Todolos artigos de: CRAEGA

A Xornada do XXV aniversario do Craega conclúe que “o sector eco ten futuro, si ou si”

O Consello Regulador da Agricultura Ecolóxica de Galicia (Craega) congregou esta mañá no salón de actos do Pazo de Feiras e Congresos de Lugo numerosos asistentes con motivo da xornada divulgativa, que levou por título “Craega: 25 anos medrando co sector ecolóxico galego”.

O acto deu comezo ás 10:00 horas e foi inaugurado polo presidente da Axencia Galega de Calidade Alimentaria (Agacal), José Luis Cabarcos, quen, tras felicitar o Consello polos seus 25 anos de existencia, resaltou que Galicia está no camiño de seguir medrando para alcanzar as esixencias da normativa europea (cuxa axenda é acadar que o 25 % da superficie agraria última (SAU) sexa ecolóxica en 2030), pois nesta última década o incremento na nosa comunidade foi do 127 %. Así mesmo, incidiu en que hai que aproveitar este crecemento, porque a clave do éxito está en “facer cousas ordinarias de maneira extraordinaria”.

A continuación, foi a quenda de José Miguel González, xefe da Área de Produción Ecolóxica na Subdirección Xeral de Calidade e Sostibilidade Alimentaria (MAPA), quen disertou sobre a situación actual e de futuro da produción ecolóxica en España e en Galicia no marco europeo. Tras a introdución histórica da normativa eco en Europa e en España, repasou os datos estatísticos máis salientables tanto a nivel nacional como na nosa comunidade e, entre os fitos conseguidos, lembrou o feito de que España foi un dos primeiros países en certificar en ecolóxico, en 1988, e que na actualidade o gasto per cápita en consumo eco está xa por riba da media da Unión Europea. Neste sentido arroxou un dato moi significativo: en 2006 o gasto per cápita do consumidor en produto ecolóxico era de 2 euros; na actualidade é de 60. Finalmente, ofreceu un percorrido pola situación da normativa e polo futuro do sector.

O terceiro en subir ao estrado foi Manuel López Luaces, xefe de Área de Formación, Innovación e Investigación Agraria na Agacal, quen dedicou parte da súa intervención a presentar a área I+D+i ao servizo do sector agrario. Entre os proxectos que engloban o seu departamento, deu conta dos centros de investigación galegos vinculados ao sector agro, un por provincia: Centro de Investigacións Agrarias de Mabegondo, Estación Experimental de Gandería de Montaña de Marcos da Curra, Estación Experimental Agrogandeira da Pobra do Brollón e Estación Experimental Agrícola do Baixo Miño. Para seguir, enunciou os instrumentos da Agacal para a I+d+i e presentou o contrato de xestión para os anos 2021-2024, co fin de mellorar a produción agropecuaria galega na liña coa estratexia europea de investigación en materia agraria. Rematou a súa intervención facendo referencia ao ámbito dos centros formativos, que reivindicou como espazos “para xerar man de obra entre os mozos e mozas agricultores” co fin de garantir o futuro do sector.

A compra pública verde como oportunidade para a produción eco foi o tema das seguintes relatoras, que expuxeron dous interesantes proxectos: o de Josefina Irles, xefa de sección de Dietética e Xestión de Hostalería no Hospital Xeral de Valencia, e o de Slow Food Compostela, que o amosou Rocío García, secretaria da asociación.

Tras rememorar o camiño que a levou á introdución da alimentación eco no hospital onde exerce como nutricionista, Irles incidiu nos motivos principais que a levaron a facer esta aposta: ser garante dunha nutrición sa para un colectivo especialmente vulnerable como son os pacientes, e ser respectuosa co medio ambiente e co planeta.

Pola súa banda, García fixo balance de “Come Local”, a campaña que organiza o colectivo desde hai tres anos, promovida pola Agacal, e na que o Craega participa coa achega de alimentos ecolóxicos con moi boa acollida por parte dos usuarios dos centros.

Tras a pausa do café, subiron ao estrado Xosé Lois Lamazares (xerente de Daveiga) e Guillermo Martínez (xerente de Casa Grande de Xanceda) e ambos centraron o seu relato en ofrecerlle ao público asistente un completo percorrido por cada unha das empresas que teñen ao seu cargo, expoñendo as trabas que se atoparon na súas traxectorias e como lograron facer das súas marcas un negocio de éxito.

“Emprender en ecolóxico: experiencias, retos e ideas” foi o fío común sobre o que debateron José Manuel Vázquez (Burgo de Negral), José Luis Vaz (Verín Bioocoop) e Rocío Freire (Alibos Galicia), para facer partícipe ao público da súa experiencia como produtores en ecolóxico e poñer en común retos e ideas para o futuro. Entre as moitas propostas que emerxeron na mesa, unha destacada foi o camiño que se debe seguir e todos estiveron de acordo en que a clave está en “compartir e repartir” para poder mirar ao futuro, porque a agricultura ecolóxica “ten futuro, si ou si, porque non nos queda outra”. A mesa foi moderada polo director dos programas O agro e Labranza da CRTVG, Manuel Cruz.

O presidente do Craega, Francisco López Valladares, foi o encargado de pechar esta actividade formativa, repasando brevemente algúns datos destacados da certificación e agradecéndolles a presenza a todas as persoas asistentes.

ÁLBUM DE FOTOS DA XORNADA

Casa Codesal e Granxa Ecolóxica Figueiroa SC gañan os premios Exceleite 2022

Na xornada de onte, celebrouse en Santiago de Compostela o acto de entrega da sexta edición dos premios Exceleite, os galardóns á excelencia da calidade hixiénico-sanitaria de produtores de leite cru de vaca de Galicia.

O acto estivo presidido polo conselleiro do Medio Rural, José González, quen definiu estes galardóns como “o recoñecemento da Xunta polo esforzo de gandeiros e gandeiras de Galicia comprometidos coa calidade”, unha estratexia que, sinalou González, “é a panca que facilita a consolidación definitiva do sector lácteo galego, tanto no conxunto de España como fóra do noso país”. Tamén estiveron presentes o director xeral de Gandería, Agricultura e Industrias Agroalimentarias, José Balseiros, e os delegados territoriais da Xunta na Coruña e Pontevedra, Gonzalo Trenor e Luis López.

Na categoría de gandería ecolóxica volveron repetirse os nomes da edición de 2020: Casa Codesal SL (Friol, Lugo), que obtivo o ouro, e Granxa Ecolóxica Figueiroa SC (Arzúa, A Coruña), que acadou a prata. Ambas as ganderías contan coa certificación do Craega e posúen anos de historia producindo leite en ecolóxico. Cabe lembrar que Casa Codesal gañou todas as edicións, agás a de 2021. 

LISTAXE COMPLETA DOS PREMIADOS 

O Craega organiza unha xornada divulgativa para abordar as oportunidades eco certificadas en Galicia

Co gallo do 25 aniversario do Craega como órgano de control e certificación da produción ecolóxica galega, faise indispensable a realización dunhas xornadas presenciais para analizar as experiencias pasadas, compartir os bos datos de produtos certificados en ecolóxico e estudar a xestión do crecemento que o sector vivirá nos próximos anos.

Por iso, baixo o lema “Craega: 25 anos crecendo co sector ecolóxico galego”, o vindeiro xoves 1 de decembro terá lugar no Pazo de Feiras e Congresos de Lugo unha xornada divulgativa na que se fará  balance e se analizarán as oportunidades da produción ecolóxica na nosa comunidade. 

UN PROGRAMA CARGADO DE PROPOSTAS

Ás 10:00 horas, abrirase o evento coa inauguración a cargo do director da Axencia Galega da Calidade Alimentaria (Agacal), José Luis Cabarcos.

A continuación, José Miguel González, xefe da área de Produción Ecolóxica no Ministerio de Agricultura, Pesca e Alimentación (MAPA), tratará a situación da produción ecolóxica en España e mostrará elementos de futuro. Seguiralle Manuel López Luaces, xefe de Área de Formación, Innovación e Investigación Agraria na Agacal, coa súa charla “A I+D+i ao servizo do sector agrario”.  

Logo terán lugar dúas charlas que se centrarán na oportunidade para a produción eco que ofrece a compra pública. Nesta área falarán Josefina Irles, xefa de sección de Dietética e Xestión de Hostalería no Hospital Xeral de Valencia, co relatorio “Alimentación ecolóxica no Hospital Xeral de Valencia”, e Rocío García, secretaria da asociación Slow Food Compostela, que tratará a campaña “Come Local” como un exemplo galego de xestión viable nos comedores escolares.

Tras unha pausa, mostraranse dous exemplos de éxito dentro do sector: DaVeiga, con Xosé Lois Lamazares, e Casa Grande de Xanceda, con Guillermo Martínez. Finalmente, celebrarase unha mesa redonda moderada por Manuel Cruz, director dos programas O Agro e Labranza da CRTVG, que xirará ao redor do emprendemento en ecolóxico, con experiencias, retos e ideas. Intervirán José Manuel Vázquez, socio de Burgo do Negral; Paula Bernárdez, directora de Mieles Anta; José Luis Vaz, xerente de Verín Biocoop, e Rocío Freire, directora de Produción de Alibos Galicia.

Para poñer o broche final, o presidente do Craega, Francisco L. Valladares, clausurará a cita.

Todas as persoas interesadas poden inscribirse cubrindo o formulario antes do 29 de novembro. 

Ler programa completo

O número especial sobre o noso 25 aniversario, xa na rúa!

Este outono acadamos a 61 edición da nosa revista cun número moi especial: as nosas vodas de prata ao lado do sector, que conmemoramos nun emotivo acto na Parada das Bestas (Pidre, Palas de Rei, Lugo). Ao longo de varias páxinas poderedes atopar unha escolma dalgúns dos intres máis sinalados da nosa celebración, como foron o acto oficial, no que contamos coa presenza de varias autoridades, entre os que se atopaban os conselleiros do Medio Rural, José González; de Medio Ambiente, Territorio e Vivenda, Ángeles Vázquez, e do Mar, Rosa Quintana; a homenaxe aos cinco primeiros operadores inscritos, o posado dos numerosos convidados e convidadas que pasaron polo noso particular photocall, e a parte máis lúdica do noso evento, na que houbo música, gastronomía e mesmo arte urbana.

Dentro do mesmo especial, repasamos os  25 anos de historia do Consello, para lembrar o noso nacemento e analizar como foi o crecemento, algunhas das actividades realizadas ao longo destes anos e cales son os principais obxectivos.

A esta retrospectiva séguelle a nosa “Memoria anual” correspondente ao ano 2021, que reflicte, entre outros datos significativos, un incremento da superficie ecolóxica do 127 % respecto de 2010.

Na nosa habitual sección de “Cociña Eco”, os integrantes de Indo e Vindo Gastronomía propóñennos un novo menú moi saudable e sinxelo de levar á práctica; “Aliméntate Bío” inclúe un artigo asinado por Slow Food Compostela, no que aborda  o que foron estes tres últimos anos da campaña Come Local nos comedores escolares de Galicia, nos que o Consello participou co envío de produtos eco. 

A publicación dá peche co recompilatorio de “Novas breves”  e coa “Axenda”, que este número vén dedicada ao noso paso pola feira BioCultura Madrid.

Ver revista completa

O Craega participa no proxecto de investigación Sambucus Go

Imaxe de Carabuñas

Sambucus Go é un proxecto para impulsar a xestión sostible de recursos naturais e ecosistemas autóctonos, enfocándose na investigación agroforestal da especie Sambucus Nigra, co obxectivo de mellorar o cultivo do sabugueiro ecolóxico. Neste estudo cooperan agricultores representados por Veigas de Sabugueiro (coa marca comercial Carabuñas), a Escola Politécnica-Produción Vexetal (Universidade de Santiago de Compostela), Anfaco-Cecopesca e o Consello Regulador da Agricultura Ecolóxica de Galicia (Craega).

Coa participación do Craega garantirase a difusión dos avances na produción de sabugueiro respectando o medio ambiente e a fertilidade dos solos, aspectos clave da agricultura ecolóxica, ademais de garantir a posta no mercado de produtos máis saudables, nutritivos e mellor valorados. O grupo operativo contará coa colaboración de Imasde Agroalimentaria, axente de innovación encargado de coordinar, promover e dinamizar proxectos no ámbito agroalimentario, especializado na análise de datos para mellorar o proceso de toma de decisións e valorar obxectivamente os cambios implementados nos sistemas de produción.

OBXECTIVOS DO PROXECTO

Imaxe de Carabuñas

Veigas busca estudar o desenvolvemento fisiolóxico e o proceso de maduración dos froitos de sabugueiro autóctono en Ourense, coa finalidade de determinar mellores condicións agronómicas para a multiplicación, o enxerto e o deseño de novas plantacións de cultivo ecolóxico.

Tendo en conta que a súa estrutura, formada por compostos bioactivos, pode verse afectada por múltiples factores, tratarase de profundar sobre determinados aspectos do manexo agronómico (poda, rega e fertilización) e a súa influencia sobre a presenza de compostos fenólicos e antocianinas nas diferentes partes da planta, que serán analizados empregando técnicas non destrutivas de análises (NIRS).

O Consello encargarase de darlles difusión aos resultados obtidos no proxecto, co obxectivo de fomentar o cultivo de sabugueiro que garanta a súa conservación e explotación sostible en Galicia. Así mesmo, proporcionarase unha guía práctica de cultivo e, dende a USC, poñerase en marcha un curso de verán para a formación do alumnado.

Toda a información do proxecto

Os produtos ecolóxicos conquistan padais en Xantar 2022

 

Ourense acolleu a 23.ª edición do Salón Internacional de Turismo Gastronómico Xantar do 9 ao 13 de novembro. O evento congregou 165 expositores 8 restaurantes que atraeron a 16.000 visitantes.

Os produtos ecolóxicos galegos certificados polo Craega tamén tiveron presenza neste evento. En concreto, o xoves, dentro do programa de Experiencias de Calidade que ofreceu a Axencia Galega da Calidade Alimentaria (Agacal), o chef Martín Mantilla, do restaurante Berso (Sober, Lugo), elaborou un menú con diferentes alimentos eco, mentres que Juan Ramón Díaz, do Departamento de Promoción do Consello, explicou a importancia da certificación e o valor engadido que lles dá  a estas elaboracións.

Pola tarde, como parte da programación da Consellería do Mar, tivo lugar a actividade “Galicia sabe a mar: Ecolóxicos a mares”. Nela, a cociñeira Begoña Vázquez, do restaurante Regueiro da Cova (Verín, Ourense), preparou un menú con produtos do mar, que estivo acompañado por viño ecolóxico. Durante a sesión, Díaz expuxo o crecemento que ten a acuicultura ecolóxica en Galicia e como traballan desde o Consello para potenciala.

MÁIS INVESTIMENTO PARA OS PRODUTOS GALEGOS DE CALIDADE

Como é habitual nas últimas edicións, o domingo é o día dedicado ao Medio Rural, polo que contou coa presenza do conselleiro do Medio Rural da Xunta de Galicia, José González, que acudiu a clausurar o evento e aproveitou para anunciar que en 2023 investirán máis de 5,4 millóns de euros na promoción dos produtos galegos de calidade, aqueles incluídos nas “Experiencias de Calidade” e que son os recoñecidos con algún selo de garantía como a denominación de orixe, a indicación xeográfica protexida ou o de produción ecolóxica.

A Fundación Juana de Vega convoca a primeira edición do Premio ao Emprendemento Agroalimentario

A Fundación Juana de Vega pon en marcha o XI Programa de Apoio a Empresas Agroalimentarias, un programa de formación e mentorización orientado a axudar aos emprendedores no deseño e na implantación dos seus proxectos empresariais, así como para empresas existentes que necesitan abordar proxectos de mellora ou de expansión. As persoas interesadas poden participar ata o 30 de novembro

En pasadas edicións, empresas que forman parte do Craega obtiveron apoio do Programa: na quinta edición a beneficiaria foi cooperativa A Carqueixa (Os Ancares, Lugo), mentres que na sexta o foron Trasdeza Natur (Silleda, Pontevedra) e Carabuñas (Vilar de Santos, Ourense) e na novena foi a quenda de Traloagro (Friol, Lugo) e Zumiño (O Rosal, Pontevedra).

Poderán participar tanto empresas existentes como novas iniciativas empresariais nos ámbitos agroalimentario, forestal, marisqueiro e pesqueiro, ou outros sectores da bioeconomía, así como proxectos de base tecnolóxica e servizos relacionados cos anteriores, que se desenvolvan no ámbito xeográfico de Galicia. O programa conta con dúas modalidades: “Emprendemento” e “Crecemento e consolidación”.

Á primeira poden postular aquelas persoas que queiran crear novas empresas ou poñer en marcha iniciativas empresariais que estean en proceso de deseño da idea e de definición do modelo de negocio; aquelas de nova creación ou en fase de lanzamento; en fase de sucesión e recuperación e proxectos de posta en valor de activos rurais improdutivos.

Na categoría de “Crecemento e consolidación” poderán concorrer todos aqueles autónomos, micropemes e pemes que, con independencia do seu tamaño, estean en funcionamento e necesiten realizar unha revisión estratéxica do seu negocio ou levar a cabo unha investigación de mercado.

PREMIO AO EMPRENDEMENTO

Dentro do propio Programa e co obxectivo de apoiar o sector agroalimentario na súa implantación, a Fundación crea a primeira edición do Premio ao Emprendemento Agroalimentario.

Este recoñecemento consistirá nun cheque por valor de 3.000 €, que o gañador poderá usar en sesións de apoio con mentores designados durante un período de 5 meses. O cheque equivale a un total de 30 horas de mentorización e acompañamento á empresa durante as primeiras etapas de lanzamento.

Poderán optar ao premio os participantes no XI PAEA na modalidade de “Emprendemento” e entregarase nun acto público que terá lugar a finais de 2023.

Consulta as bases do Programa

Xa está en marcha a cuarta edición dos Premios TalentA

Corteva Agriscience e a Federación de Asociacións de Mulleres Rurais en España (Fademur) poñen en marcha a cuarta edición dos Premios TalentA. O obxectivo destes premios é potenciar o talento e o emprendemento das mulleres no rural, detectando as potencialidades que ofrece o territorio e dinamizando a economía local. O prazo de presentación está aberto ata o 31 de xaneiro, inclusive.

Cabe lembrar que en pasadas edicións, emprendedoras que forman parte do Craega foron galardoadas nestes premios. En concreto, no ano 2021 María José Tallón, da firma silledense (Pontevedra) Trasdeza Natur, obtivo un dos premios finalistas e no ano 2022, Marta Álvarez e Ana Corredoira, coa súa firma de leite Sen Máis tamén obtiveron un dos recoñecementos.

CATEGORÍAS DOS PREMIOS

Debido á participación da Cátedra Corteva en Agricultura Dixital e Sustentabilidade da Universidade de Sevilla, inclúese unha nova categoría para apoiar a mulleres universitarias que teñan un proxecto agroalimentario innovador para desenvolver nunha zona rural. A esta categoría optarán aqueles programas que procedan de calquera ámbito universitario de España, que sexan procedentes de calquera tipo de modalidade académica, sempre que estean vinculados e teñan un impacto positivo no sector agrario ou agroalimentario, ou que necesiten de apoio externo para lograr desenvolverse e que a súa finalidade sexa achegar un valor ao desenvolvemento da muller no espazo rural.

Dentro da categoría Muller Rural Emprendedora, poderanse presentar mulleres rurais emprendedoras con proxectos do sector agrario ou agroalimentario, desenvolvidos no ámbito rural, que estean situados en áreas rurais de non máis de 20.000 habitantes, que se atopen nunha fase inicial de preparación e planificación ou que xa foran postos en marcha en espazos rurais e que queiran iniciar unha nova liña de negocio ou mellorar a que teñen.

Na súa páxina web podedes consultar máis información e toda a documentación precisa para presentar o proxecto.

Madrid réndese ante os produtos ecolóxicos galegos

Máis de 50.000 persoas se achegaron a coñecer todas as novidades do sector ecolóxico que se presentaron en BioCultura Madrid. A feira de alimentación ecolóxica e do consumo responsable celebrouse do 3 ao 6 de novembro no IFEMA e foron un total de 430 expositores os que participaron con propostas en diferentes ámbitos da ecoloxía.

A GALICIA ECO TRIUNFA EN MADRID

Como en cada edición, o Craega non faltou a esta cita, nesta ocasión cunha ducia de operadores baixo o seu paraugas: Celebridade Galega, Euro Andean, Galuriña, Portomuiños, Algas La Patrona, Bubela Artesá, Traloagro, Los Sabores del Camino, Sovoral, Capitán Alga, Terra de Baronceli e Bioalacena. Asi mesmo, as firmas eco Orballo, The Bio FactoryAlgamar asistiron tamén á feira con posto propio. Todos eles mostraron a súa satisfacción por poder presentar as súas novidades neste evento nacional que potencia o sector ecolóxico e salientaron a boa acollida que tiveron os produtos galegos certificados desde a apertura da feira.

ALTA PARTICIPACIÓN NAS ACTIVIDADES

Durante os catro días leváronse a cabo máis de 300 actividades, entre elas os showcooking e o showroom de EcoEstÉtica, que atraeron ao público de maneira masiva. O obxectivo das mostras culinarias é presentar alternativas alimentarias á alimentación que ofrecen as grandes empresas e nelas participou Euro Andean Trading SL. Coa firma comercial Tata, Alimentos con Historia, levou a cabo unha demostración de cociña baixo o título “Cociñando con Tata”. Judith Jacinto Valderrama foi a encargada de impartir este obradoiro, no que ofreceu unha merenda saudable.

Como actividade paralela, tamén tivo lugar Tribuna EcoJusticia, “un espazo no que entidades de diversa índole puideron denunciar todo o que está pasando en múltiples ámbitos”, indicou a directora da feira, Ángeles Parra. Así mesmo, no espazo El Manicomio mostráronse películas, obradoiros de danza e charlas de diferentes índoles: “Hai unha cultura con visións alternativas e está en BioCultura”, indicou Pedro Burruezo, encargado da organización desta sección.

VISITAS DE AUTORIDADES

A cita inaugurouse o mércores e contou coa presenza de Alberto Garzón, ministro de Consumo; Ángeles Parra, directora de BioCultura, e Ángel de Mariano González Sáez, viceconselleiro de Medio Ambiente e Agricultura da Comunidade de Madrid. Todos coincidiron na necesidade de apoiar o sector ecolóxico porque “é o futuro que necesitamos se queremos ter futuro”.

Na xornada do domingo levantou grande expectación entre as persoas asistentes a visita ao Ifema da raíña, Letizia Ortiz, quen se achegou ao recinto para coñecer de primeira man a evolución que está tendo o sector.

*Algúns datos utlizados neste reportaxe foron extraídos de VidaSana