gala de premios da XXX Cata Dos Viños e Augardentes de Galicia 2018.

No certame participaron máis de 350 marcas amparadas baixo as denominacións de orixe galegas, e repartidas en 16 categorías.

Este ano inaugurouse unha categoría especial para premiar os viños ecolóxicos amparados por este consello, unha importante iniciativa que engade valor e recoñecemento a esta clase de viños e á magnífica labor dos seus produtores.

Desde o Craega felicitamos a Bodegas Corisca por conseguir o 1º posto e Acio de Ouro na categoría, e animamos ás adegas certificadas a participar en futuras edicións.

Lembramos que o 2017 cerrouse cunha superficie de viñedos certificados de 88 hectáreas, tendo adegas inscritas en tódalas denominacións de orixe de Galicia.

As explotacións ecolóxicas terán preferencia á hora de recibir axudas de Medio Rural para mellora e asesoramento

As explotacións de produción ecolóxica, polas súas especiais características e o seu compromiso ambiental e sustentable, sairán moi beneficiadas na aplicación de criterios de prioridade para acceder a diferentes axudas da Consellería do Medio Rural.

Así llo explicou a directora xeral de Gandaría, Agricultura e Industrias Agroalimentarias, Belén do Campo, aos responsables do Consello Regulador de Agricultura Ecolóxica de Galicia (Craega) nunha recente xuntanza de traballo. Indicoulles que na convocatoria de achegas para o apoio aos investimentos nas explotacións agrícolas especializadas en horticultura terase en conta a condición de ecolóxico como criterio preferente.

Os responsables do Craega interesáronse ademais pola orde de recente publicación relativa ás axudas para a prestación de servizos de asesoramento aos titulares das granxas. Neste sentido, a directora xeral sinalou que neste caso tamén van ter un peso importante este tipo de explotacións ecolóxicas, polas súas especiais características, e serán beneficiarias do asesoramento dentro das materias de asesoramento integral, ao ser un tipo de agricultura sustentable.

Belén do Campo engadiu que as explotacións que están en agricultura ecolóxica en moitos casos se atopan en zonas con limitacións naturais, polo que son prioritarias. Ademais, moitas están rexidas por agricultores que se incorporan á actividade agraria, e en numerosos casos por mulleres. Con estas condicións comúns á maioría delas, as entidades que as asesoren acadaran con seguridade a correspondente axuda.

Nesta xuntanza de traballo avanzouse ademais na aplicación e seguimento dos obxectivos marcados no Plan Estratéxico da produción ecolóxica que impulsa a Xunta en colaboración co sector. Esta iniciativa contempla un orzamento de 50 millóns de euros para impulsar todo o relacionado con estas producións.

Fonte: www.xunta.gal

Video-resumo sobre a certificación e o traballo dos produtores e empresas certificadas polo Craega

Agora que estamos a piques de pechar o curso, no Craega botamos a vista atrás e facemos un balance máis que positivo de este ano académico: medramos en volume, en clientes, en facturación… e así seguiremos! Para celebralo, compartimos con vós este vídeo no que vos amosamos o gran traballo que fan os produtores,empresas certificadas e o traballo que se realiza desde o Consello.

A PRODUCIÓN #ECO CERTIFICADA EN GALICIA |CRAEGA

#EnVídeo? | Agora que estamos a piques de pechar o curso, no #Craega botamos a vista atrás e facemos un balance máis que positivo de este ano académico: medramos en volume, en clientes, en facturación… e así seguiremos! Para celebralo, compartimos con vós este vídeo no que vos amosamos o gran traballo que fan os nosos operadores. Que vos guste!

Publiée par Craega – Consello Regulador da Agricultura Ecolóxica de Galicia sur mercredi 20 juin 2018

 

Xornada de produción, comercialización e distribución de produtos hortofrutícolas

Onte celebrouse unha xornada de produción, comercialización, e distribución de produtos hortofrutícolas na sede do Craega, en Monforte de Lemos.

O presidente do Craega, Francisco López Valladares, inaugurou unha xornada na que empresas de distribución, cooperativas agrarias, a Asociación Galega de Cooperativas Agrarias (AGACA) e a Administración, compartiron as súas experiencias e abordaron temas como: a situación da distribución dos produtos hortofrutícolas en Galicia, posibles formas de impulsar o sector, a asociación ou agrupación para a comercialización, e o balance das accións promocionais e apoios dispoñibles por parte da administración, entre outras cousas.

Os produtores asistentes tiveron a ocasión de compartir as súas impresións, ampliar coñecemento e abrir novas vías de comercialización. Unha xornada cualificada como moi proveitosa segundo o público asistente.