Todolos artigos de: CRAEGA

Estreámonos en Tik Tok!

É innegable que TikTok experimentou un grande éxito nos últimos anos, especialmente entre os usuarios máis novos, que é onde a rede social ten o seu nicho predilecto. Na actualidade, a popular rede social  é a sétima plataforma máis utilizada en todo o mundo e mantén un bo nivel de crecemento que lle augura un futuro bastante próspero.

Desde o Craega non queriamos quedarnos atrás e xa temos dispoñible o noso perfil! Non perdades de visitarnos para coñecer o contido que ofreceremos. Será unha xanela máis para dar a coñecer os nosos operadores e, sobre todo, o noso traballo. Trataremos de ofrecervos un contido informativo, á vez que orixinal para que vexades, de primeira man, o noso labor.

Aquí podedes ver o noso perfil. Búscanos e síguenos!

Hoxe celébrase o primeiro Día da Agricultura Ecolóxica da UE

As tres institucións da UE, o Parlamento Europeo, o Consello da Unión Europea e a Comisión Europea, asinaron hoxe unha Declaración Conxunta que institúe oficialmente o 23 de setembro como Día da Agricultura Ecolóxica da UE. A celebración deste primeiro día coincide co Cume de Sistemas Alimentarios da ONU, que terá lugar en Nova York.

A idea do Día da Agricultura Ecolóxica da UE expúxose no Plan de Acción Ecolóxica que se publicou na primavera de 2021. Os representantes do tres institucións da UE e as principais partes interesadas subliñaron a importancia do obxectivo do 25 % de alimentos e agricultura ecolóxicos en 2030 para salvagardar a saúde dos consumidores e a biodiversidade da natureza.

Jan Plagge, presidente de IFOAM Organics Europe, estivo presente na cerimonia da firma e deu a benvida a esta iniciativa dicindo que “o Día da Agricultura Ecolóxica da UE será a oportunidade ideal para facer un balance de como Europa está a alcanzar o seu obxectivo dun 25 % de terras ecolóxicas baixo xestión ecolóxica para o ano 2030, das tendencias na demanda dos consumidores, a conciencia da agricultura ecolóxica na cadea de subministración e da aplicación do Plan de Acción Ecolóxico da UE”.

Máis información en Bio Eco Actual

Anaís Rivas e J. Pablo Díaz vencen o IV Acuatlón de Poio

O IV Acuatlón do Concello de Poio celebrouse o sábado 11 de setembro. Os vencedores e campións galegos absolutos foron Anaís Rivas, do Tríatlon Rías Baixas, e Juan Pablo Díaz, do Tríatlon Inforhouse Santiago. Aarón Ortiz, do Tríatlon Rías Baixas, proclamouse campión galego de Paratriatlón na modalidade de acuatlón.

Pola súa parte, o club A.D. Náutico de Narón vencía por clubs femininos, mentres que o Tríatlon Inforhouse Santiago facíao na categoría masculina. En canto aos vencedores veteranos, foron María Mareque (Club Hércules Termaria) e Pedro Bernárdez (Tríatlon Vilagarcía/Atenas Running). Así mesmo, os campións sub 23 foron Miriam Trigo (A.D. TriPenta Terras de Lugo) e Leo Suárez (Tríatlon Inforhouse Santiago).

Na proba, que contaba coa colaboración do Craega, repartíronse mochilas e bidóns de bebida a todos os deportistas. Ademais, os campións galegos individuais, tanto da categoría masculina como feminina, recibiron unha camisola.

Curso sobre o novo regulamento en ovino-caprino ecolóxico en Guntín

 

O Consello Regulador da Agricultura Ecolóxica de Galicia (Craega) e a Axencia Galega da Calidade Alimentaria (Agacal) organizan un novo curso sobre o novo Regulamento de produción ecolóxica (UE) 2018/848, aplicable a partir de xaneiro de 2022; desta volta está centrado na produción en ovino-caprino e desenvolverase na Casa da Cultura de Guntín (Lugo) o día 13 de outubro.

Coma o resto dos cursos previstos, terá lugar en xornada única, cun total de 7 horas de duración, con contido teórico en sesión de mañá (10:00-14:00 horas) e contido práctico en sesión de tarde (15:30-18:30 horas), con visita a unha explotación.

Lembrade que estas actividades son totalmente gratuítas e están abertas a calquera persoa interesada.  Tedes toda a información e inscricións en Agronovo.

Información sobre outros cursos

Curso en Chantada dirixido á produción porcina ecolóxica

Grande acollida en Pontevedra da primeira das ‘Ecoexperiencias do Craega’

Baixo o lema Vive e coñece a produción ecolóxica de Galicia, a pasada fin de semana (11-12 de setembro) tiña lugar en Pontevedra a primeira das catro “Ecoexperiencias do Craega”, unha nova iniciativa do Consello organizada por Slow Food Compostela,  que se levarán a cabo nas catro provincias galegas co principal obxectivo de visibilizar produtores e elaboradores ecolóxicos da nosa comunidade que leven o selo do Consello Regulador.

Este novo proxecto consiste en catro rutas a través das cales un grupo de influencers gastronómicos visitarán diversos lugares para dar a coñecer dende as súas diferentes plataformas dixitais a produción ecolóxica da zona.

Neste primeiro encontro xuntáronse un total de 11 blogueiros e blogueiras galegos, nacionais e internacionais: Alvientooo, Petiscos Galegos, Rogelio Santos Queiruga, Amar Viajar e Petiscar, Vanesa Bustos, Gastroactivity, Blondie Muser e ElMundook.com, ademais da deportista galega Belén Toimil, recentemente chegada dos Xogos Olímpicos de Toquio.

Con esta nova iniciativa o Craega pretende amosar de primeira man a singularidade destes produtores en ecolóxico e ensinar cal é a diferenza que marca a súa calidade final.

 

 

PONTEVEDRA, ECOLÓXICA POR TERRA E POR MAR

O sábado 11 de setembro o grupo partiu desde Compostela rumbo a Vilanova de Arousa, onde realizou a primeira parada nunha produción moi especial: unha batea de mexillóns ecolóxicos nun catamarán dende onde puideron ver como é o traballo desta cría de molusco e aprender que ten de especial con respecto ao convencional. Nesta primeira visita colaborou Dime Salnés.

A seguinte parada foi a conserveira Pan do Mar

Dentro do catálogo de provedores cos que traballan, contan con pesca sostible, mexillón certificado da DOP Mexillón de Galicia pero, sobre todo, con verduras, aceites e escabeches ecolóxicos, que achegan coherencia e calidade ao produto final que chega ao consumidor.

Tras estas visitas, este mesmo día puideron degustar un menú de produtos eco no restaurante da Quinta de San Amaro.

 

Xa pola tarde desprazáronse ata a explotación gandeira de Isidro Peleteiro en Pedre (Cerdedo):reses en extensivo, alimentadas exclusivamente con pastos, en gran medida grazas a traballar cunha raza autóctona galega, a frieiresa, que está adaptada ao hábitat e permite a súa cría en liberdade todo o ano.

Despois puxeron rumbo cara á Estrada, onde os esperaba Javier Agrelo de Biofruit Galicia, explotación que apostou polo arando ecolóxico, unha froita cunha demanda cada vez maior no mercado galego. 

Alí tamén se sitúa Kiwi Atlántico, empresa que conta actualmente con máis de setenta socios e vinte produtores colaboradores, o que a fai a maior produtora de kiwi de España e unha  das máis importantes de Europa.

Os participantes nesta primeira ecoexperiencia fixeron noite en Torres de Moreda, a 4 km do centro urbano da Estrada, que posúe unha leira dunha extensión de 25.000 m2, a súa maioría dedicada á plantación de maceiras para produción de sidra ecolóxica.

O domingo visitaron a plantación de maceiras autóctonas de Callobre con cuxo produto se elabora a espirituosa sidra ecolóxica Rabiosa, e logo foron ata Silleda para coñecer a María José Tallón, impulsora de Trasdeza Natur, e ao seu marido Rosendo Estévez.

 

Esta horta está situada nunha zona con gran diversidade ecolóxica, que permite unha produción autóctona ao longo do ano. Ademais, transforman algúns deses produtos frescos para darlles máis permanencia no tempo a modo de aperitivos deshidratados, conservas e especias.

Esta primeira ruta pola provincia de Pontevedra puxo punto e final no Restaurante A Moa onde degustaron, do mesmo xeito que na Quinta de San Amaro, máis produto certificado en ecolóxico polo Craega. O prato estrela nesta ocasión foi a costela de tenreira galega ecolóxica.

A seguinte ecoexperiencia terá lugar na provincia da Coruña a fin de semana do 25 e 26 de setembro e prevese a presenza dun grupo de 9 blogueiros que coñecerán de preto a produción ecolóxica e visibilizarán o labor dos nosos operadores nesa provincia.

Fotos: Alvientooo

*Texto adaptado da folla de ruta realizada por Slowfood Compostela para Ecoexperiencias do Craega.

 

 

Chantada acolle un curso sobre a nova normativa ecolóxica de produción en porcino

O Consello Regulador da Agricultura Ecolóxica de Galicia (Craega) e a Axencia Galega da Calidade Alimentaria (Agacal) organizan un novo curso sobre o novo Regulamento de produción ecolóxica (UE) 2018/848, aplicable a partir de xaneiro de 2022.  Nesta ocasión celebrarase na Aula Cemit de Chantada (Lugo) o día 7 de outubro.

Coma o resto dos cursos previstos, terá lugar en xornada única, cun total de 7 horas de duración, con contido teórico en sesión de mañá (10:00-14:00 horas) e contido práctico en sesión de tarde (15:30-18:30 horas), con visita a unha explotación.

Lembrade que estas actividades son totalmente gratuítas e están abertas a calquera persoa interesada.  Tedes toda a información e inscricións en Agronovo.

Información sobre outros cursos

 

Curso de comercialización de mazá ecolóxica na Estrada

A Consellería do Medio Rural, a través da Agacal, en colaboración co Craega, organiza un novo curso de produción ecolóxica. Desta volta a formación está dedicada á comercialización de mazá ecolóxica, que terá lugar o 28 de setembro no Museo do Moble da Estrada (MOME) da Estrada (Pontevedra)

Coma no resto dos cursos, a xornada estenderase todo o día: pola mañá, a partir das 9:00 horas, trataranse temas como a situación do mercado da mazá ecolóxica, o novo regulamento e a comunicación ambiental de produtos ecolóxicos; a sesión matutina finalizará cun coloquio para todos os asistentes.  Pola tarde, a partir das 16:00 horas, levarase a cabo unha visita práctica.

As solicitudes poden enviarse a clientes@sinerxia.es.

O Craega colabora co IV Acuatlón do Concello de Poio

Nestes días celebrouse a presentación do Campionato Xunta de Galicia (absoluto, junior, sub23 e veterano) que se enmarca no IV Acuatlón do Concello de Poio. A cita deportiva levarase a cabo este sábado, 11 de setembro, e contará con numerosos atletas de alto nivel.

Na presentación estiveron o alcalde de Poio, Luciano Sobral, a concelleira Marga Caldas, o representante do Club Triatlón Poio, Faustino Meis, e Enrique Hernández, como representante da Fegatri.

Se queres consultar toda a información relativa á proba, preme neste enlace

O Rosal celebra un taller sobre a comercialización de produtos de horta ecolóxica

A Consellería de Medio Rural, a través de Agacal, en colaboración co Craega, organiza un novo curso de produción ecolóxica, nesta ocasión centrado na comercialización de produtos de horta ecolóxica, que terá lugar o 7 de outubro no Espazo de autoarranxo no Concello do Rosal.

A xornada estenderase todo o día: pola mañá, a partir das 9:00 horas, trataranse temas como a situación do mercado do produto de horta ecolóxica, o novo regulamento e a comunicación ambiental de produtos ecolóxicos; a sesión matutina finalizará cun coloquio para todos os asistentes.  Pola tarde, a partir das 16:00 horas, levarase a cabo unha visita práctica.

As solicitudes poden enviarse a clientes@sinerxia.es.

Organic Food Iberia contará con preto de 300 expositores

Un dos eventos máis grandes da Península Ibérica para profesionais do sector ecolóxico, Organic Food Iberia e Eco Living Iberica, celebran a súa segunda edición os días 8 e 9 de setembro no pavillón 8 do Ifema Madrid.

A convocatoria presencial contará coa participación de case 300 expositores que presentarán os mellores produtos ecolóxicos, sostibles e innovadores de viños, bebidas, beleza, téxtil… Entre eles, atópase o noso operador Algamar. Ademais, haberá un amplo programa de seminarios con relatores de primeiro nivel e outras actividades.

Organic Food Iberia e Eco Living Iberia permiten ofrecer aos participantes unha plataforma de impulso e expansión internacional co programa de Compradores VIP e Hosted Buyer Program, deseñados exclusivamente para involucrar á compradores clave máis importantes do sector ecolóxico a nivel nacional e internacional.

A feira acolle a Zona de Innovación que presenta os produtos máis novos e innovadores dos expositores lanzados nos últimos dous anos. Neste ámbito, visitantes e compradores invitados votarán, de entre os presentados, aos gañadores entre 10 categorías distintas, que serán anunciados posteriormente nos Premios ‘Organic Iberia’, evento que se celebrará o día 8 ás 19.30h. en Ifema de Madrid.

Máis información