Todolos artigos de: CRAEGA

Avelina Calvo (O Cortizo): “O mel moi barato non pode ser puro”

Avelina Calvo Munín, de O Cortizo, recolle o galardón da XVII Cata dos Meles de mans do conselleiro de Medio Rural, José González Vázquez.

Ten intención de probalo, pero aínda non caeu nas súas mans. Con varios premios ás súas costas, a apicultora lalinense Avelina Calvo Munín non é quen de falar do mel chinés con coñecemento de causa. “Cando din por aí que hai un produto moi barato no mercado, o asunto non soa ben. O que está claro é que non pode ser tan puro como o de aquí”, advirte.

A súa empresa, Mel O Cortizo, sumaba días atrás un novo galardón na cata que organiza a Consellería de Medio Rural e que xa acadou a décimo sétima edición. Con selo ecolóxico do Craega, mereceu a máxima distinción -ouro- na categoría multifloral. “Desta vez ten bastante breixo e un ton máis escuro do habitual. O sabor é moi intenso”, explica Calvo Munín. “É un produto natural e iso nótase. Vén dos montes de Zobra, entre O Candán e O Testeiro”, engade.

Esa singularidade que se percibe no padal foi precisamente a que inclinou a balanza ao seu favor. De carácter familiar, O Cortizo posúe 200 colmeas das que se recollen arredor de mil quilos de mel. “O tempo inflúe moito. Este ano comezou moi ben. Houbo condicións favorables para a floración, pero despois veu moita choiva e xa se estragou a colleita”, sinala.

O Cortizo tampouco se libra da vespa velutina. “Coñecina non hai moito e agora estamos á espera de que nos veñan retirar dous niños. É unha mágoa ver como atacan as colmeas”, lamenta.

Este mel ecolóxico de premio pode atoparse en puntos como a Praza de Abastos de Santiago e tendas especializadas. Para potenciar aínda máis o seu sabor, Avelina Calvo suxire untar filloas e torradas ou mesturalo con requeixo.

Laura Rodríguez Álvarez, gañadora do sorteo dunha cesta de Nadal ecolóxica

Cesta de Nadal con produtos ecolóxicos certificados polo Craega

Laura Rodríguez Álvarez, con domicilio en Pontevedra, foi a gañadora do sorteo promovido polo Consello coincidindo co Nadal. Organizado a través da páxina en Facebook do Craega, a dinámica do xogo era moi sinxela. Para participar, só había que respostar á pregunta ‘Que ceas en Noiteboa?’ realizando un comentario no post e picando ‘Gústame’.

Nun período de 10 días, a publicación reuniu máis de 270 comentarios. Tal e como figuraba nas bases, o sorteo realizouse o venres 21 de decembro e a afortunada foi Laura Rodríguez. A cesta con produtos ecolóxicos certificados polo Consello remitiuse finalmente á cidade do Lérez.

Sete agasallos ecolóxicos para triunfar no Nadal

Agasallos ecolóxicos de Nadal de Caurelor, Bioselección, Arqueixal, Alicornio Organic Spirits, O Muíño da Espelta, Bodegas Corisca e Maruxas de Nata

Febre consumista? Excesos? Estrés? Lonxe dos tópicos de sempre, o Nadal é sinónimo de compartir cos máis achegados. Imponse cada ano ao peche do calendario para obrigar a uns e outros a botar o freo e pasar tempo cos seus. O intercambio de agasallos vén de antigo. A súa orixe ten que ver precisamente co feito de compartir presentes con familiares e amigos como desexo de boa fortuna. Pero certo é que máis dunha vez supón un quebradeiro de cabeza. Acertar e ser orixinal non resulta sinxelo e, coa sobreoferta que hai no mercado, a elección complícase aínda máis. No Craega imos darche pistas para saír do apuro. Coincidindo con estas datas, algúns dos nosos operadores sacan á rúa edicións especiais. Son produtos respectuosos co medio ambiente e co selo de garantía do Consello. Así que, se queres atinar, escolle agasallos ecolóxicos:

  1. Cesta de Caurelor. Especializada na manufactura de produtos naturais, en particular da castaña, a empresa de Quiroga (Lugo) deseñou ata cinco cestas de Nadal para levar á mesa durante as festas. Na súa proposta non faltan estrelas do seu escaparate como as marmeladas de cabaza ou de pexego e as castañas en almíbar. Tamén se inclúen aportacións doutros operadores como sidra ecolóxica de Ribela ou cervexa de sabugueiro de Carabuñas.
  1. Ecocestas de Bioselección. A empresa con sede na Coruña lanza cestas e lotes de Nadal compostos por produtos bio e galegos. O abano de posibilidades é moi amplo: marmeladas, meles, almíbares, cafés, chocolates, infusións, cremas de castaña, artigos gourmet… Ademais de empregar embalaxes respectuosas co medio ambiente (só papel e cartón), a firma ofrece ás compañías a opción de personalizar os paquetes coa súa propia imaxe corporativa. Como complemento, Bioselección dispón de cestas de lotes con produto bio e de comercio xusto.
  1. Cesta de Arqueixal. De Palas de Rei (Lugo) chega outra selección de produtos para deleitar ao padal nestas datas. Os queixos de elaboración artesanal –cremoso e de Nabiza-, o eco iogur natural feito a partir de leite ecolóxico de vaca e o leite pasteurizado –sen químicos e sen pesticidas- son os protagonistas desta cesta pensada para poñer o mellor sabor ao Nadal.
  1. Pack de Alicornio Organic Spirits. A firma de Sarreaus (Ourense) promove dous packs especiais en caixa de madeira rústica. Con dúas botellas de 50 cl., no primeiro pódense combinar licores tradicionais ecolóxicos (licor café e de herbas; ou oruxo Albariño e de herbas) e de froitas (laranxa con herba luísa e  arandos con xenxibre; laranxa con herba luísa e framboesa con menta; framboesa con menta e arandos con xenxibre). Confeccionada con tres botellas de 50 cl., as opcións para o segundo pack son as seguintes: licores tradicionais (de herbas, oruxo Albariño e licor café) e de froitas (laranxa con herba luísa, arandos con xenxibre e framboesa con menta).
  1. Panettone do Muíño da Espelta. Desde Mos (Pontevedra) xorde unha das propostas máis singulares das festas: o panettone eco de espelta. Elaborado con masa nai rechea de chocolate e laranxa caramelizada, hai dous formatos diferentes: tamaño grande (700 grs.) ou paquetes de tres unidades (90 grs. cada un).
  1. Viño de Corisca. As adegas ecolóxicas de Tui (Pontevedra) tamén dispoñen dun agasallo especial para as festas do Nadal. Cunha embalaxe propia destas datas, inclúe dúas botellas de Albariño 100% ecolóxico. Pioneira na elaboración desta variedade, a produción desta firma vén de viñedos propios e a vendima realízase manualmente. O viño chama a atención pola súa frescura, así como polo seu sabor equilibrado que lembra a diferentes froitas.
  1. Edición especial de Maruxas de Nata. As galletas de San Sadurniño (A Coruña) sacan ao mercado un orixinal envase coincidindo coas festas. Edición limitada, a lata foi deseñada desta vez polo artista galego Leandro Lamas. A que leva a sinatura do pintor e ilustrador de Narón non é máis que o arrinque dunha serie que, con continuidade anual, irá poñendo un toque singular á presentación das Maruxas de Nata. Para iso, a empresa contará coa colaboración de creadores de diferentes eidos do mundo das artes e das letras.

 

O Craega sortea unha cesta de Nadal ecolóxica

O Nadal adáptase aos tempos que corren e cada vez son máis os que cambian os copiosos banquetes típicos destas datas por pratos saudables. Para que as mesas vaian adquirindo un ton cada vez máis ecolóxico, o Craega sortea unha cesta de produtos certificados polo Consello. Para participar, só tes que entrar na nosa páxina oficial en Facebook e responder a unha pregunta moi sinxela (consulta aquí as bases legais).

O Craega é o órgano que se ocupa de regular e certificar as producións ecolóxicas de Galicia. Fundado en 1997, hoxe suma máis de mil operadores en toda a comunidade. Respectuosa co medio ambiente e contraria ao uso de químicos de síntese, a agricultura bio busca conseguir alimentos de máxima calidade.

Promoción exterior: bolseiros do Igape visitan dúas empresas do Craega

O xerente e fundador de Meles Anta, David Corral, explica aos bolseiros do Igape como funciona a empresa

Un grupo de bolseiros de internacionalización do Igape visitou este martes a dous operadores do Craega para coñecer de primeira man como funciona a produción ecolóxica no mercado exterior. No almacén de distribución que Mel da Anta posúe no polígono da Grela (A Coruña) o seu xerente e tamén fundador, David Corral, explicoulles que o 40% da súa facturación corresponde a ‘eco’. O seu principal mercado atópase precisamente fóra. Especializada en comercialización de algas, Porto-muíños tamén ten o seu forte no exterior. A súa responsable de exportación, Bibiana Canosa, trasladoulles aos mozos que o 20% do seu produto véndese noutros países, sobre todo en Alemaña, Italia e Francia.

Cinco Exceleite para as granxas ecolóxicas

Ángel Rivas Lamas (Friol) e Concepción Torres López (Chantada), recibiron o ouro e a prata, respectivamente, na categoría de ecolóxico dos premios Exceleite 2018

Cinco gandarías ecolóxicas acaban de facerse cun premio polo seu bo facer. Convocados por segunda vez pola Consellería de Medio Rural para recoñecer a excelencia hixiénico-sanitaria das granxas leiteiras, nesta categoría resultaron galardoados Ángel Rivas Lamas (Friol) e Concepción Torres López (Chantada), ouro e prata, respectivamente. Tamén foron distinguidos con diplomas Figueroa S.C. (Arzúa), Manuel Calvelo Capelo (Negreira) e a Cooperativa Burgo de Negral (Friol).

Co máximo recoñecemento de Exceleite en ecolóxico por segundo ano consecutivo, a Ángel Rivas Lamas a vocación vaille no sangue. Os inicios da súa explotación remóntanse a 1921, cando o seu avó se fixo coas terras que viña traballando para a nobreza da zona. “Viuse entre a espada e a parede. Se non mercaba, botábano. Tivo que pedir un préstamo e, con moito esforzo, saiu adiante”, lembra.

O gañador do certame pertence á terceira xeración dunha saga de gandeiros. Colleu as rendas do negocio no 1981 e no 2003 iniciou a conversión ao modelo ecolóxico. “Daquela contabamos cunha marxe neta de 0,18 €/litro. Era viable, pero tiñamos a necesidade de buscar un prezo diferenciado”, argumenta. Certificado polo Craega en 2005, hoxe suma 90 cabezas e unha produción de 360.000 litros anuais, cantidade que desde 2017 se destina integramente a Casa Grande de Xanceda.

Premio Exceleite de Prata 2018 de gandaría ecolóxica, Concepción Torres López é unha recén chegada a este tipo de produción. Estreouse hai só seis meses. “Se mantivera o modelo convencional, xa tería pechado”, advirte. Aínda a pesar de que os custes se encarecen, hai un retorno que, ao seu xuízo, serve para equilibrar a balanza.

Herdanza dos seus pais, Torres colleu as rendas da granxa 35 anos atrás. Pero no 2016, despois das dificultades que viña atravesando o sector lácteo, viuse na obriga de buscar outro camiño e empezar a facer as cousas dun xeito máis respectuoso co medio ambiente. “Véndeno coma se fora un luxo, pero o eco xa se facía hai cen anos. Non imos cara algo novo”, conclúe.

Convocada a IV edición dos premios “EcoeLabora-SEAE”

A Sociedad Española de Agricultura Ecológica/Agroecología (SEAE)  publicou as bases da IV edición dos premio EcoeLabora á xeración e xestión do coñecemento e a innovación en agroecoloxía e produción ecolóxica.

Con estes premios, quérese recoñecer a aquelas persoas ou entidades ( elaboradores, agricultores, comercializadores, promotores do consumo, técnicos asesores, investigadores, e autoridades competentes ou de control) que contribúen a desenvolver este modelo Agroecológico e de xestión dos agrosistemas que reúne a produción de alimentos de calidade e a conservación de recursos naturais, considerando a agricultura e a gandería ecolóxica como motor esencial para enfrontar os retos que ten expostos o sector tales como: a conservación e mellora da biodiversidade, a mitigación/adaptación do cambio climático, a soberanía alimentaria, a escaseza de auga e o desenvolvemento rural sustentable e a paisaxe.

A entrega de premios realizarase o 15 de novembro, durante o XIII Congreso de Agricultura Ecológica de SEAE.

Para máis información podes consultar a convocatoria na web da SEAE Convocatoria premios Ecoelabora 2018

 

Os alimentos ecolóxicos, percibidos como máis seguros e de mellor calidade que os convencionais

Tan só o 14% dos consumidores españois recoñece o logo de agricultura ecolóxica. Este e outros datos e opinións da cidadanía europea e española ao redor da agricultura, e á agricultura ecolóxica, foron recollidas pola Comisión Europea no Eurobarómetro especial “Europeos, Agricultura e PAC”. En Europa, o coñecemento do logo sitúase no 27%, e creceu en 5 puntos desde 2015, data do anterior Eurobarómetro, mentres que en España só o fixo nun punto.

A gran maioría das persoas enquisadas coincide en considerar os alimentos ecolóxicos máis caros que os convencionais, algo que opina o 90% dos europeos e o 91% dos españois. Tamén está moi xeneralizada a opinión de que son máis seguros, apoiada polo 70% dos europeos e o 75% dos españois, e de mellor calidade, segundo un 72% dos europeos e un 77% dos españois enquisados. En canto ao seu proceso de produción, o 79% dos europeos e o 76% dos españois afirma que están obtidos facendo un uso moi restrinxido de pesticidas, antibióticos ou fertilizantes. Ademais, percíbese que na súa produción utilizáronse mellores prácticas ambientais (78% dos europeos e 75% dos españois), e cuns maiores niveis de respecto polo benestar animal (76% de europeos e 73% de españois).

A sensación de ter ou non un fácil acceso aos produtos ecolóxicos varía de forma importante entre os distintos países europeos. Así, un 68% dos españois enquisados afirma que son difíciles de atopar nos supermercados, tendas e mercados da zona na que vive, unha porcentaxe só superada por Romanía, onde un 70% dos enquisados percibe esa dificultade. Fronte a eses datos, en Dinamarca tan só o 13% considera difícil atopar alimentos ecolóxicos nos seus puntos de venda próximos, mentres que en Francia e Holanda a cifra sitúase no 18%.

O eurobarómetro preguntou tamén ás persoas enquisadas sobre a responsabilidade social dos agricultores. Prover alimentos seguros, saudables e de alta calidade é a súa principal responsabilidade para un 55% dos europeos e un 50% dos españois. Asegurar o benestar dos animais é máis importante para os europeos que para os españois: un 28% de europeos sitúaa entre as principais responsabilidades dos agricultores, fronte a un 18% de españois, que dan maior importancia ao labor dos agricultores para protexer o medio ambiente e combater o cambio climático (31% dos españois fronte a 25% dos europeos) e á súa contribución para crear emprego e crecemento nas zonas rurais (32% da españois fronte ao 18% dos europeos).

Outro dos aspectos abordados polo Eurobarómetro son as opinións da cidadanía sobre as prioridades de investigación e innovación no sector agroalimentario. Para un 26% dos europeos e un 21% dos españois, unha das prioridades é apoiar enfoques ecolóxicos en agricultura.

Máis da metade dos españois compra alimentos ecolóxicos.

O mercado de produtos ecolóxicos continúa crecendo en España a bo ritmo, segundo o informe de IRI sobre consumo ecolóxico en 2017, que apunta a un crecemento das vendas superior ao 20% tanto en volume (22%) como en valor (24%). A pesar diso, o informe matiza que o mercado segue sendo pequeno, e sitúa o seu volume de vendas en 230 millóns de euros.

Segundo os datos recolleitos neste traballo, o 52% dos españois compra produtos ecolóxicos, unha cifra moi próxima á europea, onde a porcentaxe é do 53%. Con respecto aos anos anteriores, os compradores españois han aumentado o consumo de produtos ecolóxicos en menor medida que os europeos (23% fronte a un 34%), pero presentan un maior crecemento da intención de compra de produtos ecolóxicos para os próximos meses (29% fronte ao 21% do conxunto de Europa).

Hipermercados e supermercados representan a principal canle de compra, e a eles acoden o 72% dos consumidores. Séguenlles as tendas ecolóxicas (30%), tendas ecolóxicas na internet (9%), farmacias (5%), mercadillos (5%), granxas (5%) e outro tipo de tendas (4%).

Por familias de produtos, o informe (que non inclúe o dato relativo a froitas e verduras) sinala que o 43% das vendas totais de produtos ecolóxicos corresponde a ovos; o 26% a lácteos, derivados e queixos; o 14% a alimentación seca; o 14% a bebidas ecolóxicas, e o 3% a conservas ecolóxicas.

Fonte: La Fertilidad de la Tierra

XORNADAS FORMATIVAS ORIENTADAS Á PRODUCIÓN ECOLÓXICA

O vindeiro mes de setembro impartiranse as xornadas de “Mellora das superficies extensivas para a produción ecolóxica mediante o uso da metodoloxía de liña clave e técnicas de permacultura”

Horario: 25-26 setembro, 09:30 a 19:00

Lugar: Centro de Formación e Experimentación Agroforestal de Monforte de Lemos.

Descargar a folla de inscrición

Aprender as ferramentas de rexeneración do solo permite comprender a importancia do deseño para a captación, almacenamento e xestión óptima das augas pluviais, manexo do gando e vixilancia das parcelas para asegurar a súa viabilidade e a produtividade destas terras, e así lograr unha base de soporte humano que vaia máis aló da sustentabilidade. Sendo a auga o elemento máis importante dentro de todo proxecto agronómico e de calquera desenvolvemento humano, o estudo detallado da xestión hidrolóxica dun terreo é indispensable para desenvolver unha agricultura ou gandería permanente a longo prazo.

No curso explicaranse as condicións indispensables para rexenerar o solo,“ler” a topografía natural da paisaxe e utilizar a súa forma e contorno para determinar o deseño e posición de represas, gabias de infiltración, desaugadoiros, áreas de irrigación, camiños, valos, cortellos, currais, casas e liñas de árbores. Analizarase a utilidade das curvas de nivel e as curvas a desnivel e aprenderase a marcalas no terreo a través dunha práctica de campo.

Durante o curso realizaranse prácticas de campo co uso de instrumentos de precisión topográfica como o nivel láser (para o deseño de propiedades a gran escala), así como o uso de instrumentos tan sinxelos como o nivel de mangueira (para propiedades a pequena escala).

Ademais, demostrarase o uso do apeiro Yeomans (se fose posible), co que se poderán ilustrar os patróns “Keyline” de cultivo, así como os beneficios deste tipo de apeiro, co cal é posible cultivar a terra sen volteala, descompactala, eliminar malas herbas, inxectar microorganismos directamente á terra, sementar e aplicar compost, todo cunha soa pasada do tractor.

O apeiro Yeomans ara a terra en profundidade rompendo a compactación, pero sen voltear a terra na superficie: esta é a clave para restaurar solos degradados e incrementar a profundidade do solo fértil, que é capaz de fixar grandes cantidades de carbono estable.

Os participantes neste curso adquirirán unha visión ampliada do que significa a agricultura rexenerativa, isto é, a produción de alimentos sans para todos; de forma que se incremente a soberanía alimentaria e a rendibilidade para os produtores. Tamén adquirirán as ferramentas para analizar a topografía dun espazo, definir puntos e liñas clave, así como deseñar espazos fermosos que poidan reter auga, construír un solo fértil, capturar carbono, reducir gastos e multiplicar producións.

O patrón de plantación marcará a diferenza entre un espazo que perde solo fértil coa escorrentía cada vez que chove e outro que aproveita cada pinga para aumentar a súa fertilidade e polo tanto a súa produtividade.

Curso dirixido a agricultores, gandeiros, silvicultores, técnicos agrícolas e, en xeral, a xestores de terreos públicos ou privados, asesores e técnicos da Administración.

O curso será impartido por Jesús Ruíz, experto en deseño de parcelas con liña clave con manexo hidrolóxico, ademais de ser topógrafo e formador en agroecoloxía.

Programa

Martes e mércores, 25 e 26 de setembro 2018

Horario: 9.30 h – 19.00

Sesión 1. Introdución. O solo como organismo vivo. O problema da erosión e o estrés hídrico.

Sesión 2. Introdución á topografía.

Sesión 3. Prácticas de campo. Introdución aos tipos de niveis: nivel de man, bunyipou mangueira, láser.

Trazado de curvas a nivel con nivel de mangueira. Trazado con nivel láser. Equidistancias entre curvas de nivel.

Como crear un mapa cun GPS de man ou Smartphone e un nivel láser ou de mangueira.

Sesión 4. Práctica de campo. Introdución á liña clave, curvas a desnivel.

Sesión 5. Introdución ao Keyline, a escala de permanencia.

Sesión 6. Maquinaria para a rexeneración de solos. Exemplos de deseños en España e Portugal

Sesión 7. Práctica de deseño, estudo de planos topográficos. Práctica de deseño, decodificación de terreos e determinación de liñas clave. Deseño de terreos, asignación de áreas de captación con madeirables, infiltración con froiteiras, rega con cultivos anuais e aproveitamento con autóctonas. Deseño de viñedos e outras leñosas.

Sesión 8. Entrega de deseños, preguntas e respostas.

Inscricións no teléfono 982 40 53 00, no fax 982 41 60 30 ou no correo electrónico craega@craega.es antes do día 21/09/2018, debendo xuntar o formulario que se achega. No caso de inscrición telefónica, debe presentar o formulario orixinal asinado o día da xornada.